Zeova i toultan fer sa ki byen
Zeova i toultan fer sa ki byen
“Zeova i drwat dan tou sa ki i fer.”—PSONM 145:17.
1. Ki mannyer ou reazir ler en dimoun i fer en move konklizyon lo ou, e ki leson nou kapab aprann atraver sa leksperyans?
ESKI in deza arive ki en dimoun in tir en move konklizyon lo ou, petet kestyonn ou aksyon oubyen motivasyon, san ki i konn tou sa ki’n vreman arive? Si i leka, i tre probab ki ou ti ofanse e nou konpran akoz ou ti santi koumsa. Atraver sa leksperyans, nou kapab aprann en leson enportan: I saz pour nou pa taye pour tir konklizyon lo en dimoun ler nou pa konn tou bann fe.
2, 3. Ki mannyer serten dimoun i azir anver bann resi Labib ki napa ase detay pour reponn tou zot kestyon, me ki Labib i dir nou lo Zeova?
2 Nou devret gard sa leson antet ler nou pe tir konklizyon lo Zeova. Akoz sa i neseser? Sa i akoz i annan serten resi Labib ki ler nou lir li pour premye fwa i kapab paret difisil pour nou sezi son sans. Sa bann resi—petet konsernan aksyon serten adorater Bondye oubyen zizman Bondye dan lepase—i kapab pa donn ase detay pour reponn tou nou kestyon. Malerezman, serten dimoun i kritik sa bann resi, zot menm kestyonnen si Bondye i vreman drwat e zis. Pourtan, Labib i dir nou ki “Zeova i drwat dan tou sa ki i fer.” (Psonm 145:17) Son Parol i osi asir nou ki i “kontan lazistis” e ki i “pa fer sa ki mal.” (Zob 34:12; Psonm 37:28) Alors, esey mazinen ki mannyer i santi ler lezot i tir bann move konklizyon lo li!
3 Annou egzamin senk rezon akoz nou devret aksepte zizman Zeova. Apre, avek sa bann pwen antet, nou pou egzamin de resi Labib ki serten dimoun i vwar li difisil pour konpran.
Akoz aksepte Zizman Zeova?
4. Akoz nou devret montre limilite ler nou pe egzamin sa ki Bondye in fer? Donn en legzanp.
4 Premyerman, akoz Zeova i konn tou bann fe ki enplike e nou nou pa konnen. Nou devret montre limilite ler nou pe egzamin sa ki Bondye in fer. Annou konsider en legzanp: Mazin en ziz ki annan repitasyon pour toultan fer bann desizyon zis e la i’n pas en santans dan en ka ankour. Ki ou pou panse lo en dimoun ki kritik desizyon sa ziz, kan sa ler i pa konn tou bann fe oubyen pa vreman konpran lalwa ki enplike? I pou bet pour en dimoun ziz en zafer san ki i konn tou keksoz lo sa zafer. (Proverb 18:13) I pou pli bet ankor pour bann senp imen kritik “Ziz lo later antye”!—Zenez 18:25.
5. Ki nou pa devret oubliye ler nou lir konsernan zizman Bondye lo serten dimoun dan Labib?
5 En dezyenm rezon pour aksepte zizman Bondye i akoz Bondye i kapab lir leker, en keksoz ki imen pa kapab fer. (1 Samyel 16:7) Son Parol i dir: “Mwan, Zeova, mon pe egzamin leker, egzamin ronnyon, pour donn sakenn dapre sa ki i’n fer, dapre konsekans son aksyon.” (Zeremi 17:10) Alors, ler nou lir konsernan zizman Bondye lo serten dimoun dan Labib, annou pa oubliye ki lefe ki Zeova i vwar tou keksoz, i pran an konsiderasyon panse, motivasyon, ek lentansyon sa dimoun ki pa ganny mansyonnen dan son Parol.—1 Kronik 28:9.
6, 7. (a) Ki mannyer Zeova in demontre ki i fidelman swiv son standar zis e drwat menm si i kout li bokou? (b) Ki nou devret rapel si nou lir en keksoz dan Labib ki fer nou demande si Bondye ti azir dan en fason zis e drwat?
Romen 5:18, 19) Me Zeova ti’n bezwen santi en gran lapenn ler i ti vwar son Garson byenneme soufer e mor lo en poto. Ki sa i dir nou lo Bondye? Konsernan sa pri ki Zezi Kri in peye, Labib i dir: “Bondye in fer sa pour montre son lazistis.” (Romen 3:25) En lot versyon Labib i tradwir Romen 3:25 koumsa: “Sa ti montre ki Bondye i toultan fer sa ki drwat e sa ki zis.” (New Century Version) Wi, sa ki Zeova ti pare pour fer pour fourni sa sakrifis i montre ki i annan en tre gran respe pour “sa ki drwat e sa ki zis.”
6 La en trwazyenm rezon pour aksepte zizman Zeova: I reste atase avek son standar ki zis e drwat malgre i kapab kout li bokou. Annou vwar en legzanp. Ler i ti donn son Garson konman en pri pour liber imen obeisan avek pese ek lanmor, Zeova ti azir an armoni avek son standar zis e drwat. (7 Alors, si i arive ki nou lir en keksoz dan Labib ki fer serten mazinen si Bondye ti azir dan en fason zis ouswa drwat, nou devret rapel sa: Akoz son fidelite anver son standar ladrwatir ek lazistis, Zeova ti les son prop Garson sibir en lanmor matir. Alor, eski aprezan i pou sanz sa bann standar dan lezot keksoz? Larealite i ki Zeova pa zanmen kas son standar drwat e zis. Sa i fer nou annan bokou rezon pour devlop sa konviksyon ki i toultan fer sa ki drwat e sa ki zis.—Zob 37:23.
8. Akoz i pa pou lozik pour imen mazinen ki Zeova i kapab napa lazistis ek ladrwatir?
8 Annou vwar en katriyenm rezon akoz nou devret aksepte zizman Zeova: Zeova in fer imen parey li. (Zenez 1:27) Alors, imen in ganny bann kalite parey Bondye, enkli lazistis ek ladrwatir. Si nou, nou annan lazistis ek ladrwatir eski nou kapab krwar ki Zeova napa sa bann kalite? Si en serten resi Labib i trouble nou, nou bezwen mazinen ki akoz pese ki nou’n erite, nou abilite pour konn sa ki zis e drwat i pa parfe. Nou Kreater Zeova li i parfe dan lazistis ek ladrwatir. (Deterononm 32:4) I pou bet pour mazinen ki imen i kapab pli zis e drwat ki Bondye!—Romen 3:4, 5; 9:14.
9, 10. Akoz Zeova pa oblize eksplik oubyen zistifye son aksyon anver bann imen?
9 En senkyenm rezon pour aksepte zizman Zeova se ki i “Tre O lo later antye.” (Psonm 83:18) Vi ki i annan sa pozisyon, i pa oblize eksplik oubyen zistifye son aksyon avek imen. I sa Gran Potye, e nou parey bann vaz ki’n ganny fer avek later. Alor i azir avek nou mannyer i fer li plezir. (Romen 9:19-21) Ki nou ete, nou ki travay son lanmen, pour kestyonn son desizyon oubyen aksyon? Ler patrias Zob pa ti byen konpran fason azir Bondye anver imen, Zeova ti koriz li, par demande: “Eski vreman ou pou fer mon lazistis napa valer? Eski ou pou dir ki mon mal pour ki ou kapab byen?” Ler i ti realize ki i ti’n koze san byen konpran, Zob ti apre repantir. (Zob 40:8; 42:6) Annou pa zanmen fer sa fot pour trouv defo avek Bondye!
10 I kler ki nou annan bann bon rezon pour krwar ki Zeova i toultan fer sa ki byen. Avek sa lenformasyon ki ed nou konpran fason azir Zeova, annou egzamin de resi Labib ki serten i kapab trouv li difisil pour konpran. Sa enn premye i enplik sa ki en adorater Bondye ti fer, e sa lot i konsernan en zizman ki Bondye ti pase.
Akoz Lot ti ofer son Fiy avek en Lafoul ankoler?
11, 12. (a) Rakont sa ki ti arive ler Bondye ti anvoy de lanz Sodonm. (b) Ki bann kestyon serten in demande konsernan sa resi?
11 Dan Zenez sapit 19, nou trouv sa resi konsernan sa ki ti arive ler Bondye ti anvoy de lanz Sodonm, ki ti’n pran laform imen. Lot ti ensiste ki sa de viziter i reste dan son lakaz. Me sa zour swar en group zonm dan lavil ti serkle sa lakaz e zot ti demande ki zot ganny sa de viziter pour fer bann keksoz imoral avek zot. Lot ti esey rezonn avek sa lafoul, me sa pa ti abouti dan nanryen. Vi ki i ti anvi protez son de envite, Lot ti dir zot: “Silvouple, mon bann frer pa fer sa ki mal. Silvouple, la mon annan de fiy ki pa’n zanmen sorti avek en zonm. Silvouple, les mwan anmenn zot deor kot zot. Apre fer sa ki zot vwar i bon dan zot lizye avek zot. Selman pa fer sa de zonm nanryen, akoz pour sa rezon ki zot in vin anba lonbraz mon twa.” Sa lafoul pa ti oule ekoute e zot ti pres pour kas laport. Finalman, sa de lanz ti fer sa bann dimoun dan sa lafoul vin aveg.—Zenez 19:1-11.
12 I normal pour serten dimoun demann zot lekor serten kestyon konsernan sa resi. Zot demande: ‘Ki mannyer Lot ti kapab ofer son fiy avek en lafoul visye pour esey protez son envite? Eski pa i mal pour li fer sa, e pa i montre ki i en kapon?’ Vi ki sa resi i dan Parol Bondye, akoz Bondye ti enspir Pyer pour apel Lot en “zonm zis”? Eski Bondye ti dakor avek fason ki Lot ti azir? (2 Pyer 2:7, 8) Annou rezonn lo sa zafer pour ki nou pa tir en move konklizyon.
13, 14. (a) Ki nou devret fer resorti konsernan sa resi Labib ki koz lo sa ki Lot ti fer? (b) Kwa ki montre ki Lot ti azir avek kouraz?
13 Pour konmanse, nou devret rekonnet ki Labib pa ni aprouv oubyen kondann aksyon Lot, i zis rankont sa ki ti arive. Labib pa ni osi dir nou kwa ki ti dan lespri Lot oubyen kwa ki ti motiv li pour azir dan sa fason. Ler i ganny “resisite” petet i pou revel plis detay.—Akt 24:15.
14 Lot ti en dimoun brav. I ti dan en sitiasyon difisil. Ler i ti dir ki sa de viziter in “vin anba lonbraz” son twa, Lot ti montre ki i ti santi li oblize pour protez zot. Me sa pa ti en keksoz fasil pour Lot fer. Istoryen Zwif Josephus i raporte ki bann Sodomit ti “enzis anver zonm, e mank respe pour Bondye . . . Zot ti ay bann etranze, e fer sodomi.” Me Lot pa ti per sa lafoul ankoler. Okontrer, i ti al deor e rezonn avek sa bann zonm ankoler. I ti menm “ferm laport deryer li.”—Zenez 19:6.
15. Akoz nou kapab dir ki Lot ti’n kapab azir avek lafwa?
15 Serten dimoun i kapab demande: ‘Be akoz Lot ti ofer son fiy avek sa lafoul?’ Olye mazinen ki Lot ti annan bann move motivasyon, akoz nou pa egzamin serten posibilite ki ti’n kapab fer li azir koumsa? Premyerman, i kapab ki Lot ti azir avek lafwa. Ki mannyer sa? Lot ti sirman konnen ki mannyer Zeova ti protez Sara, madanm son tonton, Abraam. Vi ki Sara ti en tre zoli madanm, Abraam ti demann li pour dir ki i ti son frer, pangar lezot ava touy li pour zot kapab pran Sara. * Alors, zot ti anmenn Sara kot lakaz Faraon. Me Zeova ti entervenir e anpes Faraon vyol Sara. (Zenez 12:11-20) I posib ki Lot ti annan lafwa ki son de fiy ti pou osi ganny proteze. Anfet, atraver son bann lanz Zeova ti entervenir, e pa ti ariv nanryen avek sa de zenn fiy.
16, 17. (a) Dan ki fason Lot ti’n kapab pe esey sok oubyen konfiz bann zonm Sodonm? (b) Nenport ki rezonnman Lot ti fer, ki nou kapab asire?
16 Annou egzamin en lot posibilite. Petet Lot ti pe esey sok oubyen konfiz sa bann zonm. Petet i ti panse ki sa bann zonm pa ti pou enterese avek son fiy lefe ki bann Sodomit ti annan bann dezir omoseksyel. (Zid 7) Deplis, sa de zenn fiy ti fiyanse avek de zonm dan sa lavil. Alors, petet son fitir zann ti annan bann fanmiy, zanmi, oubyen dimoun ki zot fer biznes avek dan sa lafoul. (Zenez 19:14) Petet Lot ti annan lespwar ki serten zonm dan sa lafoul ti pou koz an faver son fiy, lefe ki zot ti annan serten relasyon avek son de zann. Alor, en lafoul divize pa ti pou sitan danzere. *
17 Nenport rezonnman ek motivasyon ki Lot ti annan, nou kapab asire ki: Lefe ki Zeova i toultan fer sa ki drwat, i ti’n bezwen annan bon rezon pour konsider Lot konman “en zonm zis.” Deplis ler nou konsider aksyon sa lafoul Sodomit, eski pa Zeova ti annan tou rezon pour ziz e detri bann zabitan sa move lavil?—Zenez 19:23-25.
Akoz Zeova ti touy Ouza?
18. (a) Ki ti arive ler David ti esey anmenn Lars Zerizalenm? (b) Ki kestyon sa resi i fer dimoun demande?
18 En lot resi ki kapab paret konfizan pour serten i ler David ti esey anmenn lars lalyans an Zerizalenm. Lars ti ganny mete lo en saret, ki ti ganny kondwir par Ouza ek son frer. Labib i dir: “Finalman zot ti ariv sa landrwa ki separ dible Nakonn, e Ouza ti anvoy son lanmen pour tyonbo lars sa vre Bondye akoz bann bef ti pros pour fer tonbe lars. Lakoler Zeova ti monte kont Ouza e sa vre Bondye ti frap li pour sa mank respe ki i ti demontre. Alor i ti mor lanmenm obor lars sa vre Bondye.” Detrwa mwan plitar, en dezyenm lesey ti mars byen akoz Lars ti ganny transporte dan fason ki Bondye ti demande. Sa se lo zepol bann Levit Koatit. (2 Samyel 6:6, 7; Nonm 4:15; 7:9; 1 Kronik 15:1-14) Serten dimoun i kapab demande: ‘Akoz Zeova ti azir dan en fason sitan sever? Ouza ti pe zis esey protez sa Lars.’ Pour ki nou pa tir en move konklizyon, i annan serten detay dan sa resi ki nou devret egzaminen.
19. Akoz i enposib pour Zeova azir dan en fason enzis?
19 Nou bezwen rapel ki i enposib pour Zeova azir dan en fason enzis. (Zob 34:10) Si Bondye ti azir koumsa, i pa ti pou en Bondye lanmour e nou konnen atraver nou letid lo Labib ki “Bondye i lanmour.” (1 Zan 4:8) Deplis osi, Labib i dir ki “tronn [Bondye] i repoz lo ladrwatir ek lazistis.” (Psonm 89:14) Alor, ki mannyer Zeova i ava kapab azir dan en fason enzis? Si i azir koumsa, i pou met an danze sa ki son dominasyon siprenm i repoz lo la.
20. Nonm bann rezon ki ti fer Ouza konn bann lalwa konsernan Lars.
20 Gard antet ki Ouza ti’n devret konn byen Lalwa. Lars ti reprezant prezans Zeova. Lalwa ti spesifye ki dimoun ki napa lotorite pa devret tous Lars. Lalwa ti osi klerman averti ki bann ki kas sa lalwa ti pou ganny met amor. (Nonm 4:18-20; 7:89) Alors, deplas sa Lars pa ti en travay ki ti devret ganny pran alalezer. I paret ki Ouza ti en Levit (me pa en pret), alor i ti’n bezwen konn tre byen Lalwa. Deplis avan sa, Lars ti ganny anmennen kot lakaz son papa pour ganny proteze. (1 Samyel 6:20–7:1) Lars ti’n reste dan sa landrwa pour 70 lannen, ziska ki David ti deside pour tir li la. Alors, i probab ki depi lanfans Ouza ti konn bann lalwa konsernan Lars.
21. Dan ka Ouza, akoz i enportan pour rapel ki Zeova i vwar motivasyon dan leker?
21 Parey i’n ganny mansyonnen pli boner, Zeova i kapab lir leker. Vi ki son Parol i dir ki Ouza ti “mank respe,” petet Zeova ti’n vwar serten dezir egois dan Ouza ki pa ganny mansyonnen dan sa resi. Eski petet Ouza ti en zonm ki ti azir avek lorgey, annan tandans pour desot limit? (Proverb 11:2) Eski anmenn an piblik sa Lars ki son fanmiy ti’n veye an prive ti fer li santi li enportan? (Proverb 8:13) Eski Ouza ti mank lafwa? Eski i pa ti mazinen ki Zeova ti kapab protez sa lars ki reprezant Son prezans? Antouleka, nou kapab asire ki Zeova ti fer sa ki byen. I tre probab ki i ti vwar en keksoz dan leker Ouza ki ti fer Li pas en zizman deswit.—Proverb 21:2.
En Rezon solid pour annan Konfyans
22. Ki mannyer lasazes Zeova i evidan lefe ki parler son Parol pa mansyonn serten detay?
22 Nou kapab vwar lasazes Zeova lefe ki parler son Parol pa enkli serten detay. Zeova i alor donn nou en loportinite pour montre ki nou annan konfyans dan li. Atraver sa ki nou’n egzaminen, eski pa i kler ki nou annan bann bon rezon pour aksepte zizman Zeova? Wi ler nou etidye Parol Bondye avek en leker senser ek en lespri ouver, nou konn ase lenformasyon lo Zeova pour nou konvenki ki i toultan fer sa ki zis e drwat. Alors, si serten resi Labib i fer demann serten kestyon ki nou pa kapab trouv en larepons deswit, annou annan konfyans total ki Zeova ti fer sa ki byen.
23 Nou annan sa menm konfyans konsernan sa ki Zeova pou fer dan lavenir. Alors, nou kapab asire ki ler i vini pour li pas zizman zour gran ladetres, i pa pou “detrir sa ki drwat avek sa ki move.” (Zenez 18:23) Son lanmour pour ladrwatir ek lazistis pa pou zanmen permet li fer sa. Nou osi kapab annan konfyans total ki dan sa nouvo lemonn ki pe vini, i pou satisfer tou nou bezwen dan sa pli bon fason posib.—Psonm 145:16.
[Not anba lo paz]
^ par. 15 Abraam ti annan rezon per, akoz en vye dokiman i rakont konsernan en Faraon ki ti fer son bann solda pran en zoli madanm e touy son mari.
^ par. 16 Pour plis remark, vwar Latour Veyer le 1 Desanm, 1979, paz 31 an Angle oubyen Franse.
Eski ou rapel?
• Pour ki rezon nou devret aksepte zizman Zeova?
• Kwa ki kapab ed nou evite tir move konklizyon ler Lot ti ofer son fiy avek sa lafoul ankoler?
• Ki bann fakter ki kapab ed nou konpran akoz Zeova ti touy Ouza?
• Ki konfyans nou kapab annan konsernan sa ki Zeova pou fer dan lavenir?
[Kestyon]
23. Ki konfyans nou kapab annan konsernan sa ki Zeova pou fer dan lavenir?