Akoz i pa bon fer Kankan?

“Kote lager ek kerel parmi zot i sorti?”​—ZAK 4:1.

ZAK, en ekriven Labib, pa ti demann sa kestyon avek bann group solda Romen ki sa letan ti pe fer lager. I pa ti ni pe kestyonn lentansyon par deryer lager gerila ki bann Zwif kriminel ti pe fer dan premye syek. Zak ti pe refer avek bann dispit ki ti kapab enplik zis de dimoun. Akoz? Parski parey lager, bann dispit ant bann endividi i kapab anmenn bann move rezilta. Get sa bann resi Labib.

Bann garson patrias Zakob ti sitan ay zot frer Zozef ki zot ti vann li konman lesklav. (Zenez 37:4-28) Plitar Sail, lerwa Izrael ti esey touy David. Akoz? Parski i ti zalou David. (1 Samyel 18:7-11; 23:14, 15) Dan premye syek, de madanm Kretyen, Evodi ek Sentis, ti deranz lape dan kongregasyon avek zot bann dispit.—Filipyen 4:2.

En lepok, zonm ti rezourd zot bann dezakor par fer fas avek kanmarad avek sakenn en lepe oubyen fizi. Souvan enn ant le de ti ganny touye oubyen ti vin envalid pour leres son lavi. Ozordi, bann ki an konfli avek lezot i normalman servi bann parol anmer ek koze mirak konman zot zarm. Menm si napa disan ki ganny verse, sa bann latak ki ganny fer avek parol i afekte bann santiman ek repitasyon. Souvannfwa i bann inosan ki soufer dan sa bann kalite “lager.”

Annou vwar sa ki ti arive detrwa lannen pase kan en pret Anglikan ti akiz en lot pret pour mal servi larzan legliz. Zot kankan ti vin an piblik, e sa kongregasyon ki zot ti servi ti divize. Serten manm ti refize asiste servis si sa pret ki zot ti opoze ti pe fer lanmes. Zot ti telman pa kontan kanmarad ki zot pa ti koz avek kanmarad ler zot ti dan legliz pour ladorasyon. Kan sa pret ki ti pe akiz sa lot pret ti ganny akize pour mal kondwir li seksyelman, sa dispit ti vin pli so.

 Larsevek Canterbury ti fer lapel avek sa de pret, e i ti apel zot lager “en kanser” ek “en skandal ki dezonnor non Nou Senyer.” An 1997, enn sa pret ti dakor pour pran son retret. Sa lot ti gard son pozisyon ziska ki i ti bezwen arete akoz i ti’n ariv laz kot i ti devret pran retret. Me i ti reste ziska dernyen moman posib, e pran son retret ler i ti ganny 70 an, le 7 Out 2001. The Church of England Newspaper i dir ki sa zour ki sa pret ti pran retret ti zour lafet “Sen” Viktris. Lekel “Sen” Viktris? I ti en levek dan katriyenm syek ki ti aparaman ganny bate akoz i ti refize lager dan larme. Sa zournal ti fer komanter lo diferans dan latitid ant “Sen” Viktris ek sa pret: “Refize pour lager dan en konfli relizye pa ti en tre dan [sa pret ki’n pran retret].”

Sa de pret ti’n kapab evite afekte zot menm ek lezot si zot ti aplik sa konsey dan Romen 12:17, 18: “Pa rann mal pour mal. Me fer tou ou posib pour fer sa ki byen devan tou dimoun. Fer tou sa ki depann lo ou pour viv anpe avek tou dimoun.”

Me ou? Si en dimoun i ofans ou, eski lakoler i pous ou pour atak sa dimoun avek bann parol? Oubyen, eski ou evite koz dan en fason dir e les laport ouver pour fer lape? Si ou ofans en dimoun, eski ou evit li e espekte ki avek letan i pou bliy sa problenm? Oubyen, eski ou pare pour demann leskiz? Ki swa ou demann en dimoun pour pardonn ou oubyen ou menm ou pardonn li, ler ou esey fer lape i pou fer ou pli an bonn sante. Konsey Labib i kapab ed nou pour rezourd menm bann konfli ki’n dir pour bokou letan, parey sa lartik swivan i montre.