Eski ou aksepte Led ki Zeova i donnen?
Eski ou aksepte Led ki Zeova i donnen?
“Zeova i mon led; Mon pa pou per.”—EBRE 13:6, NW.
1, 2. Akoz i enportan ki nou aksepte led ek gidans Zeova dan nou lavi?
IMAZIN ou pe marse lo en montanny. Me ou pa tousel, en gid in dakor pour akonpanny ou, e i sa pli bon gid ki egziste. I annan plis leksperyans e i pli fit ki ou. Kantmenm sa, avek pasyans i mars akote ou. I remarke ki tanzantan ou tonm en kou. Petet ou’n tonm dan en landrwa danzere, e vi ki i vreman anvi protez ou, i anvoy son lanmen pour tir ou dan sa danze. Eski ou ti pou refiz son led? Sirman ou ti pou aksepte! Parski ou lavi i an danze.
2 Konman Kretyen, nou osi nou lo en semen ki difisil pour swiv. Eski nou devret mars lo sa semen etrwat nou tousel? (Matye 7:14) Non, Labib i fer vwar ki Zeova i sa pli bon Gid ki nou kapab trouve, e i pare pour les imen mars avek li. (Zenez 5:24; 6:9) Eski Zeova i ed son bann serviter anmezir ki zot pe marse? I dir: “Parski mwan, Zeova mon ou Bondye, mon pe tyonbo ou lanmen drwat, sa Enn ki pe dir ou, ‘pa bezwen per. Mon pou ed ou.’” (Izai 41:13) Avek labonte, Zeova i pare pour ede e partaz son lanmitye avek bann ki anvi mars avek li, zis parey sa gid ki nou’n mansyonnen pli boner. Sirman nou tou nou ti pou anvi aksepte son led!
3. Ki kestyon nou pou diskite dan sa lartik?
3 Dan lartik presedan nou ti diskit kat fason ki Zeova ti ed son pep dan letan lontan. Eski ozordi i ed son pep dan menm fason? Ki mannyer nou kapab fer sir ki nou aksepte sa kalite led? Annou egzamin sa bann kestyon ansanm. Kan nou fer sa, nou pou kapab annan plis lasirans ki Zeova i sa enn ki vreman ed nou.—Ebre 13:6.
Led sorti kot bann Lanz
4. Akoz bann serviter Bondye ozordi i kapab asire ki zot annan sipor bann lanz?
4 Eski bann lanz i ed bann serviter Zeova lo later ozordi? Wi, zot fer li. I vre ki ozordi bann lanz pa aparet pour tir bann vre adorater dan danze. Menm dan letan Labib, byen rar ki bann lanz ti aparet avek bann imen. Laplipar keksoz ki zot ti fer, bann imen pa ti vwar, e koumsa menm i ete ozordi. Antouka, bann serviter Bondye ki ti realize ki bann lanz ti la pour siport zot, ti vreman ganny ankouraze par sa. (2 Lerwa 6:14-17) Nou annan tou rezon pour santi parey.
5. Ki mannyer Labib i montre ki bann lanz i enplike dan sa travay predikasyon ozordi?
5 Bann lanz Zeova i vreman enterese dan en travay spesyal ki nou enplike ladan. Ki sa travay? Nou kapab trouv larepons dan Revelasyon 14:6: “Apre mon ti war en lot lanz pe anvole atraver lesyel, avek en levanzil eternel pour anons tou zabitan later, tou nasyon, tribi, lalang ek pep.” I kler ki sa “levanzil eternel” i relye avek sa “bonn nouvel Rwayonm” ki Zezi ti dir “pou ganny anonse partou dan lemonn” avan lafen sa sistenm. (Matye 24:14) Byensir, bann lanz pa pe pres port-an-port. Zezi in donn imen sa latas byen enportan. (Matye 28:19, 20) Pa i ankourazan pour konnen ki anmenmtan nou pe akonpli sa latas, nou annan led bann lanz ki sen, saz e pwisan!
6, 7. (a) Kwa ki montre ki nou annan sipor bann lanz dan sa travay predikasyon? (b) Ki mannyer nou kapab asire ki nou pou ganny sipor bann lanz?
6 Nou annan levidans ki bann lanz pe donn nou sipor dan sa travay. Par egzanp, souvannfwa nou antann ki ler bann Temwen Zeova pe prese, zot zwenn en dimoun ki pa tro lontan ti’n priy Bondye pour ed li vwar laverite. Sa bann leksperyans i ariv tro souvan pour nou dir ki i zis en kwensidans. Lefe ki bann lanz pe ed nou, bokou plis dimoun pe aprann fer sa ki en lanz ki ti pe “anvole atraver lesyel” ti dir: “Donn Bondye loner e rann li glwar.”—Revelasyon 14:7.
7 Eski vreman ou ti a kontan ganny sipor bann lanz pwisan? Alor, fer tou sa ki ou kapab pour byen akonpli ou minister. (1 Korentyen 15:58) Kan nou volonterman fer sa travay spesyal ki Zeova in konfye nou, nou kapab asire ki son bann lanz pou ed nou.
Led sorti kot Sef bann Lanz
8. Ki pozisyon Zezi i annan dan lesyel, e akoz sa i ankourazan?
8 Zeova i osi donn nou led sorti kot en lot kalite lanz. Dan Revelasyon 10:1 en lanz i ganny dekrir konman enn ki annan “gran pouvwar” e son “figir ti konman soley.” San dout, sa lanz dan sa vizyon ti pe reprezant Zezi Kri ki ti’n ganny pwisans dan lesyel. (Revelasyon 1:13, 16) Eski Zezi i vreman en lanz? Dan en sans wi, parski i en arkanz. (1 Tesalonisyen 4:16) Kwa sa en arkanz? Sa mo i vedir “lanz prensipal” oubyen “sef lanz.” Zezi i pli pwisan ki tou lezot garson spirityel ki Zeova in kree. Zeova in met li ansarz tou Son bann larme lanz. Vi ki i sef bann lanz, i en gran sours led. Dan ki sans?
9, 10. (a) Ki mannyer Zezi i vin en “led” pour nou kan nou fer pese? (b) Ki led nou kapab gannyen ler nou egzamin legzanp Zezi?
9 Zapot Zan ki ti avanse dan laz ti ekrir: “Si okenn antre zot i arive fer pese nou annan en avoka [oubyen en “led,” NW] kot Bondye, Zezi-Kri, nou Lazistis.” (1 Zan 2:1) Akoz Zan ti dir ki Zezi i nou “led” sirtou ler nou “fer pese”? Anfet, toulezour nou fer pese, e pese i anmenn lanmor. (Eklezyast 7:20; Romen 6:23) An realite, Zezi ti donn son lavi konman en sakrifis pour nou pese. I akote nou Papa ki pran pitye, pour sipliy pour nou. Nou tou nou bezwen sa kalite led. Ki mannyer nou kapab aksepte sa led? Nou bezwen repantir e demann pardon lo baz sakrifis Zezi. Nou devret evite repet nou bann pese.
10 Zezi pa’n zis mor pour nou, me i’n osi kit en legzanp parfe pour nou. (1 Pyer 2:21) Son legzanp i gid nou, i ed nou pour vey byen bann desizyon ki nou pran pour ki nou pa fer bann pese grav e pour fer plezir Zeova. Pa nou kontan ki nou annan sa kalite led? Zezi ti promet son bann disip ki zot pou ganny en lot led.
Led Lespri sen
11, 12. Kisisa lespri sen, ki kantite pwisan i ete, e akoz nou bezwen li ozordi?
11 Zezi ti fer sa promes: “Mon pou demann mon Papa, e i pou donn zot en lot Konseyer [oubyen “led,” NW] ki pou reste avek zot pour touzour. Sa i Lespri laverite, ki lemonn pa kapab resevwar.” (Zan 14:16, 17) Sa “Lespri laverite” oubyen lespri sen, pa en dimoun me en lafors. Annefe i lafors aktif Zeova. I sitan pwisan ki i pa kapab ganny konpare avek nanryen. I sa lafors ki Zeova ti servi pour kree liniver, pour fer bann mirak enpresyonan e pour revel son lavolonte atraver bann vizyon. Vi ki ozordi Zeova pa pe servi son lespri sen pour fer sa bann keksoz, eski sa i vedir ki nou pa bezwen son lespri sen?
12 Non, i pa vedir sa. Dan sa bann “letan difisil” ki nou bezwen fer fas avek, nou bezwen lespri sen Zeova plis ki zanmen. (2 Timote 3:1) Lespri sen i donn nou lafors pour andir bann leprev. I ed nou pour devlop bann zoli kalite ki fer nou vin pli pros avek Zeova ek nou bann frer ek ser spirityel. (Galat 5:22, 23) Alor, ki byenfe nou kapab gannyen atraver sa led sorti kot Zeova?
13, 14. (a) Akoz nou kapab asire ki Zeova i pare pour donn son pep son lespri sen? (b) Ki kalite aksyon ki kapab montre ki nou pa vreman aksepte lespri sen?
13 Premyerman, nou bezwen priye pour ganny lespri sen. Zezi ti dir: “Si, zot, move konman zot ete, zot kapab donn bon keksoz zot zanfan, i annan plis rezon pour ki zot Papa ki dan lesyel pou donn son Lespri Sen tou bann ki demann li?” (Lik 11:13) Wi, Zeova i sa pli bon Papa ki nou kapab imazinen. Si avek lafwa nou senserman demann li son lespri sen, sirman i pou donn nou son lespri sen avek gran ker. Kestyon ki nou kapab demande se, Eski nou demann Bondye son lespri sen? Dan nou lapriyer toulezour nou devret demann Zeova son lespri sen.
14 Dezyenmman, nou aksepte sa kado par viv an armoni avek lespri sen. Pour donn en legzanp: Meton en Kretyen pe lalit avek sa tandans pour get pornografi. I’n priye pour ki lespri sen i ed li reziste sa move labitid. I’n osi rod led avek bann ansyen, e zot in konsey li pour pran bann aksyon serye, tel parey evit okenn kontak avek bann keksoz ki kapab fer li vwar pornografi. (Matye 5:29) Me si i pa fatig li avek zot konsey e i kontinyen ekspoz son lekor avek bann tantasyon? Eski i pe viv an armoni avek son lapriyer pour li ganny led lespri sen? Okontrer, eski pa i pe riske sagrin lespri sen Bondye e perdi sa kado? (Efezyen 4:30) Wi, nou tou nou devret fer tou sa ki nou kapab pour fer sir ki nou kontinyen ganny sa led sorti kot Zeova.
Led sorti dan Parol Bondye
15. Ki mannyer nou kapab montre ki nou pa pran Labib konman en naryen ditou?
15 Pour plizyer syek, Labib in en sours led pour bann serviter fidel Zeova. Olye pran Labib konman en nanryen ditou, nou devret gard antet ki Labib i en gran sours led. Pour nou aksepte sa led i demann zefor. Nou devret lir Labib toulezour.
16, 17. (a) Ki mannyer Psonm 1:2, 3 i dekrir rezilta ki nou gannyen ler nou lir lalwa Bondye? (b) Ki mannyer Psonm 1:3 i montre ki nou bezwen travay dir?
16 Remarke ki Psonm 1:2, 3 i dir lo en dimoun ki fer plezir Bondye: “Me i pran plezir dan lalwa Zeova, e i lir son lalwa avwabas lizour e aswar. Sirman i pou vin parey en pye dibwa ki’n ganny plante obor bann larivyer, ki raport son fri pandan son sezon e ki son fey pa fletri. Tou sa ki i fer pou reisi.” Eski ou vwar pwen pli enportan dan sa de verse? I fasil pour lir sa bann parol e konklir ki zot senpleman pe dekrir en zoli senn kot i annan lape—kot en pye dibwa ki donn lonbraz in pouse obor en larivyer. Pa i ti pou gou fer en pti asoupi apremidi dan en zoli landrwa koumsa! Me sa psonm pa pe demann nou pour mazin repo. I pe montre nou en portre ki byen diferan, enn ki enplik travay dir. Ki mannyer?
17 Remarke ki sa pye dibwa i pa en pye dibwa ki’n pouse par azar obor en larivyer. I en pye fri, enn ki’n ganny “plante” dan en zoli landrwa—“obor bann larivyer.” Ki mannyer en pye dibwa i kapab pous obor plis ki en larivyer? Dan en bitasyon kot i annan plizyer pye fri, sa fermye i kapab fouy bann rigol pour fer delo ariv ziska kot rasin son bann pye dibwa. Anr, aprezan mon konpran! Si dan en sans spirityel nou raport fri parey sa pye dibwa, sa i akoz en dimoun in ed nou en kantite. Nou pe asosye avek en lorganizasyon ki fourni delo laverite ziska kot nou. Me nou bezwen fer nou par. Nou bezwen bwar sa delo presye, reflesir e fer resers pour ki nou kapab fer sa laverite dan Parol Bondye antre dan nou lespri ek leker. Dan sa fason, nou osi nou pou kapab raport bon fri.
18. Ki nou bezwen fer pour nou kapab trouv larepons pour nou kestyon?
18 Nou pa benefisye si nou Labib i zis la lo en letazer, zanmen nou ouver li. I pa ni en liv mazik, kot nou ferm nou lizye, ouver li lo nenport paz, epi nou ekspekte pour trouv larepons nou kestyon lo sa paz. Ler nou bezwen fer en desizyon, nou devret rod “konnesans Bondye” zis parey nou pe rod en trezor. (Proverb 2:1-5) Souvannfwa, nou bezwen fer bann resers oprofon pour nou kapab vwar en konsey ki spesifikman koz lo sa ki nou pe rode. Nou annan en kantite piblikasyon baze lo Labib pour ed nou fer resers. Anmezir ki nou servi zot pour ganny sa lasazes tre presye dan Parol Bondye, nou pe vreman servi byen bann led ki Zeova i donn nou.
Led sorti kot bann Konpanyon Kretyen
19. (a) Akoz nou kapab dir ki bann lartik dan Latour Veyer ek Réveillez-vous! i bann led sorti kot nou bann konpanyon Kretyen? (b) Ki mannyer en lartik dan nou bann piblikasyon in ed ou?
19 Bann serviter Bondye lo later in toultan ed kanmarad. Eski Zeova in sanze dan sa domenn? Non. San okenn dout, nou tou nou kapab mazin en moman kot nou ti bezwen led, e lanmenm ler enn nou bann konpanyon Kretyen ti ed nou. Eski ou kapab mazin serten lartik dan Latour Veyer oubyen Réveillez-vous! ki ti donn ou sa rekonfor ki ou ti bezwen, ki ti ed ou rezourd en problenm, ouswa enn ki ti ed ou fer fas avek en sitiasyon ki ti pe teste ou lafwa? Zeova in donn ou sa kalite led atraver ‘lesklav fidel e pridan’ ki’n ganny apwente pour donn “manze kan i ler.”—Matye 24:45-47.
20. Ki mannyer bann ansyen dan kongregasyon i prouve ki zot bann “kado zonm”?
20 Parfwa, nou ganny led avek nou bann konpanyon Kretyen dan en fason pli direk. I kapab ki en ansyen dan kongregasyon i donn en diskour ki tous nou, oubyen nou pe pas dan en letan difisil e en ansyen i fer en vizit pastoral kot nou ki vreman ed nou, ouswa i donn nou bann bon konsey ki ed nou pour vwar e sirmont en febles. Remarke ki en Kretyen byen rekonesan ti ekrir konsernan en ansyen ki ti ed li: “Dan predikasyon, i ti pasyante avek mwan, pour ki mon kapab koze. Son lavey, mon ti’n priy Zeova pour ed mwan trouv en dimoun ki mon kapab koz avek. Son lannmen, sa frer ti koz byen avek mwan, i ti vreman konpran mwan. I ti ed mwan pour vwar ki mannyer Zeova in ed mwan pour bokou lannen. Mon remersye Zeova pour anvoy sa ansyen kot mwan.” Dan tou sa bann fason, bann ansyen dan kongregasyon i montre ki zot bann “kado zonm,” en kado ki Zeova in donnen atraver Zezi Kri pour ed nou andire lo sa semen ki anmenn ver lavi.—Efezyen 4:8.
21, 22. (a) Ki i arive letan tou dimoun dan kongregasyon i aplik sa konsey dan Filipyen 2:4? (b) Menm si sa aksyon pour demontre labonte anver nou i pti, akoz i enportan?
21 Apard ki bann ansyen, sak Kretyen ki fidel i anvi aplik sa komannman enspire pour pa “pran ka zis avek [son] prop lentere, me osi avek lentere lezot.” (Filipyen 2:4) Kan tou Kretyen dan kongregasyon i aplik sa konsey, nou pou kapab vwar bann zoli aksyon ki demontre labonte. Par egzanp, en fanmiy ti bezwen fer fas avek bann maler ki ti ariv enn apre lot. En msye ti’n anmenn son pti fiy avek li laboutik. Ler zot ti pe retournen, zot ti enplike dan en aksidan. Sa pti fiy ti mor, e sa msye ti gravman blese. Ler i ti ganny large lopital, i ti andikape, alor i pa ti kapab fer nanryen lo li menm. Son madanm ti tro trouble par tousala, ki i pa ti kapab pran swen avek son msye li tousel. Alor, en koup dan kongregasyon ti deside fer sa koup ki ti dan lapenn vin reste kot zot. Sa koup ti pran swen avek zot pour plizyer semenn.
22 Byensir, labonte pa zis ganny demontre ler i annan maler oubyen ler ou bezwen fer sakrifis. Parfwa nou kapab ganny led ki pli pti ki sa. Menm si sa aksyon pour demontre labonte anver nou i pa paret bokou, nou vreman apresye sa, pa vre? Eski ou kapab mazin en moman kot en frer oubyen en ser ti dir ou en zoli parol ouswa fer en keksoz pour ou ki ti vin sa led ki ou ti bezwen? Souvannfwa, Zeova i pran swen avek nou dan sa fason.—Proverb 17:17; 18:24.
23. Ler nou esey fer nou mye pour ed kanmarad, ki mannyer Zeova i vwar sa?
23 Eski ou ti pou kontan ki Zeova i servi ou pour ed lezot? Sa gran loportinite i kapab pour ou. Annefe, Zeova i apresye ler ou fer sa zefor pour ed lezot. Son Parol i dir: “Sa ki rann faver bann dernyen dimoun pe pret Zeova, e I pou rekonpans li pour son aksyon.” (Proverb 19:17) Kan nou ed nou bann frer ek ser, an retour sa i fer nou kontan en kantite. (Akt 20:35) Me bann ki toultan reste alekar, pa kapab eksperyans sa lazwa ki nou gannyen ler nou donnen, oubyen ganny sa lankourazman avek bann ki pare pour ede. (Proverb 18:1) Alor, annou fidelman kontinyen asosye avek nou bann frer ek ser dan bann renyon pour ki nou kapab ankouraz kanmarad.—Ebre 10:24, 25.
24. Akoz nou pa devret santi ki Zeova pe priv nou serten keksoz menm si nou pa’n vwar mirak?
24 Pa i en plezir pour reflesir lo bann fason ki Zeova i ed nou? Menm si Zeova pa fer mirak dan nou letan pour akonpli son plan, nou pa devret santi ki Zeova pe priv nou serten keksoz. Sa ki vreman enportan se ki Zeova i ed nou tou pour nou kapab reste fidel. Si ansanm dan lafwa nou andire, nou pou vwar sa keksoz pli merveye e spektakiler ki Zeova pou fer! Annou determinen pour aksepte e servi o maksimonm led ki Zeova i donn nou, pour ki nou kapab viv an akor avek sa parol dan nou teks pour lannen 2005: “Mon led i sorti kot Zeova.”—Psonm 121:2.
Ki ou rapel?
Ki mannyer Zeova i fourni led ki nou bezwen ozordi atraver—
• bann lanz?
• son lespri sen?
• son Parol enspire?
• bann konpanyon Kretyen?
[Kestyon]
[Portre lo paz 15]
I ankourazan pour konnen ki nou annan sipor bann lanz dan sa travay predikasyon
[Portre lo paz 17]
Zeova i kapab servi enn nou bann konpanyon Kretyen pour donn nou sa rekonfor ki nou bezwen