‘Kontinyen rod Lafors avek Senyer’

“Rod ou lafors dan linyon avek Senyer e dan son gran pisans.” —Efezyen 6:10.

1. (a) Ki konba ekstraordiner ti deroule apepre 3,000 an pase? (b) Akoz David ti bat Golyat?

APEPRE 3,000 an pase, de konbatan sorti dan de diferan group larme lo fron batay ti fer fas avek kanmarad. Sa enn ki ti pli zenn ti en gardyen mouton e i ti apel David. Golyat, en zonm avek en lafors ek grander eksepsyonnel ti debout devan li. Son lenz proteksyon ti pez apepre 57 kilo, e i ti anmenn en manman lans ek en gran lepe. David ti napa okenn lekipman batay. Sel zarm ki i ti annan ti en fles. Sa zean Filisten, Golyat, ti vreman ofanse pour vwar ki son oponan ti ankor en manrmay. (1 Samyel 17:42-44) Pour bann obzervater lo tou le de kote, rezilta ti evidan. Me sa ki pli for pa toultan ganny lager. (Eklezyast 9:11) David ti bat Golyat akoz i ti lager avek lafors Zeova. I ti dir: “Batay i pour Zeova.” Labib i fer resorti ki “David, avek en fles ek en ros, ti pli for ki sa Filisten.”—1 Samyel 17:47, 50.

2. Ki kalite lager bann Kretyen i bezwen lager?

² Bann Kretyen pa partisip dan lager. Kantmenm zot anpe avek tou dimoun, zot bezwen lager en lager spirityel kont bann oponan ki tre for. (Romen 12:18) Dan dernyen sapit son let ki i ti adres avek bann Efezyen, Pol ti dekrir en lager ki sak Kretyen i enplike ladan. I ti ekrir: “Nou pa pe lit kont dimoun, me kont bann pouvwar move lespri dan ler, bann lotorite, ek pouvwar dan lemonn teneb dan sa letan ki nou pe viv ladan.”—Efezyen 6:12.

3. Dapre Efezyen 6:10, ki nou bezwen pour garanti nou sikse?

³ Sa bann move lespri dan ler i Satan ek son bann demon, ki anvi detrir nou relasyon avek Zeova. Vi ki zot pli for ki nou, nou vwar nou dan menm sitiasyon avek David, e nou pou reisi si selman nou depan lo lafors Bondye. Anfet, Pol i konsey nou pour kontinyen rod “lafors dan linyon avek Senyer e dan son gran pisans.” (Efezyen 6:10) Apre ki i ti donn sa konsey, sa zapot i dekrir bann provizyon spirityel ek bann kalite ki en Kretyen i bezwen annan pour ganny sa batay.—Efezyen 6:11-17.

4. Ki sa de pwen prensipal nou pou egzaminen dan sa lartik?

 ⁴ Aprezan, annou egzamin sa ki Labib i dir konsernan pwen for ek taktik nou lennmi. Apre nou pou diskit fason ki nou kapab protez nou lekor. Si nou swiv lenstriksyon Zeova, nou kapab annan konfyans ki nou bann lennmi pa pou ranport laviktwar lo nou.

En Lalit kont bann move Lespri

5. Ki mannyer sa sport ki langaz orizinal dan Efezyen 6:12 i dekrir i ed nou rekonnet taktik Satan?

⁵ Pol i eksplike ki nou ‘pe lit kont bann pouvwar move lespri dan ler.’ Byensir Satan, ki “sef demon,” i osi sef move lespri. (Matye 12:24-26) Dan langaz orizinal, Labib i konpar nou lalit avek sa sport ki apel wrestling. Dan bann konpetisyon wrestling ki ti fer dan ansyen Lagres, sak partisipan ti esey fer son oponan perdi son lekilib pour kapab zet li ater. Pareyman, Dyab i anvi nou perdi nou lekilib spirityel. Ki mannyer i kapab fer sa?

6. Servi Labib pour montre ki mannyer Dyab i kapab servi diferan taktik pour afebli nou lafwa.

⁶ Dyab i kapab azir parey en serpan, oubyen en lyon ki pe kriye, oubyen menm en lanz lalimyer. (2 Korentyen 11:3, 14; 1 Pyer 5:8) I kapab servi bann imen pour persekit oubyen dekouraz nou. (Revelasyon 2:10) Vi ki Satan i annan lotorite lo lemonn antye, i kapab servi byen bann dezir ek latraksyon sa lemonn pour fer nou tonm dan son pyez. (2 Timote 2:26; 1 Zan 2:16; 5:19) I kapab servi bann panse lemonn oubyen pwennvi bann aposta pour anbet nou, zis parey i ti anbet Ev.—1 Timote 2:14.

7. Ki limit bann demon i annan, e ki lavantaz nou annan?

⁷ Menm si zarm ek pouvwar Satan ek son bann demon i kapab paret pli for ki nou, zot annan zot limit. Sa bann move lespri pa kapab fors nou pour fer okenn move keksoz ki depler nou Papa dan lesyel. Nou ti ganny kree avek sa kapasite pour swazir sa ki byen ek sa ki mal, e nou annan kontrol lo nou panse ek aksyon. Deplis, nou pa tousel dan sa batay. Parey dan letan Elisa, ozordi nou osi nou kapab dir: “I annan plis avek nou ki avek zot.” (2 Lerwa 6:16) Labib i asir nou ki si nou soumet avek Bondye e opoz Dyab, i pou sov lwen avek nou.—Zak 4:7.

Nou konn Lentansyon Satan

8, 9. Ki leprev Satan ti anmenn lo Zob pour kas son fidelite, e ki danze spirityel nou pe fer fas avek ozordi?

⁸ Nou konn byen lentansyon Satan parski Labib i devwal son bann taktik debaz. (2 Korentyen 2:11) Dyab ti sey kas fidelite  Zob par servi gro problenm ekonomik, lanmor bann dimoun ki i ti pros avek, lopozisyon fanmiy, soufrans, ek bann kritik ki pa zistifye sorti kot bann fo zanmi. Zob ti vreman dekouraze e ti krwar Bondye ti’n abandonn li. (Zob 10:1, 2) Satan pa neseserman kree sa bann problenm ozordi. Me kantmenm sa, sa bann problenm i afekte bokou Kretyen, e Dyab i servi sa dan son lavantaz.

⁹ Bann danze spirityel in ogmant rapidman dan sa letan lafen. Nou pe viv dan en lemonn kot rod bann keksoz materyel in pran plas lobzektif spirityel. Medya i toultan portre limoralite seksyel konman en sours lazwa olye en latet fer mal. Deplis, laplipar dimoun i “kontan plezir plis ki Bondye.” (2 Timote 3:1-5) Sa kalite fason panse i kapab finalman fer nou perdi nou lekilib spirityel, amwen ki nou “lite enn fwa pour tou, pour lafwa.”—Zid 3.

10-12. (a) Ki lavertisman Zezi ti donnen dan son parabol senmer lagrenn? (b) Montre ki mannyer bann valer spirityel i kapab ganny toufe.

¹⁰ Enn bann taktik Satan ki pli byen marse se fer nou donn tou nou lentere ek lenerzi sa lemonn ek son bann lobzektif materyel. Dan son parabol senmer lagrenn, Zezi ti averti ki dan serten ka “traka, plezir lavi ek larzan i touf [parol konsernan Rwayonm].” (Matye 13:18, 22) Sa mo Grek ki’n ganny tradwi la konman “touf” i vedir “anvair konpletman.”

¹¹ I annan en kalite lalyann ki pous dan bann lafore tropikal. I pouse dousman dousman lo tron en pye dibwa. Ptit-a-pti, sa lalyann i anvair sa pye dibwa par son rasin ki vin deplizanpli pli for. Avek letan, rasin sa lalyann i absorb preski tou nouritir dan later otour sa pye dibwa, e son bann fey anler i anpes sa pye dibwa ganny lalimyer. Finalman sa pye dibwa i mor.

¹² Pareyman, pran tro bokou traka, tay deryer larzan ek bann konfor materyel i kapab ptit-a-pti pran plis nou letan ek lenerzi. Ler nou latansyon i lo bann keksoz lemonn, nou kapab fasilman negliz letid personnel e fer li en labitid pour mank renyon Kretyen. Rezilta se ki nou pe priv nou lekor nouritir spirityel. Aprezan bann lobzektif materyel i ranplas bann aktivite spirityel, e finalman i vin telman fasil pour Satan devor nou.

Nou bezwen reziste Satan

13, 14. Ki pozisyon nou bezwen pran kan Satan i opoz nou?

¹³ Pol ti sipliy son bann konpanyon Kretyen pour “reziste kont tou bann riz Dyab.” (Efezyen 6:11) Byensir, nou pa kapab defet Satan ek son bann demon. Bondye in donn Zezi Kri sa latas pour fer. (Revelasyon 20:1, 2) Me ziska ki Satan i ganny tire, nou bezwen “reziste” li pour ki i pa annan kontrol lo nou.

¹⁴ Zapot Pyer ti osi met lanfaz lo nesesite pour reziste Satan. I ti ekrir: “Reste vizilan e vey byen. Zot lennmi, dyab pe pas partou konman en lyon ki kriye, pe rode ki i pou devore. Reste ferm dan lafwa e reziste li, parski zot konnen ki tou zot bann frer dan lemonn antye pe pas par menm soufrans.” (1 Pyer 5:8, 9) Anfet, sipor nou bann frer ek ser spirityel i tre esansyel pour nou reste  ferm kan Dyab i atak nou parey en lyon ki pe kriye.

15, 16. Donn en legzanp dan Labib pour montre konman soutyen bann frer ek ser i kapab ed nou pour reste ferm.

¹⁵ Lafrik dan lakanpanny, kan en lyon i kriye bann antilop i taye avek tou zot vites ziska ki zot nepli an danze. Me bann lelefan zot, zot legzanp i montre konman nou kapab soutenir kanmarad. Liv Elephants—Gentle Giants of Africa and Asia i eksplike: “En sistenm defans ki bann lelefan i abitye servi se form en serk. Bann lelefan adilt i vir zot figir deor avek menas, tandis ki bann pti lelefan zot zot ganny proteze dan sa serk.” Pa souvan ki bann lyon pou atak menm bann pti lelefan kan zot vwar sa lafors ek sipor ki sa bann lelefan i met ansanm.

¹⁶ Pareyman, kan Satan ek son bann demon i menas nou, nou bezwen reste ansanm, zepol kont zepol avek nou bann frer ki solid dan lafwa. Pol ti admet ki serten konpanyon Kretyen ti konman ‘en led fortifyan’ pour li kan i ti dan prizon an Ronm. (Kolosyen 4:10, 11) Sa mo Grek ki’n ganny tradwir “en led fortifyan” i aparet zis en fwa dan Lekritir Grek Kretyen. Dapre Expository Dictionary of New Testament Words, “en laform verbal sa mo i refer avek bann latizann ki apez douler.” Parey en bon latizann, soutyen bann Kretyen matir i kapab apez douler emosyonnel oubyen fizik zot frer ek ser.

17. Kwa ki kapab ed nou reste fidel avek Bondye?

¹⁷ Lankourazman nou bann konpanyon Kretyen ozordi i kapab fortifye nou determinasyon pour servi Bondye fidelman. Bann ansyen dan kongregasyon i sirtou annan en gran dezir pour fourni led spirityel. (Zak 5:13-15) Etidye Labib e asiste bann renyon ek lasanble regilyerman i bann keksoz ki kapab ed nou reste fidel. Nou prop relasyon avek Bondye i ed nou reste fidel avek li. Anfet, ki swa nou manze, bwar, oubyen fer okenn lezot keksoz, nou devret anvi fer tou keksoz pour laglwar Bondye. (1 Korentyen 10:31) Natirelman, depan lo Zeova atraver lapriyer i enportan pour nou kontinyen lo sa semen ki fer li plezir.—Psonm 37:5.

18. Akoz nou pa devret arete menm si bann sitiasyon difisil i pran tou nou lafors?

¹⁸ Parfwa latak Satan i vin kan nou santi nou feb spirityelman. En lyon i sot lo en zannimo ki en pe fay fay. Bann problenm fanmiy, problenm larzan, oubyen maladi i kapab pran tou nou lafors spirityel. Me annou pa aret fer sa ki fer plezir Bondye, parski Pol ti dir: “Ler mon feb, lanmenm ler ki mon for.” (2 Korentyen 12:10; Galat 6:9; 2 Tesalonisyen 3:13) Ki i ti oule dir par sa? I ti oule dir ki lafors Bondye i kapab ed nou kan nou feb, si nou tourn ver li pour ganny lafors. Laviktwar ki David ti  gannyen lo Golyat i montre ki Bondye i kapab fortifye son pep e i vreman fer li. Ozordi, bann Temwen Zeova i kapab konfirmen ki dan letan vreman kritik, zot in santi lanmen Bondye fortifye zot.—Danyel 10:19.

19. Donn en legzanp pour montre konman Zeova i kapab fortifye son bann serviter.

¹⁹ En koup marye ti ekrir konsernan soutyen ki Bondye ti’n donn zot: “Nou’n servi Zeova ansanm konman msye ek madanm pour bokou lannen. Nou’n ganny en kantite benediksyon e nou’n fer konnesans avek bokou dimoun ki nou’n vreman apresye. Nou’n osi ganny formen e fortifye par Zeova pour kapab persevere dan bann difikilte. Parey Zob, nou pa’n toultan konpran akoz serten keksoz in arive, me nou ti konnen ki Zeova i toultan la pour ed nou.”

20. Ki laprev dan Labib ki montre Zeova i toultan soutenir son pep?

²⁰ Lanmen Zeova pa tro kourt pour li soutenir e fortifye son pep fidel. (Izai 59:1) Psalmis David ti sante: “Zeova pe donn sipor tou sa bann ki pe tonbe, e pe redres tou sa bann ki’n kourbe.” (Psonm 145:14) Vreman, nou Papa dan lesyel i “anmenn nou fardo sak zour” e i fourni nou avek sa ki nou vreman bezwen.—Psonm 68:19.

Nou bezwen met “Lekipman Batay ki Bondye i donnen”

21. Ki mannyer Pol ti met lanfaz lo nesesite pour met nou lekipman batay?

²¹ Nou’n egzamin serten metod ki Satan i servi e nou’n vwar nesesite pour reziste son bann latak. Aprezan nou bezwen egzamin en lot keksoz vreman enportan ki ed nou defann nou lafwa. De fwa dan son let ki i ti ekrir bann Efezyen, zapot Pol ti mansyonn en fakter enportan pour reziste bann riz Satan e reisi dan nou lalit kont bann move lespri. Pol ti ekrir: “Met lo zot tou bann lekipman batay ki Bondye i donnen, pour ki zot a kapab reziste kont tou bann riz Dyab . . . Met lo zot, lekipman proteksyon ki Bondye in donn zot. Alor kan bann move zour difikilte i ava arive, zot a kapab defann zot kont latak lennmi, e kan zot a’n fini lite ziska zot dernyen zour, zot ava ankor kapab tenir ferm.”—Efezyen 6:11, 13.

22, 23. (a) Ki nou lekipman batay spirityel i enkli? (b) Ki nou pou egzaminen dan lartik swivan?

²² Wi, nou bezwen met ‘tou bann lekipman batay ki Bondye i donnen.’ Kan Pol ti ekrir sa let bann Efezyen, i ti pe ganny veye par en solda Romen, ki petet parfwa ti met tou son lekipman batay. Parkont, Pol ti ganny enspire par Bondye pour diskit sa  lekipman batay spirityel ki sak serviter Zeova i vreman bezwen.

²³ Sa lekipman batay ki Bondye i donn nou i enkli bann kalite ki en Kretyen i bezwen annan, ensi ki bann provizyon spirityel ki Zeova i fourni. Dan lartik swivan, nou pou egzamin sa lekipman batay bout par bout. Sa pou ed nou pour vwar ki degre ekipe nou ekipe pour nou batay spirityel. Anmenmtan, nou pou vwar konman legzanp merveye Zezi Kri i ed nou reisi reziste Satan.

Ki ou pou reponn?

• Ki konba tou Kretyen i annan?

• Dekrir serten taktik Satan.

• Ki mannyer soutyen nou bann konpanyon Kretyen i kapab fortifye nou?

• Lo ki lafors nou devret depan, e akoz?

[Kestyon]

[Portre lo paz 13]

Bann Kretyen i bezwen ‘lit kont pouvwar bann move lespri’

[Portre lo paz 15]

Bann konpanyon Kretyen i kapab vin ‘en led fortifyan’

[Portre lo paz 16]

Eski ou priy Bondye pour ganny lafors?