“Met lo zot tou bann Lekipman Batay ki Bondye i donnen”

“Met lo zot tou bann lekipman batay ki Bondye i donnen, pour ki zot a kapab reziste kont tou bann riz Dyab.”—EFEZYEN 6:11.

1, 2. Dekrir dan ou prop mo sa lekipman batay ki bann Kretyen i bezwen mete.

RONM ti lo pik son pouvwar pandan premye syek nou lepok. Lafors militer Romen ti permet sa lavil ganny kontrol lo en bon parti sa lemonn ki zot ti konnen sa letan. En istoryen ti dekrir sa lafors militer konman “lorganizasyon militer ki’n pli reisi dan listwar.” Lafors militer profesyonnel Ronm ti konpoze avek bann solda vreman disiplinen ki ti fer bokou lantrennman. Me zot sikse konman en lafors militer efikas ti osi depan lo zot lekipman batay. Zapot Pol ti servi lekipman batay en solda Romen pour ilistre lekipman spirityel ki bann Kretyen i bezwen pour kapab lager avek Dyab.

² Nou trouv en deskripsyon sa lekipman batay dan Efezyen 6:14-17. Pol ti ekrir: “Zot bezwen . . . tenir zot tou letan pare: pran laverite konman en sang otour zot leren; pran ladrwatir konman en proteksyon lo zot pwatrin; met lentere pour anons levanzil konman en soulye dan zot lipye. Touzour pran lafwa konman en proteksyon ki en boukliye i donnen. Avek sa zot a kapab tenny dife tou bann dart alimen ki Dyab i anvoye. Pran osi konman kas lo zot latet delivrans ki Bondye i donnen, e pran Laparol Bondye konman en lepe ki Lespri i donnen.” Dapre en pwennvi imen, sa lekipman batay ki Pol ti dekrir ti servi konman en bon proteksyon pour en solda Romen. Apre i ti osi annan en lepe, ki ti son zouti prensipal ki i servi pour lager avek.

3. Akoz nou devret obeir lenstriksyon Zezi Kri e swiv son legzanp?

³ Apard lekipman ek lantrennman, sikse bann larme Romen ti depan lo lobeisans bann solda anver zot komandan. Pareyman, bann Kretyen i bezwen obeir Zezi Kri, ki Labib i dekrir konman “komandan bann pep.” (Izai 55:4) I osi ‘sef kongregasyon.’ (Efezyen 5:23) Zezi i donn nou lenstriksyon konsernan nou batay spirityel e i fourni en bon legzanp konman pour met nou lekipman batay. (1 Pyer 2:21) Vi ki en personnalite parey Kris i annan bokou keksoz an komen avek nou lekipman batay, Labib i konsey nou pour “arme” avek menm leta lespri ki Kris. (1 Pyer 4:1) Anmezir ki nou  egzamin sak pyes nou lekipman batay, nou pou servi legzanp Zezi pour montre son lenportans ek son lefikasite.

Protez Leren, Pwatrin, ek Lipye

4. Dan ki fason en sentir ti itil dan lekipman batay en solda, e ki sa i montre?

⁴ Pran laverite konman en sang otour zot leren. Dan letan Labib, bann solda ti met en sang oubyen sentir an kwir, ki ti kapab 5 a 15 santimet larzer. Sang en solda ti ede protez son leren, e i ti fourni en bon sipor pour tenir son lepe. Kan en solda ti ser son leren, i ti pe met li pare pour al lager. Pol ti servi sang en solda pour montre ki degre laverite dan Labib i devret enfliyans nou lavi. Dan en sans, i devret byen sere otour nou, pour nou viv an armoni avek laverite e toultan pare pour defann li. (Psonm 43:3; 1 Pyer 3:15) Pour arive fer sa, nou bezwen etidye Labib seryezman e reflesir lo sa ki nou lir. Lalwa Bondye ti ‘byen profon’ dan Zezi. (Psonm 40:8) Kan bann ki ti opoz li ti kestyonn li, i ti kapab reponn par rapel sa ki Lekritir i dir.—Matye 19:3-6; 22:23-32.

5. Eksplike konman konsey dan Labib i kapab ed nou ler nou ganny tante oubyen dan difikilte.

⁵ Kan nou les laverite dan Labib gid nou, i kapab protez nou kont bann fo rezonnman e fer nou fer bann bon desizyon. Ler nou ganny tante oubyen rankontre difikilte, bann gidans dan Labib pou fer nou pli determinen pour fer sa ki byen. Anfet, nou pou vwar nou Gran Enstrikter, Zeova, e nou pou tann en parol deryer nou pe dir: “La sa semen. Mars lo la.”—Izai 30:20, 21.

6. Akoz nou leker senbolik i bezwen proteksyon, e konman ladrwatir i kapab byen protez li?

⁶ Ladrwatir konman en proteksyon lo zot pwatrin. Sa proteksyon ki bann solda ti mete lo zot pwatrin, ti protez zot leker, en lorgann vreman enportan. Nou leker senbolik, sa ki nou ete anndan, i bezwen proteksyon spesyal akoz i annan tandans pour fer sa ki mal. (Zenez 8:21) Nou bezwen alor konn e kontan bann standar drwat Zeova. (Psonm 119:97, 105) Nou lanmour pour sa ki drwat i fer nou rezet bann fason panse lemonn ki inyor oubyen minimiz lenportans bann gidans kler Zeova. Deplis, kan nou kontan sa ki byen e ay sa ki mal, nou evite viv dan en fason ki kapab gat nou lavi. (Psonm 119:99-101; Amos 5:15) Zezi i egzanpler dan sa domenn, parski Labib i dir konsernan li: “Ou kontan lazistis, e ou ay mesanste.”—Ebre 1:9. *

7. Akoz en solda Romen ti bezwen en bon soulye, e ki sa i montre?

⁷ Lentere pour anons levanzil konman en soulye dan zot lipye. Bann solda Romen ti bezwen bann soulye ki dirab oubyen bann sandalet for, vi ki pandan en loperasyon, zot ti souvan mars 30 kilomet sak zour oubyen anmenn lekipman batay ki pez anviron 27 kilo. Pol ti servi soulye pour reprezant nou lentere pour pres mesaz Rwayonm avek tou sa ki oule ekoute. Sa i enportan  akoz ki mannyer dimoun pou konn Zeova si nou pa pare e anvi prese?—Romen 10:13-15.

8. Ki mannyer nou kapab imit legzanp Zezi konman en proklanmater sa bon nouvel?

⁸ Ki aktivite ki ti pli enportan pour Zezi? I ti dir Gouverner Pons Pilat: ‘Mon’n vin dan lemonn pour servi konman temwen pour laverite.’ Zezi ti pres partou kot i ti zwenn en dimoun ki pare pour ekoute, e i ti telman kontan son minister ki i ti konsider li pli enportan ki son bann bezwen fizik. (Zan 4:5-34; 18:37) Si parey Zezi, nou annan en gran dezir pour anons sa bon nouvel, nou pou trouv bokou loportinite pour partaz li avek lezot. Deplis, ler nou antyerman okipe dan nou minister, i pou ed nou reste for spirityelman.—Akt 18:5.

Boukliye, Kas, ek Lepe

9. Ki proteksyon en solda Romen ti gannyen avek en gran boukliye?

⁹ Lafwa konman en proteksyon ki en boukliye i donnen. Sa mo Grek ki’n ganny tradwir la konman “boukliye” pe refer avek en boukliye ki ti ase larz pour kouver preski lekor antye en solda. I ti pou kapab protez en dimoun kont “bann dart alimen” ki Efezyen 6:16 i mansyonnen. Dan letan Labib, bann solda ti servi bann dart ki ti ganny fer avek bann pti kalite banbou ki ti annan en kre ladan. Zot ti atas bann pti resipyan an fer avek e ladan zot ti met en kalite delwil anflanmen. En spesyalis i dekrir sa bann dart konman “enn bann zarm pli danzere ki ti ganny servi dan lager lontan.” Si en solda ti napa en gran boukliye pour protez li kont sa bann dart, i ti kapab ganny gravman blese e menm ganny touye.

10, 11. (a) Ki “dart alimen” Satan i servi pour afebli nou lafwa? (b) Ki mannyer legzanp Zezi i montre lenportans annan lafwa kan nou rankontre difikilte?

 ¹⁰ Ki “dart alimen” Satan i servi pour afebli nou lafwa? I kapab ankouraz persekisyon oubyen lopozisyon dan fanmiy, dan travay, oubyen kot lekol. Pour serten, sa dezir pour ganny plis keksoz materyel ek imoralite seksyel in anmenn larin spirityel pour zot. Pour protez nou lekor kont sa bann danze, nou bezwen “touzour pran lafwa konman en proteksyon ki en boukliye i donnen.” Nou devlop lafwa ler nou aprann konsernan Zeova, kominik avek li dan lapriyer regilyerman, e rekonnet konman ki i protez e beni nou.—Zozye 23:14; Lik 17:5; Romen 10:17.

¹¹ Kan Zezi ti lo later, i ti montre lenportans annan en lafwa for dan bann letan kritik. I ti met tou son konfyans dan desizyon son Papa e i ti kontan fer lavolonte Bondye. (Matye 26:42, 53, 54; Zan 6:38) Menm kan i ti anba bokou presyon dan zarden Zetsemane, Zezi ti dir avek son Papa: “Pa selon mon lavolonte me selon ou lavolonte.” (Matye 26:39) Zezi pa ti zanmen oubliy lenportans reste fidel e fer son Papa kontan. (Proverb 27:11) Si nou annan menm konfyans dan Zeova, nou pa pou les kritik ouswa lopozisyon afebli nou lafwa. Okontrer, nou lafwa pou vin pli for si nou depan lo Bondye, montre ki nou kontan li, e gard son komannman. (Psonm 19:7-11; 1 Zan 5:3) Napa okenn benefis materyel oubyen okenn plezir tanporer ki kapab ganny konpare avek bann benediksyon ki Zeova  in anmase pour bann ki kontan li.—Proverb 10:22.

12. Ki parti enportan ki nou kas senbolik i proteze, e akoz sa kalite proteksyon i enportan?

¹² Pran osi konman kas lo zot latet delivrans ki Bondye i donnen. En kas i protez latet ek laservel en solda—landrwa kot son lentelizans i baze. Nou lesperans Kretyen i ganny konpare avek en kas akoz i protez nou lespri. (1 Tesalonisyen 5:8) Kantmenm nou’n sanz nou mantalite gras a sa konnesans egzakt ki nou’n gannyen dan Parol Bondye, nou ankor touzour bann imen enparfe e nou annan nou febles. Nou lespri i kapab fasilman ganny koronpi. Bann lobzektif sa lemonn i kapab pran nou lentere oubyen menm ranplas nou lesperans ki Bondye in donn nou. (Romen 7:18; 12:2) Dyab ti sey anven pour anpes Zezi konsantre lo son lobzektif par ofer li “tou bann rwayonm partou lo later.” (Matye 4:8) Me Zezi ti rezet son lof deswit, e Pol ti dir sa lo li: “Akoz sa lazwa ki ti ganny plase devan li, i ti siport en poto siplis, san pran kont laont, e i’n asiz lo kote drwat tronn Bondye.”—Ebre 12:2, NW.

13. Ki mannyer nou kapab kontinyen annan konfyans dan sa lesperans ki devan nou?

¹³ Sa kalite konfyans ki Zezi ti annan pa vin otomatik. Si nou ranpli nou lespri avek bann rev oubyen bann lobzektif sa lemonn olye gard antet nou lesperans, nou lafwa dan promes Bondye pou afebli. Avek letan, nou kapab menm perdi nou lesperans konpletman. De lot kote, si nou regilyerman reflesir lo promes Bondye, nou lesperans ki devan nou pou gard nou lazwa.—Romen 12:12.

14, 15. (a) Ki sa lepe senbolik ki nou annan, e konman nou kapab servi li? (b) Montre konman lepe ki lespri i donnen i kapab ed nou reziste tantasyon.

¹⁴ Laparol Bondye konman en lepe ki Lespri i donnen. Parol oubyen mesaz Bondye ki’n ganny rikorde dan Labib, i parey en lepe pwisan ki koup de kote e ki kapab retir bann mansonz relizye. I osi ed bann dimoun senser ganny libere spirityelman. (Zan 8:32; Ebre 4:12) Sa lepe spirityel i osi kapab defann nou kan nou ganny tante oubyen kan bann aposta i oule detri nou lafwa. (2 Korentyen 10:4, 5) Pa nou rekonesan ki ‘tou Lekritir i enspire par Bondye e i itil pour byen ekip nou pour fer tou aksyon ki bon’!—2 Timote 3:16, 17.

¹⁵ Kan Satan ti tant li dan dezer, Zezi ti byen servi lepe ki Lespri i donnen pour repous son bann fo rezonnman ek bann tantasyon rize. Sak fwa ki Satan ti teste li, Zezi ti reponn: “I’n ekri.” (Matye 4:1-11) David, en Temwen Zeova ki reste Lespanny, ti vwar li osi konman Labib ti ed li sirmont en tantasyon. Kan i ti annan 19 an, en zoli fiy ki ti travay dan menm lakonpanni avek li ti sizere ki zot “pas en bon moman ansanm.” David ti rezet son lapros e demann son soupervayzer pour li travay dan en lot departman pour ki sa sitiasyon pa repet ankor. David ti dir: “Mon ti mazin legzanp Zozef. I ti rezet imoralite e kit sa landrwa. Mwan osi mon’n fer parey.”—Zenez 39:10-12.

16. Eksplike akoz nou bezwen formasyon pour kapab ‘anons byen laverite.’

¹⁶ Zezi ti osi servi lepe ki lespri i donnen  pour ed lezot pour sorti anba pouvwar Satan. Zezi ti dir: “Lansennyman ki mon donnen i pa mon prop lansennyman, me i sorti kot Bondye ki’n anvoy mwan.” (Zan 7:16) Pour imit sa bon fason ki Zezi ti ansennyen, nou bezwen ganny formasyon. Konsernan bann solda Romen, Josephus, en istoryen Zwif ti ekrir: “Tou solda i fer legzersis toulezour, e zot vreman serye dan zot legzersis, konmsi zot dan konba menm. Sa i en rezon akoz zot kapab fasilman kontinyen lager malgre lafatig.” Dan nou lager spirityel, nou bezwen servi Labib. Deplis, nou bezwen ‘fer tou pour akseptab devan Bondye konman en zouvriye ki napa nanryen pour onte me ki anons byen mesaz laverite.’ (2 Timote 2:15) Pa nou satisfe kan nou servi Labib pour reponn kestyon en dimoun enterese!

Priye toultan

17, 18. (a) Ki mannyer lapriyer i ede reziste Satan? (b) Donn en legzanp pour montre valer lapriyer.

¹⁷ Apre ki i’n diskit lo sa bann lekipman batay, Pol i donn en lot konsey enportan. Pour reziste Satan, bann Kretyen i bezwen byen profit sa dispozisyon ki zot annan pour ‘priye e sipliy Bondye pour son led.’ Ki kantite fwa zot bezwen priye? Pol ti ekrir: “Priye dan tou sirkonstans.” (Efezyen 6:18) Kan nou rankontre tantasyon, leprev, oubyen dekourazman, lapriyer i kapab fortifye nou en kantite. (Matye 26:41) Zezi ti “ofer son lapriyer ek son siplikasyon, avek leokri ek larm, sa enn ki ti kapab sov li dan lanmor. Annefe, Bondye ti egzos li akoz son lobeisans.”—Ebre 5:7.

¹⁸ Pour plis ki 15 an, Milagros ti pran swen avek son msye ki ti annan en maladi kronik. I dir: “Kan mon dekouraze, mon apros Zeova dan lapriyer. Napa personn ankor ki pli kapab ed mwan ki li. I vre ki i annan bann moman ki mon santi mon nepli kapab kontinyen. Me plizyer fwa, apre ki mon’n priy Zeova, mon santi ki mon reganny mon lafors ek mon moral ankor.”

19, 20. Ki nou bezwen pour sorti viktorye dan nou konba avek Satan?

¹⁹ Dyab i konnen ki son letan i kourt, e i pe fer bokou plis zefor pour ganny nou. (Revelasyon 12:12, 17) Nou bezwen reziste sa lennmi vreman for e “konbat sa bon konba dan lafwa.” (1 Timote 6:12) Pour arive fer sa, nou bezwen sa lafors ki napa son parey. (2 Korentyen 4:7) Nou osi bezwen led lespri sen Bondye e nou devret priye pour ganny li. Zezi ti dir: “Si, zot, move konman zot ete, zot kapab donn bon keksoz zot zanfan, i annan plis rezon pour ki zot Papa ki dan lesyel pou donn son Lespri Sen tou bann ki demann li.”—Lik 11:13.

²⁰ I kler alor ki i tre enportan ki nou met tou nou lekipman batay ki Zeova i donn nou. Met sa lekipman batay i vedir devlop bann kalite ki fer plezir Bondye, parey lafwa ek ladrwatir. Nou osi bezwen kontan laverite konmsi nou’n ganny anvlope avek li, pare pour partaz sa bon nouvel dan tou lokazyon, e gard sa lespwar ki devan nou fre dan nou lespri. Nou bezwen aprann byen servi lepe ki lespri i donnen. Letan nou met tou nou lekipman batay ki Bondye i donnen, nou kapab sorti viktorye dan nou lalit kont pouvwar bann move lespri e vreman anmenn laglwar lo non sen Zeova.—Romen 8:37-39.

[Not anba lo paz]

Ki ou pou reponn?

• Lekel ki donn pli bon legzanp an se ki konsern met sa lekipman batay, e akoz nou devret egzamin byen son legzanp?

• Ki mannyer nou kapab protez nou lespri ek leker?

• Ki mannyer nou kapab byen servi lepe ki lespri i donnen?

• Akoz nou devret kontinyen priye dan tou lokazyon?

[Kestyon]

[Portre lo paz 19]

Etidye Labib seryezman i kapab motiv nou pour anons sa bon nouvel dan tou lokazyon

[Portre lo paz 20]

Nou lespwar solid i ed nou fer fas avek leprev

[Portre lo paz 21]

Eski ou servi “lepe ki Lespri i donnen” dan predikasyon?