Kestyon Lekter

Ki mannyer Kongregasyon Kretyen i konsider manz tro bokou?

Parol Bondye i konsider bwar pour sou e manz tro bokou konman bann keksoz ki pa akseptab pour sa bann ki pe servi Bondye. Alors, kongregasyon Kretyen i konsider en dimoun ki annan labitid manz tro bokou parey avek en dimoun ki abitye sou. Ni en soular, ni en dimoun ki manz tro bokou pa kapab form parti kongregasyon Kretyen.

Proverb 23:20, 21 i dir: “Pa frekant bann bwarer diven ek bann ki voras lavyann. Akoz en  soular ek en dimoun ki voras manze pou tonm dan lamizer, e sonmey pou fer en dimoun mars dan lenz desire.” Deterononm 21:20 i koz konsernan en dimoun “teti e rebel” ki ti merit ganny met amor anba Lalwa Moiz. Dapre sa verse, de latitid ki sa dimoun rebel ki pa ti oule repantir ti annan se manz tro bokou e bwar tro bokou. I evidan ki dan ansyen Izrael, manz tro bokou ti ganny vwar konman en keksoz pa akseptab pour bann ki ti anvi servi Bondye.

Me ki mannyer nou pou dekrir sa problenm, e ki Lekritir Grek Kretyen i dir lo sa topik? Sa problenm i egziste ler “en dimoun i annan en labitid pour manz e bwar avek voras.” Alor, sa i ganny konsidere konman vorasite, e Parol Bondye i dir nou ki bann dimoun voras pa pou erit Rwayonm Bondye. (1 Korentyen 6:9, 10; Filipyen 3:18, 19; 1 Pyer 4:3) Deplis, ler zapot Pol ti averti bann Kretyen konsernan bann aktivite “natir imen,” i ti mansyonn “soulezon, parti bwar ek lezot bann tel aksyon.” (Galat 5:19-21) Manz tro bokou i souvan asosye avek bann parti bwar. Deplis, manz tro bokou oubyen voras manze i sirman enkli parmi sa ki Pol ti apel “lezot bann tel aksyon ankor.” Parey avek lezot aktivite “natir imen,” en Kretyen ki tou dimoun i konn li konman en voras manze e ki refize sanz son konportman egois, i devret ganny retire dan kongregasyon.—1 Korentyen 5:11, 13. *

Menm si Parol Bondye i konsider en soular lo menm nivo avek en dimoun ki manz tro bokou, i pli fasil pour idantifye en soular ki en dimoun ki manz tro bokou. Souvannfwa i tre fasil pour vwar si en dimoun i sou. Me pour determin sa staz kot nou kapab konfirmen ki en dimoun i manz tro bokou i pli difisil akoz i pa evidan dan laparans en dimoun. Alors, tret bann sitiasyon dan sa laspe i demann bokou latansyon ek disernman delapar bann ansyen dan kongregasyon.

Par egzanp, lobesite i kapab en siny ki endike ki en dimoun i manz tro bokou me sa i pa toultan leka. En dimoun i kapab tro gro akoz en problenm lasante. En dimoun i kapab osi gro akoz i en keksoz ki i’n erite dan son fanmiy. Nou devret osi kit antet ki lobesite i en kondisyon fizik, tandis ki manz tro bokou i en latitid mantal. Lobesite se ler “en dimoun i annan tro bokou lagres,” tandis ki manz tro bokou i akoz en dimoun i “voras oubyen i oule tro satisfer en dezir.” Alor, manz tro bokou pa ganny determinen par groser en dimoun me par son latitid anver manze. En dimoun i kapab annan en groser normal oubyen menm meg e pourtan i en dimoun ki manz tro bokou. Deplis, pa tou nasyon ki annan menm pwennvi lo groser apropriye.

Ki sa bann siny ki montre ki en dimoun i manz tro bokou? En dimoun ki koumsa i montre en mank kontrol lo son lekor, menm manze ziska ki i malad oubyen pa santi li konfortab. Lefe ki i mank kontrol lo son lekor i montre ki i pa enterese si sa i anmenn repros lo Zeova ek bon repitasyon Son pep. (1 Korentyen 10:31) Parkont, en dimoun ki manz tro bokou enn fwa dan rar pa pou otomatikman ganny vwar konman en dimoun voras. (Efezyen 5:5) Toudmenm, an armoni avek Galat 6:1, en Kretyen ki koumsa i kapab bezwen led. Pol ti dir: “Mon bann frer si zot arive sirprann en dimoun pe fer en keksoz mal, zot ki posed Lespri Bondye, zot devre redres li avek en lespri ladouser.”

Akoz konsey Labib pour evit manz tro bokou i sirtou enportan ozordi? Parski Zezi ti averti sirtou konsernan nou letan: “Fer byen atansyon zotmenm, pangar zot vizilans i ganny detournen avek festen, labwason ek traka lavi. Fer atansyon sa zour i sirprann zot parey en pyez.” (Lik 21:34, 35) Evite tro satisfer nou dezir pour manze i en fason enportan pour anpes nou lasante spirityel ganny afekte.

Kontrol lo nou lekor i en zoli kalite pour Kretyen devlope. (1 Timote 3:2, 11) Alor, Zeova pou sirman ed tou sa bann ki fer zefor pour aplik konsey Labib pour manz e bwar avek en kontrol.—Ebre 4:16.

[Not anba lo paz]