Zeova i nou Labri dan Letan Ladetres
Zeova i nou Labri dan Letan Ladetres
‘Delivrans bann dimoun drwat i sorti kot Zeova. I zot labri dan letan ladetres.’—PSONM 37:39.
1, 2. (a) Ki Zezi ti demande pour son bann disip dan son lapriyer? (b) Ki Bondye i anvi pour son pep?
ZEOVA i tou pwisan. I annan en pwisans pour protez son bann serviter fidel dan nenport fason i anvi. I menm kapab separ son pep fizikman avek larestan sa lemonn e met zot dan en lanvironnman kot zot pou anpe e an sekirite. Me konsernan son bann disip, Zezi ti priy avek son Papa dan lesyel: ‘Mon pa demann ou pour tir zot dan lemonn, me mon demann ou, pour prezerv zot kont sa enn ki mesan.’—Zan 17:15.
2 Zeova in deside pour pa ‘tir nou dan lemonn.’ Okontrer, i anvi nou reste ansanm avek tou dimoun dan lemonn pour anons son mesaz lespwar e rekonfor avek lezot. (Romen 10:13-15) Me parey Zezi ti endike dan son lapriyer, ler nou viv dan sa lemonn nou ganny ekspoze avek sa ‘enn mesan.’ Bann imen dezobeisan ek bann move lespri i anmenn bokou soufrans ek lapenn, e bann Kretyen pa ganny eparnyen.—1 Pyer 5:9.
3. Ki realite menm bann adorater fidel i bezwen fer fas avek, me ki rekonfor nou trouve dan Parol Bondye?
3 Ler nou rankontre bann leprev koumsa, i normal pour nou dekouraze pour en pe letan. (Proverb 24:10) Labib i koz lo plizyer adorater fidel ki ti pas dan bann moman vreman difisil. En psalmis i dir: “En dimoun drwat i rankontre bokou maler, me Zeova i delivre li dan tou sa bann maler.” (Psonm 34:19) Wi, bann move keksoz i kapab ariv menm avek “en dimoun drwat.” Parey psalmis David, parfwa nou kapab menm santi nou ‘angourdi e vreman epwize.’ (Psonm 38:8) Wi, i rekonfortan pour konnen ki “Zeova i pre avek sa bann ki annan leker brize; e i sov bann ki zot lespri i fatige.”—Psonm 34:18; 94:19.
4, 5. (a) An armoni avek Proverb 18:10, ki nou bezwen fer pour ganny proteksyon Bondye? (b) Nonm serten pa ki nou kapab pran pour ganny led Bondye.
4 An armoni avek lapriyer Zezi, Zeova pe vey lo nou. I nou ‘labri dan letan ladetres.’ (Psonm 37:39) Liv Proverb i servi en langaz parey kan i dir: “Non Zeova i en latour for. Bann dimoun drwat i tay ladan e zot ganny proteksyon.” (Proverb 18:10) Sa verse i devwal en laverite debaz konsernan lentere pour son bann kreatir. Bondye i protez sirtou bann dimoun drwat ki kontinyen rod li, konmsi nou pe tay kot en latour for pour rod proteksyon.
5 Kan nou rankontre bann gro problenm, ki mannyer nou kapab tay kot Zeova pour ganny proteze? Annou vwar trwa pa enportan ki nou kapab pran pour ganny led Zeova. Premyerman, nou bezwen tourn ver nou Papa dan lesyel atraver lapriyer. Dezyenmman, nou devret swiv gidans son lespri sen. Trwazyenmman, nou bezwen soumet avek laranzman Zeova par rod lasosyasyon nou bann frer ek ser Kretyen, ki kapab soulaz nou dan ladetres.
Pouvwar Lapriyer
6. Ki mannyer bann vre Kretyen i konsider lapriyer?
6 Serten eksper dan lasante i konsey dimoun pour fer lapriyer konman en tretman pour depresyon ek presyon. En moman refleksyon an silans parey ler ou pe priye, i kapab tir presyon, zis parey bann son lanatir, oubyen menm en bon masaz. Bann vre Kretyen pa fer lapriyer annan mwens valer par konsider li zis konman en terapi ki fer en dimoun santi li byen. Pour nou, lapriyer se koz avek Bondye avek en profon respe. Lapriyer i enplik nou devosyon avek Bondye ek nou konfyans dan li. Wi, lapriyer i form parti nou ladorasyon.
7. Ki savedir priy avek konfyans, e ki mannyer bann tel lapriyer i ed nou fer fas avek difikilte?
7 Nou lapriyer i devret ganny fer avek konfyans dan Zeova. Zapot Zan ti ekrir: “Sa se lasirans ki nou annan dan li: si nou demann keksoz dapre son lavolonte, i pou ekout nou.” (1 Zan 5:14) Anfet, Zeova, ki pli gran dan liniver, ki sa sel vre Bondye e ki tou pwisan, i donn en latansyon spesyal lapriyer senser son bann adorater. I rekonfortan zis pour konnen ki nou Bondye lanmour i tann nou kan nou dir li kwa ki trakas nou e osi nou problenm.—Filipyen 4:6.
8. Akoz bann Kretyen fidel pa devret zanmen santi zot kanmi oubyen onte pour apros Zeova dan lapriyer?
8 Bann Kretyen fidel pa devret zanmen santi zot kanmi, onte, oubyen napa ase lasirans kan zot pe apros Zeova dan lapriyer. I vre ki ler nou dezapwente avek nou menm oubyen nou pe rankontre bokou problenm, nou kapab pa touzour anvi apros Zeova dan lapriyer. Dan bann moman koumsa, nou bezwen mazinen ki Zeova i ‘pran pitye pour son bann serviter ki dan lapenn’ e i “konsol tou” sa ki dekouraze. (Izai 49:13; 2 Korentyen 7:6) Sirtou dan bann moman lapenn ek detres ki nou bezwen tourn ver nou Papa avek konfyans, parski se li ki donn nou lafors.
9. Ki lenportans annan lafwa kan nou apros Bondye dan lapriyer?
9 Pour benefisye plennman avek sa privilez pour priye, nou bezwen annan en lafwa senser. Labib i dir “sa ki apros kot Bondye i devre krwar ki i egziste e ki i rekonpans tou bann ki rod li.” (Ebre 11:6) Lafwa pa zis letan ou krwar ki Bondye “i egziste.” Pour annan en lafwa senser, nou bezwen konvenki ki Bondye i kapab e anvi rekonpans nou pour nou lobeisans anver li. “Lizye Senyer i fikse lo bann zis, e son zorey i ouver pour ekout zot lapriyer.” (1 Pyer 3:12) Ler nou toultan konsyan ki Zeova i vreman enterese avek nou, sa i donn nou lapriyer bokou plis sans.
10. Ki mannyer nou lapriyer i devret ete si nou anvi Zeova i soutenir nou spirityelman?
10 Zeova i ekout nou lapriyer ler nou priy avek tou nou leker. En psalmis ti ekrir: “Mon’n apel avek tou mon leker. Reponn mwan, O Zeova.” (Psonm 119:145) Kontrerman avek bann lapriyer resite ki bokou larelizyon i fer, nou lapriyer pa zis en routin, ki pa sorti ofon nou leker. Kan nou priy Zeova avek ‘tou nou leker,’ nou parol i annan plis sans ek bi. Apre ki nou’n priy avek senserite, nou konmans santi sa soulazman ki nou gannyen ler nou larg nou “fardo lo Zeova.” Parey Labib i promet, “li i pou soutenir” nou.—Psonm 55:22; 1 Pyer 5:6, 7.
Lespri Bondye i ed nou
11. Nonm en fason ki Bondye i reponn nou kan nou ‘kontinyen demann’ son led.
11 Zeova pa zis ekout lapriyer me i osi reponn lapriyer. (Psonm 65:2) David ti ekrir: “Zour mon dan ladetres mon pou apel ou, parski ou pou reponn mwan.” (Psonm 86:7) Zezi osi ti ankouraz son bann disip pour ‘kontinyen demann’ led Zeova akoz nou “Papa ki dan lesyel” pou “donn son Lespri Sen tou bann ki demann li.” (Lik 11:9-13) Wi, lafors aktif Bondye i ed oubyen rekonfort son pep.—Zan 14:16.
12. Ki mannyer lespri Bondye i kapab ed nou kan nou bann problenm i paret ensiportab?
12 Menm kan nou rankontre leprev, lespri Bondye i kapab donn nou “sa pisans ki napa son parey.” (2 Korentyen 4:7) Zapot Pol, ki ti pas dan plizyer sitiasyon difisil, ti dir avek konfyans: ‘Mon kapab fer fas avek tou par Bondye ki donn mwan lafors.’ (Filipyen 4:13) Pareyman, ozordi bokou Kretyen in reganny zot lafors spirityel e emosyonnel konman en larepons pour zot siplikasyon. Souvan apre ki nou’n resevwar led atraver lespri Bondye, nou bann problenm nepli parey nou ti vwar zot avan. Parski Bondye i donn nou lafors, nou kapab dir parey sa zapot: “Nou ganny pouse dan tou kote me san ganny kraze; nou enkyet me nou pa perdi lespwar; nou ganny persekite, me nou pa ganny abandonnen; nou ganny rabat, me nou pa ganny detri.”—2 Korentyen 4:8, 9.
13, 14. (a) Ki mannyer Zeova in montre ki i donn nou lafors atraver son Parol? (b) Ki mannyer aplik bann prensip Labib in ed ou personnelman?
13 Lespri sen in osi enspir e prezerv Parol Bondye pour nou prop byenfe. Ki mannyer Zeova in fortifye nou dan letan ladetres atraver son Parol? En fason ki i’n fer sa se par donn nou lasazes pratik ek abilite pour reflesir. (Proverb 3:21-24) Labib i form nou pour byen servi nou lespri e nou kapasite pour rezonnen. (Romen 12:1) Ler nou lir e etidye Labib regilyerman, ensi ki met li an pratik, nou pou kapab “konn fer diferans ant sa ki byen ek sa ki mal.” (Ebre 5:14) Petet ou’n eksperyanse pour ou menm konman bann prensip Labib in ed ou fer bann bon desizyon kan ou rankontre difikilte. Labib i ed nou servi nou lespri pour trouv bann solisyon pratik pour bann problenm ki pe fatig nou.—Proverb 1:4.
14 Parol Bondye i donn nou en lot sours lafors. Sa i lespwar pour delivrans. (Romen 15:4) Labib i dir nou ki bann move keksoz pa pou kontinyen egziste pour touzour. Nenport ladetres ki nou pe pas ladan i zis tanporer. (2 Korentyen 4:16-18) Nou annan “lesperans lavi eternel. Bondye ki pa zanmen manti ti promet nou sa lavi avan konmansman letan.” (Tit 1:2) Si nou lesperans i gard nou dan lazwa, avek sa lavenir briyan ki Zeova in promet antet, nou pou kapab persevere dan ladetres.—Romen 12:12; 1 Tesalonisyen 1:3.
Kongregasyon—en Fason ki Bondye i eksprim son Lanmour
15. Ki mannyer bann Kretyen i kapab vin en benediksyon pour kanmarad?
15 En lot provizyon sorti kot Zeova ki kapab ed nou dan letan ladetres se sa lasosyasyon ki nou gannyen dan kongregasyon Kretyen. Labib i dir: “En vre konpanyon i kontan ou toultan, e i en frer ki’n ne pour letan ladetres.” (Proverb 17:17) Parol Bondye i ankouraz nou tou dan kongregasyon pour onor e kontan kanmarad. (Romen 12:10) Zapot Pol ti ekrir: “Personn pa devret rod son prop lentere, me lentere son prosen.” (1 Korentyen 10:24) Sa kalite latitid i ed nou konsantre lo bezwen lezot olye lo nou prop difikilte. Kan nou depans nou lenerzi pour lezot, nou pa zis ed zot me nou osi resanti en lazwa ek satisfaksyon ki fer nou prop fardo vin pli leze.—Akt 20:35.
16. Ki mannyer sak Kretyen i kapab ankouraz lezot?
16 Bann frer ek ser ki matir spirityelman i kapab zwe en rol enportan pour fortifye lezot. Pour kapab fer sa, fodre ki i fasil pour lezot apros zot e fodre ki zot menm zot ofer zot letan. (2 Korentyen 6:11-13) Kongregasyon i vreman benefisye kan tou dimoun i fer letan pour felisit bann zenn, batir bann nouvo, e ankouraz bann ki demoralize. (Romen 15:7) Lanmour pour nou bann frer ek ser pou osi ed nou evite mefye kanmarad. Nou pa devret taye pour konklir ki bann difikilte personnel en dimoun i en siny ki i feb spirityelman. Pol ti ankouraz bann Kretyen pour koz dan en fason rekonfortan avek bann ki dekouraze. (1 Tesalonisyen 5:14) Labib i montre ki menm bann Kretyen fidel i pas atraver bann moman ladetres.—Akt 14:15.
17. Ki loportinite nou annan pour fortifye nou lanmitye avek nou bann frer ek ser?
17 Bann renyon Kretyen i en bon loportinite pour nou rekonfort e ankouraz kanmarad. (Ebre 10:24, 25) Sa lesanz lankourazman ranpli avek lanmour pa ganny fer zis dan renyon. Plito, pep Bondye i osi rod loportinite pour pas letan avek kanmarad dan bann moman detant. Kan bann sitiasyon difisil i arive, nou pou pare pour ed kanmarad akoz bann bon lanmitye in deza fini ganny formen. Zapot Pol ti ekrir: “Koumsa napa divizyon dan lekor me bann parti lekor i ganny en swen egal enn a lot. Si en parti lekor i soufer, tou lezot parti i soufer avek li; si en parti i ganny onore, tou lezot parti i osi rezoui avek li.”—1 Korentyen 12:25, 26.
18. Ki tandans nou devret evite kan nou santi nou dekouraze?
18 Parfwa, nou kapab santi nou tro dekouraze pour asosye avek nou bann frer ek ser. Nou devret lalit avek sa santiman pour ki nou pa priv nou lekor sa rekonfor ek led ki bann konpanyon Kretyen i kapab ofer. Labib i averti nou: “Sa ki izol son lekor pou rod son prop dezir egois; i pou al kont tou lasazes pratik.” (Proverb 18:1) Nou bann frer ek ser i en fason ki Bondye i eksprim son lentere pour nou. Si nou aksepte sa provizyon ranpli avek lanmour, nou pou trouv soulazman dan letan ladetres.
Gard en Latitid pozitif
19, 20. Ki mannyer Labib i ed nou rezet bann panse negatif?
19 Kan nou dekouraze e dan latristes, i fasil pour nou annan bann panse negatif. Par egzanp, kan serten i pas dan difikilte zot konmans annan dout lo zot spirityalite. Zot kapab konklir ki zot difikilte i en siny ki zot in perdi laprouvasyon Bondye. Me mazinen ki Zeova pa teste personn par “sa ki mal.” (Zak 1:13) Labib i dir: “I pa ti son leker pour [Bondye] kree problenm oubyen fer soufer bann imen.” (Lamantasyon 3:33) Okontrer, Zeova i vreman sagren kan son bann serviter i soufer.—Izai 63:8, 9; Zekarya 2:8.
20 Zeova i sa “Papa ki ranpli avek labonte, Bondye ki touzour donn konsolasyon.” (2 Korentyen 1:3) I pran swen avek nou, e i pou beni nou dan son letan apropriye. (1 Pyer 5:6, 7) Si nou toultan konsyan ki Bondye i kontan nou, sa pou ed nou gard en latitid pozitif e menm gard nou lazwa. Zak ti ekrir: “Mon bann frer, konsider konman en lazwa, tou bann leprev ki zot bezwen pas ladan.” (Zak 1:2) Akoz? I reponn: “Parski apre son leprev i pou resevwar kouronn lavi eternel ki Bondye in promet tou bann ki kontan li.”—Zak 1:12.
21. Malgre bann difikilte ki nou rankontre, ki garanti Bondye i donn bann ki reste fidel avek li?
21 Parey Zezi ti averti nou, dan sa lemonn nou pou bezwen soufer. (Zan 16:33) Me Labib i promet ki napa okenn “lasoufrans, lenkyetid, persekisyon, lafen, lamizer, danze” ki pou separ nou avek lanmour Zeova ek lanmour son Garson. (Romen 8:35, 39) I vreman rekonfortan pour konnen ki nenport difikilte ki nou fer fas avek i zis tanporer! Antretan, pandan ki nou pe espere pour vwar lafen soufrans bann imen, nou Papa lanmour, Zeova, i vey lo nou. Si nou tay kot li pour ganny proteksyon, i pou montre ki i “en landrwa o ki ofer sekirite pour nenport ki ki’n ganny oprimen, en landrwa o ki ofer sekirite pour letan ladetres.”—Psonm 9:9.
Ki nou’n aprann?
• Ki bann Kretyen i ekspekte antretan ki zot pe viv dan sa lemonn mesan?
• Ki mannyer nou lapriyer senser i kapab donn nou lafors kan nou rankontre bann leprev?
• Ki mannyer lespri Bondye i ed nou?
• Ki nou kapab fer pour ed kanmarad?
[Kestyon]
[Portre lo paz 15]
Nou bezwen rod Zeova konmsi nou pe tay dan en latour for
[Portre lo paz 16]
Bann Kretyen matir i servi tou loportinite ki zot gannyen pour felisit e ankouraz lezot