Rod Zeova, sa Enn ki egzamin Leker
Rod Zeova, sa Enn ki egzamin Leker
“Rod mwan, e kontinyen viv.”—AMOS 5:4.
1, 2. Kan Labib i dir ki Zeova “i vwar dan leker,” ki i oule dir par sa?
ZEOVA ti dir avek profet Samyel: “En senp zonm i vwar sa ki aparet devan son lizye; me Zeova li, i vwar sa ki dan leker.” (1 Samyel 16:7) Konman Zeova “i vwar sa ki dan leker”?
2 Dan Labib, leker i ganny servi pour reprezant sa ki en dimoun i ete anndan, setadir son bann dezir, panse, santiman, ek lafeksyon. Alors kan Labib i dir ki Bondye i vwar sa ki dan leker, i vedir ki i get pli lwen ki laparans an deor en dimoun e i konsantre lo ki sa dimoun i vreman ete.
Bondye i egzamin Izrael
3, 4. Dapre Amos 6:4-6, ki sitiasyon ti egziste dan rwayonm dis tribi Izrael?
3 Ler sa Enn ki egzamin leker ti obzerv sa rwayonm dis tribi Izrael dan letan Amos, ki I ti vwar? Amos 6:4-6 i koz lo bann zonm ki ti “pe dormi lo bann lili ivwar e pe fil zot lo zot divan.” Zot ti pe “manz bann mouton ki’n ganny pran dan en troupo ek bann zenn toro ki’n ganny swazir parmi bann pti bef angrese.” Sa bann zonm ti’n “envant bann lenstriman pour sante” e zot ti pe “bwar dan bann bol diven.”
4 Premye kou, sa senn i kapab paret zoli pour gete. Dan konfor zot lakaz deliks, bann dimoun ris ti servi bann pli bon kalite manze ek bwar, e zot ekout bann lenstriman lanmizik pli modern pour diverti zot. Zot ti osi annan “bann lili ivwar.” Bann arkeolog in trouv bann zoli ivwar ki’n ganny byen skilpte an Samari, lavil kapital rwayonm Izrael. (1 Lerwa 10:22) Petet plizyer parmi sa bann ivwar ti ganny mete lo bann meb e plake lo miray.
5. Akoz Bondye ti ofanse avek bann Izraelit dan letan Amos?
5 Eski Zeova ti mekontan lefe ki bann Izraelit ti pe viv dan konfor, apresye bann manze delisye, bwar bann bon diven, e ekout bann zoli lanmizik? Byensir ki non. Apre tou, i fourni sa bann keksoz an abondans pour imen rezwir. (1 Timote 6:17) Sa ki ti ofans Zeova se bann move dezir sa pep, zot move kondisyon leker, ek zot mank respe pour sa vre Bondye. Deplis zot ti napa lanmour pour zot bann frer Izraelit.
6. Ki ti kondisyon spirityel Izrael dan letan Amos?
6 Ti annan en sirpriz ki ti pe esper ‘bann ki ti pe fil zot lo zot divan, ki ti pe manz mouton ki’n ganny pran dan troupo, bwar diven, e envant lenstriman mizikal.’ Sa bann zonm ti ganny demande: “Eski zot pe retir dan zot lespri sa zour maler?” Zot ti’n merit sagren ki mannyer sitiasyon an Izrael ti’n arive, me okontrer “katastrof Zozef pa ti rann zot malad.” (Amos 6:3-6) Kantmenm sa nasyon ti prospere lo plan ekonomik, Zeova ti vwar ki lo plan spirityel, Zozef, oubyen Izrael, ti dan en sitiasyon katastrofik. Pourtan, lepep ti kontinyen avek zot bann aktivite toulezour e pa ni ti fatig zot avek nanryen. Bokou dimoun ozordi i annan menm kalite latitid. Zot kapab admet ki nou pe viv dan bann letan difisil, me osi lontan ki zot pa ganny afekte personnelman, zot pa enterese avek difikilte ki lezot pe pas ladan e osi avek keksoz spirityel.
Izrael—en Nasyon ki ti pe pouri
7. Ki ti pou arive si lepep Izrael pa ti pran kont lavertisman Bondye?
7 Liv Amos i dekrir en nasyon ki pe pouri, menm si an deor i paret pe prospere. Akoz zot pa’n pran kont bann lavertisman Bondye e sanz zot pwennvi, i pou abandonn zot dan lanmen zot lennmi. Bann Asiryen pou vini, pok zot lo zot zoli lili ivwar e trenn zot an egzil. Zot pou nepli viv dan konfor!
8. Ki mannyer Izrael ti’n ariv dan sa move kondisyon spirityel?
8 Ki mannyer bann Izraelit ti’n ariv dan sa leta? Sa sitiasyon ti konmans devlope an 997 A.N.L., kan Reabam ti ranplas son papa Lerwa Salomon e sa dis tribi Izrael ti separe avek tribi Zida ek Benzamen. Premye lerwa sa dis tribi rwayonm Izrael ti Yarobam 1, “garson Neba.” (1 Lerwa 11:26) Yarobam ti konvenk sa pep dan rwayonm nor ki i ti tro difisil pour zot vwayaze pour al Zerizalenm pour ador Zeova. Me an realite pa byennet lepep ki i ti vreman enterese avek. Plito, i ti anvi protez son prop lentere. (1 Lerwa 12:26) Yarobam ti per ki si bann Izraelit i kontinyen al kot tanp an Zerizalenm alokazyon sa bann lafet ki onor Zeova tou le zan, finalman zot ti pou redonn rwayonm Zida zot fidelite. Pour anpes sa arive, Yarobam ti enstal de pti bef annor, enn Dann e lot Betel. Alor, ladorasyon pti bef ti vin larelizyon ofisyel dan rwayonm Izrael.—2 Kronik 11:13-15.
9, 10. (a) Ki kalite lafet relizye Lerwa Yarobam 1 ti organize? (b) Ki mannyer Bondye ti vwar sa bann lafet an Izrael dan letan Lerwa Yarobam 2?
9 Yarobam ti esey fer sa nouvo larelizyon en pe parey avek sa enn ki vre. I ti organiz bann lafet ki ti en pe parey bann lafet ki ti ganny fer Zerizalenm. Nou lir dan 1 Lerwa 12:32: “Yarobam ti fer en lafet dan wityenm mwan, kenzyenm zour sa mwan, parey sa lafet an Zida, pour ki i kapab fer bann lofrann lo lotel ki i ti’n fer Betel.”
10 Zeova pa ti zanmen aksepte sa bann fo lafet relizye. I ti fer sa byen kler plis ki en syek plitar atraver Amos pandan renny Yarobam 2, ki ti vin lerwa sa rwayonm dis tribi Izrael apepre 844 A.N.L. (Amos 1:1) Dapre Amos 5:21-24, Bondye ti dir: “Mon’n deteste, mon’n rezet zot bann lafet, e mon pa pou apresye loder zot bann lasanble solannel. Me si zot ofer mwan lofrann brile, mon pa pou pran plezir ni menm dan zot lofrann, e mon pa pou get zot bann zenn zannimo angrese ki zot ofer konman sakrifis konminyon. Aret fer tapaz dan mon zorey avek zot bann kantik; fodre pa ki mon antann ankor zoli son zot lenstriman lakord. Les lazistis koule parey delo, e ladrwatir parey en larivyer ki pe toultan koule.”
Similarite ozordi
11, 12. Ki similarite i annan ant ladorasyon dan ansyen Izrael ek ladorasyon Kretyente?
11 I kler ki Zeova ti egzamin leker bann ki ti pe partisip dan bann lafet Izrael e i ti rezet zot bann lafet ek lofrann. Pareyman ozordi, Bondye i rezet bann selebrasyon payen ki Kretyente i fer, tel parey Nwel ek Pak. Pour bann ki ador Zeova, i pa kapab annan okenn lasosyasyon ant lazistis ek mesanste, ni okenn linyon ant lalimyer ek fernwanr.—2 Korentyen 6:14-16.
12 I annan lezot similarite ki nou kapab remarke ant ladorasyon pti bef ki bann Izraelit ti fer ek ladorasyon ki Kretyente i fer. Kantmenm serten ki dir zot Kretyen i aksepte laverite dan Parol Bondye, ladorasyon Kretyente li menm pa ganny motive par vre lanmour pour Bondye. Si sa ti leka, i ti pou ensiste ki dimoun i ador Zeova “an-espri e an verite” parski se sa kalite ladorasyon ki fer li plezir. (Zan 4:24) Deplis, Kretyente pa “les lazistis koule parey delo, e ladrwatir parey en larivyer ki pe toultan koule.” Okontrer, i pe toultan abes bann standar moral Bondye. I toler imoralite seksyel, ek lezot pese grav e i menm ganny pour beni maryaz bann omoseksyel!
“Kontan sa ki byen”
13. Akoz nou bezwen obeir sa parol dan Amos 5:15?
13 Pour tou sa ki anvi ador Zeova dan en fason akseptab, i dir: “Ay sa ki mal, e kontan sa ki byen.” (Amos 5:15) Lanmour ek laenn i bann santiman for ki sorti dan nou leker senbolik. Vi ki leker i tret; nou devret fer tou sa ki nou kapab pour protez li. (Proverb 4:23; Zeremi 17:9) Si nou les nou leker nouri lo bann move dezir, nou kapab trouv nou pe kontan sa ki mal e ay sa ki byen. Deplis si nou fer pese pour satisfer sa bann dezir, fer tou sa ki nou oule dan servis Zeova sa pa pou fer nou reganny son faver. Annou alor priy Bondye pour ed nou “ay sa ki mal, e kontan sa ki byen.”
14, 15. (a) Lekel ki ti pe fer sa ki byen an Izrael, me konman serten zot ti ganny trete? (b) Ki mannyer nou kapab ankouraz bann ki dan servis aplentan ozordi?
14 Me pa tou Izraelit dan letan Amos ki ti pe fer sa ki mal dan lizye Zeova. Par egzanp, Osea ek Amos ‘ti kontan sa ki byen’ e servi fidelman konman profet. Serten ti fer bann ve pour viv konman bann Nazireen. Pandan ki zot ti pe viv konman bann Nazireen, zot pa ti servi okenn prodwi ki’n ganny fer avek rezen, sirtou diven. (Nonm 6:1-4) Konman lezot Izraelit ti vwar sakrifis ki sa bann zonm fidel ti pe fer? Larepons sa kestyon i sokan e i montre ki kantite pouri sa nasyon ti’n pouri spirityelman. Amos 2:12 i dir: “Ou ti kontinyen donn bann Nazireen diven pour bwar, e ou ti enpoz en lord lo bann profet, an dizan: ‘Zot pa devret profetize.’ ”
15 Letan bann Izraelit ti vwar legzanp fidel bann Nazireen ek bann profet, zot ti devret santi zot onte e motive pour sanz zot fason viv. Okontrer, zot ti esey dekouraz sa bann dimoun fidel pour donn Bondye laglwar. Annou pa zanmen ankouraz bann pionye, misyonner, sirveyan rezyonal, oubyen bann manm lafanmiy Betel pour aret zot servis aplentan senpleman pour retourn dan en lavi swadizan normal. Okontrer, annou ankouraz zot pour kontinyen zot bon travay!
16. Akoz bann Izraelit ti pli byen dan letan Moiz ki dan letan Amos?
16 Kantmenm bokou Izraelit dan letan Amos ti pe viv en lavi satisfezan lo plan materyel, zot pa ti “ris devan Bondye.” (Lik 12:13-21) Pour 40 an, zot zanset ti’n manz zis lamann dan dezer. Zot pa ti fer festen avek bann toro angrese oubyen fer pares lo bann lili ivwar. Kantmenm sa, Moiz ti dir zot: “Zeova zot Bondye ti beni zot dan tou zot aktivite. . . . Pandan sa karant an, Zeova zot Bondye in avek zot. Zot pa ti mank nanryen.” (Deterononm 2:7) Wi, bann Izraelit dan dezer ti toultan annan bann keksoz ki zot ti vreman bezwen. Sa ki ti pli enportan ankor, zot ti annan lanmour, proteksyon, ek benediksyon Bondye!
17. Akoz Zeova ti anmenn bann Izraelit dan Later Promiz?
17 Zeova ti rapel bann Izraelit dan letan Amos ki I ti’n anmenn zot zanset dan Later Promiz e ed zot elimin tou zot lennmi. (Amos 2:9, 10) Me akoz Bondye ti’n fer bann Izraelit sorti Lezip e anmenn zot dan sa pei ki i ti promet zot? Eski i ti’n fer sa pour ki zot kapab viv en lavi nanryen fer dan konfor, e rezet zot Kreater? Non! Okontrer, i ti’n fer sa pour zot kapab ador li konman en pep lib e prop spirityelman. Me bann zabitan sa rwayonm dis tribi pa ti ay sa ki mal e kontan sa ki byen. Okontrer zot ti pe donn laglwar bann zidol olye Bondye. Pa sa ti en laont!
Rann Kont devan Zeova
18. Akoz Zeova in liber nou spirityelman?
18 Bondye pa ti pou inyor kondwit bann Izraelit ki fer onte. I ti fer son pozisyon kler, kan i ti dir: “Mon pou fer zot rann kont pour tou zot fot.” (Amos 3:2) Sa parol i devret fer nou mazinen ki nou’n ganny delivre dan lesklav avek Lezip modern, setadir sa sistenm aktyel. Zeova pa’n liber nou spirityelman pour nou pourswiv bann lobzektif egois. Okontrer, i’n fer sa pour nou kapab senserman donn li laglwar konman en pep lib ki donn en ladorasyon pir. Deplis, nou tou nou pou rann kont pour lafason ki nou pe servi nou liberte ki Bondye in donn nou.—Romen 14:12.
19. Dapre Amos 4:4, 5, ki laplipar Izraelit ti’n arive kontan?
19 Malerezman, bokou dimoun an Izrael pa ti pran kont mesaz pwisan Amos. Dan Amos 4:4, 5, sa profet ti devwal kondisyon zot leker ki ti malad spirityelman, an dizan: “Vin kot Betel zot lepep e komet bann fot. Komet en kantite fot an Gilgal, . . . parski se sa fason ki zot ti kontan fer, O garson Izrael.” Bann Izraelit pa ti’n devlop bann bon dezir. Zot pa ti’n protez zot leker. An rezilta, laplipar zot ti konmans kontan sa ki mal e ay sa ki byen. Sa bann ki ti ador pti bef ti antete e zot pa ti sanze. Zeova ti pou fer zot rann kont e zot ti pou mor dan zot pese!
20. Ki mannyer en dimoun i viv en lavi an armoni avek Amos 5:4?
20 I kapab ki i pa ti fasil pour okenn dimoun ki ti pe viv an Izrael sa letan pour reste fidel avek Zeova. Parey bann Kretyen ozordi, zenn konman vye, i byen konnen ki i pa fasil pour naz kont kouran. Me lanmour pour Zeova ek en dezir pour fer li plezir ti motiv serten Izraelit pour pratik vre ladorasyon. Zeova ti ofer zot sa lenvitasyon ranpli avek lafeksyon dan Amos 5:4: “Rod mwan, e kontinyen viv.” Pareyman ozordi, Bondye i montre mizerikord anver bann ki repantir e rod li par pran konnesans egzakt lo son Parol e apre fer son lavolonte. I pa en lavi fasil, me i anmenn ver lavi eternel.—Zan 17:3.
Prospere malgre Lafanmin spirityel
21. Ki lafanmin ki’n tonm lo bann ki pa pe pratik vre ladorasyon?
21 Kwa ki ti pe esper bann ki pa ti siport vre ladorasyon? En lafanmin pli pir ki kapab egziste—lafanmin spirityel! “Souvren Senyer Zeova i dir: ‘Gete! En letan pe vini kot mon pou anvoy en lafanmin dan pei. Zot pa pou lafen dipen oubyen swaf delo, me pour antann parol Zeova.’ ” (Amos 8:11) Kretyente i omilye en tel lafanmin spirityel. Me bann dimoun parmi zot ki senser i kapab vwar prosperite spirityel pep Bondye, e zot pe tay kot lorganizasyon Zeova an gran kantite. Diferans ant sitiasyon Kretyente ek sitiasyon bann vre Kretyen i ganny byen fer resorti dan parol Zeova: “Gete! Mon prop serviter pou manze, me zot zot pou lafen. Gete! Mon prop serviter pou bwar, me zot zot pou swaf. Gete! Mon prop serviter pou dan lazwa, me zot zot pou onte.”—Izai 65:13.
22. Akoz nou annan rezon pour rezwir?
22 Nou ki servi Zeova, eski nou personnelman apresye sa ki nou annan konman provizyon ek benediksyon spirityel? Kan nou etidye Labib ek bann piblikasyon Kretyen e kan nou asiste nou bann renyon kongregasyon ek lasanble, nou vreman santi ki nou anvi kriye avek lazwa akoz nou bon kondisyon leker. Nou rezwir akoz sa konprenezon kler ki nou annan lo Parol Bondye, enkli profesi Amos ki’n ganny enspire.
23. Ki sa bann ki donn laglwar Bondye i benefisye avek?
23 Pour tou bann ki kontan Bondye e anvi donn li laglwar, profesi Amos i kontyen en mesaz lespwar. Nenport ki sitiasyon ekonomik ki nou ladan ozordi, oubyen nenport ki leprev nou bezwen fer fas avek dan sa lemonn trouble, nou ki kontan Bondye nou pe ganny son benediksyon e rezwir pli bon manze spirityel. (Proverb 10:22; Matye 24:45-47) Alors, tou laglwar i al pour Bondye, ki fourni nou tou keksoz an abondans pour nou byenfe! Fotespere nou determinen pour senserman loue li pour touzour. Sa pou vin nou gran privilez si nou rod Zeova, sa Enn ki egzamin leker.
Ki ou pou reponn?
• Ki kondisyon ti egziste an Izrael dan letan Amos?
• Konman sitiasyon ozordi i parey sitiasyon dan sa rwayonm dis tribi Izrael?
• Ki lafanmin ki egziste ozordi, e lekel ki pa ganny afekte avek sa lafanmin?
[Kestyon]
[Portre lo paz 17]
Bokou Izraelit ti viv dan konfor me zot pa ti ris lo plan spirityel
[Portre lo paz 18]
Ankouraz bann serviter aplentan pour kontinyen zot bon travay
[Portre lo paz 21]
Napa lafanmin spirityel parmi pep byennere Zeova