Rod sa Perl “ki annan gran Valer” ozordi
Rod sa Perl “ki annan gran Valer” ozordi
“Sa Bonn Nouvel Rwayonm pou ganny anonse partou dan lemonn pour tou dimoun konnen.”—MATYE 24:14.
1, 2. (a) Ki bann Zwif dan letan Zezi ti mazinen lo Rwayonm Bondye? (b) Ki Zezi ti fer pour ed son bann disip byen konpran sa Rwayonm, e ki rezilta sa ti anmennen?
RWAYONM Bondye ti en size ki ti vreman enteres bann Zwif dan letan Zezi. (Matye 3:1, 2; 4:23-25; Zan 1:49) Me okonmansman, laplipar zot pa ti vreman konpran ki mannyer sa Rwayonm pou egzers son lotorite e ki kantite pwisan i ti pou ete. Zot pa ti ni menm konnen ki i ti pou en gouvernman dan lesyel. (Zan 3:1-5) Menm serten disip Zezi pa ti vreman konnen kisisa Rwayonm Bondye, oubyen ki zot devret fer pour kapab vin bann dirizan avek Kris.—Matye 20:20-22; Lik 19:11; Akt 1:6.
2 Anmezir ki letan ti pase, avek pasyans Zezi ti ansenny son bann disip en kantite leson. Par egzanp, sa parabol lo perl gran valer ki nou’n diskite dan lartik presedan, e i ti osi ansenny zot akoz i enportan pour fer bokou zefor pour rod sa Rwayonm lesyel. (Matye 6:33; 13:45, 46; Lik 13:23, 24) Tousala ti’n bezwen tous zot en kantite, parski apre zot ti vin bann proklanmater Rwayonm ki ti aktif e kouraze ki ti pres sa bon nouvel dan bann landrwa pli elwannyen, parey liv Akt i montre.—Akt 1:8; Kolosyen 1:23.
3. Ki Zezi ti dir lo sa Rwayonm konsernan nou letan?
3 Be ki mannyer i ete ozordi? Bann benediksyon dan en paradi lo later anba sa Rwayonm pe ganny anonse avek plizyer milyon dimoun. Dan son gran profesi konsernan lafen sa sistenm, Zezi ti dir: “Sa Bonn Nouvel Rwayonm pou ganny anonse partou dan lemonn pour tou dimoun konnen; e apre sa, lafen pou arive.” (Matye 24:3, 14; Mark 13:10) I ti osi eksplike ki sa gran travay pou ganny fer menm si i annan bann gro lobstak ek problenm oubyen menm persekisyon. Me kantmenm sa i ti donn sa lasirans: “Sa ki reste fidel ziska lafen pou ganny sove.” (Matye 24:9-13) Tousala, i demann sakrifis ek devosyon, zis parey sa marsan dan parabol Zezi ti demontre. Ozordi, eski i annan ki demontre sa kalite lafwa ek devouman pour rod sa Rwayonm?
Lazwa pour trouv Laverite
4. Ki lefe laverite i fer lo dimoun ozordi?
4 Sa marsan dan parabol Zezi ti deborde avek lazwa kan i ti vwar sa perl “ki annan gran valer.” Sa lazwa ki i ti’n gannyen ti pous li pour fer nenport kwa pour ganny sa perl. (Ebre 12:1) Pareyman ozordi, laverite lo Bondye ek son Rwayonm i atir dimoun e i osi motiv zot. Sa i fer nou mazin komanter ki Frer A. H. Macmillan ti ekrir konsernan son resers lo Bondye ek Son plan pour limanite dan liv Faith on the March. I ti dir: “Sa ki mon’n trouve, en kantite dimoun i ankor pe trouve tou le zan. Zot bann dimoun ki parey mwan ek ou, parski zot sorti dan diferan nasyon, ras, nivo lavi e zot annan diferan laz. Laverite pa fer lapliferans pour personn. I atir nenport ki kalite dimoun.”
5. Ki bon rezilta nou’n gannyen diran lannen servis 2004?
5 Nou vwar ki sa parol i vre akoz tou le zan plizyer milye dimoun ki annan leker senser pe ganny touse par sa bon nouvel Rwayonm Bondye pour dedye zot lavi avek Zeova e pour fer son lavolonte. I pa ti en leksepsyon pour lannen servis 2004, ki ti konmans depi Septanm 2003 ziska Out 2004. Pandan sa 1 an, 262,416 ti batize dan delo pour montre piblikman ki zot in dedye zot lavi avek Zeova. Sa ti arive dan 235 pei, kot tou le semenn bann Temwen Zeova pe fer 6,085,387 letid Labib. Zot fer sa pour ed tou kalite dimoun sorti dan diferan nasyon, tribi e ki koz diferan langaz pour aksepte laverite dan Labib ki anmenn ver lavi.—Revelasyon 7:9.
6. Pour ki rezon in kontinyen annan ogmantasyon diran bann lannen ki’n pase?
6 Kwa ki’n fer tousala posib? San okenn dout, Zeova in atir sa bann ki annan sa bon kondisyon leker anver li. (Zan 6:65; Akt 13:48) Me nou pa devret oubliy sa leta lespri sakrifis ek zefor kontinyel delapar sa bann ki pe donn tou pour sa Rwayonm. Alaz 79 an Frer Macmillan ti ekrir: “Depi ki mon ti aprann konsernan bann promes pour limanite ki malad e pe mor, mon lesperans dan sa ki mesaz ki Labib in revele pa’n vin sonm. A sa moman mon ti determinen pour aprann plis lo sa ki Labib i ansennyen pour ki mon kapab ed lezot ki parey mwan menm, pe rod konnesans lo sa Bondye Tou Pwisan, Zeova, ek son plan pour imen.”
7. Ki leksperyans ki demontre lazwa ek devouman bann ki pe trouv laverite?
7 Sa menm lantouzyasm i evidan parmi bann serviter Zeova ozordi. Pran par egzanp, Daniela ki sorti Vienna, Lotris. I ti dir: “Depi mon lanfans, Bondye in toultan mon pli bon zanmi. Mon ti toultan anvi konnen ki mannyer i apele. Akoz pour mwan, ‘Bondye’ ti tro lwen avek mwan. Me mon ti bezwen espere ziska ki mon ti annan 17 an. Sa letan bann Temwen Zeova ti rann mwan en vizit. Zot ti eksplik mwan tou sa ki mon ti anvi konnen lo Bondye. Finalman, mon ti vwar laverite e i ti en keksoz merveye! Mon ti sitan eksite ki mon ti konmans pres avek tou dimoun.” Son lantouzyasm ki i ti demontre ti fer lezot son bann kanmarad lekol sikann li. Daniela i kontinyen rakont nou: “Me pour mwan ti konmsi mon pe vwar en profesi Labib ganny akonpli, vi ki mon ti’n aprann ki Zezi ti dir ki lemonn pou ay son bann disip e zot pou ganny persekite akoz son non. Mon ti vreman kontan e sirprann.” Pa bokou letan apre, Daniela ti dedye son lavi avek Zeova e batize. Apre son batenm i ti konmans fikse lobzektif pour antreprann servis misyonner. Apre son maryaz, Daniela ek son mari Helmut ti konmans pres avek bann Afriken, Sinwan, Filipino ek Endyen ki reste Vienna. Ozordi, Daniela ek Helmut pe servi konman misyonner dan sid ek was Lafrik.
Zot pa aret dan Semen
8. Nonm en fason ki bokou in demontre zot lanmour pour Bondye ek fidelite anver son Rwayonm.
8 Annefe, servis misyonner i enn parmi bann plizyer fason ki pep Zeova ozordi i demontre zot lanmour pour Bondye ek zot fidelite anver son Rwayonm. Zis parey sa marsan dan parabol Zezi, bann ki pran sa servis i pare pour al dan bann landrwa byen lwen akoz sa Rwayonm. Byensir, sa bann misyonner pa pe vwayaze pour rod sa bon nouvel Rwayonm; okontrer zot pe anmenn sa nouvel kot bann dimoun ki reste dan bann landrwa pli elwannyen lo later. Zot pare pour ansenny sa bann dimoun e ed zot vin disip Zezi Kri. (Matye 28:19, 20) Dan bokou pei zot in bezwen fer fas avek bann gro difikilte. Me zot ganny bokou benediksyon pour zot landirans.
9, 10. Ki bann leksperyans eksitan ki bann misyonner pe gannyen dan bann pei ki byen lwen, tel parey Repiblik Lafrik Santral?
9 Pran par egzanp, Repiblik Lafrik Santral. Lannen pase ti annan 16,184 dimoun ki ti asiste Memoryal lanmor Kris. Sa i apepre set fwa plis ki lakantite proklanmater dan sa pei. Vi ki bokou landrwa dan sa pei napa elektrik, normalman bann dimoun i fer zot travay lakour deor anba en pye dibwa. Alor i normal ki bann misyonner i akonpli zot travay dan menm fason. Zot fer bann letid Labib deor anba lonbraz en pye dibwa. Deor i pa zis pli kler oubyen donn bon ler, me i osi annan en lot lavantaz. Bann dimoun dan sa pei i kontan Labib, e zot kontan koz lo bann topik relizye, zis parey dimoun i kontan koz lo sport ek letan dan lezot pei. Souvannfwa, bann dimoun ki pe pase i arete pour tyeke ki pe pase e zot vin ekoute.
10 En zour kan en misyonner ti pe fer en letid Labib deor, en zennonm ki reste lot kote semen ti aprose e dir ki lefe ki i pa’n ganny en vizit, alor sa misyonner i devret vizit li e etidye Labib avek li osi. Byensir, sa misyonner ti byen kontan pour vizit li, e sa zennonm pe fer progre byen vitman. Dan sa pei, souvannfwa lapolis i aret bann Temwen lo semen pa pour donn zot en somonn oubyen sarz zot, me plito pour demann bann dernyen kopi Latour Veyer ek Réveillez-vous! oubyen pour remersye zot pour en lartik ki zot in byen apresye.
11. Kantmenm difikilte, ki mannyer bann ki’n servi konman misyonner pour plizyer lannen i santi lo zot servis?
11 Bokou ki ti antreprann servis misyonner depi 40 an oubyen 50 an pase, zot ankor fidel dan sa servis. Pa sa i en legzanp lafwa ek perseverans pour nou tou! Pour 42 an, en koup in servi konman misyonner dan trwa pei. Sa msye i dir: “In annan difikilte. Par egzanp, nou ti bezwen vey nou kont malarya pour 35 an. Kantmenm sa, nou pa zanmen regrete ki nou’n vin misyonner.” Son madanm i azoute: “In toultan annan en kantite keksoz ki fer nou rekonesan. Predikasyon i vreman gou, e i fasil pour konmans letid Labib. Kan ou vwar bann etidyan asiste renyon e zot konmans konn lezot, sak fwa i parey en fanmiy ki pe zwenn ansanm.”
Zot konsider tou Keksoz “konman en pert”
12. Ki mannyer en dimoun i montre ki i vreman apresye valer sa Rwayonm?
12 Kan sa marsan ti trouv en perl ki annan gran valer, i ti ale deswit e i ti “vann tou sa ki i posede e i aste sa perl.” (Matye 13:46) Sa dezir pour pare pour abandonn tou sa ki ti kapab ganny konsidere konman keksoz valer, i evidan dan bann ki vreman apresye valer sa Rwayonm. Zapot Pol ki ti pou eksperyans laglwar Rwayonm Bondye ansanm avek Kris, ti ekrir: “Mon konsider tou keksoz konpletman konman en pert, akoz sa valer bokou pli siperyer ki annan dan konnesans mon Senyer, Kris Zezi. Akoz li, mon’n rezet tou, mon konsider tousala konman salte, pour kapab ganny Kris.”—Filipyen 3:8.
13. Ki mannyer en zonm an Repiblik Tyek ti demontre son lanmour pour sa Rwayonm?
13 Dan sa menm fason, bokou dimoun ozordi i pare pour fer bann gran sanzman dan zot lavi pour zot ganny benediksyon sa Rwayonm. Par egzanp an Oktob 2003, dan Repiblik Tyek, en zonm aze 60 an ki ansarz en lekol ti vwar sa liv Konnesans Ki Anmenn ver Lavi Eternel. Deswit apre ki i ti’n fini lir sa liv, i ti rod bann Temwen Zeova dan son rezyon pour li ganny en letid Labib. I ti fer bon progre e pa bokou letan apre i ti konmans asiste tou renyon. Me ki ti arive avek son bann plan pour esey ganny elekte konman mer en lavil e plitar pour esey ganny elekte konman en manm lasanble? I ti deside pourswiv en lot karyer, sa i lakours pour ganny lavi, konman en proklanmater Rwayonm. I ti dir: “Mon ti kapab donn mon bann etidyan lekol en kantite piblikasyon ki baze lo Labib.” Dan en lasanble an Zilyet 2004 i ti batize.
14. (a) Ki sa bon nouvel Rwayonm in pous plizyer milyon dimoun pour fer? (b) Ki kestyon nou tou nou kapab demann nou lekor?
14 Plizyer lezot dimoun dan lemonn antye in azir dan menm fason anver sa bon nouvel Rwayonm. Zot in sorti dan sa move lemonn, rezet zot vye personnalite, aret frekant bann dimoun ki zot ti frekante e aret tay deryer keksoz dan sa lemonn. (Zan 15:19; Efezyen 4:22-24; Zak 4:4; 1 Zan 2:15-17) Akoz zot fer tousala? Parski zot apresye bann benediksyon Rwayonm Bondye bokou plis ki okenn keksoz ki sa lemonn i kapab ofer. Eski ou annan sa menm santiman anver sa bon nouvel Rwayonm? Eski ou santi ou ganny pouse par sa bon nouvel pour fer bann sanzman neseser pour ki ou lavi, bann keksoz ki ou kontan ek lobzektif i vin an akor avek sa ki Zeova i ekspekte avek nou? Si ou fer sa, ou pou ganny bann benediksyon depi la konmela menm e dan lavenir.
Rekolt pe ariv lo son Pik
15. Ki Labib ti predir pep Bondye ti pou fer dan bann dernyen zour?
15 Psalmis David ti ekrir: “Zour ou lafors militer, ou pep pou ofer zot lekor volonterman.” Parmi sa bann ki’n ofer zot lekor i en “latroup zenn zan ki parey bann gout laroze” ek “en gran larme” ki konpri bann “madanm pe anons sa bon nouvel.” (Psonm 68:11; 110:3) Zonm konman fanm, zenn konman vye dan sa bann dernyen zour in kontinyen persevere e fer bann sakrifis pour kapab prese. Be ki rezilta sa in anmennen?
16. Donn en legzanp pour montre ki mannyer serviter Bondye pe fer zefor pour ed lezot aprann konsernan sa Rwayonm.
16 En pionye oubyen en proklanmater Rwayonm aplentan Lenn ti mazinen ki mannyer sa plis ki 2 milyon dimoun sourd dan sa pei i kapab ganny ede pour aprann konsernan sa Rwayonm. (Izai 35:5) Alors, sa ser ti deside zwenn en lenstitisyon Bangalore pour li aprann langaz siny. Laba i ti kapab partaz sa bon nouvel Rwayonm avek bokou dimoun sourd, e i ti osi kapab form plizyer group pour etidye Labib. Dan lespas detrwa semenn, apepre en douzenn dimoun ti konmans asiste renyon kot Lasal Rwayonm. Plitar, sa ser pionye ti zwenn en zennonm sourd sorti Calcutta kot en resepsyon maryaz. Sa zennonm ti demann li en pake kestyon e i ti vreman enterese pour konn plis lo Zeova. Me ti annan en problenm. Sa zennonm ti sipoze retourn Calcutta, ki 1600 kilomet avek sa landrwa kot i ti ete, pour konmans kolez, e laba ti napa Temwen ki ti konn langaz siny. Avek bokou zefor, i ti reisi fer son papa les li al lekol Bangalore plito ki Calcutta pour li kapab kontiny son letid Labib. I ti byen progrese, e apepre enn an plitar i ti dedye son lavi avek Zeova. Apre son batenm, i ti osi konmans etidye Labib avek plizyer dimoun sourd, e enn parmi ti son dalon ler zot ti ankor pti. Ozordi, biro brans Lenn pe fer laranzman pour plizyer pionye aprann langaz siny pour ed bann dimoun sourd.
17. Dir kwa ki ou vwar i ankourazan dan sa rapor lannen servis 2004 lo paz 21 ziska 24.
17 Lo paz 21 ziska 24 dan sa magazin, ou pou kapab vwar rapor mondyal lannen servis 2004 bann Temwen Zeova. Pran en pe letan pour egzamin sa rapor e vwar pour ou menm ki pep Zeova partou lo later ozordi pe rod sa perl ki “annan gran valer.”
Kontinyen “rod plito Rwayonm”
18. Ki lenformasyon Zezi pa ti enkli dan son parabol marsan, e akoz?
18 Annou retourn ankor en kou lo sa marsan dan parabol Zezi. Petet ou’n remarke ki Zezi pa ti dir nanryen ki sa marsan ti pou fer pour li viv, apre ki i ti’n vann tou sa ki i ti annan. I toutafe normal ki serten i kapab demande: ‘Be ki mannyer sa marsan pou ganny manze, lenz ek landrwa reste, vi ki aprezan i napa nanryen dekote? Ki byenfe sa zoli perl ti pou anmennen pour li aprezan?’ Sa bann kestyon i fer sans pour en dimoun ki ziz sa sitiasyon dapre pwennvi imen. Me eski Zezi pa ti demann son bann disip pour “rod plito Rwayonm Bondye ek son lazistis, e limenm i a donn zot anplis tou lezot keksoz osi”? (Matye 6:31-33) Pwen prensipal sa parabol i sa nesesite pour nou servi Bondye avek tou nou leker e demontre devouman pour sa Rwayonm. Eski nou kapab tir en leson ladan?
19. Ki leson enportan nou kapab tire dan parabol Zezi lo sa perl ki annan gran valer?
19 Si nou’n fek aprann sa bon nouvel oubyen depi lontan nou pe rod sa Rwayonm e pe dir lezot konsernan son bann benediksyon, nou tou nou devret kontinyen met tou nou lentere ek latansyon lo sa Rwayonm. Nou pe viv dan letan difisil, me nou annan bann rezon solid pour krwar ki sa ki nou pe rode i reel e napa nanryen ki egal avek li—zis parey sa perl ki sa marsan ti trouve. Bann levennman ki pe arive dan lemonn ek bann profesi Labib ki pe ganny akonpli i bann laprev konvenkan ki nou pe viv dan letan “lafen” sa sistenm. (Matye 24:3) Zis parey sa marsan, avek tou nou leker annou kontinyen devoue pour Rwayonm Bondye e apresye sa privilez pour pres sa bon nouvel.—Psonm 9:1, 2.
Eski ou rapel?
• Diran bann lannen ki’n pase, kwa ki’n fer li posib pour annan ogmantasyon parmi pep Bondye?
• Ki leta lespri bann misyonner i annan?
• Ki sanzman serten in fer akoz sa bon nouvel Rwayonm?
• Ki leson enportan nou kapab aprann dan parabol Zezi lo sa perl ki annan gran valer?
[Kestyon]
[Tablo lo paz 21-24]
RAPOR MONDYAL LANNEN SERVIS 2004 BANN TEMWEN ZEOVA
(Vwar piblikasyon)
[Portre lo paz 26]
Parey sa marsan, bann misyonner i ganny en kantite benediksyon
[Portre lo paz 27]
“Ou pep pou ofer zot lekor volonterman”