Ganny formen pour donn en Temwannyaz oprofon

“Zot a vin mon bann temwen dan Zerizalenm, dan tou rezyon Zide ek Samari e ziska tou bann landrwa pli elwannyen lo later.”—AKT 1:8.

1, 2. Ki travay Pyer ti gannyen pour fer, e lekel ki ti donn li sa travay?

‘ZEZI in donn nou lord pour prese e anons bann dimoun ki se limenm ki Bondye in etabli pour ziz bann vivan ek bann mor.’ (Akt 10:38, 42) Avek sa parol, zapot Pyer ti eksplik Korney ek son fanmiy sa lord ki i ti’n gannyen pour anons sa bon nouvel.

² Kan ki Zezi ti donn sa lord? I tre probab ki Pyer ti pe mazin sa ki Zezi ti dir zis avan i ti mont dan lesyel. Sa zour, Zezi ti dir son bann disip fidel: “Zot a vin mon bann temwen dan Zerizalenm, dan tou rezyon Zide ek Samari e ziska tou bann landrwa pli elwannyen lo later.” (Akt 1:8) Me pour en pe letan avan sa, Pyer ti’n deza konnen ki konman en disip Zezi, i ti pou bezwen koz avek lezot konsernan son lafwa lo Zezi.

Trwa zan Formasyon

3. Ki mirak Zezi ti fer, e ki lenvitasyon i ti donn Pyer ek Andre?

³ Detrwa mwan apre son batenm lannen 29 N.L., Zezi ti pres dan sa landrwa kot Pyer ek son frer Andre ti travay konman peser lo Lanmer Galile. Zot ti’n travay tou lannwit me san okenn rezilta. Kantmenm sa, Zezi ti dir zot: “Avans kannot dan kre e zet ou lasenn pour atrap pwason.” Ler zot ti fer sa ki Zezi ti dir, “zot ti atrap telman kantite pwason ki zot lasenn ti pe desire.” Ler Pyer ti vwar sa mirak, i ti per, me Zezi ti rasir li: “Pa per, dezorme ou pou lapes zonm.”—Lik 5:4-10.

4. (a) Ki mannyer Zezi ti prepar son bann disip pour donn en temwannyaz? (b) Dan ki fason minister bann disip Zezi ti diferan avek sa ki pour li?

⁴ Deswit, Pyer ek Andre, osi Zak ek Zan ki ti de garson Zebede ti kit zot kannot e swiv Zezi. Pour preski trwa zan, zot ti akonpanny Zezi lo son bann vwayaz predikasyon e zot ti ganny formen konman pour anons sa bon nouvel. (Matye 10:7; Mark 1:16, 18, 20, 38; Lik 4:43; 10:9) Alafen sa letan, le 14 Nizan,  lannen 33 N.L., Zezi ti dir zot: “Sa ki krwar mwan, i ava fer bann menm kalite travay ki mon’n fer, e menm i pou fer travay pli enportan.” (Zan 14:12) Bann disip Zezi ti pou donn en temwannyaz oprofon parey Zezi ti fer me lo en pli o nivo. Pa ti pran bokou letan pour zot e osi lezot disip ki ti pou swiv apre, aprann ki zot ti pou rann temwannyaz “ziska tou bann landrwa pli elwannyen lo later,” e ‘ziska lafen sa sistenm.’—Matye 28:19, 20.

5. Dan ki fason nou kapab benefisye avek sa formasyon ki Zezi ti donn son bann disip?

⁵ Nou pe viv dan ‘lafen sa sistenm.’ (Matye 24:3) Kontrerman avek sa bann premye disip, nou pa kapab akonpanny Zezi e obzerv li pe pres avek dimoun. Me nou kapab benefisye avek sa formasyon ki Zezi ti donnen par lir dan Labib ki mannyer i ti prese e lenstriksyon ki i ti donn son bann disip. (Lik 10:1-11) Me sa lartik pou diskit en lot keksoz enportan ki Zezi ti montre son bann disip. Sa i sa bon latitid anver travay predikasyon.

En Lentere pour Dimoun

6, 7. Ki kalite Zezi ti annan ki ti fer son predikasyon efikas, e ki mannyer nou kapab imit li dan sa laspe?

⁶ Akoz Zezi ti donn en temwannyaz sitan efikas? Sa gran lentere ek konsern ki i ti annan pour dimoun i en rezon. En psalmis ti predir ki Zezi ti pou “pran pitye pour sa bann dernyen dimoun ek bann pov.” (Psonm 72:13) I ti sirman akonpli sa profesi. Labib i dir konsernan en moman dan lavi Zezi: “Son leker ti ranpli avek konpasyon pour lafoul ki i ti war, akoz zot ti fatige e dekouraze parey bann mouton ki napa berze.” (Matye 9:36) Menm bann gran peser ti santi son lentere e zot ti ganny atire anver li.—Matye 9:9-13; Lik 7:36-38; 19:1-10.

⁷ Ozordi nou pou efikas si nou demontre sa menm lentere pour dimoun. Avan partisip dan predikasyon, akoz ou pa pran en pe letan pour reflesir lo ki degre irzan dimoun i bezwen sa lenformasyon ki ou pe anmenn pour zot? Mazin sa bann problenm ki zot kapab annan ki selman Rwayonm ki pou rezourd. Esey annan en pwennvi pozitif lo tou dimoun, vi ki ou pa konnen lekel ki pou aksepte sa mesaz. Petet sa dimoun ki ou pe al vizite ti pe priye pour en dimoun parey ou pas kot li e ed li!

Motive par Lanmour

8. Parey Zezi, kwa ki motiv son bann disip pour pres sa bon nouvel?

⁸ Sa bon nouvel ki Zezi ti anonse ti annan pour fer avek lakonplisman lavolonte Bondye, osi ki non Bondye i ganny glorifye e ki Son drwa pour dirize i ganny zistifye. Tou dimoun i bezwen fer fas avek sa de keksoz. (Matye 6:9, 10) Lefe ki i ti kontan son Papa, sa ti pous Zezi pour gard son fidelite ziska lafen e pour donn en temwannyaz oprofon lo Rwayonm, ki pou rezourd sa bann keksoz. (Zan 14:31) Vi ki bann disip Zezi ozordi i annan sa menm motivasyon, zot travay dir dan predikasyon. Zapot Zan ti dir: “La lanmour Bondye: ki nou obei son konmannman;” sa i enkli sa komannman pour pres sa bon  nouvel e pour fer disip—1 Zan 5:3; Matye 28:19, 20.

9, 10. Apard ki lanmour pour Bondye, ki sa lot lanmour ki motiv nou pour donn en temwannyaz oprofon?

⁹ Zezi ti dir son bann disip: “Si zot kontan mwan, zot pou obei mon konmannman. Sa ki posed mon bann konmannman e obei zot, limenm ki kontan mwan.” (Zan 14:15, 21) Alor, lanmour pour Zezi i devret pous nou pour rann temwannyaz lo laverite e obeir lezot keksoz ki Zezi in demann nou pour fer. Apre son rezireksyon, Zezi ti aparet avek son bann disip e i ti ankouraz Pyer: “Pran swen avek mon bann lanyo. . . . Pran swen avek mon bann mouton. . . . Pran swen avek mon bann mouton.” Kwa ki ti devret pous Pyer pour fer sa? Zezi ti endik larepons ler i ti plizyer fwa demann Pyer: ‘Eski ou kontan mwan? . . . Eski ou annan lafeksyon pour mwan? . . . Eski ou kontan mwan?’ Wi, lanmour Pyer pour Zezi, son lafeksyon pour li, ti pou motiv li pour donn en temwannyaz oprofon, pour rod “bann lanyo” Zezi, e apre vin zot berze spirityel.—Zan 21:15-17.

¹⁰ Ozordi, nou pa konn Zezi parey Pyer ti konn li. Me nou konn tre byen sa ki Zezi in fer pour nou. Nou leker i ganny touse par sa gran lanmour ki ti fer li “gout lanmor pour tou dimoun.” (Ebre 2:9; Zan 15:13) Nou santi parey Pol ti santi ler i ti ekrir: “Lanmour Kris i kontrol nou . . . I’n mor pour tou bann vivan pour ki bann vivan i nepli viv pour zot menm, me pour li ki’n mor e resisite pour zot.” (2 Korentyen 5:14, 15) Ler nou pran oserye sa lord pour donn en temwannyaz oprofon, nou demontre ki nou apresye en kantite lanmour ki Zezi i annan pour nou e ki nou kontan li. (1 Zan 2:3-5) Nou pa pou zanmen anvi vin neglizan anver sa travay predikasyon,  konmsi nou konsider sakrifis Zezi san gran valer.—Ebre 10:29.

Gard nou Regar fikse lo sa ki enportan

11, 12. Pour ki rezon Zezi ti vin dan lemonn, e ki mannyer i ti montre ki i ti vwar sa konman son travay pli enportan?

¹¹ Ler Zezi ti devan Pons Pilat, i ti dir: “Mon’n ne e mon’n vin dan lemonn pour servi temwen pour laverite.” (Zan 18:37) Zezi pa ti les nanryen distrer li dan son travay pour rann temwannyaz lo laverite. Sa ti lavolonte Bondye pour li.

¹² Satan ti sirman teste Zezi dan sa domenn. En pe letan apre son batenm, Satan ti ofer li loportinite pour vin en gran dimoun dan lemonn, par donn li “tou bann rwayonm partou lo later.” (Matye 4:8, 9) Plitar, bann Zwif ti anvi fer li vin lerwa. (Zan 6:15) Serten dimoun i kapab mazinen ki nou ti pou’n pli byen si Zezi ti’n aksepte sa bann loportinite. Petet zot rezonnen ki konman en lerwa imen, Zezi ti pou’n kapab fer bokou dibyen pour limanite. Me Zezi ti rezet sa kalite panse. I ti vwar rann temwannyaz lo laverite konman keksoz pli enportan ki i devret fer.

13, 14. (a) Ki sa keksoz ki Zezi pa ti les distrer li avek son travay pli enportan? (b) Menm si Zezi ti pov lo plan materyel, ki i ti akonpli?

¹³ Deplis, rod larises pa ti en keksoz ki ti distrer Zezi. Alors, i pa ti en zonm ris. I pa ti ni menm annan son prop lakaz. En fwa, i ti dir: “Renar i annan zot trou, zwazo i annan zot nik, me Fis-de-Lonm li napa en landrwa kot i kapab repoz son latet.” (Matye 8:20) Ler Zezi ti mor, dapre Labib sel keksoz valer ki i ti annan i ti sa lenz ki bann solda Romen ti tir o sor pour gannyen. (Zan (19:23, 24) Alors, eski sa i vedir ki Zezi pa’n reisi dan lavi? Ditou!

¹⁴ Zezi ti akonpli bokou plis ki zonm pli ris ki anvi ed lezot ti pou’n kapab fer. Pol ti dir: “Zot konn lagras nou Senyer Zezi-Kri, ki menm ki i ti ris, pour zot in fer li pov, pour ki par son povrete zot vin ris.” (2 Korentyen 8:9; Filipyen 2:5-8) Menm si i ti pov lo plan materyel, Zezi ti fer li posib pour bann dimoun senp rezwir lavi eternel dan perfeksyon. Nou vreman annan rekonesans pour sa ki i’n fer! Nou osi kontan pour sa rekonpans ki i’n gannyen akoz i ti gard son regar fikse lo fer lavolonte Bondye!—Psonm 40:8; Akt 2:32, 33, 36.

15. Kwa ki annan plis valer ki larises?

¹⁵ Bann Kretyen ki ozordi i esey imit Zezi, pa les zot ganny distrer par rod larises. (1 Timote 6:9, 10) Zot rekonnet ki larises i kapab fer lavi konfortab, me zot konnen ki lavi eternel pa depan lo larises. Ler en Kretyen i mor, son larises materyel napa valer pour li zis parey sa lenz ti napa valer pour Zezi ler i ti mor. (Eklezyast 2:10, 11, 17-19; 7:12) Ler en Kretyen i mor, sel keksoz valer ki i annan, i son relasyon avek Zeova e avek Zezi Kri.—Matye 6:19-21; Lik 16:9.

Pa dekouraze par Lopozisyon

16. Ki mannyer Zezi ti fer fas avek lopozisyon?

¹⁶ Lopozisyon pa ti anpes Zezi pour rann temwannyaz lo laverite. I pa ti ni dekouraze menm si i ti konnen ki i ti pou bezwen sibir en lanmor matir. Pol ti dir konsernan Zezi: ‘Olye lazwa ki i merite, i’n sibir lanmor lo poto san pran kont laont e la i’n asiz dan kote drwat tronn Bondye.’ (Ebre 12:2) Remarke ki Zezi pa ti “pran kont laont.” I pa ti trakase ki bann oponan i mazinen lo li. I ti kontinyen konsantre lo fer lavolonte Bondye.

17. Ki nou kapab aprann atraver landirans Zezi?

¹⁷ Pol ti aplik leson ki nou kapab aprann  atraver landirans Zezi par ankouraz bann Kretyen: “Mazin en pe, ki mannyer i’n siport sitan lopozisyon delapar bann peser. E pa dekouraze, ni dezespere.” (Ebre 12:3) I vre, i kapab fatigan pour fer fas avek lopozisyon oubyen sikannri toulezour. I kapab fatigan pour kontinyen reziste latraksyon lemonn. Sirtou si nou bann fanmiy ki ankouraz nou pour vin en dimoun enportan i kritik nou. Me parey Zezi nou rod sipor avek Zeova anmezir ki nou determinen pour met Rwayonm premye dan nou lavi.—Matye 6:33; Romen 15:13; 1 Korentyen 2:4.

18. Ki sa bon leson nou kapab aprann atraver parol ki Zezi ti dir Pyer?

¹⁸ Zezi ti montre ki i pa oule ganny distrer ler i ti konmans dir son bann disip konsernan son lanmor ki ti pe aprose. Pyer ti ankouraz Zezi pour pa tro sever avek son lekor e i ti asir Zezi ki “sa pa pou zanmen ariv” li. Zezi ti refize ekout okenn parol ki ti kapab afeblir son determinasyon pour fer lavolonte Zeova. Zezi ti tourn son ledo avek Pyer e i ti dir: “Ale! Sorti la Satan! Ou en ros dan mon semen, ou pa mazin parey Bondye me konman zonm.” (Matye 16:21-23) Annou toultan annan sa menm determinasyon pour rezet bann panse imen. Okontrer, annou toultan ganny gide par panse Bondye.

Anmenn vre Byenfe

19. Menm si i ti fer bokou mirak, kwa ki ti parti pli enportan dan minister Zezi?

¹⁹ Zezi ti fer bokou mirak pour montre ki i ti Mesi. I ti menm lev bann dimoun mor. Sa bann travay ti atir bokou dimoun, me Zezi pa ti vin lo later zis pour fer en travay sosyal. I ti vin pour rann temwannyaz lo laverite. I ti konnen ki okenn byenfe materyel ki li menm ti ofer ti zis tanporer. Menm sa bann ki ti ganny resisite ti pou mor ankor. Se selman par rann temwannyaz lo laverite ki i ti pou kapab ed serten ganny lavi eternel.—Lik 18:28-30.

20, 21. Ki mannyer bann vre Kretyen i gard zot balans konsernan fer dibyen lezot?

²⁰ Ozordi, serten dimoun i esey imit bon travay Zezi par fer bann lopital oubyen fer lezot keksoz dan bann pei pov. Dan serten ka, i kout zot bokou pour fer sa, e zot senserite i merit ganny felisite. Me okenn soulazman ki zot anmennen i zis dir pour en pe letan. Se selman Rwayonm ki pou anmenn soulazman permanan. Alors, parey Zezi ti fer, bann Temwen Zeova i konsantre pour rann temwannyaz lo laverite konsernan sa Rwayonm.

²¹ Byensir, bann vre Kretyen i fer dibyen lezot. Pol ti ekrir: “Pandan ki nou annan lokazyon, annou fer dibyen tou dimoun, sirtou nou bann frer dan lafwa.” (Galat 6:10) Dan bann moman kritik oubyen ler en dimoun i dan bezwen, nou pa ezite pour “fer dibyen” nou prosen oubyen nou bann frer ek ser Kretyen. Me nou kontinyen konsantre lo sa ki pli enportan. Sa se rann temwannyaz lo laverite.

Aprann avek Legzanp Zezi

22. Akoz bann Kretyen i pres avek zot prosen?

²² Pol ti ekrir: “Maler pour mwan si mon pa anons Levanzil!” (1 Korentyen 9:16) Pol pa ti neglizan konsernan anons sa bon nouvel akoz i ti konnen ki sa ti pou sov li menm ek sa bann ki ekout li. (1 Timote 4:16) Nou vwar nou minister dan sa menm fason. Nou anvi ed nou prosen. Nou anvi montre nou lanmour pour Zeova. Nou anvi montre nou lanmour pour Zezi e nou lapresyasyon pour son gran lanmour pour nou. Pour sa rezon, ki nou pres sa bon nouvel e alor ‘viv leres nou lavi, non pa selon nou dezir imen, me selon lavolonte Bondye.’—1 Pyer 4:1, 2.

23, 24. (a) Ki leson nou aprann avek sa mirak konsernan pwason? (b) Lekel ozordi ki pe donn en temwannyaz oprofon?

²³ Parey Zezi, ler lezot i monk nou oubyen rezet nou mesaz, sa pa fer nou aret fer sa travay.  Nou aprann en leson atraver sa mirak ki Zezi ti fer ler i ti apel Pyer ek Andre pour swiv li. Nou konpran ki si nou obeir Zezi e zet nou lasenn dan delo ki kapab napa nanryen, nou kapab ganny bon rezilta. I annan bokou Kretyen ki’n atrap en bon pe pwason apre plizyer lannen travay dan bann teritwar ki paret pa prodiktif. Lezot in kapab al lapes kot i annan plis pwason e ganny en bon rezilta. Nenport keksoz ki nou fer, nou pa pou aret larg nou lasenn. Nou konnen ki Zezi pa ankor dir ki travay predikasyon in fini dan okenn par lo later.—Matye 24:14.

²⁴ Plis ki sis milyon Temwen Zeova i aprezan okipe dan plis ki 230 pei. Dan Latour Veyer le 1 Fevriye, 2005, i pou annan rapor annyel zot aktivite pandan lannen servis 2004. Sa rapor pou montre benediksyon Zeova lo sa travay predikasyon. Dan sa letan ki reste pour sa sistenm, annou kontinyen pran aker parol ankourazan Pol: “Anons Laparol, ensiste dan tou lokazyon.” (2 Timote 4:2) Annou kontinyen donn en temwannyaz oprofon ziska ki Zeova i dir ki sa travay in fini.

Konmansman sa lannen, Rapor Mondyal Lannen Servis Bann Temwen Zeova pa pou aparet dan Latour Veyer le 1 Zanvye. Plito i pou ganny pibliye dan nimero le 1 Fevriye.

Eski ou kapab reponn?

• Ki mannyer nou kapab benefisye avek formasyon ki Zezi ti donn son bann disip?

• Ki latitid Zezi ti annan anver dimoun ki i ti pres avek?

• Kwa ki pous nou pour donn en temwannyaz oprofon?

• Dan ki fason nou kapab reste konsantre lo fer lavolonte Bondye, parey Zezi ti fer?

[Kestyon]

[Portre lo paz 25]

Zezi ti vin lo later pour premyerman rann temwannyaz lo laverite

[Portre lo paz 26]

Temwen Zeova i fer tou pour donn en temwannyaz oprofon