Sa ki vreman fer en Dimoun ere

ZEOVA ki en Bondye ere e Zezi Kri ki osi ere, i konn pli byen ki tou lezot kwa ki fer en dimoun ere. (1 Timote 1:11; 6:15) Alors, i pa sirprenan ki lakle pour boner i trouve dan Parol Bondye, Labib.—Revelasyon 1:3; 22:7.

Dan son fame Sermon lo montanny, Zezi ti dekrir sa ki fer en dimoun ere. I ti dir: “Byennere bann” ki (1) konsyan zot bezwen spirityel, (2) dan latristes, (3) dous, (4) lafen e swaf lazistis, (5) pran pitye pour lezot, (6) annan leker pir, (7) fer lape, (8) ganny persekite pour lazistis, e (9) ganny ensilte e persekite akoz li.—Matye 5:3-11. *

Eski sa ki Zezi ti dir i vre?

Pa fodre fer bokou leksplikasyon pour montre sa ki Zezi ti dir i vre. Lekel ki pou refize admet ki en dimoun dous, ki pran pitye pour lezot, e ki fer lape ki ganny motive par en leker pir i pli ere ki en dimoun ki ankoler, agresif, ki pa pran pitye pour lezot?

Me nou kapab demande, ki mannyer dimoun  ki lafen e swaf lazistis oubyen ki dan latristes i kapab ere. Sa bann dimoun i annan en pwennvi rezonnab lo kondisyon sa lemonn. Zot ‘sagrinen e plennyen akoz bann move keksoz ki pe arive’ dan nou letan. (Ezekyel 9:4) Sa dan li menm pa fer zot ere. Me ler zot aprann ki plan Bondye pou anmenn bann bon kondisyon lo later e lazistis pour bann ki pe ganny kraze, zot annan tou rezon pour zwaye.—Izai 11:4.

Lanmour pour sa ki drwat i osi fer bann dimoun sagren ler zot pa kapab fer sa ki byen. Zot alors konsyan zot bezwen spirityel. Sa bann dimoun i pare pour rod gidans Bondye akoz zot realize ki zis li tousel ki kapab ed dimoun pour sirmont zot febles.—Proverb 16:3, 9; 20:24.

Bann dimoun ki dan latristes, lafen e swaf lazistis, e ki konsyan zot bezwen spirityel i konpran lenportans pour annan en bon relasyon avek zot Kreater. En bon relasyon avek imen i anmenn boner, me en bon relasyon avek Bondye i anmenn plis boner. Wi, bann ki vreman kontan sa ki drwat, ki pare pour aksepte gidans Bondye, i kapab viv en lavi ere.

Parkont, ou kapab vwar li difisil pour krwar ki en dimoun ki ganny ensilte e persekite i kapab ere. Me i bezwen vre, vi ki Zezi li menm ki ti dir sa parol. Alors, ki mannyer nou devret konpran son parol?

Persekite me ere —Ki mannyer sa i posib?

Remarke ki Zezi pa ti dir ki lensilt ek persekisyon dan li menm i anmenn boner. I ti dir: “Byennere bann ki ganny persekite pour lazistis, . . . kan en dimoun i ensilte zot, persekit zot, . . . akoz zot mon disip.” (Matye 5:10, 11) Alors en dimoun i ere si selman i ganny ensilte akoz i en disip Kris e akoz i viv son lavi dapre bann prensip drwat ki Zezi ti ansennyen.

Sa i ganny demontre par sa ki ti arive avek bann premye Kretyen. Bann manm lakour siprenm Zwif, ti “fer bat zot [bann zapot], e donn zot lord pour pa koz ankor lo Zezi. Apre sa zot ti les zot ale.” Konman sa bann zapot ti reazir? “Bann zapot ti kit lasal konsey, byen kontan, ki zot ti’n ganny konsidere diny pour ganny maltrete pour sa Non Senyer. Toulezour zot ti kontinyen prese dan Tanp ek dan bann lakaz e anons Zezi konman Mesi.”(Nou ki’n met an italik.)—Akt 5:40-42; 13:50-52.

Zapot Pyer ti donn plis leklersisman lo sa relasyon ki egziste ant lensilt ek boner. I ti ekrir: “Si zot ganny maltrete pour non Kris, zot ere, parski Lespri laglwar, Lespri Bondye i repoz lo zot.” (1 Pyer 4:14) Wi, soufer konman en Kretyen akoz nou fer sa ki drwat, menm si sa soufrans pa gou, i anmenn boner akoz nou konnen ki en dimoun i resevwar lespri sen Bondye. Ki mannyer lespri sen Bondye i relye avek boner?

Aktivite Natir Imen ouswa Fri Lespri?

Lespri sen Bondye i avek sa bann ki obeir Bondye konman dirizan. (Akt 5:32) Zeova pa donn son lespri sen bann ki pratik “bann aktivite natir imen.” Sa bann aktivite i “aksyon imoral, lenpirte, vis, ladorasyon zidol, siperstisyon, laenn, diskord, zalouzi, lakoler, egois, divizyon an diferan parti opoze, groker, soulezon, parti bwar, ek lezot bann tel aksyon ankor.” (Galat 5:19-21) I vre, “bann aktivite natir imen” i tre komen dan sa lemonn ozordi. Me bann ki pratik zot napa en vre boner dirab. Okontrer, ler en dimoun i fer sa bann keksoz i gat son relasyon avek son fanmiy, zanmi, ek lezot dimoun ki i konnen. Deplis, Parol Bondye i dir ki bann ki “pratik sa bann keksoz koumsa pa pou erit Rwayonm Bondye.”

 Parkont, Bondye i donn son lespri sen avek bann ki devlop “fri Lespri.” Sa bann kalite ki form sa fri i “lanmour, lazwa, lape, pasyans, labonte, fidelite, ladouser, kontrol lo son prop lekor.” (Galat 5:22, 23) Ler nou demontre sa bann kalite, nou kree bann kondisyon pour annan bann bon relasyon avek lezot e avek Bondye, ki anmenn vre boner. (Vwar bwat.) Pli enportan, ler nou demontre lanmour, labonte, ek lezot kalite ki sorti kot Bondye, nou fer plezir Zeova e nou annan sa lesperans pour viv pour touzour dan nouvo lemonn Bondye kot pou annan lazistis.

Boner i en Swa

Ler Wolfgang ek Brigitte, en koup ki viv Lalmanny, ti konmans etidye Labib seryezman, zot ti annan bokou keksoz materyel ki laplipar dimoun i santi i neseser pour en dimoun ere. Zot ti zenn e an bonn sante. Zot ti met bann lenz ser, reste dan en zoli lakaz meble, e zot ti annan en biznes ki ti pe fer byen. Zot ti pas laplipar zot letan pour rod plis keksoz materyel, me sa pa ti donn zot vre boner. Me avek letan, Wolfgang ek Brigitte ti fer en swa tre enportan. Zot ti konmans dedye plis letan ek zefor pour rod bann keksoz spirityel e rod fason pour apros pli pre avek Zeova. Pa bokou letan apre, zot swa ti fer zot sanz zot latitid, ki an retour ti pous zot pour senplifye zot lavi e pour servi konman pionye, parey nou apel bann evanzelizater aplentan. Ozordi, zot servi konman volonter dan biro brans Temwen Zeova Lalmanny. Deplis, zot pe aprann en langaz ki ganny servi dan bann pei Lazi pour ed bann etranze aprann laverite dan Parol Bondye, Labib.

Eski sa koup in trouv vre boner? Wolfgang i dir: “Depi ki nou’n enterese pour rod bann keksoz spirityel, nou’n vin pli ere e nou’n ganny plis satisfaksyon. Servi Zeova avek tou nou leker in osi fer nou maryaz vin pli solid. Nou ti annan en bon lavi maryaz avan, me nou ti annan bann lobligasyon ek lentere ki ti redi nou tou le  de dan diferan direksyon. Aprezan nou pe pourswiv menm lobzektif ansanm.”

Kwa ki fer en Dimoun ere?

An bref: Evit “bann aktivite natir imen,” e devlop “fri Lespri [Bondye].” Pour en dimoun ere, i bezwen anvi annan en relasyon pros avek Bondye. En dimoun ki fer zefor pour fer sa pou parey sa ki Zezi ti dir lo en dimoun ere.

Alors, pa dir ki ou pa pou kapab trouv boner. I vre ki konmela ou kapab napa en bon lasante oubyen ou menm kapab pe rankontre problenm dan ou maryaz. Petet i pa posib pour ou fer zanfan, ouswa ou pe fer tou sa ki ou kapab pour trouv en bon travay. I kapab ki ou nepli annan sa menm kantite larzan parey avan. Me pran kouraz; napa rezon pour ou dezespere! Rwayonm Bondye pou rezourd sa bann problenm ek bokou lezot ankor. Sirman, byento Zeova Bondye pou akonpli son parol ki en psalmis ti dir: “Ou pou lerwa pour touzour . . . Ou pe ouver ou lanmen e satisfer dezir tou kreatir vivan.” (Psonm 145:13, 16) Parey plizyer milyon serviter Zeova partou dan lemonn i kapab konfirmen, gard antet sa promes rekonfortan i kontribye en kantite pour fer ou ere ozordi.—Revelasyon 21:3.

[Not anba lo paz]

[Bwat/Portre lo paz 6]

Bann Keksoz ki kontribye pour fer en Dimoun ere

Lanmour i fer lezot demontre lanmour pour ou an retour.

Lazwa i donn ou lafors pour fer fas avek bann difikilte.

Lape i ed ou gard bann bon relasyon avek lezot.

Pasyans i ed ou pour reste zwaye menm ler ou pe rankontre leprev.

Labonte i atir lezot ver ou. I osi fer lezot kontan pour ede ler ou bezwen led.

Lafwa pou asir ou ki Bondye pou gid ou avek lanmour.

Ladouser pou donn ou en lekor, leker, ek lespri kalm.

Kontrol lo ou prop lekor i vedir ou pou fer pli pti gin fot.

[Portre lo paz 7]

Pour trouv boner, ou bezwen satisfer ou bezwen spirityel