Lekel ki pe donn Bondye Laglwar ozordi?

“Nou Senyer, nou Bondye, ou merite resevwar laglwar, loner ek pisans.”—REVELASYON 4:11.

1, 2. (a) Ki bann legzanp ki montre sa domenn lasyans ki kopye keksoz dan lanatir? (b) Ki kestyon ki ganny souleve e ki son larepons?

EN ZOUR dan bann lannen 1940, en enzenyer Swis apele George de Mestral ti anmenn son lisyen fer en pti pronmnad. Ler i ti retourn kot li, i ti remarke ki son lenz osi byen plim son lisyen ti kouver avek en kalite tref. Avek kiryozite i ti egzamin sa bann tref anba en mikroskop e i ti fer en dekouvert enteresan. I ti vwar plizyer pti lanmson ki ti atas avek nenport keksoz ki annan en ron. Plitar, i ti envant en materyo parey apele Velcro. Pa zis de Mestral ki’n kopi bann keksoz dan lanatir. An Letazini, sa de frer Wright ti desin e fabrik en avyon apre ki zot ti’n etidye bann gran zwazo pe anvole. Enzenyer Franse Alexandre-Gustave Eiffel ti envant sa latour Pari ki port son non par servi bann prensip debaz ki permet lezo dan lazanm en dimoun siport pwa son lekor.

² Sa bann legzanp i klerman montre sa ki zot apel biomimetik, en domenn lasyans ki esey souvan kopye bann keksoz ki trouve dan lanatir. * Me nou poz nou lekor sa kestyon: Konbyen fwa sa bann envanter i rekonnet sa Enn ki’n fer sa bann tref, gran zwazo, lezo imen, e tou lezot orizinal merveye ki bann lenvansyon imen i baze lo la? Malerezman, ozordi dan sa lemonn, Bondye i rarman ganny sa respe oubyen loner ki i merite.

3, 4. Ki savedir sa mo Ebre ki ganny tradwir “laglwar,” e i refer avek kwa ler i ganny servi avek Zeova?

³ Serten dimoun i kapab demande, ‘Akoz i neseser donn Bondye laglwar? Eski pa Bondye i deza annan laglwar?’ I vre ki Zeova i sa enn ki annan plis laglwar dan tou liniver, me sa pa vedir ki tou imen i krwar ki i annan laglwar. Dan Labib, sa mo Ebre ki ganny tradwir konman “laglwar” i prensipalman vedir “lour.” I refer avek nenport keksoz ki fer en dimoun enpresyonan oubyen enportan pour lezot. Ler sa mo i ganny servi avek Bondye, i refer avek keksoz ki fer Bondye enpresyonan pour imen.

⁴ Ozordi bokou dimoun pa remark bann keksoz ki fer Bondye enpresyonan. (Psonm 10:4; 14:1) Annefe, laplipar dimoun enportan dan lasosyete pa krwar dan Bondye. Deplis sa bann ki krwar in souvan enfliyans dimoun pour pa montre respe pour Kreater liniver. Dan ki fason zot in fer sa?

 Zot “san okenn Lekskiz”

5. Ki mannyer bokou syantis i eksplik legzistans sa bann mervey dan kreasyon?

⁵ Bokou syantis i ensiste ki napa Bondye. Me ki mannyer zot eksplik legzistans sa bann keksoz merveye dan kreasyon, enkli imen? Zot dir ki sa bann keksoz merveye in ariv par evolisyon, en prosedir ki’n arive par azar lo li menm. Par egzanp, Stephen Jay Gould, en dimoun ki krwar dan evolisyon, ti ekrir: “Nou egziste akoz en serten group pwason ti annan en kalite lezel ki kapab transform an lipye pour mars lo later . . . Petet nou anvi en ‘pli bon’ larepons—me i pa egziste.” Pareyman, Richard E. Leakey ek Roger Lewin ti ekrir: “Petet laras imen i zis en gro lerer biolozik.” Menm serten syantis ki apresye labote ek kreasyon dan lanatir pa donn Bondye loner.

6. Kwa ki dekouraz bokou dimoun pour donn Bondye sa loner ki i merite konman Kreater?

⁶ Ler bann dimoun byen edike i krwar ki evolisyon i vre, zot sizere ki zis bann dimoun inyoran ki refize krwar sa. Ki mannyer bokou dimoun i azir anver sa ki zot dir? Detrwa lannen pase, en zonm ki konn byen lo evolisyon ti entervyou dimoun ki ti aksepte sa teori. I ti dir: “Mon ti dekouver ki laplipar dimoun ki krwar dan evolisyon i fer li zis akoz zot in ganny dir ki tou dimoun entelizan i krwar dan evolisyon.” Wi, ler bann dimoun edike i dir ki zot pa krwar dan Bondye, sa i dekouraz serten dimoun pour donn Bondye sa loner ki i merite konman Kreater.—Proverb 14:15, 18.

7. Dapre Romen 1:20, ki nou kapab klerman vwar par mwayen bann keksoz vizib, e akoz?

⁷ Eski sa bann syantis in fer zot konklizyon baze lo bann fe ek levidans ki montre ki evolisyon i vre? Pa ditou! Nou antoure par levidans ki en Kreater i egziste. Zapot Pol ti ekrir konsernan Bondye: “Depi ki Bondye in kre lemonn son bann kalite envizib, setadir, son pisans eternel ek son natir konman Bondye i ganny revele par bann keksoz ki in fer. Dimoun i alor kapab konn tousala san okenn lekskiz.” (Romen 1:20) Nou kapab klerman vwar levidans Kreater dan son bann travay. Alor Pol pe dir ki depi okonmansman legzistans imen, i’n posib pour imen “konn” bann levidans lo legzistans Bondye par mwayen bann keksoz ki nou vwar dan kreasyon. Oli sa bann levidans?

8. (a) Ki mannyer sa lesyel ki nou vwar i montre pwisans ek lasazes Bondye? (b) Kwa ki montre ki liniver in bezwen annan en Premye Lakoz?

⁸ Ler nou get sa lesyel ranpli avek zetwal nou vwar levidans Bondye. Psonm 19:1 i dir: “Lesyel pe anons laglwar Bondye.” “Lesyel” savedir soley, lalin, ek zetwal i montre pwisans ek lasazes Bondye. Nou ranpli avek ladmirasyon ler nou get sa gran kantite zetwal. Deplis, tou sa bann keksoz i deplase dan lesyel dapre bann lalwa presi, me pa an bonnavini. * (Izai 40:26) Eski i fer sans pour dir ki sa bann keksoz in arive zis par azar lo li menm? I enteresan pour dir ki bokou syantis i dir ki liniver ti annan en konmansman. Ki sa i enplike? En profeser ti eksplike: ‘En liniver ki’n toultan egziste i fer bann dimoun ki pa krwar dan Bondye plezir e zot aksepte sa lide. Pareyman, en liniver ki soudennman in konmanse i vedir ki i bezwen annan en keksoz par deryer; parski personn pa pou mazin en tel lefe san en lakoz par deryer.’

9. Ki mannyer lasazes Zeova i evidan dan bann zannimo?

⁹ Nou osi vwar levidans Bondye lo later. En psalmis ti proklanmen: “Pa ou bann travay i bokou, O Zeova! Ou’n fer zot tou avek lasazes. Later i ranpli avek tou sa ki ou’n fer.” (Psonm 104:24) Sa ki Zeova in fer, enkli bann zannimo i levidans son lasazes. Parey nou’n mansyonnen okonmansman, bann keksoz dan lanatir in telman ganny byen fer ki lasyans i souvan esey kopye sa bann keksoz. Annou vwar detrwa lezot legzanp. Bann serser pe etidye korn bann serf avek bi pour fer bann elmet pli for; zot pe egzamin en kalite mous ki  annan en tre bon abilite pour tande avek lentansyon pour amelyor sa lekipman ki ed dimoun tande. Zot pe osi egzamin plim lezel ibou avek lide pour amelyor bann avyon ki radar pa kapab detekte. Me esey tou zot seye, zonm pa kapab vreman kopye bann orizinal parfe ki annan dan lanatir. Liv Biomimicry—Innovation Inspired by Nature i fer resorti: “Bann keksoz dan lanatir in fer tou keksoz ki nou imen nou anvi fer, pa konsonm bennzin, pa polye later oubyen met an danze zot lavenir.” Sa i vreman lasazes!

10. Akoz i pa fer sans pour rezet legzistans en Gran Kreater? Eksplike.

¹⁰ Ki swa ou get lesyel oubyen obzerv bann kreasyon isi lo later, levidans en Kreater i tre evidan. (Zeremi 10:12) Nou devret antyerman dakor avek bann lanz ki sante: “Nou Senyer, nou Bondye, ou merite resevwar laglwar, loner ek pisans, parski ou’n kree tou keksoz, e se par ou lavolonte ki zot egziste e ki zot in ganny kree.” (Revelasyon 4:11) Pourtan, bokou syantis pa arive vwar levidans en Kreater avek ‘lizye zot leker,’ menm si zot kapab apresye bann keksoz dan lanatir avek zot de lizye. (Efezyen 1:18) Nou kapab eksplik li koumsa: Pour admir labote ek kreativite dan lanatir e rezet legzistans en Gran Kreater i pa fer sans, zis parey i pa fer sans pour admir en zoli tablo e anmenmtan pa aksepte legzistans sa artis ki’n pran en bout papye vid e desin en zoli desen lo la. I pa sirprenan ki Labib i dir ki bann dimoun ki refize krwar dan Bondye i “san okenn lekskiz.”

Bann Gid aveg i anbet bokou Dimoun

11, 12. Lansennyman predestinasyon i baze lo ki krwayans, e kwa ki montre ki sa lansennyman pa glorifye Bondye?

¹¹ Bokou dimoun relizye i senserman krwar ki zot pe donn Bondye laglwar par zot fason ador Bondye. (Romen 10:2, 3) Me larelizyon i en lot laspe dan sosyete ki an realite anpes plizyer milyon dimoun glorifye Bondye. Ki mannyer sa i posib? Annou egzamin de fason.

¹² Premyerman, larelizyon i fer Bondye pa ganny laglwar par mwayen bann fo lansennyman. Pran par egzanp sa lansennyman predestinasyon. Sa lansennyman i baze lo sa krwayans ki akoz Bondye i annan sa pouvwar pour konn lavenir, i devret konn davans rezilta tou keksoz. Sa krwayans i alor sizere ki depi byen lontan Bondye in fini konn lavenir sak dimoun ki swa i pou bon oubyen move. Dapre sa konsep, Bondye ki bezwen ganny blanmen pour tou soufrans ek mesanste ki arive dan lemonn ozordi. Ler imen i met blanm lo Bondye kan sa ler son gran adverser Satan ki devret ganny blanmen, sa enn ki Labib i dir i “gouvern lemonn,” sa pa ditou glorifye Bondye!—Zan 14:30; 1 Zan 5:19.

13. Akoz i bet pour krwar ki Bondye pa kapab kontrol son abilite pour konn lavenir? Donn en legzanp.

¹³ Predestinasyon i en lansennyman ki pa baze lo Labib e i kalonmni Bondye. I konfiz sa ki Bondye i kapab fer avek sa ki i fer an realite. Labib i montre klerman ki Bondye i kapab konn davans bann levennman. (Izai 46:9, 10) Me i pa fer sans pour mazinen ki i pa kapab kontrol son abilite pour konn lavenir oubyen ki i responsab pour tou keksoz ki arive. Annou vwar en legzanp pour montre sa. Meton ou ti annan en kantite lafors. Eski sa ti pou fer ou anvi lev tou keksoz lour ki ou vwar? Byensir ou pa pou anvi fer sa! Pareyman, annan sa abilite pour konn lavenir pa pous Bondye pour konn davans oubyen predir tou keksoz. I swazir kan i pou servi son abilite e i fer li avek diskresyon *. Klerman, bann fo lansennyman enkli predestinasyon pa glorifye Bondye.

14. Dan ki fason larelizyon in dezonnor Bondye?

¹⁴ En dezyenm fason ki larelizyon i dezonnor Bondye i atraver kondwit bann dimoun dan sa bann larelizyon. Bann Kretyen i devret swiv lansennyman Zezi. Par egzanp, Zezi ti ansenny son bann disip pour “kontan kanmarad” e pour “pa fer parti lemonn.”  (Zan 15:12; 17:14-16) Ki levidans i montre konsernan bann sef relizye sa bann larelizyon dan sa laspe? Eski zot in vreman swiv sa bann lansennyman?

15. (a) Ki repitasyon bann sef relizye i annan konsernan bann lager dan sa lemonn? (b) Ki lefe zot kondwit in fer lo plizyer milyon dimoun?

¹⁵ Annou get repitasyon bann sef relizye konsernan lager. Zot in siport, ankouraz e menm pran par dan sa bann lager. Zot in beni bann larme e zistifye sa bann masak. Nou demann nou lekor, ‘Eski sa bann pret pa mazinen ki zot konpatriyot lo lot kote fron batay pe fer menm keksoz avek zot?’ (Vwar bwat “Lo ki Kote Bondye i ete?”) Bann sef relizye pa glorifye Bondye ler zot proklanmen ki Bondye pe siport sa bann lager kriyel. Zot osi pa donn Bondye laglwar ler zot dir ki bann standar Labib nepli pratik e osi ankouraz bann kondwit seksyel imoral. Wi zot vreman fer nou mazin bann sef relizye ki Zezi ti apel zot bann “ki pratik lemal” e “bann aveg ki pe kondir” lezot! (Matye 7:15-23; 15:14) Plizyer milyon dimoun pe perdi zot lanmour pour Bondye akoz kondwit bann sef relizye.—Matye 24:12.

Lekel ki pe vreman donn Bondye Laglwar?

16. Akoz nou devret get dan Labib pour reponn sa kestyon lekel ki pe vreman donn Bondye laglwar?

¹⁶ Si bann dimoun enportan dan sa lemonn pa’n arive donn Bondye laglwar, alor lekel ki pe vreman fer li? Pour reponn sa kestyon, nou bezwen al dan Labib. Apre tou, Bondye i annan tou drwa pour dir ki mannyer i devret ganny glorifye, e i etablir bann standar dan son Parol, Labib. (Izai 42:8) Annou egzamin trwa fason pour glorifye Bondye, e dan sak ka nou pou konsider sa kestyon, ‘Lekel ki pe vreman fer sa ozordi?’

17. Ki mannyer Zeova li menm ti montre ki glorifye son non i en laspe enportan son lavolonte, e lekel ozordi ki pe loue non Bondye partou lo later?

¹⁷ Premyerman, nou glorifye Bondye par loue son non. Sa ki Zeova ti dir Zezi i montre ki loue non Bondye i en laspe tre enportan dan son lavolonte. Detrwa zour avan i ti mor, Zezi ti priye: “Papa glorifye ou non.” Apre en lavwa ti reponn: “Mon’n deza glorifye li e mon pou glorifye li ankor.” (Zan 12:28) San dout se Zeova ki ti koze. Atraver son larepons, i kler ki glorifye son non i en keksoz enportan pour li. Alor, lekel ozordi ki pe glorifye Zeova par fer lezot konn son non e loue son non partou lo later? Temwen Zeova pe fer sanmenm e zot pe fer li dan 235 pei!—Psonm 86:11, 12.

18. Ki mannyer nou kapab idantifye sa bann ki pe ador Bondye avek laverite e lekel sa group ki’n ansenny laverite Labib pour plis ki 100 an?

¹⁸ Dezyenmman, nou kapab glorifye Bondye par ansenny laverite lo li. Zezi ti dir ki bann vre adorater pou ‘ador [Bondye] an verite.’ (Zan 4:24) Ki mannyer nou kapab idantifye sa bann ki pe ador Bondye avek laverite? Zot bezwen rezet bann lansennyman ki pa baze lo Labib e ki mal reprezant Bondye ek  son lavolonte. Okontrer, zot bezwen ansenny senpleman laverite lo Parol Bondye. Par egzanp: Zeova i Bondye Tou Pwisan, e zis li tousel ki ganny sa laglwar konman tre o (Psonm 83:18); Zezi i Garson Bondye e Dirizan dan Rwayonm Mesyanik Bondye (1 Korentyen 15:27, 28); Rwayonm Bondye pou glorifye non Zeova e akonpli son plan pour later ek imen (Matye 6:9, 10); sa bon nouvel konsernan sa Rwayonm i bezwen ganny prese partou lo later. (Matye 24:14) Pour plis ki 100 an, zis en sel group ki’n fidelman ansenny sa bann laverite presye—Temwen Zeova!

19, 20. (a) Akoz kondwit en Kretyen i kapab anmenn laglwar pour Bondye? (b) Ki kestyon ki kapab ed nou pour konnen lekel ozordi ki pe glorifye Bondye par gard en bon kondwit?

¹⁹ Trwazyenmman, nou kapab glorifye Bondye par viv an armoni avek son standar. Zapot Pyer ti ekrir: “Zot devre annan bonn kondwit parmi bann payen pour ki ler zot ganny akize pour mal fer, bann payen a rekonnet zot bonn aksyon e rann glwar Bondye zour i pou vini.” (1 Pyer 2:12) Kondwit en Kretyen i reflekte lo son lafwa. Ler sa bann ki pe obzerve i fer sa konneksyon—savedir, ler zot vwar ki bon kondwit en Kretyen i relye direkteman avek son lafwa—sa i anmenn laglwar pour Bondye.

²⁰ Lekel ozordi ki pe glorifye Bondye par gard en bon kondwit? Lekel sa group relizye ki bokou gouvernman in felisite konman bann sitwayen anpe, ki obeir lalwa e ki pey zot taks? (Romen 13:1, 3, 6, 7) Lekel sa group dimoun ki renonmen dan lemonn pour zot linite antre kanmarad—en linite ki ganny laviktwar lo diferans rasyal, nasyonal ek etnik? (Psonm 133:1; Akt 10:34, 35) Ki sa group ki ganny rekonnet partou dan lemonn pour zot travay ledikasyon lo Labib ki promot respe pour lalwa, valer fanmiy, ek moralite Labib? I annan zis en group ki son bon kondwit dan sa bann laspe ek lezot i koz pour li menm—Temwen Zeova!

Eski ou pe donn Bondye Laglwar?

21. Akoz nou devret egzaminen si nou menm nou pe donn Zeova laglwar?

²¹ I ti ava bon si nou tou nou demande, ‘Eski mwan personnelman, mon pe donn Zeova laglwar?’ Dapre Psonm 148, laplipar kreasyon i donn Bondye laglwar. Bann lanz, lesyel, later ek bann zannimo lo la—zot tou zot loue Zeova. (Verse 1-10) I malere pour dir ki laplipar imen ozordi pa pe fer sa! Par viv dan en fason ki donn Bondye laglwar, ou an armoni avek larestan kreasyon ki pe loue Zeova. (Verse 11-13) Napa en lot pli bon fason pour servi ou lavi.

22. Dan ki fason ou pou ganny beni par donn Bondye laglwar, e ki ou devret determinen pour fer?

²² Ler ou donn Zeova laglwar ou ganny beni dan bokou fason. Kan ou demontre lafwa dan sakrifis Kris, ou rekonsilye avek Bondye e rezwir en relasyon anpe e satisfezan avek ou Papa dan lesyel. (Romen 5:10) Ler ou rod rezon pour donn Bondye laglwar, ou pou vin pli pozitif e annan plis lapresyasyon. (Zeremi 31:12) Apre sa, ou pou dan en pozisyon pour ed lezot viv en lavi ere e satisfezan, e sa pou anmenn plis lazwa pour ou. (Akt 20:35) Nou swete ki ou pou parmi sa bann ki determinen pour donn Bondye laglwar—konmela e pour touzour!

[Not anba lo paz]

Eski ou rapel?

• Akoz nou kapab dir ki bann syantis an zeneral pa’n ed dimoun pour glorifye Bondye?

• Ki sa de fason ki larelizyon in anpes dimoun donn Bondye laglwar?

• Dan ki fason nou kapab glorifye Bondye?

• Akoz ou devret egzaminen si ou pe personnelman donn Zeova laglwar?

[Kestyon]

[Bwat lo paz 26]

“Lo ki Kote Bondye i ete?”

En zonm ki ti lager dan Larme-d-ler Alman pandan Dezyenm Lager Mondyal me ki plitar ti vin en Temwen Zeova i rakonte:

“Sa ki ti fatig mwan plis pandan sa bann lannen lager . . . se vwar bann pret preski tou larelizyon—Katolik, Literyen, Episkopal, ek lezot—beni bann avyon ek zot lekipaz avan zot al lo zot misyon pour larg bonm. Souvan mon ti mazinen, ‘Lo ki kote Bondye i ete?’

“Bann larme Alman ti met en sang avek en bouk avek sa mo Gott mit uns (Bondye i avek nou) ekrir lo la. Me mon ti reflesir, ‘Akoz Bondye pa pou avek bann solda lo lot kote ki ti dan menm larelizyon avek nou e ki ti pe priy menm Bondye?’ ”