Fer atansyon ‘Lavwa bann Etranze’

“Zot pa pou swiv en etranze, okontrer zot pou tay lwen avek li, akoz zot pa konn son lavwa.”—ZAN 10:5.

1, 2. (a) Ki mannyer Mari ti reazir kan Zezi ti apel li par son non, e ki pwen Zezi ti’n deza koz lo la ki sa levennman i fer resorti? (b) Kwa ki ed nou reste pros avek Zezi?

ZEZI ki ti’n resisite ti pe obzerv sa madanm ki ti pe debout obor son tonbo vid. I ti konn byen sa madanm. I apel Mari Madlenn. Apepre de zan pase, i ti’n tir demon avek sa madanm. Depi sa, i ti’n akonpanny Zezi ek son bann zapot e pran swen avek zot toulezour. (Lik 8:1-3) Me ozordi, Mari ti pe plere asodlarm akoz i ti’n vwar Zezi mor e la son lekor ti’n menm disparet! Alor Zezi ti demann li: “Fanm akoz ou pe plere? Lekel ki ou pe rode?” Mari ti krwar ki zardinyen ki ti pe koz avek li. I ti reponn: “Msye, si ou ki’n pran li, dir mwan kote ou’n met li e mon ava al repran li.” Apre Zezi ti dir: “Mari!” Deswit, i ti rekonnet Zezi par lafason ki i ti koz avek li. I ti kriye avek lazwa: “‘Rabouni!’ (savedir Met).” Apre, i ti apros li.—Zan 20:11-18.

² Sa resi i montre dan en fason tousan sa ki Zezi ti’n deza dir avan sa. I ti konpar li avek en berze e son bann disip avek bann mouton. Apre, i ti dir ki sa berze i kriy son bann mouton par zot non e zot konn son lavwa. (Zan 10:3, 4, 14, 27, 28) Anfet, zis parey en mouton i rekonnet son berze, Mari osi ti rekonnet son berze, Kris. Sa i osi leka pour bann disip Zezi ozordi. (Zan 10:16) Zis parey zorey en mouton ki detekte byen bann son, i ed li reste pros avek son berze, nou osi nou disernman spirityel i ed nou swiv lepa nou Bon Berze, Zezi Kri.—Zan 13:15; 1 Zan 2:6; 5:20.

3. Ki serten kestyon sa parabol bon berze i fer vin dan lespri?

³ De lot kote, dapre sa menm parabol, sa abilite ki en mouton i annan pour rekonnet lavwa imen i ed li pour pa zis konn son zanmi me osi son lennmi. Sa i vreman enportan parski nou annan bann lennmi ki byen rize. Lekel zot? Ki mannyer zot azir? Ki mannyer nou kapab protez nou lekor? Pour konn larepons, annou vwar sa ki Zezi ti dir ankor dan son parabol bon berze.

‘I pa antre par Laport’

4. Dapre sa parabol bon berze, ki bann mouton i swiv, e ki zot pa swiv?

⁴ Zezi i dir: “Sa zonm ki antre par laport, limenm li berze sa bann mouton. Gardyen i ouver laport pour li e bann mouton i ekout son lavwa; i apel son bann mouton sakenn par son non, e anmenn zot deor. Kan i’n fini fer zot sorti i mars, devan e bann mouton i swiv li, akoz zot konn son lavwa. Zot pa pou swiv en etranze, okontrer zot pou tay lwen avek li, akoz zot pa konn son lavwa.” (Zan 10:2-5) Remarke ki Zezi i servi sa mo “lavwa” trwa fwa. I koz lo lavwa en berze de fwa, me trwazyenm fwa, i refer avek ‘lavwa en etranze.’ Ki kalite etranze Zezi pe refer avek?

5. Akoz nou pa byen resevwar sa kalite etranze ki Zan sapit 10 i koz lo la?

⁵ Zezi pa pe koz lo sa kalite etranze ki nou ti pou kontan resevwar se nou, ki son mo orizinal i vedir “lanmour pour bann etranze.” (Ebre 13:2) Dan parabol Zezi, sa etranze pa en dimoun ki’n ganny envite. I ‘pa antre  dan berkay mouton par laport, me i pas par en lot landrwa.’ I “en voler e en bandi.” (Zan 10:1) Dapre Parol Bondye lekel ki ti vin sa premye voler e bandi? Satan. Nou vwar laprev dan liv Zenez.

Premye Fwa ki Lavwa en Etranze ti ganny tande

6, 7. Akoz i apropriye ki Satan i ganny apele en etranze ek en voler?

⁶ Zenez 3:1-5 i dekrir konman lavwa en etranze ti ganny tande pour premye fwa lo later. Sa resi i rakonte ki Satan ti apros sa premye madanm, Ev, par servi en serpan pour koz avek li dan en fason pour anbet li. I vre ki dan sa resi Satan pa ganny apele en “etranze.” Toudmenm, dan plizyer fason, son aksyon i montre ki i ti parey sa etranze ki Zezi ti dekrir dan son parabol dan Zan sapit 10. Annou vwar detrwa fason ki i parey.

⁷ Zezi i dir ki sa etranze i apros son bann viktim dan berkay, dan en fason endirek. Pareyman, Satan ti apros son viktim dan en fason endirek, par servi en serpan. Sa kalite lapros rize i montre ki Satan i vreman ete—en gran triser. Deplis, sa etranze dan berkay i annan lentansyon vol sa bann mouton ki pa pour li. An realite, i pli pir ki en voler, parski son bi se pour “touye e detri” osi. (Zan 10:10) Pareyman, Satan ti en voler. Kan i ti anbet Ev, i ti vol son fidelite avek Bondye. Deplis, Satan ti osi anmenn lanmor lo imen. Alors, i en kriminel.

8. Ki mannyer Satan ti devir parol ek motivasyon Zeova?

⁸ Malonnekte Satan ti osi evidan dan lafason ki i ti devir parol Zeova ek son motivasyon. I ti demann Ev: “Eski i vre ki Bondye in dir zot pa manz fri dan tou pye dibwa sa zarden?” Satan ti fer krwar i ti sirprann pour aprann sa, konmsi i ti pe dir: ‘Ki mannyer Bondye i kapab pa rezonnab koumsa?’ I ti azoute: “Bondye i konnen, ki sa zour menm ki zot pou manz li, zot lizye pou sirman ouver.” Get byen ki i dir: “Bondye i konnen.” Konmsi Satan ti pe dir: ‘Sa ki Bondye i konnen, mwan osi mon konnen. Mon konn son bann motivasyon, e zot move.’ (Zenez 2:16, 17; 3:1, 5) Malerezman, Adan ek Ev pa ti rezet lavwa sa etranze. Okontrer, zot ti ekout li e anmenn maler lo zot menm ek zot desandans.—Romen 5:12, 14.

9. Akoz nou ekspekte tann lavwa bann etranze ozordi?

⁹ Satan i servi bann menm metod pour anbet pep Bondye ozordi. (Revelasyon 12:9) I “papa tou mansonz,” e bann ki esey anbet serviter Bondye parey li, i son bann zanfan. (Zan 8:44) Annou vwar serten fason ki nou tann lavwa bann etranze.

Ki mannyer nou tann Lavwa bann Etranze ozordi

10. Nonm en fason ki nou tann lavwa bann etranze.

¹⁰ Bann rezonnman ki kapab anbet nou. Zapot Pol i dir: “Pa les zot ganny antrennen par tou sort lansennyman drol.” (Ebre 13:9) Ki kalite lansennyman? Vi ki sa kalite lansennyman i kapab ‘antrenn nou,’ i kler ki Pol pe refer avek bann lansennyman ki afebli nou spirityelman. Lekel ki pe propaz sa bann lansennyman? Pol ti dir serten ansyen: “Parmi zot pou annan dimoun ki pou leve pour ansenny bann mansonz pour fer bann krwayan swiv zot.” (Akt 20:30) Anfet, parey dan letan Pol, ozordi serten ki ti form parti kongregasyon Kretyen pe aprezan sey anbet bann mouton par servi “bann mansonz”—bann keksoz ki zis lanmwatye ki vre oubyen ki konpletman fo. Parey zapot Pyer i dir, zot servi “fo zistwar”—bann parol ki  paret vre me ki an realite pa vo nanryen zis parey bann fo biye.—2 Pyer 2:3.

11. Ki mannyer sa parol dan 2 Pyer 2:1, 3 i devwal metod ek lobzektif bann aposta?

¹¹ Pyer i kontinyen devwal metod bann aposta par dir ki “sekretman zot pou anmenn bann lansennyman mansonz e destrikter.” (2 Pyer 2:1, 3) Zis parey sa voler dan parabol Zezi pa antre ‘par laport, me i pas par en lot landrwa,’ sa bann aposta osi i apros nou ansousekre. (Galat 2:4; Zid 4) Ki zot lobzektif? Pyer i azoute: “Sa bann dimoun pou eksplwat zot.” Anfet, nenport kwa ki bann aposta i kapab dir pour sey zistifye zot lekor, zot vre lobzektif se pour “vole, touye e detri.” (Zan 10:10) Fer atansyon sa bann etranze!

12. (a) Ki mannyer nou frekantasyon i kapab ekspoz nou avek lavwa bann etranze? (b) Konman taktik Satan ek taktik sa bann etranze ozordi i parey?

¹² Bann move frekantasyon. Nou kapab tann lavwa bann etranze atraver bann dimoun ki nou frekante. Move frekantasyon i en danze sirtou pour bann zenn. (1 Korentyen 15:33) Pa bliye ki Satan ti target Ev, ki ti pli zenn e annan mwens leksperyans ki Adan. I ti konvenk li ki Zeova ti pe tro priv li son laliberte, kan an realite sa ti tou lekontrer. Zeova ti kontan imen ki li menm i ti’n kree e i ti enterese avek zot byennet. (Izai 48:17) Pareyman, ozordi bann etranze i oule sey fer ou zenn krwar ki ou paran i tro priv ou. Ki lefe sa bann etranze i kapab fer lo ou? En zenn fiy Kretyen i admet: “Pour en pe letan mon lafwa ti’n afeblir a en serten degre akoz mon bann kanmarad dan laklas. Toultan zot ti pe dir mwan ki mon larelizyon i strik e pa rezonnab.” Me an realite ou paran i kontan ou. Alors, kan ou bann kanmarad lekol i sey fer ou annan dout lo ou paran, pa les zot anbet ou parey Ev ti ganny anbete.

13. Ki bon desizyon David ti pran, e ki mannyer nou kapab imit li?

¹³ Konsernan bann move frekantasyon, psalmis David i dir: “Mon pa’n asiz avek bann manter; e mon pa frekant bann ki kasyet sa ki zot ete.” (Psonm 26:4) Eski ou remark ankor sa tre ki tipik dan bann etranze? Zot kasyet sa ki zot ete, zis parey Satan ti kasyet son lidantite par servi en serpan. Ozordi, i annan serten dimoun imoral ki kasyet zot lidantite e zot vre lentansyon par servi Internet. Serten adilt visye i kapab prezant zot lekor konman en zenn dan kwen koze lo Internet pour fer ou tonm dan zot latrap. Bann zenn, silvouple, fer byen atansyon pangar zot a ganny afekte spirityelman.—Psonm 119:101; Proverb 22:3.

14. Ki mannyer parfwa medya i pibliy lavwa bann etranze?

¹⁴ Fo lakizasyon. Kantmenm pa tou rapor lo Temwen Zeova ki fo, parfwa medya i les zot ganny servi pour brodkas lavwa bann etranze ki kont nou. Par egzanp, dan en pei ti annan en fo rapor ki bann Temwen ti siport rezim Hitler pandan Dezyenm Lager Mondyal. Dan en lot pei, ti annan en raportaz dan nouvel ki ti akiz bann Temwen konmkwa zot fer sabotaz dan bann legliz. Dan plizyer pei, medya i akiz bann Temwen pour refize donn tretman medikal zot zanfan e osi pour volonterman inyor pese grav ki zot konpanyon Kretyen in fer. (Matye 10:22) Kantmenm sa, bann dimoun senser ki konn nou personnelman i rekonnet ki sa bann lakizasyon i fo.

15. Akoz i pa saz pour krwar tou keksoz ki medya i prezante?

¹⁵ Ki nou devret fer si lezot i servi bann lakizasyon ki’n ganny propaze par lavwa bann etranze pour opoz nou? I ti a byen si nou pran aker sa konsey dan Proverb  14:15: “Sa ki napa leksperyans i met lafwa dan tou parol, me sa enn ki malen i egzamin son lepa.” I pa saz pour krwar tou keksoz ki medya i prezant konman bann fe reel. Menm si nou pa rezet tou lenformasyon ki sa lemonn i prezante, nou realize ki “lemonn antye i dan pouvwar dyab.” (Nou ki’n met an italik.)—1 Zan 5:19.

‘Teste bann ki pretann zot posed Lespri’

16. (a) Ki mannyer lafason ki en mouton i azir i montre ki parol Zezi dan Zan 10:4 i vre? (b) Ki Labib i ankouraz nou pour fer?

¹⁶ Me ki mannyer nou pou konnen si en dimoun i en zanmi oubyen en lennmi? Zezi ti dir ki mouton i swiv zot berze “akoz zot konn son lavwa.” (Zan 10:4) Se pa laparans fizik sa berze ki fer bann mouton swiv li; se son lavwa. En liv lo bann pei biblik i rakonte ki en fwa en viziter ti dir ki mouton i rekonnet zot berze par son lenz, pa par son lavwa. Me en berze ti reponn ki se lavwa ki zot rekonnet. Pour prouv sa, i ti sanz lenz avek sa etranze. Apre sa, sa etranze ki ti’n abiye dan lenz sa berze ti kriy sa bann mouton, me zot pa ti al kot li. Zot pa ti konn son lavwa. Me osito ki sa berze ti kriy zot, menm si i pa ti’n abiy konman en berze, zot ti tay kot li. Alors, en dimoun i kapab parey en berze, me pour bann mouton, sa pa prouve ki i vreman en berze. Anfet, sa mouton i teste lavwa sa dimoun ki pe kriy li e konpar li avek lavwa son berze. Parol Bondye i demann nou pour fer parey, pour “teste zot pour verifye si lespri ki zot posede i sorti kot Bondye.” (1 Zan 4:1; 2 Timote 1:13) Kwa ki pou ed nou fer sa?

17. (a) Ki mannyer nou vin familye avek lavwa Zeova? (b) Ki konnesans lo Zeova i ed nou pour fer?

¹⁷ Byensir, pli nou konn lavwa Zeova, oubyen son mesaz, pli nou pou kapab detekte lavwa en etranze pli byen. Labib i montre konman nou kapab aprofondi sa konnesans. I dir: “Zot zorey pou tann en parol deryer zot dir: ‘La sa semen. Mars lo la.’ ” (Izai 30:21) Sa “parol” deryer nou i sorti dan Parol Bondye. Sak fwa nou lir Parol Bondye, konmsi nou pe tann lavwa nou Gran Berze, Zeova. (Psonm 23:1) Alors, pli nou etidye Labib, pli nou vin familye avek lavwa Bondye. An retour, ler nou konn Zeova personnelman sa pou ed nou detekte lavwa bann etranze deswit.—Galat 1:8.

18. (a) Ki konn lavwa Zeova i enplike? (b) Dapre Matye 17:5, akoz nou devret obeir lavwa Zezi?

¹⁸ Konn lavwa Zeova i enplik kwa ankor? Apard ki ekoute, i enplik obeir. Get ankor sa ki Izai 30:21 i dir. Parol Bondye i dir: “La sa semen.” Wi, kan nou etidye Labib, nou tann bann lenstriksyon sorti kot Zeova. Apre sa, i demann nou pour fer en keksoz: “Mars lo la.” Zeova i anvi nou aplik sa ki nou tande. Alors, ler nou aplik sa ki nou aprann, nou montre ki nou pa’n zis tann lavwa Zeova me nou’n osi ekout li. (Deterononm 28:1) Obeir lavwa Zeova i osi vedir obeir lavwa Zezi, parski Zeova menm ki’n demann nou pour fer sa. (Matye 17:5) Ki Zezi, sa Bon Berze, i demann nou pour fer? I ansenny nou pour fer disip e pour met konfyans dan ‘lesklav fidel e pridan.’ (Matye 24:45; 28:18-20) Obeir son lavwa i vedir lavi eternel pour nou.—Akt 3:23.

 “Zot pou tay lwen avek li”

19. Ki mannyer nou devret reazir anver lavwa bann etranze?

¹⁹ Alors, ki mannyer nou devret reazir anver lavwa bann etranze? Parey bann mouton i fer. Zezi i dir: “Zot pa pou swiv en etranze, okontrer zot pou tay lwen avek li.” (Zan 10:5) Nou annan de keksoz pour fer. Premyerman, nou “pa pou swiv en etranze.” Wi, nou rezet en etranze avek bokou determinasyon. Anfet, dan sa langaz Grek ki Labib ti orizinalman ekrir, i ti servi en lekspresyon pli for pour dekrir fason pour rezet en keksoz. (Matye 24:35; Ebre 13:5) Dezyenmman, nou pou “tay lwen avek li,” oubyen nou pou rezet li. Sa i sel fason apropriye pour fer anver bann ki zot lansennyman pa an armoni avek lavwa sa Bon Berze.

20. Ki mannyer nou pou reazir kan nou ganny reprose avek (a) bann aposta malonnet, (b) move frekantasyon, (c) bann fo rapor par medya?

²⁰ Alors, kan bann ki annan bann lide aposta avek zot i repros nou, nou pou fer sa ki Parol Bondye i dir: “Met zot byen lo zot gard avek sa bann ki senm divizyon ek dezord kontrerman avek lansennyman ki zot in gannyen. Evit bann tel dimoun.” (Nou ki’n met an italik; Romen 16:17; Tit 3:10) Pareyman, bann zenn Kretyen ki kapab tonm dan move frekantasyon i kapab aplik sa konsey ki Pol ti donn zenn Timote: “Gard ou lekor kont sa bann pasyon lazenes.” Deplis, kan medya i prezant bann fo lakizasyon kont nou, nou pou mazin sa lot konsey ki Pol ti donn Timote: ‘Zot [bann ki ekout lavwa bann etranze] pou prefer bann fab. Me ou, gard ou bon sans dan tou sirkonstans.’ (Nou ki’n met an italik, 2 Timote 2:22; 4:3-5) Kantmenm lavwa sa bann etranze i kapab pli dous, nou elwanny nou avek tou sa ki ti a kapab afebli nou lafwa.—Psonm 26:5; Proverb 7:5, 21; Revelasyon 18:2, 4.

21. Ki rekonpans pe esper bann ki rezet lavwa bann etranze?

²¹ Letan zot rezet lavwa bann etranze, bann Kretyen swazir i ekout parol sa Bon Berze ki trouve dan Lik 12:32. Zezi ti dir avek zot: “Pa bezwen per, pti troupo, akoz zot Papa i’n war bon pour donn zot son Rwayonm.” ‘Lezot mouton’ osi pe esper avek enpasyans pour tann Zezi pe dir: “Vini, zot ki mon Papa in beni! Vin erit Rwayonm ki’n ganny prepare pour zot depi kreasyon lemonn.” (Zan 10:16; Matye 25:34) Pa i annan en gran rekonpans ki pe esper nou, si zis nou rezet ‘lavwa bann etranze’!

Eski ou rapel?

• Dan ki fason Satan i koresponn byen avek deskripsyon sa etranze ki Zezi ti mansyonnen dan son parabol berze?

• Ki mannyer nou tann lavwa bann etranze ozordi?

• Ki mannyer nou kapab rekonnet lavwa bann etranze?

• Ki mannyer nou devret reazir anver lavwa bann etranze?

[Kestyon]

[Portre lo paz 32]

Ki mannyer nou reazir anver lavwa bann etranze?