Bann Serviter Zeova ki ere
Bann Serviter Zeova ki ere
“Ere bann ki konsyan zot bezwen spirityel.”—MATYE 5:3, NW.
1. Kisisa vre boner e ki i endike?
BONER i en keksoz presye ki pep Zeova i seri. Psalmis David ti dir: “Ere sa pep ki son Bondye i Zeova!” (Psonm 144:15) Boner i en santiman ki nou pe byen fer. Sa pli gran boner i ariv ziska ofon nou leker, e sa i posib akoz nou konsyan ki Zeova pe beni nou. (Proverb 10:22) Sa kalite boner i endike ki nou annan en relasyon pros avek nou Papa dan lesyel e ki nou konsyan nou pe fer son lavolonte. (Psonm 112:1; 119:1, 2) I enteresan pour note ki Zezi ti nonm nef rezon akoz nou kapab ere. Dan sa lartik nou pou egzamin bann rezon akoz nou kapab ere e sa lot lartik pou ed nou realize ki kantite ere nou kapab ere si nou fidelman servi sa “Bondye ere,” Zeova.—1 Timote 1:11, NW.
Konsyan nou Bezwen spirityel
2. Ki lokazyon Zezi ti koz konsernan boner, e ki premye parol i ti dir?
2 Dan lannen 31 N.L., Zezi ti donn enn bann diskour ki pli popiler dan listwar. I apel Sermon lo montanny, parski Zezi ti donn sa diskour lo en montanny obor Lanmer Galile. Levanzil ki Matye ti ekrir i dir: “Kan Zezi ti war sa lafoul i ti mont lo en montanny e i ti asize. Son bann disip ti vin otour li e i ti konmans ansenny zot, an dizan: ‘Byennere bann ki pov an-espri, akoz Rwayonm Lesyel i pour zot.’ ” “Ere bann ki pe mandyan keksoz spirityel.” (Matye 5:1-3, Nou ki’n met an italik; Kingdom Interlinear; not anba paz) Today’s English Version i dir: “Ere sa bann ki konnen zot pov spirityelman.”
3. Ki mannyer ler nou annan limilite i ede pour nou vin ere?
3 Dan son sermon lo montanny, Zezi ti fer resorti ki en dimoun i pli ere si i konsyan son bezwen spirityel. Bann Kretyen ki annan limilite i konn tre byen ki zot fer pese, alor zot sipliy Zeova pour pardonn zot lo baz sakrifis ranson ki Kris in fer. (1 Zan 1:9) An retour zot ganny lape lespri ek vre boner. “Ere sa enn ki’n ganny pardonnen pour son rebelyon, sa enn ki son pese in ganny kouver.”—Psonm 32:1; 119:165.
4. (a) Ki mannyer nou kapab montre ki nou konsyan nou bezwen spirityel ek bezwen spirityel lezot? (b) Ki mannyer nou ganny plis boner ler nou konsyan nou bezwen spirityel?
4 Ler nou konsyan nou bezwen spirityel, sa i pous nou pour lir Labib toulezour, pour vreman benefisye atraver nouritir spirityel ki “lesklav fidel e pridan” i donn nou “dan letan apropriye.” I osi pous nou pour asiste renyon regilyerman. (Matye 24:45, NW; Psonm 1:1, 2; 119:111; Ebre 10:25) Lanmour pour nou prosen i fer nou konsyan bezwen spirityel lezot e i pous nou pour pres e ansenny sa bon nouvel konsernan sa Rwayonm avek devouman. (Mark 13:10; Romen 1:14-16) Kan nou partaz laverite dan Labib avek lezot sa i anmenn bokou lazwa. (Akt 20:20, 35) Nou boner i ogmant plis ankor ler nou reflesir lo sa lespwar merveye konsernan sa Rwayonm ek bann benediksyon ki i pou anmennen. Pour sa “pti troupo,” ki bann Kretyen swazir, zot annan lespwar pour ganny lavi eternel dan lesyel pour form parti dan Rwayonm Kris. (Lik 12:32; 1 Korentyen 15:50, 54) Me lezot “mouton,” zot annan lespwar pour viv pour touzour dan paradi lo later anba sa Rwayonm.—Zan 10:16; Psonm 37:11; Matye 25:34, 46.
Ki mannyer bann ki dan Latristes i kapab ere
5. (a) Ki savedir sa lekspresyon “bann ki dan latristes”? (b) Ki mannyer sa bann ki dan latristes i ganny konsole?
5 Sa lot mo ki Zezi ti servi pour montre kwa ki fer en dimoun ere i paret kontradiktwar. I ti dir: ‘Byennere bann ki dan latristes, akoz zot pou ganny konsole.’ (Matye 5:4) Ki mannyer en dimoun i kapab tris, me anmenmtan ere? Pour kapab konpran ki Zezi pe dir, nou bezwen rode ki kalite latristes i pe koz lo la. Disip Zak ti eksplike ki nou lenperfeksyon i devret fer nou tris. I ti ekrir: “Lav zot lanmen, zot ki komet pese, e pirifye zot leker, zot bann ipokrit. Rekonnet zot lamizer, plere e lamante. Sanz zot riye an pler, zot lazwa an tristes. Imilye zot devan Senyer e i ava elev zot.” (Zak 4:8-10) Bann ki vreman sagren akoz zot lenperfeksyon, i ganny rekonforte kan zot aprann ki zot pese i kapab ganny pardonnen. Sa i posib si zot demontre lafwa dan sakrifis ranson ki Kris in fer e montre ki zot in senserman repantir par fer lavolonte Zeova. (Zan 3:16; 2 Korentyen 7:9, 10) An retour zot kapab annan en relasyon ki presye avek Zeova e annan sa lespwar pour servi li e loue li pour touzour. Sa i anmenn pli gran boner pour zot.—Romen 4:7, 8.
6. Dan ki sans serten i dan latristes, e ki mannyer zot ganny konsole?
6 Sa ki Zezi ti dir i osi enkli bann ki dan latristes akoz sa kondisyon deplorab ki later i ladan. Zezi ti aplik sa profesi dan Izai 61:1, 2, lo li: “Lespri Souvren Senyer Zeova i lo mwan, akoz Zeova in swazir mwan pour anons bon nouvel bann dimoun dous. I’n anvoy mwan pour pans sa bann ki annan leker brize, . . . pour konsol tou bann ki an dey.” Sa travay i osi aplik avek bann Kretyen swazir ki ankor lo later. Zot fer li avek led zot bann konpanyon, lezot “mouton.” Zot tou zot partisip dan sa travay kot zot senbolikman met en mark lo fron “bann zonm ki pe zemir e plennyen akoz tou sa bann move keksoz ki pe arive dan milye sa lavil [Zerizalenm enfidel, ki pe reprezant Kretyente].” (Ezekyel 9:4) Sa bann ki dan latristes i ganny rekonforte par sa “Bonn Nouvel Rwayonm.” (Matye 24:14) Zot kontan pour konnen ki sa move sistenm ki pe ganny kontrole par Satan, pou tre byento ganny ranplase par nouvo lemonn drwat Zeova.
Byennere bann ki dous
7. Ki sa mo “dous” pa vedir?
7 Zezi ti kontiny son Sermon lo montanny par sa parol: ‘Byennere bann ki dou, akoz zot pou posed later.’ (Matye 5:5) Parfwa i annan ki panse ki ler en dimoun i dous i en febles. Antouka, sa i pa leka. Pour eksplik sans sa mo ki’n ganny tradwir dous, en spesyalis Labib ti ekrir: “Sa pli gran karakteristik dan en zonm ki [dous] se ki i en zonm ki kapab kontrol son lekor parfetman. I pa en dimoun ki mou, ki annan en leker feb e ki pa oule mel li dan nanryen. I en lafors anba kontrol.” Zezi ti dir sa lo son lekor: “Mon dou e mon annan limilite dan mon leker.” (Matye 11:29) Kantmenm sa, Zezi ti annan kouraz pour defann bann prensip drwat.—Matye 21:12, 13; 23:13-33.
8. Ki kalite ki relye pros avek ladouser e akoz nou bezwen sa kalite dan nou relasyon avek lezot?
8 Alor, ladouser i relye pros avek kontrol lo nou prop lekor. Annefe, ler zapot Pol ti nonm “fri lespri,” ladouser ek kontrol lo nou prop lekor ti ganny mete ansanm. (Galat 5:22, 23) Nou bezwen led lespri sen pour kapab devlop ladouser. Sa i en kalite dan en Kretyen ki kontribye pour prezerv lape avek dimoun ki napa menm krwayans avek li e avek bann dan kongregasyon. Pol ti ekrir: “Zot devre ranpli avek konpasyon, labonte, limilite, ladouser ek pasyans. Siport kanmarad, pardonn kanmarad sak fwa ki enn ant zot i ofans en lot.”—Kolosyen 3:12, 13.
9. (a) Akoz nou pa selman demontre ladouser dan nou relasyon avek lezot dimoun? (b) Ki mannyer bann ki annan ladouser i erit later?
9 Me nou pa selman demontre ladouser dan nou relasyon avek lezot dimoun. Par volonterman soumet avek dominasyon Zeova, nou demontre ki nou annan ladouser. Zezi Kri in donn en pli gran legzanp dan sa domenn. Kan i ti lo later i ti demontre ladouser ek soumisyon total anver lavolonte son Papa. (Zan 5:19, 30) Avan tou Zezi pou erit later, parski i sa enn ki’n ganny apwente pour diriz later. (Psonm 2:6-8; Danyel 7:13, 14) I pou partaz sa leritaz avek 144,000 lezot “zeritye,” ki’n ganny swazir parmi imen pour vin bann lerwa ki pou diriz later. (Romen 8:17; Revelasyon 5:9, 10; 14:1, 3, 4; Danyel 7:27) Kris avek sa bann ki pou dirize avek li, pou diriz plizyer milyon zonm ek fanm ki dous parey mouton. Sa parol profetik dan sa psonm pou akonpli lo zot: “Bann dimoun ki annan limilite pou reste lo later, e zot pou vreman tir bokou plezir dan labondans lape.”—Psonm 37:11; Matye 25:33, 34, 46.
Byennere bann ki lafen Ladrwatir
10. Nonm en fason konman bann ki ‘lafen e swaf ladrwatir’ i kapab rasazye.
10 Ler i ti pe koze lo montanny, Zezi ti dir en lot keksoz ki fer en dimoun ere. I ti dir: “Byennere bann ki lafen e swaf ladrwatir, parski zot pou rasazye.” (Matye 5:6, NW ) Pour bann Kretyen, Zeova i etablir standar pour ladrwatir. Alor, bann ki lafen e swaf ladrwatir, an realite zot lafen e swaf gidans Bondye. Sa bann dimoun koumsa i konn tre byen ki zot fer pese e ki zot enparfe, alor zot annan sa dezir pour ganny laprouvasyon Zeova. Zot vreman kontan kan zot aprann dan Parol Bondye ki si zot repantir e demann pardon lo baz sakrifis ranson Kris, zot pou ganny konsidere drwat devan Bondye!—Akt 2:38; 10:43; 13:38, 39; Romen 5:19.
11, 12. (a) Ki mannyer bann Kretyen swazir in ganny konsidere drwat? (b) Ki mannyer laswaf konpanyon bann Kretyen swazir i ganny satisfe?
11 Zezi ti dir ki sa bann dimoun pou ere parski zot pou “satisfe.” (Matye 5:6, Kingdom Interlinear) Pour bann Kretyen ki’n ganny swazir pour “dirize konman lerwa” ansanm avek Kris dan lesyel, Zeova in konsider zot ‘drwat pour ganny lavi.’ (Romen 5:1, 9, 16-18) Alor, Zeova i adopte zot konman bann garson spirityel. Zot vin zeritye ansanm avek Kris, zot in ganny apele pour vin bann lerwa ek pret dan son Rwayonm.—Zan 3:3; 1 Pyer 2:9.
12 Me Zeova pa ankor konfirmen si konpanyon bann Kretyen swazir i drwat pour ganny lavi. Kantmenm sa, devan Zeova zot drwat a en serten degre akoz zot lafwa dan disan Kris. (Zak 2:22-25; Revelasyon 7:9, 10) Zot in ganny konsidere drwat konman bann zanmi Zeova ki pou ganny delivre pandan “sa gran ladetres.” (Revelasyon 7:14, NW ) Zot laswaf pour ladrwatir pou pli ganny satisfe, kan anba sa “nouvo lesyel,” zot pou form parti sa nouvo later kot ‘pou annan ladrwatir.’—2 Pyer 3:13; Psonm 37:29.
Byennere bann ki pran Pitye
13, 14. Dan ki fason pratik nou kapab montre ki nou annan pitye, e ki byenfe nou pou gannyen?
13 Pour kontiny son Sermon lo montanny, Zezi ti dir: ‘Byennere bann ki pran pitye pour lezot, akoz Bondye pou pran pitye pour zot.’ (Matye 5:7) Dan ka lalwa, dimoun i konpran pitye oubyen mizerikord konman konpasyon ki en ziz i annan ki fer li redwir sa santans ki en dimoun koupab i devret gannyen anba lalwa. Me sa mo orizinal ki ganny servi dan Labib ki’n ganny tradwir “pitye” oubyen mizerikord i plizoumwen refer avek montre konsiderasyon oubyen pitye anver bann ki dan bezwen. Alor, bann ki annan pitye i fer aksyon pour montre ki zot konpran lezot. Legzanp Zezi konsernan sa Samariten i en bon legzanp kot en endividi ti “egzers konpasyon” anver en dimoun ki ti dan bezwen.—Lik 10:29-37.
14 Si nou anvi eksperyans sa boner ki nou gannyen ler nou pran pitye pour lezot, nou devret fer bann bon keksoz anver sa bann ki dan bezwen. (Galat 6:10) Zezi ti annan konpasyon pour bann dimoun ki i ti vwar. “I ti pran pitye pour zot, akoz zot ti parey bann mouton ki napa berze; e i ti konmans ansenny zot bokou keksoz.” (Mark 6:34) Zezi ti realize ki imen i pli bezwen keksoz spirityel. Nou kapab montre konpasyon e annan pitye par partaz sa “Bonn Nouvel Rwayonm” avek lezot, parski sa i keksoz pli enportan ki zot bezwen. (Matye 24:14) Nou kapab osi ed nou bann konpanyon Kretyen ki pli aze, bann vev ek orfelen dan en fason pratik, e konsol bann ki dekouraze. (1 Tesalonisyen 5:14; Proverb 12:25; Zak 1:27) Ler nou fer sa, nou pa pou zis ganny boner, me sa i pou osi fer Zeova pran pitye pour nou.—Akt 20:35; Zak 2:13.
Annan Leker pir e kontan fer Lape
15. Ki mannyer nou kapab annan en leker pir e fer lape?
15 Zezi ti fer resorti sa sizyenm ek setyenm keksoz ki fer en dimoun ere: ‘Byennere bann ki annan leker pir, akoz zot pou war Bondye. Byennere bann ki fer lape akoz zot pou ganny apele bann garson Bondye.’ (Matye 5:8, 9) En leker pir i enn ki pa zis prop moralman me i osi prop spirityelman, e i en leker ki tou pour Zeova. (1 Kronik 28:9; Psonm 86:11) Bann ki kontan fer lape i viv anpe avek zot bann konpanyon Kretyen, e otan ki zot kapab avek zot bann vwazen osi. (Romen 12:17-21) Zot “rod lape e fer lape.”—1 Pyer 3:11.
16, 17. (a) Akoz bann Kretyen swazir i ganny apele “bann garson Bondye,” e ki mannyer zot “war Bondye”? (b) Ki mannyer lezot “mouton” i “war Bondye”? (c) Kan e ki mannyer lezot “mouton” pou vin “bann garson Bondye” dan en sans konplet?
16 I annan en promes ki’n ganny fer avek bann ki kontan fer lape e ki annan en leker pir, se ki zot “pou ganny apele ‘bann garson Bondye’ ” e “zot pou war Bondye.” Bann Kretyen ki’n ganny swazir par lespri sen i ganny adopte konman “bann garson” par Zeova ler zot ankor lo later. (Romen 8:14-17) Kan zot ganny resisite pour al zwenn Kris dan lesyel, zot servi dan prezans Zeova, alor zot kapab vwar Li.—1 Zan 3:1, 2; Revelasyon 4:9-11.
17 Lezot “mouton” ki kontan fer lape i servi Zeova anba sa Bon Berze, Zezi Kri, ki vin zot “Papa Eternel.” (Zan 10:14, 16; Izai 9:6) Sa bann ki pas sa dernyen tes, apre sa Mil an ki Kris pou dirize, pou ganny adopte konman bann garson Zeova lo later e zot pou “partisip dan laliberte ek laglwar bann zanfan Bondye.” (Romen 8:21; Revelasyon 20:7, 9) Anmenmtan ki zot pe met pare pour sa letan, zot pran Zeova konman zot Papa, parski zot in dedye zot lavi avek li, alor zot rekonnet li konman sa enn ki donn lavi. (Izai 64:8) Zot kapab “war Bondye” avek zot lizye lafwa, parey Zob ek Moiz dan lepase. (Zob 42:5; Ebre 11:27) Avek zot lizye lafwa e par konnesans egzakt lo Bondye, zot rekonnet bann kalite merveye Zeova e zot esey imit li par fer son lavolonte.—Efezyen 1:18; Romen 1:19, 20; 3 Zan 11.
18. An rapor avek sa set keksoz ki Zezi ti dir ki fer en dimoun ere, lekel ozordi ki trouv vre boner?
18 Nou’n vwar ki bann ki konsyan zot bezwen spirityel, bann ki tris, ki annan ladouser, sa bann ki lafen e swaf ladrwatir, bann ki pran pitye, ki annan leker pir e ki kontan fer lape i trouv vre boner par servi Zeova. Pourtan, sa bann kalite dimoun in toultan ganny opoze e menm ganny persekite. Eski sa i anpes zot ere? Nou pou konsider sa kestyon dan nou lartik swivan.
Revizyon
• Ki boner bann ki konsyan zot bezwen spirityel i gannyen?
• Dan ki sans bann ki tris i ganny konsole?
• Ki mannyer nou montre ladouser?
• Akoz nou bezwen annan pitye, annan en leker pir e kontan fer lape?
[Kestyon]
[Portre lo paz 23]
‘Byennere sa bann ki konsyan zot bezwen spirityel’
[Portre lo paz 23]
“Byennere bann ki pran pitye”
[Portre lo paz 23]
‘Byennere bann ki swaf e lafen ladrwatir’