Bon Gidans pour bann Koup marye
Bon Gidans pour bann Koup marye
“Bann madanm, zot devre obei zot mari, parey zot obei Senyer. Zot, bann mari, kontan zot madanm.”—Efezyen 5:22, 25.
1. Ki mannyer nou devret vwar maryaz?
ZEZI ti dir ki maryaz i en laranzman kot Bondye i ini ansanm en zonm ek en madanm pour zot vin “en sel laser.” (Matye 19:5, 6) I enplik de dimoun avek diferan personnalite ki pe aprann devlop menm lentere e pe travay ansanm ver menm lobzektif. Maryaz i en langazman pour lavi, me non pa en lagreman tanporer ki en dimoun i kapab fasilman abandonnen. Dan bokou pei i fasil pour ganny en divors, me pour en Kretyen, maryaz i sakre. I annan zis en rezon tre serye ki kapab met en lafen avek sa linyon.—Matye 19:9.
2. (a) Ki led bann koup marye i annan? (b) Akoz i enportan pour fer zefor pour fer nou maryaz reisi?
2 En konseye lo maryaz ti dir: “En bon maryaz i kontinyelman sanze anmezir ki i rankontre bann nouvo sitiasyon, fer fas avek problenm ki arive, e servi bann resours disponib dan sak staz lavi.” Pour bann Kretyen marye, sa bann resours i enkli bann bon konsey sorti dan Labib, sipor lezot Kretyen, ek en relasyon pros avek Zeova atraver lapriyer. En maryaz ki reisi i siport tou e avek letan i anmenn boner ek lakontantman pour sa msye ek son madanm. Pli enportan, i anmenn loner pour Zeova, Loter maryaz.—Zenez 2:18, 21-24; 1 Korentyen 10:31; Efezyen 3:15; 1 Tesalonisyen 5:17.
Imit Zezi ek son Kongregasyon
3. (a) Fer resorti bann pwen prensipal dan konsey ki Pol ti donn bann koup marye. (b) Ki sa bon legzanp Zezi in donnen?
3 De mil an pase, zapot Pol ti donn bann bon konsey avek bann Kretyen marye ler i ti ekrir: ‘Bann madanm i devre touzour obei zot mari parey kongregasyon, i obei Kris. Zot, bann mari, kontan zot madanm parey Kris in kontan kongregasyon, e in donn son lavi pour li.’ (Efezyen 5:24, 25) Sa i en zoli konparezon! Bann madanm Kretyen ki kontinyen soumet avek zot mari i imit kongregasyon akoz zot rekonnet e obeir prensip lotorite. Bann mari Kretyen ki kontinyen kontan zot madanm ki swa dan botan ou movetan, i montre ki zot pe swiv legzanp Kris, ki kontan e pran swen avek kongregasyon.
4. Ki mannyer bann mari i kapab swiv legzanp Zezi?
4 Bann mari Kretyen i sef zot fanmiy, me zot osi zot annan en sef. Sa i Zezi. (1 Korentyen 11:3) Alors, zis parey Zezi i pran swen avek son kongregasyon, bann mari i pran byen swen avek zot fanmiy lo plan spirityel e fizik, menm si zot bezwen fer serten sakrifis personnel. Zot met byennet zot fanmiy avan zot prop dezir ek zot gou personnel. Zezi ti dir: “Alor fer pour lezot sa ki ou oule lezot i fer pour ou.” (Matye 7:12) Sa prensip i sirtou aplikab dan maryaz. Pol ti montre sa ler i ti dir: “Bann zonm devre alor, kontan zot madanm parey zot kontan zot prop lekor. . . . Annefe napa personn ki’n deza ay son prop lekor, okontrer, i nouri li e pran byen swen avek li.” (Efezyen 5:28, 29) En zonm i devret nouri e pran byen swen avek son madanm avek sa menm devouman ki i nouri e pran swen avek son prop lekor.
5. Ki mannyer bann madanm i kapab imit kongregasyon Kretyen?
5 Bann madanm ki ador Bondye i get kongregasyon Kretyen konman en model. Ler Zezi ti lo later son bann disip pa ti ezite pour abandonn sa ki zot ti pe fer avan e swiv li. Apre son lanmor, zot ti kontinyen soumet avek li, e pandan sa preski 2,000 lannen ki’n pase, vre kongregasyon Kretyen in kontinyen soumet avek Zezi e swiv son direksyon dan tou keksoz. Pareyman, bann madanm Kretyen pa kraz zot mari oubyen pa pran oserye laranzman lotorite dan maryaz ki Labib in etablir. Okontrer, zot siport e soumet avek zot mari, korpere avek zot, e sa i ankouraz zot mari. Ler mari ek madanm i azir dan sa bon fason, zot maryaz pou reisi e tou le de pou trouv lazwa dan sa relasyon.
Kontinyen viv avek zot
6. Ki konsey Pyer ti donn bann mari, e akoz i enportan?
6 Zapot Pyer osi ti annan konsey pour bann koup marye e son parol pour bann mari ti byen fran. I ti dir: “Zot osi bann msye, zot devre viv dan larmoni sakenn avek son madanm e rekonnet ki bann madanm i annan en natir pli feb. Tret zot avek respe parski bann madanm, zot osi partaz ansanm avek zot, sa kado lavi ki Bondye in donnen. Dan sa fason zot lapriyer pa pou ganny okenn lobstak.” (1 Pyer 3:7) Bann dernyen parol dan sa verse i montre ki degre serye konsey Pyer i ete. Si en mari pa respe oubyen onor son madanm, sa pou afekte son relasyon avek Zeova. I pou en lobstak pour son lapriyer.
7. Ki mannyer en mari i devret onor son madanm?
7 Alors, ki mannyer bann mari i kapab onor zot madanm? En mari i onor son madanm ler i tret li avek lanmour, respe ek dinite. Bokou ti vwar li drol pour en madanm ganny trete dan sa bon fason. En spesyalis Grek i ekrir: “Anba lalwa Romen en madanm ti napa okenn drwa. Devan lalwa i ti ganny trete parey en zanfan. . . . I ti antyerman soumet avek son mari e i pa ti kapab fer nanryen pour protez li kont son mari.” Sa i konpletman diferan avek lansennyman Kretyen! En mari Kretyen ti onor son madanm. I ti pa tret son madanm dapre ki mannyer i santi, me dapre bann prensip Kretyen. Deplis, sa mari ti pran konsiderasyon pour son madanm akoz i ti “rekonnet” ki son madanm ti annan en natir pli feb.
“Pli feb” dan ki Fason?
8, 9. Dan ki fason madanm i egal avek zonm?
8 Ler Pyer ti dir ki madanm i “pli feb” i pa ti oule dir ki bann madanm i pli feb ki bann zonm lo nivo akademik oubyen spirityel. I vre ki bokou zonm Kretyen i annan bann privilez dan kongregasyon ki bann madanm pa ekspekte gannyen, e dan en fanmiy bann madanm i soumet avek zot mari. (1 Korentyen 14:35; 1 Timote 2:12) Kantmenm sa, zonm konman fanm i bezwen demontre sa menm lafwa, perseverans, ek en standar moral onivo. Parey Pyer ti dir, mari konman madanm i “partaz . . . sa kado lavi.” Konsernan delivrans, zonm ek fanm i annan menm pozisyon devan Bondye. (Galat 3:28) Pyer ti pe ekrir bann Kretyen swazir dan premye syek. Alors, son parol ti rapel bann mari Kretyen ki konman “zeritye ansanm avek Kris,” zot ek zot madanm ti annan menm lespwar pour viv dan lesyel. (Romen 8:17) En zour tou le de, zonm ek fanm, ti pou servi konman pret ek lerwa dan Rwayonm Bondye!—Revelasyon 5:10.
9 Bann madanm Kretyen swazir pa ti enferyer dan okenn fason avek zot mari Kretyen swazir. An zeneral, i menm parey avek sa bann ki annan lesperans pour viv lo later. Zonm konman fanm dan sa “gran lafoul” i lav zot rob e blansi li dan disan Lanyo. Zonm konman fanm dan lemonn antye i loue Zeova “lizour konman aswar.” (Revelasyon 7:9, 10, 14, 15) Tou le de, zonm ek fanm, pe esper avek enpasyans pour rezwir “laliberte ek laglwar bann zanfan Bondye.” (Romen 8:21; 1 Timote 6:19) Ki swa zot bann Kretyen swazir oubyen lezot mouton, tou Kretyen i servi Zeova ansanm konman “en sel troupo” anba “en sel berze.” (Zan 10:16) Sa i vreman en rezon konvenkan pour en mari ek en madanm Kretyen montre loner kanmarad!
10. Dan ki fason bann madanm i “pli feb”?
10 Me dan ki fason alor bann madanm i “pli feb”? An zeneral, madanm i pli pti e annan mwens lafors fizik ki zonm. Petet Pyer ti pe refer avek sa fe ler i ti donn sa konsey. Deplis, akoz nou enparfe, sa privilez pour port e donn nesans en baba i afekte lasante en madanm. Bann madanm ki annan laz pour fer zanfan i kapab regilyerman pa santi zot byen fizikman. Zot sirman bezwen latansyon ek konsiderasyon spesyal ler zot pe pas atraver sa bann moman difisil oubyen ler zot bezwen port e donn nesans en baba. En mari ki onor son madanm, i rekonnet sa sipor ki son madanm i bezwen, e sa pou kontribye en kantite pour fer en maryaz reisi.
Dan en Lakour kot Msye ek Madanm pa dan menm Larelizyon
11. Dan ki fason en maryaz i kapab reisi menm si mari ek madanm i dan diferan larelizyon?
11 Me si de dimoun marye i annan diferan pwennvi relizye, akoz enn in aksepte laverite en pe letan apre ki zot in marye e sa lot pa’n aksepte? Eski en maryaz koumsa i kapab reisi? Wi, bokou sa bann maryaz in reisi. En mari ek en madanm ki pa dan menm larelizyon i kapab annan en bon maryaz ki dire e anmenn boner pour zot tou le de. Deplis sa maryaz i ankor valid dan lizye Zeova; zot ankor “en sel laser.” Alors, bann Kretyen marye i ganny konseye pour reste avek zot partner ki pa Temwen si li i dakor. Si zot annan zanfan, zanfan i benefisye avek fidelite sa paran Kretyen.—1 Korentyen 7:12-14.
12, 13. Ki mannyer bann madanm Kretyen i kapab ed zot mari ki pa Temwen, si zot swiv konsey Pyer?
12 Pyer i zantiman donn konsey bann madanm Kretyen ki pe viv dan en lakour ki divize lo plan relizye. Son parol i osi aplik pour bann mari Kretyen ki dan menm sitiasyon. Pyer i ekrir: “Zot bann madanm, soumet sakenn avek son msye, pour ki, par zot kondwit, si serten parmi zot msye pa obei parol Bondye, zot a kapab kanmenm aksepte lafwa san laparol. Sa bann zonm i a war ki zot kondwi zot dan en fason drwat e avek respe.”—1 Pyer 3:1, 2.
13 I en bon keksoz si en madanm i kapab koz avek son mari lo son lafwa san ofans li. Me si i pa anvi ekoute? Sa i son swa. Me pa dezespere, akoz kondwit en Kretyen i osi donn en bon temwannyaz. Bokou mari ki okonmansman pa ti enterese oubyen ki ti menm opoz lafwa zot madanm in devlop sa bon kondisyon leker pour lavi eternel apre ki zot in vwar bon kondwit zot madanm. (Akt 13:48) Menm si en mari pa aksepte laverite, kondwit son madanm i kapab fer en bon lefe lo li ki pou fortifye zot relasyon maryaz. En mari ki son madanm i en Temwen Zeova ti admet ki i pa pou zanmen kapab swiv sa standar onivo bann Temwen Zeova. Me dan en let ki i ti ekrir en zournal, i ti dekrir li konman en “mari ere ki annan en bon madanm” e i ti senserman koz an byen lo son madanm ek son bann konpanyon Temwen.
14. Ki mannyer bann mari i kapab ed zot madanm ki pa Temwen?
14 Bann mari Kretyen ki’n swiv sa prensip dan parol Pyer in osi ganny zot madanm par zot kondwit. Bann madanm ki pa Temwen in vwar ki zot mari in pran zot responsabilite pli serye. Zot in osi aret gat zot larzan lo sigaret, bwar, ek dan bann zwe larzan e zot in nepli servi bann parol lensilt. Serten sa bann madanm in fer konnesans avek lezot manm kongregasyon. Zot in enpresyonnen par sa lasosyasyon frer ek ser, e sa ki zot in vwar in atir zot ver Zeova.—Zan 13:34, 35.
‘Labote enteryer dan Leker’
15, 16. Ki fason en madanm Kretyen i devret konport li ki kapab fer li ganny son mari?
15 Ki kalite kondwit ki kapab fer en madanm ganny son mari? Anfet, i sa kalite kondwit ki normalman bann madanm Kretyen i devlope. Pyer i dir: “Zot pa devre rod montre zot labote par zot laparans: avek seve trese, bann bizou an-or, zoli lenz ki kout ser. Me zot labote i devret en labote enteryer, dan leker e ki pa kapab disparet, labote en lespri bon e trankil ki annan en gran valer devan Bondye. Koumsanmenm ki bann madanm ki servi Bondye ti fer lontan. Zot ti met zot lespwar dan Bondye e soumet zot avek zot mari. Koumsamenm ki Sara ti obei Abraam e apel li son Senyer. Aprezan, zot in vin son bann fiy, si zot fer sa ki byen e pa les nanryen fer zot per.”—1 Pyer 3:3-6.
16 Pyer ti konsey en madanm Kretyen pour pa depan lo labote fizik. Okontrer, i devret les son mari rekonnet lefe ki bann lansennyman Labib i fer lo sa dimoun ki i ete anndan. I devret les son mari vwar sa nouvo personnalite an aksyon. Petet i pou konpar li avek sa vye personnalite ki son madanm ti annan avan. (Efezyen 4:22-24) Sa mari pou sirman vwar ki son madanm i annan “en lespri bon e trankil” ki agreab e atiran. Sa latitid pa zis fer plezir en mari me i “annan en gran valer devan Bondye.”—Kolosyen 3:12.
17. Dan ki fason Sara i en bon legzanp pour bann madanm Kretyen?
17 Sara i ganny mansyonnen konman en model, e i en bon legzanp pour bann madanm Kretyen ki swa zot mari i Temwen oubyen non. I kler ki Sara ti konsider Abraam konman son sef. Menm dan son leker, i ti apel li son “senyer.” (Zenez 18:12) Me sa pa ti fer Sara napa valer. Son lafwa for ki i ti annan personnelman dan Zeova i montre ki i ti en madanm vreman spirityel. Anfet, Sara i form par sa “gro nyaz temwen” ki zot legzanp lafwa i devret pous nou pour ‘fer sa lakours ki devan nou avek perseverans.’ (Ebre 11:11; 12:1) En madanm Kretyen pa pe fer li perdi valer si i vin parey Sara.
18. Ki bann prensip ki devret ganny gard antet dan en fanmiy ki msye ek madanm pa dan menm larelizyon?
18 Menm si en msye ek son madanm pa dan menm larelizyon, sa msye i ankor touzour sef lafanmiy. Si li ki Temwen, i pou annan konsiderasyon pour krwayans son madanm san ki i fer konpromi avek son prop lafwa. Si sa madanm ki Temwen, li osi i pa pou fer konpromi avek son lafwa. (Akt 5:29) Me i pa pou konteste lotorite son mari. I pou respekte son pozisyon e reste anba “lalwa” son mari.—Romen 7:2.
Gidans saz sorti dan Labib
19. Ki serten presyon ki kapab afekte en relasyon maryaz, me ki mannyer zot kapab reziste sa bann presyon?
19 Ozordi i annan bokou keksoz ki kapab met en presyon lo lavi maryaz. Serten zonm pa desarz zot responsabilite. Serten madanm i refize aksepte lotorite zot mari. Dan serten maryaz, en partner i abiz sa lot. Pour bann Kretyen, presyon ekonomik, lenperfeksyon imen, ek lespri sa lemonn avek son bann imoralite ek move pwennvi lo sa ki vreman enportan i kapab teste zot fidelite. Me nenport sitiasyon ki zot ladan, bann zonm ek fanm Kretyen ki swiv bann prensip Labib i ganny benediksyon Zeova. Menm si zis en dimoun dan en maryaz i aplik bann prensip Labib, keksoz pou pli meyer ki si personn pa ti fer li. Deplis, Zeova i kontan e siport son bann serviter ki reste fidel avek zot ve maryaz menm dan bann sitiasyon difisil. I pa oubliy zot fidelite.—Psonm 18:25; Ebre 6:10; 1 Pyer 3:12.
20. Ki konsey Pyer ti donn tou Kretyen?
20 Apre ki zapot Pyer ti konsey bann zonm ek fanm marye, i ti konklir avek bann bon parol lankourazman. I ti dir: “Anfen, zot devre, zot tou annan menm panse ek menm santiman; kontan kanmarad konman frer, annan konpasyon pour kanmarad e viv avek limilite. Pa rann lemal pour lemal, ni lensilt pour lensilt. Okontrer reponn par benediksyon, parski pour sanmenm sa, ki Bondye in apel zot, pour resevwar benediksyon.” (1 Pyer 3:8, 9) Sa i en bon konsey pour nou tou, sirtou pour bann koup marye!
Eski ou rapel?
• Ki mannyer en mari Kretyen i imit Zezi?
• Ki mannyer bann madanm Kretyen i imit kongregasyon?
• Dan ki fason bann mari i kapab onor zot madanm?
• Pour en madanm Kretyen ki son mari pa en Temwen, ki pli bon fason fer?
[Kestyon]
[Portre lo paz 29]
En mari Kretyen i kontan e pran swen avek son madanm
[Portre lo paz 29]
En madanm Kretyen i respe e onor son mari
[Portre lo paz 31]
Zonm konman fanm dan sa “gran lafoul” pe esper lavi eternel dan Paradi
[Portre lo paz 32]
Sara ti konsider Abraam konman son senyer