Trouv en Perl “ki annan gran Valer”

“Rwayonm lesyel i sa lobzektif ki zonm i pe pouse pour atenn, e bann ki pe pouse pour arive pe reisi.”—MATYE 11:12, NW.

1, 2. (a) Ki kalite ki rar ki Zezi ti mansyonnen dan enn son parabol lo Rwayonm? (b) Ki Zezi ti dir dan son parabol lo en perl ki annan gran valer?

ESKI i annan en keksoz ki ou atas en kantite valer avek ki ou ti pou donn tou sa ki ou annan oubyen abandonn tou sa ki ou annan pour nobou ganny li? Menm si bokou dimoun i koz lo devouman ler zot pe atenn serten lobzektif—ki swa pour ganny larzan, vin popiler, ganny pouvwar oubyen pozisyon—i rar ki en dimoun i trouv en keksoz ki sitan presye ki i pare pour abandonn tou keksoz pour li ganny sa keksoz. Zezi ti refer lo sa kalite ki rar me admirab dan enn son parabol lo Rwayonm Bondye ki fer reflesir.

² Sa i parabol oubyen legzanp lo en perl ki annan gran valer. I en parabol ki Zezi ti rakont zis son bann disip. Zezi ti dir: “Rwayonm lesyel i osi parey en marsan ki rod bann zoli perl, e kan i trouv enn ki annan gran valer, i vann tou sa ki i posede e i aste sa perl!” (Matye 13:36, 45, 46) Ki Zezi ti anvi sa bann dimoun ki ti pe ekout li aprann atraver sa legzanp? Ki mannyer nou kapab benefisye avek parol Zezi?

Bann Perl ki annan gran Valer

3. Akoz dan letan lontan bann zoli perl ti annan gran valer?

³ Depi byen byen lontan, perl in ganny konsidere konman en lobze dekorasyon. En sours i dir ki dapre en ekriven Romen ki apel Pliny, perl i okip “premye plas parmi tou keksoz ki annan valer.” Kontrerman avek lor, larzan oubyen avek plizyer pyer presye, perl i ganny fer avek keksoz ki vivan. I annan en kalite zwit ki kapab fer bann keksoz ki irit zot, par egzanp bann pti pti bout ros, vin bann zoli perl par anvlop zot avek en sibstans ki apel nak. Dan letan lontan, bann pli zoli perl ti ganny trouve dan Lanmer Rouz, Lanmer Golf, ek Losean Endyen, e sa ti vreman lwen avek Izrael. Sanmenm rezon ki Zezi ti koz lo “en marsan ki [vwayaze pour, NW ] rod bann zoli perl.” Pour en dimoun kapab trouv bann perl ki vreman annan valer, i bezwen fer bokou zefor.

4. Ki sa leson prensipal Zezi ti oule fer resorti dan son parabol en marsan ki rod perl?

⁴ Menm si bann zoli perl ti vreman kout ser, i evidan ki sa pa ti pwen pli enportan ki  Zezi ti oule fer resorti dan son parabol. Zezi pa ti pe senpleman konpar Rwayonm Bondye avek en perl ki annan gran valer, me i ti atir latansyon lo “en marsan ki rod bann zoli perl,” e sa ki i fer apre ki i’n trouv enn. Kontrerman avek en boutikye, en marsan ki rod perl ti kapab ganny apele konman en koneser dan sa domenn. I ti en dimoun ki ti kapab obzerv byen oubyen annan sa abilite pour rekonnet en detay oubyen en laspe ki fer en perl ekstraordiner. Ler i pou vwar en perl, i pou konnen si i en vre perl, alor i pa pou ganny anbete pour aste bann fo perl.

5, 6. (a) Kwa ki enteresan avek sa marsan dan parabol Zezi? (b) Ki sa parabol trezor kasyet i montre nou lo sa marsan?

⁵ I annan en lot keksoz lo sa marsan ki enportan pour note. Normalman, premye keksoz ki en marsan i kapab fer, i pou kalkile konbyen sa dimoun i kapab pe vann sa perl pour ki i kapab konnen konbyen i pou peye pour li kapab fer profi. I pou osi rode si i annan en demann pour sa kalite perl pour li kapab vann deswit. Andotmo, sa marsan pa enterese pour gard sa perl, me pour deswit fer en profi avek sa perl. Me sa pa leka avek sa marsan dan parabol Zezi. I pa ti pe rod perl zis pour ganny larzan oubyen keksoz materyel. Annefe, i ti pare pour “vann tou sa ki i posede,” posibleman tou son bann keksoz personnel ek propriyete, pour ganny sa ki i ti pe rode.

⁶ Laplipar marsan pou konsider sa ki sa zonm dan parabol Zezi ti fer konman en keksoz bet pour fer. En biznesmenn ki pridan pa ti pou zanmen pran en tel risk. Me sa marsan dan parabol Zezi ti annan en diferan standar. Son rekonpans i lazwa ek satisfaksyon pour ganny en keksoz ki annan sitan gran valer, me pa pou fer larzan. Zezi ti klerman fer resorti sa pwen dan en lot legzanp. I ti dir: “Rwayonm lesyel i parey en trezor ki’n ganny kasyet dan en plantasyon. En zonm i dekouver sa trezor e i rekasyet li. I sitan kontan ki i al vann tou sa ki i ti posede e retournen e aste sa plantasyon.” (Matye 13:44) Wi, sa lazwa ki sa zonm ti gannyen apre ki i ti’n dekouver e ganny sa trezor, ti ase pour motiv li pour abandonn tou sa ki i ti annan. Eski i annan dimoun ki koumsa ozordi? Eski i annan en trezor ki pey fre pour fer en tel sakrifis?

Bann ki apresye sa gran Valer ki Rwayonm Bondye i annan

7. Ki mannyer Zezi ti montre ki i ti vreman apresye sa gran valer ki Rwayonm Bondye i annan?

⁷ Kan Zezi ti pe rakont son parabol, i ti pe koz lo “Rwayonm lesyel.” I ti vreman apresye sa gran valer ki Rwayonm Bondye i annan. Bann Levanzil i prouve ki sa i vre. Apre son batenm lannen 29 N.L., Zezi “ti konmans prese an dizan: ‘Sanz zot lavi, akoz Rwayonm Lesyel i pros!’ ” Pour trwa zan edmi, i ti ansenny bokou dimoun lo Rwayonm Bondye. I ti ale vini dan “plizyer lavil ek vilaz pour pres Bonn Nouvel Rwayonm Bondye.”—Matye 4:17; Lik 8:1.

8. Ki Zezi ti fer pour montre ki sa Rwayonm pou akonpli dan lavenir?

⁸ Zezi ti fer en kantite mirak. Par egzanp i ti geri bann malad, nouri bann ki ti lafen, kontrol bann lafors dan lanatir e menm resisit bann mor. Par fer tousala, Zezi ti pe osi montre ki Rwayonm Bondye pou fer dan lavenir. (Matye 14:14-21; Mark 4:37-39; Lik 7:11-17) Finalman, i ti montre li fidel avek Bondye e anver sa Rwayonm par donn son lavi. I ti fer sa par les li ganny met amor lo en poto. Zis parey sa marsan ti pare pour donn tou sa ki i ti annan pour ganny sa perl ki ti “annan gran valer,” Zezi ti viv e mor pour sa Rwayonm.—Zan 18:37.

9. Ki kalite bann premye disip Zezi ti annan, ki rar?

⁹ Zezi pa ti zis dedye son lavi pour sa Rwayonm, me i ti osi rasanble en pti group  disip. Sa bann disip osi ti vreman apresye gran valer sa Rwayonm. Enn parmi ti Andre, ki avan sa ti en disip Zan Batis. Apre ki i ti’n tann Zan Batis dir ki Zezi i “Lanyo Bondye,” Andre ek en lot disip Zan Batis, ki tre probab ti en garson Zebede, ki ti osi apel Zan, ti deswit ganny atire ver Zezi e zot ti vin bann krwayan. Me sa pa ti fini la. Toudswit, Andre ti al kot son frer Simon e dir li: “Nou’n trouv Mesi.” Pa bokou letan apre, Simon (ki apre i ti apel Sefas, oubyen Pyer) osi byen ki Filip ek son zanmi Natanael ti osi rekonnet ki Zezi ti Mesi. Anfet, Natanael ti ganny pouse pour dir avek Zezi: “Oumenm Garson Bondye, oumenm lerwa pep Izrael.”—Zan 1:35-49.

Motive pour fer Aksyon

10. Ki ti reaksyon bann disip kan Zezi ti envit zot pour swiv li en pe letan apre ki i ti’n zwenn zot pour premye fwa?

¹⁰ Nou kapab konpar sa leksitasyon ki Andre, Pyer, Zan ek lezot ti annan avek sa leksitasyon ki sa marsan ti annan ler i ti vwar sa perl ki annan gran valer. Ki zot ti pou fer aprezan? Levanzil pa dir nou bokou lo sa ki zot ti fer deswit apre ki zot ti’n rankontre Zezi pour premye fwa. I paret ki laplipar zot ti kontiny zot lavi parey labitid. Me preski enn an plitar, Zezi ti zwenn ankor Andre, Pyer, Zan ek son frer Zak kot lanmer Galile pe fer zot biznes lapes. * Ler Zezi ti vwar zot i ti dir zot: “Swiv mwan e mon a fer zot lapes dimoun.” Ki ti zot reaksyon? Levanzil Matye i dir nou sa lo Pyer ek Andre: “Deswit zot ti kit zot lasenn e zot ti swiv li.” Zak ek Zan lo zot kote, “deswit ti kit zot kannot ek zot papa e swiv Zezi.” Levanzil Lik i azoute ki “zot ti kit tou e zot ti swiv li.”—Matye 4:18-22; Lik 5:1-11.

11. Akoz petet bann disip pa ti tarde pour aksepte lenvitasyon Zezi?

 ¹¹ Eski bann disip ti reazir tro vit? Sa pa ti paret leka! Menm si ler zot ti zwenn Zezi pour premye fwa, zot ti kontiny zot biznes lapes, san okenn dout sa ki zot ti’n vwar e tande sa zour ti’n vreman tous zot. Dezyenm fwa ki zot ti zwenn Zezi ti preski enn an plitar, alor zot ti’n bezwen ganny ase letan pour reflesir lo sa size. Me zour ki zot ti zwenn Zezi sa dezyenm fwa ti’n ariv ler pour pran en desizyon. Eski zot ti pou ganny motive parey sa marsan ki ler i ti trouv sa perl presye, deswit i ti ale pour fer tou sa ki i bezwen fer pour aste sa perl? Larepons i wi. Sa ki zot ti’n vwar e tande ti’n motiv zot. Zot ti realize ki ler ti’n arive pour fer aksyon. Parey Levanzil i dir nou, san ezite zot ti abandonn tou e swiv Zezi.

12, 13. (a) Ki mannyer bokou dimoun ti reazir apre ki zot ti’n tann Zezi koze? (b) Ki Zezi ti dir konsernan son bann disip fidel, e ki i oule dir par sa?

¹² Wi, sa bann disip fidel ti vreman diferan avek lezot dimoun ki Levanzil ti koz lo la plitar! Menm si Zezi ti geri oubyen nouri en kantite dimoun, me bokou apre ti kontinyen fer zot bann keksoz dan lavi toulezour. (Lik 17:17, 18; Zan 6:26) Serten ti menm rod leskiz kan Zezi ti envit zot pour swiv li. (Lik 9:59-62) Plitar Zezi ti montre ki bann ki fidel i diferan ler i ti dir: “Depi lepok Zan-Batis ziska prezan, Rwayonm lesyel i sa lobzektif ki zonm i pe pouse pour atenn, e bann ki pe pouse pour arive pe reisi.”—Matye 11:12, NW.

¹³ “Pouse” e “pe pouse pour arive,” ki sa i vedir? An rapor avek sa verb Grek dan ki sa de lekspresyon i sorti, Vine’s Expository Dictionary of Old and New Testament Words i dir: “Sa verb i endik fer en gro zefor pour gannyen.” Konsernan sa verse, en spesyalis Labib ki apel Heinrich Meyer ti dir: “Dan sa fason i pe dekrir en gran dezir, en zefor kontinyel ek lalit pour sa Rwayonm ki pe aprose . . . Sa lentere pour sa Rwayonm i sitan gran e entans (nepli kalm oubyen reste lanmen krwaze).” Parey sa marsan, sa detrwa disip ti vitman rekonnet kwa ki ti vreman presye, e zot ti pare pour kit tou sa ki zot ti annan deryer pour sa Rwayonm.—Matye 19:27, 28; Filipyen 3:8.

Lezot ti vin donn Lanmen rode

14. Ki mannyer Zezi ti prepar bann zapot pour pres lo sa Rwayonm e ki rezilta sa ti anmennen?

¹⁴ Anmezir ki Zezi ti kontiny son minister, i ti form e ed lezot pour met Rwayonm premye. Okonmansman, i ti swazir 12 parmi son bann disip e fer zot vin bann zapot, oubyen bann ki’n ganny anvoye par li. Zezi ti donn zot bann lenstriksyon detaye konman pour akonpli zot minister e i ti osi averti zot kont bann problenm ek difikilte ki zot ti pou rankontre. (Matye 10:1-42; Lik 6:12-16) Pour sa de zan oubyen plis ki ti swiv, zot ti akonpanny Zezi partou kot i ti al prese e pandan sa letan zot ti vin tre pros avek li. Zot ti tann li koze, obzerv son bann mirak e vwar son legzanp. (Matye 13:16, 17) San okenn dout, tousala ti tous zot en kantite, ki parey sa marsan, zot ti rod sa Rwayonm avek devouman e avek tou zot leker.

15. Dapre Zezi, ki sa vre rezon son bann disip ti annan pour rezwir?

¹⁵ Apard sa 12 zapot, Zezi ti swazir swasanndis “lezot disip e anvoy zot devan li, de par de, dan tou bann lavil ek landrwa kot li menm i ti pou ale.” I ti osi dir zot konsernan bann leprev ek difikilte ki zot ti pou rankontre e i ti ansenny zot pour dir dimoun ki “Rwayonm Bondye in ariv pre avek zot.” (Lik 10:1-12) Kan sa 70 disip ti retournen, zot ti dan lazwa e zot ti dir: “Senyer, menm bann demon ti soumet avek nou an ou non.” Petet konman en sirpriz  pour zot, Zezi ti revele ki zot ti pou ganny plis lazwa alavenir, akoz zot devouman pour sa Rwayonm. I ti dir zot: “Pa rezoui akoz bann lespri in soumet avek zot, me rezoui akoz zot non in ganny ekri dan lesyel.”—Lik 10:17, 20.

16, 17. (a) Ki Zezi ti dir son bann zapot fidel sa dernyen sware ki i ti pase avek zot? (b) Ki lazwa ek lasirans parol Zezi ti donn bann zapot?

¹⁶ Finalman, sa dernyen sware ki i ti pase lo later avek son bann zapot le 14 Nizan lannen 33 N.L., i ti entrodwir sa ki ozordi i apel Repa Senyer e i ti demann zot pour komemor sa levennman. Pandan sa sware, Zezi ti dir sa 11 zapot ki ti reste: “Zot, zot bann ki’n reste fidel anver mwan dan tou mon difikilte ek soufrans. Parey mon Papa in donn mwan pouvwar pour gouvern son Rwayonm, mwan osi, mon donn zot menm pouvwar; pour ki zot osi zot a manze e bwar atab avek mwan dan mon Rwayonm, e zot ava asiz lo tronn pour ziz douz tribi Izrael.”—Lik 22:19, 20, 28-30.

¹⁷ Sirman sa parol ki Zezi ti dir ti’n bezwen anmenn lazwa ek satisfaksyon pour sa bann zapot! Zot ti pe ganny ofer sa pli gran loner ek privilez ki okenn imen ti kapab gannyen. (Matye 7:13, 14; 1 Pyer 2:9) Parey sa marsan, zot ti’n kit bokou deryer pour kapab swiv Zezi e pour rod sa Rwayonm. Aprezan zot ti kapab asire ki sa bann sakrifis ki zot ti’n fer pa ti anven.

18. Lekel apard sa 11 zapot ki pou benefisye avek sa Rwayonm?

¹⁸ Pa zis bann zapot ki ti avek Zezi sa zour swar ki ti pou benefisye avek sa Rwayonm. I ti lavolonte Zeova ki 144,000 imen i zwenn ansanm dan sa lalyans Rwayonm konman bann dirizan avek Zezi Kri dan sa Rwayonm merveye dan lesyel. Anplis ki sa, zapot Zan ti ganny en vizyon kot i ti vwar “en gran lafoul, ki personn pa ti kapab konte, . . . debout devan tronn e devan Lanyo, . . . Zot ti kriye . . . ‘Nou delivrans i sorti kot nou Bondye ki asize lo tronn ek kot Lanyo.’ ” Sa i bann sitwayen ki pou reste lo later anba dominasyon sa Rwayonm. *—Revelasyon 7:9, 10; 14:1, 4.

19, 20. (a) Ki loportinite tou dimoun sorti dan nenport ki nasyon i annan? (b) Ki kestyon nou pou egzaminen dan nou lot lartik?

¹⁹ Zis avan ki Zezi ti mont dan lesyel, i ti donn son bann disip fidel sa komannman: “Ale e fer tou pep vin mon bann disip. Batiz zot o non di-Per, di-Fis e di-Sent-Espri. Ansenny zot pour obei tou sa ki mon’n konmande. E konnen ki mwan mon avek zot toulezour, ziska lafen.” (Matye 28:19, 20) Alors, dimoun sorti dan tou nasyon ti pou vin disip Zezi Kri. Ki swa zot annan lesperans pour viv dan lesyel ouswa lo later, sa bann osi ti pou santre zot lavi lo Rwayonm zis parey sa marsan ti fer anver sa zoli perl.

²⁰ Parol Zezi ti montre ki sa travay fer disip ti pou kontinyen ziska “lafen” sa sistenm. Alor, dan nou letan eski i ankor annan bann dimoun parey sa marsan ki pare pour donn tou pour rod Rwayonm Bondye? Nou pou egzamin sa kestyon dan nou lot lartik.

[Not anba lo paz]

Eski ou kapab eksplike?

• Ki pwen enportan dan sa parabol en marsan?

• Ki mannyer Zezi ti montre ki i vreman apresye sa gran valer ki Rwayonm i annan?

• Kwa ki ti fer Andre, Pyer, Zan ek lezot aksepte lenvitasyon Zezi deswit?

• Ki loportinite merveye tou dimoun sorti dan nenport ki nasyon i annan?

[Kestyon]

[Portre lo paz 16]

“Zot ti kit tou e zot ti swiv” Zezi