“Annan en gran Lafeksyon pour Kanmarad”

“Annan en gran lafeksyon kanmarad parey bann frer.”—ROMEN 12:10.

1, 2. Ki relasyon en misyonner dan nou letan ek zapot Pol ti annan avek zot frer ek ser?

TOUDILON son 43 lannen servis misyonner dan en pei Lazi, Don ti renonmen pour sa lafeksyon ki i ti annan pour bann dimoun ki i ti servi. Zour ki i ti gravman malad e pros pour mor, serten son bann ansyen etidyan Labib ti vwayaz plizyer milye kilomet pour al vwar li pour dir li, “kanmsahamnida, kanmsahamnida!”—savedir “Mersi, Mersi!” dan langaz Koreen. Sa lafeksyon ki Don ti annan ti’n tous zot leker.

² I annan lezot legzanp parey avek sa enn pour Don. Dan premye syek, zapot Pol ti demontre en gran lafeksyon pour sa bann ki i ti servi. Pol ti donn tou sa ki i ti annan pour lezot. Menm si i ti en zonm ki ti annan bokou konviksyon, i ti osi en zonm dous ki annan lafeksyon, “konman en manman, ki pran swen son zanfan.” I ti ekrir kongregasyon an Tesalonik: “Akoz nou lafeksyon pour zot nou ti pare pour anons zot non selman Levanzil Bondye me osi donn menm nou prop lavi pour zot akoz nou lanmour pour zot ti gran.” (1 Tesalonisyen 2:7, 8) Plitar, ler Pol ti dir son bann frer Efezyen ki zot pa pou vwar li ankor, “tou dimoun ti plere e ser Pol dan zot lebra e anbras li.” (Akt 20:25, 37) I kler ki sa relasyon ki ti egziste ant Pol ek son bann frer pa ti zis akoz zot ti partaz menm lafwa. Zot ti annan lafeksyon pour kanmarad.

Lafeksyon ek Lanmour

3. Ki mannyer bann diferan lekspresyon dan Labib pour lafeksyon ek lanmour i relye avek kanmarad?

³ Dan Labib, lafeksyon, lafeksyon fraternel, ek konpasyon i relye tre pros avek sa kalite pli enportan ki en Kretyen i devret annan—lanmour. (1 Tesalonisyen 2:8; 2 Pyer 1:7) Tou sa bann kalite i al byen ansanm pour prodwir bann zoli rezilta, parey bann diferan dimansyon en zoli dyanman. Zot fer bann Kretyen vin pli pros avek kanmarad me osi avek zot Papa dan lesyel. Alors, zapot Pol ti ankouraz son bann konpanyon Kretyen: “Lanmour i devre san lipokrizi. . . . Annan en gran lafeksyon pour kanmarad parey bann frer.”—Romen 12:9, 10.

4. Ki sa lekspresyon “gran lafeksyon” i vedir?

⁴ Sa mo Grek ki Pol ti servi pour “gran lafeksyon” i annan de bout, enn i vedir lanmitye e lot lafeksyon natirel. Parey en profeser Labib i eksplike, sa i vedir ki bann Kretyen “i ganny idantifye par en devosyon ki evidan dan en fanmiy kot i annan lanmour, lanmitye ek sipor anver kanmarad.” Eski ou santi koumsa lo ou bann frer ek ser Kretyen? En latmosfer amikal—en santiman ki nou en fanmiy—i devret egziste dan kongregasyon Kretyen. (Galat 6:10) The Jerusalem Bible i tradwir Romen 12:10 koumsa: “Kontan kanmarad parey bann frer i devret.” Wi, bann Kretyen i kontan kanmarad pa zis akoz i rezonnab pour fer sa oubyen akoz zot oblize fer sa. “Senserman” nou devret ‘kontan kanmarad bokou avek tou nou leker.’—1 Pyer 1:22.

“Ansennyen par Bondye pour kontan Kanmarad”

5, 6. (a) Ki mannyer Zeova in servi bann lasanble enternasyonal pour ansenny son pep pour annan lafeksyon Kretyen? (b) Ki mannyer sa relasyon ant bann frer ek ser i vin pli for avek letan?

⁵ Menm si dan sa lemonn “lanmour en pli gran kantite dimoun” pe diminyen, ozordi Zeova pe ansenny son pep “pour kontan kanmarad.”  (Matye 24:12; 1 Tesalonisyen 4:9) Bann lasanble enternasyonal Temwen Zeova i bann lokazyon remarkab kot zot aprann kontan kanmarad. Dan sa bann lasanble, bann Temwen i rankontre bann frer ek ser ki sorti dan lezot pei. Bokou sa bann frer ek ser i ofer landrwa reste pour sa bann delege. Resaman dan enn sa bann lasanble, serten ti sorti dan bann pei kot dimoun i tant pour pa eksprim zot santiman fasilman. En Kretyen ki ti ede avek landrwa reste pour sa bann delege i rakonte: “Ler zot ti’n fek arive, zot ti anba presyon e kanmi. Me zis sis zour plitar ler zot ti pe dir orevwar, zot e bann ki ti resevwar zot ti pe anmay kanmarad e plere. Zot ti’n ganny antoure avek en kalite lanmour Kretyen ki zot pa pou zanmen oubliye.” Montre lospitalite anver nou bann frer ek ser, san pran kont zot lorizin, i kapab ed sa bann envite ek bann ki resevwar zot pour demontre zot bann bon kalite.—Romen 12:13.

⁶ Sa bann leksperyans lasanble i tre enteresan, me en relasyon pli entim i devlope ler bann Kretyen i servi Zeova ansanm pour en bon pe letan. Ler nou konn nou bann frer ek ser byen, nou kapab pli byen apresye zot bon kalite parey zot lonnekte, senserite, fidelite, labonte, zenerozite, konsiderasyon, konpasyon, ek leta lespri sakrifis. (Psonm 15:3-5; Proverb 19:22) Mark, ki ti servi konman en misyonner dan Les Lafrik, i dir, “Travay zepol kont zepol avek nou bann frer ek ser i kree en relasyon ki difisil kase.”

7. Ki fodre nou fer pour nou ganny sa lafeksyon Kretyen dan kongregasyon?

⁷ Pour kree e mentenir sa kalite relasyon dan en kongregasyon, fodre bann manm kongregasyon i vin pros avek kanmarad. Par asiste regilyerman renyon Kretyen, nou fortifye sa latasman ki nou annan avek nou frer ek ser. Par nou prezans ek nou partisipasyon ki swa avan, pandan, e apre renyon, nou ankouraz e pous kanmarad “pour annan lanmour e fer sa ki byen.” (Ebre 10:24, 25) En ansyen an Letazini i rakonte: “Mon rapel ler mon ti ankor zanfan, mon fanmiy ti toultan parmi bann dernyen dimoun pour kit Lasal Rwayonm. Nou ti reste pli lontan posib pour kapab apresye bann bon konversasyon.”

Eski ou bezwen ‘ouver gran ou Leker’?

8. (a) Ki Pol ti oule dir ler i ti ankouraz bann Korentyen pour “ouver gran” zot leker? (b) Ki nou kapab fer pour promot lafeksyon dan kongregasyon?

⁸ Pour montre sa kalite lafeksyon, petet nou bezwen “ouver gran” nou leker. Zapot Pol ti ekrir kongregasyon an Korent: “Nou’n ouver nou leker byen gran. Nou pa’n ferm nou leker avek zot.” Pol ti ankouraz zot pour “ouver gran” zot leker an retour. (2 Korentyen 6:11-13) Eski ou osi ou kapab “ouver gran” ou leker? Pa fodre ki ou esper lezot fer premye pa pour vin ver ou. Dan son let pour bann Romen, Pol ti asosye nesesite pour annan lafeksyon avek sa konsey pour setaki montre plis respe pour kanmarad oubyen parey Traduction du monde nouveau i dir vin sa enn premye pour montre loner. (Romen 12:10) Pour montre respe oubyen loner lezot, ou kapab pran linisyativ pour akey zot dan bann renyon. Ou osi kapab envit zot pour pres avek ou oubyen prepar en renyon ansanm. Ler nou fer sa i ede pour lafeksyon grandi.

9. Ki serten in fer pour vin pli bon zanmi avek lezot konpanyon Kretyen? (Enkli nenport legzanp lokal.)

⁹ Bann fanmiy ensi bann endividi dan kongregasyon i kapab “ouver gran” zot leker par vizit kanmarad, petet par pran en repa ansanm, e par partisip dan bann bon aktivite ansanm. (Lik 10:42; 14:12-14) Tanzantan, Hakop i organiz piknik pour bann pti group dimoun. I dir: “Zenn konman vye i prezan, osi byen ki bann paran tousel. Tou dimoun i al kot zot avek bann bon souvenir, e zot santi zot pli pros avek kanmarad.” Konman Kretyen, nou devret fer zefor pour pa vin zis bann konpanyon Kretyen me osi bann vre zanmi.—3 Zan 14.

10. Ki nou kapab fer ler nou ganny problenm avek nou frer ek ser?

 ¹⁰ Me parler, lenperfeksyon i kapab fer li difisil pour devlop lanmitye ek lafeksyon. Ki nou kapab fer? Premyerman, nou bezwen priye pour annan bon relasyon avek nou bann frer ek ser. Bondye i oule ki son bann serviter i tonm dakor avek kanmarad e i pou reponn zot lapriyer senser. (1 Zan 4:20, 21; 5:14, 15) Nou devret osi azir an armoni avek nou lapriyer. Rik, en sirveyan ki vizit bann kongregasyon dan Les Lafrik, i rapel en frer ki son personnalite difisil ti fer li pa fasil pour byen avek li. Rik i eksplike: “Olye evit sa frer, mon ti determinen pour konn li pli byen. Mon ti dekouver ki son papa ti en zonm ki ti disiplin severman. Apre ki mon ti’n konnen ki lalit sa frer in fer pour sirmont son sitiasyon e ki kantite progre i’n fer, mon ti admir li. Nou ti vin de bon zanmi.”—1 Pyer 4:8.

Eksprim ou Santiman anver lezot!

11. (a) Kwa ki neseser pour ki lafeksyon i grandi dan kongregasyon? (b) Akoz i kapab afekte nou spirityelman si nou evite eksprim nou santiman avek lezot?

¹¹ Ozordi, bokou dimoun i grandi san zanmen devlop en vre lanmitye avek personn. Sa i tris! I pa devret leka dan kongregasyon Kretyen. Vre lanmour fraternel pa zis vedir konversasyon poli ek savwar viv; i pa ni vedir fer bann gran gran zes pour demontre nou santiman. Okontrer, nou devret pare pour ouver nou leker, parey Pol ti dir bann Korentyen, e montre nou konpanyon Kretyen ki nou vreman enterese avek zot byennet. Menm si pa tou dimoun ki par natir i fasilman koze oubyen asosye avek lezot, si en dimoun i tro rezerve i kapab pa bon pour li. Labib i averti: “Sa ki izol son lekor pou rod son prop dezir egois; i pou al kont tou lasazes pratik.”—Proverb 18:1.

12. Akoz en bon kominikasyon i tre enportan pour annan bon relasyon dan kongregasyon?

¹² En kominikasyon fran e onnet i tre esansyel pour en vre lanmitye. (Zan 15:15) Nou tou nou bezwen zanmi avek ki nou kapab konfye nou santiman ek panse personnel. Deplis, pli nou konn kanmarad pli byen, i pli fasil pour satisfer bezwen kanmarad. Ler nou montre konsern anver lentere kanmarad dan sa fason, nou promot lafeksyon e nou pou vwar ki parol Zezi i vre: “I annan plis lazwa pour donnen ki pour resevwar.”—Akt 20:35; Filipyen 2:1-4.

13. Ki nou kapab fer pour montre ki nou annan vre lafeksyon pour nou bann frer ek ser?

¹³ Pour nou lafeksyon fer plis dibyen, nou bezwen eksprim li. (Proverb 27:5) Ler nou lafeksyon i senser, i tre probab ki sa pou evidan lo nou figir e i kapab tous leker lezot pour azir. En proverb dan Labib i dir: “Lizye briye i fer leker kontan.” (Proverb 15:30) Bann aksyon ki ganny fer avek konsiderasyon i osi promot lafeksyon. Menm si personn pa kapab aste lafeksyon, en kado ki ganny donnen avek en bon leker i kapab vreman tous sa dimoun. En kart, en let ek “en parol ki ganny dir dan son moman apropriye”—tousala i kapab eksprim nou profon lafeksyon. (Proverb 25:11; 27:9) Dek ki nou’n ganny lanmitye lezot, nou bezwen prezerv li par kontinyen montre en lafeksyon senser. Sirtou dan moman difisil, nou pou anvi la pour siport nou zanmi. Labib i dir: “En vre konpanyon i kontan ou toultan, e i en frer ki’n ne pour letan ladetres.”—Proverb 17:17.

14. Ki nou kapab fer si en dimoun i paret pa reazir anver nou lafeksyon?

 ¹⁴ An realite, nou pa ekspekte pour pros avek tou dimoun dan kongregasyon. Natirelman, i pou annan serten ki nou pou santi nou plis pros avek ki lezot. Alor, si i annan en dimoun ki paret pa pros avek ou parey ou ti ava anvi, pa taye pour konklir ki i annan en keksoz mal avek ou oubyen avek sa dimoun. Deplis, pa esey fors sa dimoun pour devlop en relasyon pros avek ou. Si ou senpleman ofer ou lanmitye dan en degre ki sa dimoun i aksepte, ou ede kit laport ouver pour annan en relasyon pli pros plitar.

“Ou donn mwan bokou Lazwa”

15. Ki lefe i fer lo lezot ler i annan oubyen napa felisitasyon?

¹⁵ Zezi ti bezwen vreman kontan zour son batenm ler i ti tann sa parol sorti dan lesyel: “Ou donn mwan bokou lazwa”! (Mark 1:11) Sa parol ki Zeova ti dir pour montre ki i ti aksepte son Garson, ti’n bezwen ogmant konviksyon Zezi ki son Papa ti annan lafeksyon pour li. (Zan 5:20) Malerezman, serten dimoun pa zanmen antann bann tel felisitasyon sorti kot bann ki zot respekte e kontan. Ann i fer resorti: “Bokou zenn parey mwan zot fanmiy pa dan laverite. Nou zis ganny kritike kot nou. Sa i fer nou vreman tris.” Me ler zot form parti kongregasyon, zot ganny en fanmiy spirityel—papa, manman, frer, ek ser dan lafwa, kot zot ganny lafeksyon, sipor ek latansyon.—Mark 10:29, 30; Galat 6:10.

16. Akoz i pa bon pour demontre en latitid kritike anver lezot?

¹⁶ Dan serten kiltir, paran, bann ki pli aze, ek ansennyan i rarman dir bann parol ki montre ki zot satisfe avek sa ki bann pli zenn pe fer. Zot panse ki sa pou fer bann zenn arogan. Sa kalite panse i kapab menm afekte bann fanmiy Kretyen ek kongregasyon. Ler bann ki pli aze i fer komanter lo en prezantasyon oubyen lo lezot zefor, zot kapab dir: “I ti byen, me ou kapab fer pli byen!” Oubyen dan lezot fason, zot kapab menm montre zot mekontantman avek sa zenn. Bokou i krwar ki zot pe motiv bann pli zenn pour fer pli byen, ler zot fer koumsa. Me souvan sa lapros i fer en move lefe, vi ki bann zenn i kapab aret fer zefor oubyen santi ki zot pa alaoter.

17. Akoz nou devret rod loportinite pour felisit lezot?

¹⁷ Me felisitasyon pa devret ganny donnen zis konman en lentrodiksyon avan donn konsey. Bann felisitasyon senser i promot  lafeksyon dan fanmiy ek kongregasyon. Sa i ankouraz bann zenn pour rod konsey avek bann frer ek ser eksperyanse. Alor, olye les kiltir kontrol lafason ki nou tret lezot, annou “vin en dimoun konpletman nouvo, kree dan resanblans Bondye.” Felisit lezot parey Zeova i fer.—Efezyen 4:24.

18. (a) Zenn, ki mannyer ou devret konsider konsey sorti kot bann ki pli aze? (b) Akoz bann ki pli aze i fer atansyon ki mannyer zot donn konsey?

¹⁸ Parkont, zenn, pa krwar ki bann pli aze pa kontan ou si zot koriz ou oubyen donn ou konsey. (Eklezyast 7:9) Okontrer zot kontan ou! Zot fer sa akoz zot enterese avek ou e annan lafeksyon pour ou. Sankwa, akfer zot ti pou fer sa zefor pour koz avek ou lo sa size? Vi ki zot konn lefe ki parol i kapab annan, bann ki pli aze—sirtou bann ansyen—i pas bokou letan pour reflesir e fer lapriyer avan ki zot ofer konsey, vi ki zot anvi selman fer dibyen.—1 Pyer 5:5.

‘Zeova i ranpli avek Labonte ek Konpasyon’

19. Akoz sa bann ki’n eksperyans dezapwentman i kapab depan lo Zeova pour sipor?

¹⁹ Bann move leksperyans ki serten in gannyen apre ki zot in demontre lafeksyon i kapab fer zot annan sa santiman ki montre lafeksyon pou zis anmenn plis dezapwentman. I demann kouraz ek lafwa for pour zot ouver zot leker avek lezot ankor. Me zot pa devret zanmen oubliye ki Zeova “pa lwen avek sakenn parmi nou.” I envit nou pour vin pros avek li. (Akt 17:27; Zak 4:8) I osi konpran lafreyer ki nou annan pangar nou ganny blese e i promet pour siport e ed nou. Psalmis David ti asir nou: “Zeova i pre avek sa bann ki annan leker brize; e i sov bann ki zot lespri i fatige.”—Psonm 34:18.

20, 21. (a) Ki mannyer nou konnen ki nou kapab annan en relasyon tre pros avek Zeova? (b) Ki nou bezwen fer pour annan en relasyon entim avek Zeova?

²⁰ En relasyon tre pros avek Zeova i relasyon pli enportan nou kapab devlope. Me eski en relasyon koumsa i vreman posib? Wi. Labib i dekrir ki mannyer bann zonm ek fanm drwat ti santi zot tre pros avek zot Papa dan lesyel. Zot parol ranpli avek santiman in ganny rikorde dan Labib pour donn nou konfyans ki nou osi nou kapab vin pros avek Zeova.—Psonm 23, 34, 139; Zan 16:27; Romen 15:4.

²¹ Sa ki Zeova i demande pour nou vin pros avek li i en keksoz ki nou tou nou kapab fer. David ti demande: “O Zeova, lekel ki pou vin en envite dan ou latant? . . . Sa ki napa okenn repros kont li e ki pe fer sa ki drwat, e ki pe koz laverite dan son leker.” (Psonm 15:1, 2; 25:14) Ler nou vwar ki servi Bondye i anmenn bann bon rezilta e fer nou ganny son gidans ek proteksyon, nou pou arive konpran konman ‘Zeova i ranpli avek labonte ek konpasyon.’—Zak 5:11.

22. Ki kalite relasyon Zeova i anvi son pep annan?

²² Pa nou santi nou privilezye ki Zeova i anvi annan en relasyon pros avek bann imen enparfe! Alor, eski pa nou devret demontre lafeksyon pour kanmarad? Avek led Zeova, nou tou nou kapab kontribye e benefisye avek sa lafeksyon ki evidan dan nou lasosyasyon frer ek ser. Anba Rwayonm Bondye, tou dimoun lo later pou santi sa lafeksyon pour touzour.

Eski ou kapab eksplike?

• Ki kalite latmosfer i devret egziste dan kongregasyon Kretyen?

• Ki mannyer nou tou nou kapab kontribye pour fer lafeksyon egziste dan kongregasyon?

• Ki mannyer bann felisitasyon senser i promot lafeksyon Kretyen?

• Ki mannyer lafeksyon Zeova i siport e soutenir nou?

[Kestyon]

[Portre lo paz 31]

Eski ou kapab “ouver gran” ou leker?