Kwa ki fer en Dimoun ere?

ENN de lannen pase, dimoun Lafrans, Lalmanny, Langleter, ek Letazini ti ganny demande, “Kwa ki fer en dimoun ere?” Parmi bann ki ti ganny entervyou, 89 poursan ti dir en bon lasante; 79 poursan ti mansyonn en bon lavi maryaz; 62 poursan ti dir lazwa pour vin en paran; e 51 poursan ti panse ki en bon louvraz i neseser pour trouv boner. Menm si laplipar dimoun i toultan dir ki larzan pa anmenn boner, 47 poursan bann ki ti ganny kestyonnen ti konvenki ki larzan i anmenn boner. Me ki levidans i montre?

Premyerman, annou get sa relasyon ki swadizan egziste ant larzan ek boner. En serve ki ti ganny fer lo sa san dimoun pli ris dan Letazini ti montre ki zot pa pli ere ki lezot dimoun an zeneral. Deplis, dapre bann eksper dan lasante mantal, menm si bokou dimoun dan Letazini in preski double zot bann posesyon materyel dan sa trant dernyen lannen, zot pa pli ere ki zot ti ete avan. Annefe, en rapor i dir: “Pandan sa menm peryod letan, lakantite ka depresyon in ogmante. Bann zenn ki swiside in vin trwa fwa plis. Lakantite ka divors in double.” Dan 50 diferan pei, bann serser ki’n etidye sa relasyon ant larzan ek boner in konklir ki larzan pa kapab aste boner.

Apre, ki lenportans en bon lasante, en lavi maryaz satisfezan, ek en bon karyer i annan pour trouv boner? Bon, si sa bann keksoz ti vreman neseser pour fer en dimoun ere, ki nou pou dir lo sa plizyer milyon dimoun ki napa en bon lasante e tou bann ki napa en lavi maryaz satisfezan? Ki nou pou dir lo bann koup marye ki napa zanfan e tou sa zonm ek fanm ki napa en bon louvraz? Eski tou sa bann dimoun i bezwen alor viv en lavi mizerab? Eski sa swadizan boner ki bann ki deza annan en bon lasante ek en lavi maryaz satisfezan pou fini si zot sitiasyon i sanze?

Eski nou pe rod dan sa bon Landrwa?

Tou dimoun i anvi viv en lavi ere. Sa pa sirprann nou akoz nou Kreater i ganny dekrir konman en “Bondye ere,” e nou’n ganny fer dan son resanblans. (1 Timote 1:11, NW; Zenez 1:26, 27) Alors, i normal pour bann imen rod boner dan lavi. Me bokou dimoun  in remarke ki i pa fasil pour reste ere. I konmsi ou pe esey tyonbo en ponnyen disab dan ou lanmen. I glise fasilman.

Me eski i kapab ki serten dimoun pe esey fer tro bokou zefor pour trouv boner? Eric Hoffer, ki en filozof i krwar sa. I ti fer sa remark: “Rod boner i en lakoz prensipal pour dimoun pa ere.” Sa i sirman vre si nou rod boner kot i pa ganny trouve. Dan sa ka, definitivman nou pou dezapwente e fristre. Par esey vin ris; fer zefor pour vin popiler ouswa ganny rekonnet; pourswiv bann lobzektif politik, sosyal, ouswa ekonomik; oubyen enterese avek zis nou prop lekor, e satisfer nou prop dezir toudswit, tousala pa anmenn boner. I pa sirprenan alor ki serten dimoun in adopte sa pwennvi ki en loter ti eksprimen: “Si zis nou ti’n aret esey rod boner nou ti pou’n kapab viv ere”!

I enteresan note ki sa serve ki’n ganny mansyonnen okonmansman sa lartik i osi montre ki 4 dan 10 dimoun ti santi ki fer dibyen e ed lezot i anmenn boner. Osi, 1 dan tou le 4 ti fer resorti ki lafwa ek krwayans relizye i zwe en rol enportan pour en dimoun ere. I kler ki nou bezwen egzamin pli pre kwa ki fer en dimoun vreman ere. Lartik swivan pou ed nou fer sa.

[Portre lo paz 3]

Bokou dimoun i panse larzan, en bon lavi fanmiy, ouswa en bon louvraz ki vreman fer zot ere. Eski ou dakor avek sa?