Zizman Zeova kont bann Mesan
Zizman Zeova kont bann Mesan
“Met ou pare pour rankontre ou Bondye.”—AMOS 4:12.
1, 2. Akoz nou kapab annan konfyans ki Bondye pou met en lafen avek mesanste?
ESKI en zour Zeova pou met en lafen avek mesanste ek soufrans lo sa later? La okonmansman 21 tyenm syek, sa kestyon i pli apropriye ki zanmen oparavan. I paret ki partou kot nou vire nou vwar kriyote ki zonm pe fer anver zot prosen. Pa nou vreman anvi viv dan en lemonn kot napa vyolans, terorism, ek koripsyon!
2 Erezman, nou kapab annan konfyans total ki Zeova pou met en lafen avek mesanste. Bann kalite ki Bondye i annan i asir nou ki i pou pran aksyon kont bann mesan. Zeova i en Bondye zis e drwat. Dan Psonm 33:5, son Parol i dir nou: “I kontan lazistis ek ladrwatir.” En lot psonm i dir: “[Zeova] i vreman deteste nenport ki ki kontan vyolans.” (Psonm 11:5) Sirman, Zeova, en Bondye ki tou pwisan e ki kontan lazistis ek ladrwatir, pa pou kapab toler pour touzour sa ki i deteste.
3. Ki pwen ki pou ganny aksantye dan sa egzaminasyon profesi Amos ki nou pe al fer?
3 Annou vwar en lot rezon akoz nou kapab asire ki Zeova pou retir mesanste. Bann keksoz ki’n ganny ekrir lo son fason azir dan lepase i garanti sa. Bann legzanp enpresyonan lo fason konsistan ki Zeova in azir avek bann mesan i ganny trouve dan liv Amos dan Labib. Sa egzaminasyon ki nou pou kontinyen fer lo profesi Amos pou ansenny nou trwa keksoz konsernan zizman Bondye. Premyerman, bann dimoun ki resevwar zizman Bondye i toultan merit sa zizman. Dezyenmman, nou pa kapab evit son zizman. Trwazyenmman, i selektif parski Zeova i pas zizman lo bann mesan me i pran pitye pour bann ki repantir e demontre en bon latitid.—Romen 9:17-26.
Bann ki resevwar Zizman Bondye i toultan merite
4. Kote Zeova ti anvoy Amos, e pour ki rezon?
4 Dan letan Amos, bann Izraelit ti’n fini ganny divize an de rwayonm. Enn ti Zida, rwayonm sid formen avek de tribi. Lot ti Izrael, rwayonm nor formen avek dis tribi. Zeova ti fer Amos vin son profet e fer li kit son pei natal an Zida pour al Izrael. Laba Amos ti pou ganny servi par Bondye pour anons son zizman.
5. Kont ki nasyon Amos ti profetize premyerman, e nonm en rezon akoz zot ti merit zizman Bondye?
5 Amos pa ti konmans son travay par pronons zizman Zeova kont rwayonm nor Izrael ki ti en pep vreman difisil. Okontrer, i ti konmans anons zizman ki ti pe aprose kont sis nasyon obor Izrael. Sa ti Siri, Filisti, Tir, Edom, Amonn, ek Moab. Me eski sa bann nasyon ti vreman merit zizman sever Bondye? Definitivman! En rezon pour sa se ki zot ti bann gran lennmi pep Zeova.
6. Akoz Bondye ti pe al anmenn maler lo Siri, Filisti, ek Tir?
6 Par egzanp, Zeova ti kondann bann Siryen pour “bat Gilead.” (Amos 1:3) Bann Siryen ti pran en teritwar ki ti pour Gilead—en rezyon Izrael les avek Larivyer Zourden—e zot ti fer bokou ditor pep Bondye laba. Me ki nou pou dir lo Filisti ek Tir? Filisti ti koupab pour anmenn bann Izraelit an egzil, e vann zot avek bann Edomit. Serten Izraelit ti tonm dan lanmen bann komersan lesklav Tir. (Amos 1:6, 9) Zis mazin sa—zot ti vann pep Zeova konman lesklav! I pa sirprenan alor ki Zeova ti pe al anmenn maler lo Siri, Filisti, ek Tir.
7. Ki Edom, Amonn, ek Moab ti annan an komen avek Izrael, me konman zot ti tret bann Izraelit?
7 Edom, Amonn, ek Moab ti annan en keksoz an komen. Tou le trwa nasyon ti trouv fanmiy avek bann Izraelit. Bann Edomit ti desandans Abraam atraver Ezai, frer zimo Zakob. Alors, dan en sans zot ti bann frer Izrael. Bann Amonit ek Moabit ti desandans Lot, neve Abraam. Me eski Edom, Amonn, ek Moab ti tret zot fanmiy Izraelit dan en bon fason? Non! San okenn pitye, Edom ti servi lepe kont “son prop frer,” e bann Amonit ti vreman kriyel dan lafason ki zot ti tret bann egzile Izraelit. (Amos 1:11, 13) Menm si Amos pa ti mansyonnen ki Moab ti mal tret pep Bondye, bann Moabit ti’n opoz Izrael pour en bon pe letan. Pinisyon pour sa trwa nasyon ti pou sever. Zeova ti pou anmenn en destriksyon terib lo zot.
Nou pa kapab evit Zizman Bondye
8. Akoz sa sis nasyon obor Izrael pa ti kapab evit zizman Bondye?
8 I kler ki sa sis nasyon ki ti ganny adrese pli boner dan profesi Amos ti merit zizman Bondye. Deplis, zot pa ti kapab evit sa zizman dan okenn fason. Depi Amos sapit 1, verse 3 ziska sapit 2, verse 1, sis fwa Zeova i dir: “Mon pa pou sanz mon desizyon.” Wi, Zeova ti azir dapre son parol. I pa ti les nanryen anpes li anmenn zizman lo zot. Listwar i montre ki sak sa bann nasyon ti plitar sibir bann gran maler. Omwen kat ant zot—Filisti, Moab, Amonn, ek Edom—nepli egziste ozordi!
9. Ki bann zabitan Zida ti merit gannyen e akoz?
9 Apre profesi Amos ti konsantre lo en setyenm nasyon. Sa se son pei natal, Zida. Petet bann ki ti ekout Amos dan rwayonm nor Izrael ti sirprann pour tann li anons zizman kont rwayonm Zida. Akoz bann zabitan Zida ti merit en zizman sever? Amos 2:4 i dir: “Parski zot in rezet lalwa Zeova.” Zeova pa ti inyor lefe ki zot ti volonterman montre en mank respe pour son Lalwa. Dapre Amos 2:5, i ti predir: “Mon pou anvoy en dife dan Zida, e i pou devaste tou bann latour dan Zerizalenm kot dimoun i reste.”
10. Akoz Zida pa ti pou kapab evit sa maler ki ti pe vini?
10 Zida ki ti enfidel pa ti pou kapab evit sa maler ki ti pe vini. Pour setyenm fwa, Zeova ti dir: “Mon pa pou sanz mon desizyon.” (Amos 2:4) Zida ti resevwar pinisyon ki ti’n ganny predir kan i ti ganny anvair par bann Babilonnyen an 607 A.N.L. Ankor enn fwa, nou kapab vwar ki bann mesan pa kapab evit zizman Bondye.
11-13. Kont ki nasyon Amos ti profetize prensipalman, e konman zot ti pe ganny trete dan en fason kriyel?
11 Profet Amos ti’n fek anons zizman Zeova lo set nasyon. Serten ti’n kapab krwar ki Amos ti’n fini profetize, me zot ti’n tronpe. Amos ti ankor annan bokou keksoz pour dir! Travay prensipal ki Zeova ti demann Amos pour fer se pour anons en zizman sever kont sa dis tribi rwayonm nor Izrael. Izrael ti merit zizman Bondye parski kondisyon moral e spirityel sa nasyon ti’n ariv en nivo vreman deplorab.
12 Profesi Amos ti montre ki dan rwayonm Izrael, zot ti pe tret dimoun dan en fason kriyel. An rapor avek sa, Amos 2:6, 7 i lir: “Se sa ki Zeova in dir, ‘Akoz trwa revolt Izrael, e akoz kat, mon pa pou sanz mon desizyon, parski zot in vann sa enn ki drwat pour larzan, e sa enn ki pov pour pri en per sandalet. Zot anvi vwar lapousyer lo latet bann dernyen dimoun; e zot rezet bann dimoun ki annan limilite.’ ”
13 Bann dimoun drwat ti pe ganny vann “pour larzan.” Petet sa i vedir ki bann ziz, apre ki zot in aksepte larzan konman gous, ti pe pas santans lo bann inosan. Bann dimoun ki bann pov ti drwa larzan, ti pe vann sa bann pov konman lesklav lavaler “en per sandalet,” petet pour zis bann pti det. Bann zonm san pitye ‘ti anvi vwar’ oubyen fer tou fason pour abes “bann dernyen dimoun” ki ti pou fer zot anvoy lapousyer lo zot latet, ki endik ladetres, dey, oubyen imilyasyon. I ti annan sitan en kantite koripsyon ki “bann dimoun ki annan limilite” pa ti zanmen krwar zot pou trouv okenn lazistis.
14. Lekel ki ti pe ganny maltrete dan sa rwayonm dis tribi Izrael?
14 Remarke lekel ki ti pe ganny maltrete. Bann dimoun drwat, pov, bann dernyen dimoun, e bann ki annan limilite. Lalyans Lalwa ki Zeova ti’n fer avek bann Izraelit ti demande ki konpasyon i ganny demontre anver bann ki san defans e dan bezwen. Okontrer, kondisyon sa bann dimoun koumsa dan sa dis tribi rwayonm Izrael ti vreman move.
“Met ou pare pour rankontre ou Bondye”
15, 16. (a) Akoz bann Izraelit ti ganny averti pour ‘met zot pare pour rankontre zot Bondye’? (b) Ki mannyer Amos 9:1, 2 i montre ki bann mesan pa ti pou kapab sov zizman Bondye? (c) Ki ti arive avek sa rwayonm dis tribi Izrael an 740 A.N.L.?
15 Vi ki imoralite ek lezot pese ti partou an Izrael, pour sa rezon profet Amos ti averti sa nasyon rebel: “Met ou pare pour rankontre ou Bondye.” (Amos 4:12) Bann Izraelit enfidel pa ti pou kapab evit sa zizman Bondye ki ti pe aprose parski pour en wityenm fwa, Zeova ti dir: “Mon pa pou sanz mon desizyon.” (Amos 2:6) Konsernan bann mesan ki kapab esey kasyet li, Bondye ti dir: “Ni sa enn ki pe taye pa pou sape, e ni sa enn ki pe sove pa pou trouv semen sorti. Si zot fouy dan fon Seol, mon lanmen pour al tir zot laba; e si zot mont anler dan lesyel, mon pou fer zot desann.”—Amos 9:1, 2.
16 Bann mesan pa ti pou kapab sap zizman Zeova par fouy “dan fon Seol,” ki senbolikman vedir esey kasyet dan bann landrwa pli ba lo later. Zot pa ni ti pou kapab evit zizman Bondye par “mont anler dan lesyel,” setadir esey pran refiz lo bann montanny o. Lavertisman Zeova ti kler: Napa okenn landrwa kasyet kot i pa kapab arive. Lazistis Zeova ti demande ki rwayonm nor Izrael i rann kont pour sa bann move keksoz ki i ti pe fer. Sa letan ti vreman arive. An 740 A.N.L., apepre 60 an apre ki Amos ti’n rikord son profesi, rwayonm nor Izrael ti ganny defet par bann Asiryen.
Zizman Bondye i selektif
17, 18. Ki Amos sapit 9 i revele konsernan mizerikord Bondye?
17 Profesi Amos in ed nou pour vwar ki bann ki resevwar zizman Bondye i toultan merite e zot pa kapab evit li. Me liv Amos i osi endike ki zizman Zeova i selektif. Bondye i kapab trouv bann mesan nenport landrwa kot zot kasyet e pas son zizman lo zot. I kapab osi trouv bann ki drwat e bann ki repantir, sa bann ki i deside demontre son mizerikord anver zot. Sa i ganny fer resorti dan en fason merveye dan dernyen sapit liv Amos.
18 Dapre Amos sapit 9, verse 8, Zeova ti dir: “Mon pa pou detrir fanmiy Zakob konpletman.” Parey nou vwar dan verse 13 ziska 15, Zeova ti promet ki i ti pou “rasanble tou bann egzile” son pep. Mizerikord pou ganny demontre anver zot e zot pou rezwir sekirite ek prosperite. Zeova ti predir: “Sa enn ki laboure pou depas sa enn ki rekolte.” Zis mazin sa—en rekolt sitan an abondans ki i pa ni pou ankor fini ganny ramase ler prosenn sezon pour laboure e senmen pou’n arive!
19. Ki ti arive avek en restan dimoun sorti Izrael ek Zida?
19 Nou kapab dir ki zizman Zeova kont bann mesan an Zida ek Izrael ti selektif dan le sans ki bann ki ti repantir ek bann ki ti annan en bon latitid ti ganny demontre mizerikord. Dan lakonplisman sa profesi restorasyon ki’n ganny rikorde dan Amos sapit 9, en restan dimoun dan Izrael ek Zida ki ti repantir ti retournen sorti an egzil an 537 A.N.L. Letan zot ti ariv dan zot pei natal ki zot ti kontan, zot ti reetablir ladorasyon pir. Zot ti osi rekonstrir zot lakaz, plant bann pye rezen e fer zot zarden an sekirite.
Zizman Zeova pou vini!
20. Ki lasirans nou gannyen kan nou egzamin mesaz zizman ki Amos ti anonse?
20 Letan nou egzamin bann mesaz zizman Bondye ki Amos ti anonse, sa i devret donn nou lasirans ki Zeova pou met en lafen avek mesanste dan nou letan. Akoz nou kapab krwar sa? Premyerman, sa bann legzanp lepase lo fason azir Zeova avek bann mesan i endike konman i pou azir dan nou letan. Dezyenmman, legzekisyon zizman Bondye lo rwayonm dis tribi Izrael ki ti pratik fo ladorasyon i donn nou lasirans ki Bondye pou detri Kretyente, parti dominan Gran Babilonn, tou bann fo larelizyon.—Revelasyon 18:2.
21. Akoz Kretyente i merit zizman Bondye?
21 Napa okenn dout ki Kretyente i merit zizman Bondye. Son kondisyon moral e spirityel ki deplorab i koz pour li menm. Kretyente—ek larestan lemonn Satan—i merit zizman Zeova. Zot pa pou kapab evit li osi parski kan i’n ariv ler pour egzekit zizman, parol Amos dan sapit 9, verse 1, pou aplike: “Ni sa enn ki pe taye pa pou sape, e ni sa enn ki pe sove pa pou trouv semen sorti.” Wi, nenport landrwa ki bann mesan i kapab kasyet, Zeova pou trouv zot.
22. Ki pwen konsernan zizman Bondye ki byen kler dan 2 Tesalonisyen 1:6-8?
22 Bann ki resevwar zizman Bondye i toultan merite, zot pa kapab evit li, e zizman Bondye i selektif. Nou kapab vwar sa dan sa ki zapot Pol ti dir: “Bondye i zis. I pou repey par soufrans bann ki fer zot soufer, e pour zot ki pe soufer, i pou donn zot repo, ensi ki nou osi. I pou fer sa kan Senyer Zezi pou paret dan lesyel avek son bann lanz pisan, avek laflanm dife, pour tir vanzans lo bann ki pa konn Bondye ek bann ki pa obei levanzil ki konsern nou Senyer Zezi.” (2 Tesalonisyen 1:6-8) “Bondye i zis” pour repey bann ki merit zizman akoz zot in fer soufer bann ki i’n swazir. Zot pa pou kapab evit sa zizman parski bann mesan pa sirviv “kan Senyer Zezi pou paret dan lesyel avek son bann lanz pisan, avek laflanm dife.” Zizman Bondye pou osi selektif dan le sans ki Zezi pou tir vanzans “lo bann ki pa konn Bondye ek bann ki pa obei levanzil.” Deplis, egzekisyon zizman Bondye pou anmenn rekonfor pour son pep ki’n soufer.
Lespwar pour bann Dimoun drwat
23. Ki lespwar ek rekonfor nou kapab retire dan liv Amos?
23 Profesi Amos i kontyen en zoli mesaz lespwar ek rekonfor pour bann ki annan sa bon latitid. Parey i’n ganny predir dan liv Amos, Zeova pa ti detrir son pep konpletman dan letan lontan. I ti finalman rasanble bann egzile dan Izrael, fer zot retourn dan zot pei natal e beni zot avek labondans sekirite ek prosperite. Ki sa i vedir pour nou ozordi? I donn nou lasirans ki zour Bondye pou egzekit son zizman, i pou trouv bann mesan nenport ki landrwa ki zot kapab kasyet. I pou osi trouv bann ki i vwar i merit son mizerikord nenport ki landrwa ki zot reste lo later.
24. Konman bann serviter Zeova dan nou letan in ganny beni?
24 Antretan ki nou pe esper zizman Zeova kont bann mesan, ki nou eksperyanse konman son serviter fidel? Zeova in beni nou avek prosperite spirityel an abondans! Nou rezwir en kalite ladorasyon kot napa mansonz ek tronpri sorti dan bann fo lansennyman Kretyente. Zeova in osi beni nou avek nouritir spirityel an abondans. Me pa oubliye ki avek bokou benediksyon ki sorti kot Zeova, i osi annan en gran responsabilite. Zeova i ekspekte nou averti lezot konsernan sa zizman ki pe vini. Nou anvi fer tou sa ki nou kapab pour rod sa bann ki annan sa bon latitid pour ganny lavi eternel. (Akt 13:48) Wi, nou anvi ed otan dimoun ki nou kapab pour benefisye avek sa prosperite spirityel ki nou pe rezwir la konmela. Nou osi anvi zot sirviv legzekisyon zizman Bondye kont bann mesan, ki pe aprose. Byensir, pour rezwir sa bann benediksyon, nou bezwen annan sa bon kondisyon leker. Parey nou pou vwar dan lartik swivan, sa osi i ganny fer resorti dan profesi Amos.
Ki ou pou reponn?
• Ki mannyer profesi Amos i montre ki bann ki eksperyans zizman Zeova i toultan merite?
• Ki laprev Amos i donnen pour montre ki nou pa kapab evit zizman Bondye?
• Ki mannyer liv Amos i montre ki egzekisyon zizman Bondye i selektif?
[Kestyon]
[Portre lo paz 13]
Rwayonm Izrael pa ti kapab sap zizman Bondye
[Portre lo paz 15]
An 537 A.N.L., en restan dimoun dan Izrael ek Zida ti retournen sorti an egzil Babilonn