Koz lo Parol Bondye avek Lardyes

“Ale, profetiz avek mon pep.”—AMOS 7:15.

1, 2. Lekel li Amos, e ki lenformasyon Labib i donnen konsernan li?

KAN en serviter Zeova ti pe fer son predikasyon, i ti ganny opoze par en pret. Sa pret ti kriye byen for: ‘Aret prese! Sorti la!’ Ki sa serviter ti fer? Eski i ti fer parey sa pret ti’n demann li, oubyen i ti kontinyen koz lo parol Bondye avek lardyes? Ou kapab konnen, parski sa serviter in ekrir son leksperyans dan en liv ki port son non. Sa se liv Amos dan Labib. Nou pou aprann plis lo rankont Amos avek sa pret plitar, me premyerman annou vwar serten lenformasyon lo Amos li menm.

² Lekel li Amos? Dan ki lepok i ti viv e kote i ti reste? Nou trouv larepons pour sa bann kestyon dan Amos 1:1, kot nou lir: “Parol Amos, ki ti enn parmi bann dimoun ki sonny mouton an Tekoa, . . . pandan lepok Ouziya lerwa Zida e pandan lepok Yarobam garson Yeoas, lerwa Izrael.” Amos ti reste an Zida. Son lavil natal ti Tekoa, ki ti sez kilomet sid avek Zerizalenm. I ti viv alafen nevyenm syek A.N.L. kan Lerwa Ouziya ti pe rennyen an Zida e Lerwa Yarobam 2 ti lerwa dis tribi rwayonm Izrael. Amos ti sonny mouton. Annefe, Amos 7:14 i dir ki i pa ti zis “en gardyen troupo” me i ti osi “ede pik bann fig dan bann pye.” Alors kan sezon rekolt ti arive, Amos ti partisip dan sa travay. I ti pik, oubyen pers, bann fig. Sa travay ti ganny fer pour ed bann fig mir pli vit. I ti en travay fatigan.

‘Ale, profetize’

3. Ki mannyer aprann konsernan Amos i ed nou si nou pa santi nou kalifye pour prese?

³ Amos ti dir onnetman: “Mon pa ti en profet, mon pa ti ni menm garson en profet.” (Amos 7:14) Annefe, Amos pa ti’n ne konman garson en profet ni ganny formasyon konman en profet. Me parmi tou sa dimoun an Zida, Zeova ti swazir Amos pour fer Son travay. I pa ti swazir ni en gran lerwa, ni en prens byen edike, ni en sef ris pour fer Son travay sa letan. Sa i donn nou en leson rekonfortan. Nou kapab napa en gran pozisyon dan sa lemonn oubyen en gran ledikasyon. Me eski sa i devret fer nou santi ki nou pa kalifye pour pres parol Bondye? Pa ditou! Zeova i kapab ekip nou pour proklanm son mesaz, menm dan bann teritwar difisil. Sanmenm ki Zeova ti fer pour Amos. Alors, tou bann ki anvi koz lo parol Bondye avek lardyes pou benefisye par konsider legzanp ki sa profet kouraze in kite.

4. Akoz i pa ti fasil pour Amos profetize an Izrael?

 ⁴ Zeova ti donn sa lord Amos: “Ale, profetiz avek mon pep Izrael.” (Amos 7:15) Sa pa ti en travay fasil pour fer. Sa letan, sa dis tribi rwayonm Izrael ti dan lape, sekirite, ek prosperite materyel. Bokou zot ti annan ‘bann lakaz liver’ osi byen ki ‘bann lakaz lete,’ ki pa ti’n ganny fer avek blok ordiner, me avek bann “ros taye” ki ti byen ser. Serten ti annan bann meb ki ti’n dekore avek ivwar, e zot ti bwar diven ki ti’n ganny prodwir dan “bann zoli plantasyon rezen.” (Amos 3:15; 5:11) Se pour sa ki bokou dimoun ti satisfe avek zot lavi. Annefe, teritwar ki Amos ti’n ganny demande pour pres ladan i byen resanble teritwar ki serten nou i pres ladan ozordi.

5. Ki lenzistis serten Izraelit ti pe fer?

⁵ I pa ti mal pour bann Izraelit annan bann byen materyel. Parkont, serten Izraelit ti pe akimil zot larises par bann mwayen malonnet. Bann risar ti “pe trik bann dimoun senp” e pe menm “kraz bann pov.” (Amos 4:1) Bann gran marsan, bann ziz, ek bann pret ti pe fer konplo ansanm pour vol bann pov. Aprezan annou retourn dan letan pase e nou a vwar ki sa bann zonm ti pe fer.

Zot ti kas Lalwa Bondye

6. Ki mannyer bann marsan Izraelit ti eksplwat lezot?

⁶ Premyerman nou al dan bazar. Laba bann marsan pe fer trik avek bann mezir, zot pe fer “efa vin pti” e “sekel vin gran.” Zot menm vann “restan” legren. (Amos 8:5, 6) Bann marsan pe trik zot kliyan: Zot donn pli pti gin ki zot merit donnen, pri i tro o, e kalite pa bon. Apre ki bann marsan i eksplwat bann pov ziska ki zot rin zot, sa bann pov i bezwen vann zot lekor konman lesklav. Answit, bann marsan i aste zot, “pour pri en per sandalet.” (Amos 8:6) Zis mazinen! Pour sa bann marsan voras, zot bann konpanyon Izraelit pa vo plis ki en per sandalet! Sa i vreman kraz bann ki dan bezwen, e vyol seryezman Lalwa Bondye! Pourtan, sa bann menm marsan ti obzerv “saba.” (Amos 8:5) Wi, zot ti relizye zis an deor.

7. Kwa ki ti fer li posib pour bann marsan an Izrael kas Lalwa Bondye?

⁷ Me konman sa bann marsan ti reisi sap pinisyon pour kas Lalwa Bondye, ki dir: “Ou devret kontan ou prosen parey ou prop lekor”? (Levitik 19:18) Bann marsan ti reisi fer sa parski bann ki ti devret enplimant Lalwa, setadir bann ziz, ti konplis dan zot krim. An kour kot bann ka ti ganny trete, bann ziz ti “aksepte gous pour reste trankil, e pa fatig zot avek bann pov.” Olye protez bann pov, bann ziz ti trai zot pour ganny gous. (Amos 5:10, 12) Alors bann ziz osi ti pe inyor Lalwa Bondye.

8. Ki kalite kondwit ki bann pret ti fer konmsi zot pa trouve?

⁸ Antretan, ki rol bann pret an Izrael ti pe zwe? Pour trouv larepons, nou bezwen get en lot landrwa. Gete ki kalite pese bann pret ti pe les arive “dan lakaz zot bann bondye”! Atraver Amos, Bondye ti dir: “En zonm ek son papa in al kot menm fiy, avek bi pour sali mon non sen.” (Amos 2:7, 8) Zis mazinen! En papa ek en garson Izraelit ti pe komet imoralite seksyel avek menm prostitye dan tanp. Deplis, sa bann pret mesan ti fer konmsi zot pa trouv nanryen!—Levitik 19:29; Deterononm 5:18; 23:17.

9, 10. Ki Lalwa Bondye bann Izraelit ti vyole, e konman sa i parey dan nou letan?

⁹ Zeova i mansyonn lezot pese ki zot ti pe fer, par dir: “Zot pe alonze akote tou bann lotel, lo bann lenz ki’n ganny pran konman en garanti, e dan lakaz zot bondye zot in bwar diven bann ki’n ganny kontrovansyon.” (Amos 2:8) Wi, bann pret e osi lepep an zeneral ti inyor sa lalwa ki’n ganny rikorde dan Egzod 22:26, 27, ki dir ki en lenz ki’n ganny pran konman en garanti i devret ganny rann avan soley kouse. Okontrer, zot ti servi li konman en blennket pour alonz lo la ler zot pe fete e bwar pour bann fo bondye. Deplis, avek lanmann ki zot ti gannyen avek  bann pov, zot ti aste diven pour bwar dan bann lafet fo larelizyon. Zot ti’n vreman elwannyen avek ladorasyon pir!

¹⁰ Bann Izraelit pa ti onte pour vyol sa de pli gran komannman dan Lalwa, setadir pour kontan Zeova e pour kontan zot prosen. Se pour sa ki Bondye ti anvoy Amos pour kondann zot enfidelite. Ozordi bann nasyon, enkli Kretyente, i reflekte sa kondisyon koronpi dan ansyen Izrael. Serten dimoun i prospere, tandis ki plizyer lezot i perdi tou zot larzan e ganny afekte emosyonnelman par bann pratik imoral bann lider malonnet dan gro biznes, politik, ek fo larelizyon. Me Zeova i enterese avek bann ki pe soufer e ki motive pour rod li. Alors, i’n demann son bann serviter dan nou letan pour fer en travay parey Amos ti fer, setadir pour pres Son parol avek lardyes.

11. Ki nou kapab aprann atraver legzanp Amos?

¹¹ Vi ki i annan bann similarite ant travay Amos ek sa ki pour nou, nou pou benefisye en kantite par egzamin son legzanp. Annefe, Amos i montre nou (1) ki mesaz nou devret prese, (2) konman nou devret pres sa mesaz, e (3) akoz bann ki opoz nou pa pou kapab aret nou travay predikasyon. Annou egzamin sa bann pwen enn par enn.

Konman nou kapab imit Amos

12, 13. Ki mannyer Zeova ti montre ki i pa ti kontan sa ki bann Izraelit ti pe fer, e ki ti zot reaksyon?

¹² Konman Temwen Zeova, nou predikasyon i konsantre lo pres konsernan Rwayonm Bondye e fer disip. (Matye 28:19, 20; Mark 13:10) Toudmenm, nou osi atir latansyon dimoun lo lavertisman Bondye, parey Amos ti anonse ki Zeova ti pou vin pas son zizman lo bann mesan. Par egzanp dan Amos 4:6-11 i montre ki Zeova ti kontinyelman fer Izrael konnen ki i pa ti kontan sa ki zot ti pe fer. I ti fer sa pep sibir en “lafanmin,” i pa ti “fer gro lapli tonbe,” i ti fer zot “sereal vin sek e ganny afekte avek mildyou,” e i ti anvoy “en lepidemi” lo zot. Eski sa bann keksoz ti fer Izrael sanze e repantir? Bondye ti dir: “Zot pa ti retourn kot mwan.” Wi, bann Izraelit ti kontinyelman rezet Zeova.

¹³ Alors, Zeova ti pini sa bann Izraelit ki pa ti repantir. Me premyerman zot ti resevwar en lavertisman profetik. An akor avek sa, Zeova ti dir: “Souvren Senyer Zeova pa pou fer en keksoz amwen ki i’n revel son keksoz konfidansyel avek son serviter bann profet.” (Amos 3:7) Bondye ti revel avek Noe ki Deliz ti pe vini e i ti demann li pour averti bann dimoun. Demenm Zeova ti demann Amos pour donn en lavertisman final. Malerezman, nasyon Izrael ti inyor mesaz Bondye e zot pa ti fer sa ki zot ti merit fer.

14. Ki mannyer nou letan ek letan Amos i parey?

¹⁴ San dout ou pou dakor ki i annan serten similarite remarkab ant letan Amos ek nou letan. Zezi ti predir plizyer maler ki ti pou arive pandan letan lafen. I ti osi predir ki pou annan en travay predikasyon partou dan lemonn. (Matye 24:3-14) Me parey dan letan Amos, laplipar dimoun ozordi i inyor siny dernyen zour, osi byen ki sa mesaz ki bann serviter Bondye pe prese. Pour sa bann dimoun, menm keksoz ki ti ariv bann Izraelit ki pa ti repantir pou arive avek zot. Zeova ti averti zot: “Prepar ou pour rankontre ou Bondye, O Izrael.” (Amos 4:12) Zot ti rankontre Bondye ler zot ti eksperyans son zizman kan larme Asiryen ti pran kontrol lo zot. Ozordi, sa lemonn mesan pou ‘rankontre Bondye’ kan Armagedon  pou arive. (Revelasyon 16:14, 16) Me antretan, osi lontan ki Zeova i kontinyen pran pasyans, nou ankouraz otan dimoun posib pour: “Rod Zeova, e kontinyen viv.”—Amos 5:6.

Fer fas avek Lopozisyon parey Amos

15-17. (a) Lekel li Amazya, e ki mannyer i ti reazir anver mesaz ki Amos ti pe anonse? (b) Ki lakizasyon Amazya ti fer kont Amos?

¹⁵ Nou kapab imit Amos pa zis dan sa ki nou prese me osi lafason nou prese. Sa fe i ganny soulinyen dan sapit 7, kot nou rankontre sa pret ki ti ganny mansyonnen okonmansman nou diskisyon. I ti “Amazya pret Betel.” (Amos 7:10) Lavil Betel ti en sant larelizyon aposta an Izrael, ki ti enplik ladorasyon pti bef. Alor Amazya ti en pret dan larelizyon ofisyel sa nasyon. Konman i ti reazir anver deklarasyon ranpli avek lardyes ki Amos ti fer?

¹⁶ Amazya ti dir Amos: “E ou la, ou ki vwar vizyon, sorti la, al dan pei Zida, e laba ou a manz dipen, e laba ou a kapab profetize. Me isi Betel aret profetize, akoz la i tanp en lerwa e i lakaz en rwayonm.” (Amos 7:12, 13) An realite, Amazya ti pe dir: ‘Al kot ou! Nou annan nou larelizyon.’ I ti osi esey fer gouvernman anpes Amos fer son bann aktivite. I ti dir avek Lerwa Yarobam 2: “Amos in fer konplo kont ou lanmenm la dan lakaz Izrael.” (Amos 7:10) Wi, Amazya ti akiz Amos konmkwa i’n fer traizon! I ti dir avek lerwa: “La sa ki Amos in dir, ‘Yarobam pou mor par lepe; e Izrael li, pou definitivman al an egzil.’ ”—Amos 7:11.

¹⁷ Par sa parol, Amazya ti fer trwa fo deklarasyon. I ti dir: “La sa ki Amos in dir.” Pourtan, Amos pa ti zanmen dir ki sa profesi ti sorti kot li. Okontrer, i’n toultan fer resorti: “Se sa ki Zeova in dir.” (Amos 1:3) Amos ti osi ganny akize pour dir: “Yarobam pou mor par lepe.” Me parey Amos 7:9 i montre, Amos ti profetize: “Mon [Zeova] pou lev kont fanmiy Yarobam avek en lepe.” Bondye ti’n predir ki maler ti pou arive avek “lakaz” Yarobam,  setadir son desandans. Anplis ki sa, Amazya ti pretann ki Amos ti’n dir: ‘Izrael pou definitivman al an egzil.’ Me Amos ti’n osi profetize ki nenport Izraelit ki ti retourn kot Bondye ti pou ganny benediksyon. I kler ki Amazya pa ti dir tou laverite, me i ti koz dan en fason rize pour esey restrikte travay predikasyon Amos ofisyelman.

18. Ki similarite i annan ant metod ki Amazya ti servi ek metod ki bann sef relizye i servi ozordi?

¹⁸ Eski ou’n remark okenn similarite ant metod ki Amazya ti servi ek metod ki bann ki opoz pep Zeova ozordi i servi? Zis parey Amazya ti esey fer Amos reste trankil, demenm bann pret, levek, ek patrias dan nou letan i esey anpes bann serviter Bondye fer sa travay predikasyon. Amazya ti akiz Amos konmkwa i ti pe fer traizon, ki ti en fo lakizasyon. Pareyman ozordi, serten sef relizye i akiz bann Temwen Zeova konmkwa zot en menas pour sekirite pei. Zis parey Amazya ti rod led avek lerwa pour konbat Amos, demenm bann sef relizye i rod led avek bann alye politik pour ed zot persekit Temwen Zeova.

Nou Lennmi pa kapab aret nou Travay Predikasyon

19, 20. Ki mannyer Amos ti reazir anver lopozisyon ki i ti gannyen avek Amazya?

¹⁹ Ki ti reaksyon Amos anver lopozisyon Amazya? Premyerman, Amos ti demann sa pret: “Eski ou pe dir: ‘Ou pa devret profetiz kont Izrael’?” Apre, san ezitasyon, profet kouraze Bondye ti dir sa bann menm parol ki Amazya pa ti anvi tande. (Amos 7:16, 17) Amos pa ti les personn fer li per. Pa sa i en tre bon legzanp pour nou! An sa ki konsern koz lo parol Bondye, nou pa pou dezobei nou Bondye, menm dan bann pei kot i annan dimoun ki parey Amazya, pe ankouraz bann persekisyon kriyel kont nou. Parey Amos, nou kontinyen proklanmen: “Se sa ki Zeova in dir.” Nou bann lennmi pa zanmen kapab aret nou travay predikasyon, parski lanmen Zeova i avek nou.—Akt 11:19-21.

²⁰ Amazya ti’n devret realize ki son bann menas ti pou anven. Amos ti’n deza eksplike akoz personn lo later pa ti pou kapab anpes li koze—e sa i trwazyenm pwen ki nou pou aborde. Dapre Amos 3:3-8, Amos ti servi en seri kestyon ek legzanp pour montre ki napa nanryen ki arive san en lakoz. Apre, i fer sa laplikasyon: “I annan en lyon ki’n kriye! Lekel ki pa pou per? Souvren Senyer Zeova li menm in koze! Lekel ki pa pou profetize?” Andotmo, Amos ti pe dir bann ki ti pe ekout li: ‘Zis parey ou pa kapab anpes ou santi lafreyer kan en lyon i kriye, demenm mwan osi mon pa kapab pa prese vi ki Zeova in donn lord pour fer li.’ Lakrent, oubyen respe profon pour Zeova, ti pous Amos pour koz avek lardyes.

21. Ki mannyer nou reazir anver lord Bondye pour pres sa bon nouvel?

²¹ Nou osi nou ganny demande par Zeova pour prese. Konman nou reazir? Parey Amos e parey bann premye disip Zezi, avek led Zeova nou koz lo Son parol. (Akt 4:23-31) Ni persekisyon delapar nou bann adverser, ni menm kan bann ki nou pres avek pa montre lentere anver sa mesaz, pa pou kapab fer nou reste trankil. Temwen Zeova partou dan lemonn i demontre en devouman parey Amos, ki pous zot pour kontinyen proklanm sa bon nouvel avek lardyes. Nou annan sa responsabilite pour averti bann dimoun konsernan zizman Zeova ki pe vini. Ki sa zizman i enplike? Sa kestyon pou ganny reponn dan lartik swivan.

Ki ou pou reponn?

• Dan ki sirkonstans Amos ti akonpli son misyon ki Bondye ti donn li?

• Ki nou devret prese parey Amos?

• Avek ki latitid nou devret prese?

• Akoz nou bann lennmi pa kapab aret sa travay predikasyon?

[Kestyon]

[Portre lo paz 6]

Bondye ti swazir Amos, ki ti ede pik fig, pour fer Son travay

[Portre lo paz 9]

Eski ou pe anons mesaz Zeova avek lardyes parey Amos?