Fyer akoz ou en Kretyen!
Fyer akoz ou en Kretyen!
“Sa ki oule fer vantar les li fer vantar dan . . . Senyer.”—1 KORENTYEN 1:31.
1. Ki latitid bokou dimoun i annan anver larelizyon ozordi?
“ZOT napa okenn lentere dan Bondye.” Sa i lafason ki en zonm ki fer komanter lo larelizyon ti dekrir latitid bokou dimoun anver zot lafwa. I ti osi dir ki menm si i’n annan bann gro devlopman an rapor avek larelizyon ozordi, i napa nanryen pour fer avek larelizyon li menm. Plito i en latitid kot dimoun napa lentere dan Bondye oubyen pa ni tro fatig zot avek zot prop larelizyon. I ti osi fer sa remark ki “menm si bokou dimoun i krwar dan Bondye . . . ; zot pa vreman enterese avek li.”
2. (a) Akoz i pa drol ki bokou dimoun in perdi lentere dan keksoz spirityel? (b) Akoz i pou danzere pour bann vre Kretyen si zot vin parey sa bann dimoun?
2 Sa latitid pa sirprann bann etidyan Labib. (Lik 18:8) Kan nou get larelizyon an zeneral, nou ekspekte vwar sa kalite latitid. Pour bokou letan, fo larelizyon in anbet e dezapwent dimoun. (Revelasyon 17:15, 16) Me i pou danzere pour bann vre Kretyen si zot zis krwar dan Bondye san fer aksyon e si zot perdi zot devouman. Nou pou eksperyans bann move konsekans si nou pa tro fatig nou avek sa ki nou krwar ladan e si nou perdi nou devouman pour servi Bondye e pour laverite. Zezi ti met nou an gard kont sa danze ler i ti averti bann Kretyen an Laodise: “Ou pa ni fre ni so, ou ti devre swa fre swa so. . . . Ou tyed.”—Revelasyon 3:15-18.
Rekonnet sa ki nou ete
3. Ki serten rezon bann Kretyen i kapab fyer pour zot lidantite?
3 Pour anpes nou vin inaktif, bann Kretyen i bezwen byen konpran ki zot ete e dan en fason rezonnab zot devret fyer pour zot lidantite Kretyen. Konman bann serviter Zeova ek disip Kris, Labib i dir nou ki nou vreman ete. Nou bann “temwen” Zeova, “nou pe travay ansanm pour Bondye” anmezir ki nou pres avek devouman sa “Bonn Nouvel” avek lezot. (Izai 43:10; 1 Korentyen 3:9; Matye 24:14) Nou en pep ki “kontan kanmarad.” (Zan 13:34) Bann vre Kretyen i bann dimoun “ki par leksperyans zot konn fer diferans ant sa ki byen ek sa ki mal.” (Ebre 5:14) Nou bann “lalimyer dan lemonn.” (Filipyen 2:15) Nou fer zefor pour “annan bonn kondwit” parmi bann nasyon.—1 Pyer 2:12; 2 Pyer 3:11, 14.
4. Ki mannyer en adorater Zeova i kapab konnen ki i pa ete?
4 Bann vre Kretyen i osi konnen ki zot pa ete. Zis parey zot Sef Zezi Kri pa ti fer parti lemonn, zot osi “zot pa fer parti lemonn.” (Zan 17:16) Zot reste separe avek bann dimoun ki ‘zot lespri i dan fernwanr e ki napa okenn par dan sa nouvo lavi ki Bondye i donnen.’ (Efezyen 4:17, 18) Alors, bann disip Zezi in abandonn zot “move lavi ek son bann move dezir, pour viv en lavi rezonnab, zis e fidel avek Bondye lo sa later.”—Tit 2:12.
5. Ki savedir ‘fer vantar dan Senyer’?
5 En bon konprenezon lo nou lidantite ek nou relasyon avek Souvren Senyer dan liniver, pou motiv nou pour “fer vantar dan . . . Senyer.” (1 Korentyen 1:31) Me ki kalite vantar sa? Konman bann vre Kretyen nou fyer ki Zeova i nou Bondye. Nou pran aker sa lankourazman: “Les sa enn ki pe vant son lekor, vant son lekor akoz sa bann keksoz. Akoz i annan konprenezon ek konnesans lo mwan, ki mwan mon Zeova, sa Enn ki pe demontre labonte leker, lazistis ek ladrwatir lo later.” (Zeremi 9:24) Nou fer “vantar” akoz nou’n ganny sa privilez pour konn Bondye e pour ganny servi par li pour ed lezot.
Defi
6. Akoz serten i vwar li difisil pour gard en vizyon kler lo zot lidantite konman Kretyen?
6 Pour dir fransman, konman Kretyen i pa touzour fasil pour gard nou vizyon kler lo nou lidantite Kretyen. En zennonm ki’n grandi dan laverite i rapel ki en serten letan i ti’n vin feb spirityelman: “Parfwa mon pa ti konnen akoz mon en Temwen Zeova. Mon’n aprann laverite dan Labib depi ler mon ti ankor pti pti. Parler mon ti santi ki sa ti zis en lot larelizyon parey lezot ki’n ganny etablir.” Lezot in kapab les zot lidantite ganny enfliyanse par bann distraksyon sa lemonn, par sa ki medya i dir, ek bann pwennvi lo lavi ki pa an armoni avek sa ki Labib i dir. (Efezyen 2:2, 3) Parfwa, serten Kretyen i kapab ganny serten doutans lo zot lekor e bezwen reegzamin zot standar ek lobzektif.
7. (a) Ki kalite egzaminasyon ki apropriye pour bann serviter Bondye? (b) Kote danze i kapab vini?
7 Eski i mal pour byen egzamin nou lekor tanzantan? Non. Petet ou kapab rapel ki zapot Pol ti ankouraz bann Kretyen pour kontinyen egzamin zot lekor: “Egzamin zot lekor pour war si zot pe gard zot lafwa. Teste zot lekor.” (2 Korentyen 13:5) Zapot Pol ti pe ankouraz bann Kretyen pour fer en zefor apropriye pour vwar si zot napa okenn pwen feb avek lobzektif pour koriz zot. Pour en Kretyen konnen si i dan lafwa, i bezwen egzaminen si son parol ek aksyon i an akor avek sa ki i krwar. Me si ler nou pe egzamin nou lekor, nou tant pour rod nou “lidantite” oubyen rod bann larepons dan bann sours ki napa nanryen pour fer avek nou relasyon avek Zeova, ouswa avek kongregasyon Kretyen, sa pa pou abouti dan nanryen e i kapab afekte nou spirityelman. * Sirman nou pa pou anvi ‘perdi nou lafwa’!—1 Timote 1:19.
Nou rankontre bann Defi
8, 9. (a) Ki mannyer Moiz ti eksprim son doutans? (b) Ki ti reaksyon Zeova anver bann limit ki Moiz ti annan? (c) Ki lefe bann lasirans ki Zeova ti donnen i fer lo ou?
8 Eski bann Kretyen ki parfwa ganny bann dout lo zot lekor i devret krwar ki zot pa’n reisi? Byensir non! Anfet, i kapab ankourazan pour zot ler zot konnen ki sa bann santiman pa nouvo. Bann serviter fidel dan lepase ti santi parey. Pran par egzanp Moiz, ki ti annan en lafwa ekstraordiner e ki ti fidel. Ler i ti ganny demande pour fer en gro latas, avek ezitasyon Moiz ti demande: “Ki mwan, mon ete?” (Egzod 3:11) I paret ki Moiz ti pe dir dan li menm, ‘Mwan, mon en nanryen ditou!’ oubyen ‘Mon pa kapab!’ I ti annan plizyer keksoz dan lavi Moiz ki ti’n kapab fer li rezonn koumsa: I ti sorti dan en nasyon ki ti lesklav. Bann Izraelit ti’n rezet li. I pa ti koz byen. (Egzod 1:13, 14; 2:11-14; 4:10) I ti en berze e sa ti en travay ki bann Ezipsyen pa ti kontan ditou. (Zenez 46:34) Alors, i pa drol ki i ti santi ki i pa pou kapab delivre pep Bondye dan lesklavaz!
9 Me Zeova ti ankouraz Moiz par promet li de keksoz: “Mon pou avek ou, e sa i en siny pour ou ki mon’n anvoy ou: Apre ki ou’n tir sa pep Lezip, zot pou servi sa vre Bondye lo sa montanny.” (Egzod 3:12) Bondye ti pe dir son serviter ki ti ezite, ki I pou toultan avek li. Deplis, Zeova ti pe montre ki napa nanryen ki pou anpes li delivre son pep. Toudilon listwar, Bondye in fer bann tel promes pour ankouraz son bann serviter. Par egzanp, atraver Moiz Bondye ti dir nasyon Izrael ler zot ti pros pour antre dan Later Promiz: “Pran kouraz e for. . . . Zeova ou Bondye i sa enn ki pe mars avek ou. I pa pou zanmen abandonn ou oubyen kit ou pour touzour.” (Deterononm 31:6) Zeova ti osi asir Zozye: “Toudilon ou lavi personn pa pou opoz ou. . . . Mon pou avek ou. Mon pa pou abandonn ou ni kit ou pour touzour.” (Zozye 1:5) I ti osi promet bann Kretyen: “Mon pa pou zanmen negliz ou, mon pa pou zanmen abandonn ou.” (Ebre 13:5) Vi ki nou annan sa kalite sipor, pa nou devret fyer ki nou Kretyen!
10, 11. Ki mannyer Azaf ti arive gard sa bon latitid anver valer son servis ki i ti pe donn Zeova?
10 Apepre 500 zan plitar apre Moiz, en Levit fidel ki ti apel Azaf, ti onnetman ekrir lo dout ki i ti annan pour viv en lavi drwat. Anmezir ki i ti lite pour servi Bondye malgre problenm ek tantasyon, Azaf ti vwar serten dimoun ki ti monk Bondye vin pli for e prospere. Ki mannyer Azaf ti ganny afekte par sa? Fransman i ti dir: “Mon ti pros pour glise. Parski mon ti zalou bann ki ti pe vant zot lekor, letan mon ti vwar ki bann dimoun mesan ti anpe.” I ti konmans doute si i vo lapenn reste en serviter Zeova. I ti panse: “I pour nanryen ki mon’n pirifye mon leker e lav mon lanmen dan linosans. Toudilon lazournen mon ti rankontre problenm.”—Psonm 73:2, 3, 13, 14.
11 Ki mannyer Azaf ti fer fas avek sa bann santiman ki ti pe fatig li? Eski i ti esey kasyet sa bann santiman? Non. I ti eksprim zot dan son lapriyer parey nou kapab vwar dan Psonm 73. Azaf ti fer sanzman ler i ti vizit tanp. Ler i ti laba kot tanp i ti realize ki napa pli bon fason pour viv ki servi Bondye. Apre ki i ti’n reganny son lapresyasyon spirityel, i ti arive konpran ki Zeova i ay sa ki mal e ki dan son letan apropriye bann dimoun mesan pou ganny pini. (Psonm 73:17-19) Apre ki i ti’n aziste son pwennvi, Azaf ti pli byen apresye son lidantite konman en serviter Zeova. I ti vwar sa konman en privilez. I ti dir Bondye: “Mon toultan avek ou; ou’n tyonbo mon lanmen drwat. Avek ou konsey ou pou gid mwan, e apre ou pou anmenn mwan ver laglwar.” (Psonm 73:23, 24) Azaf ti reganny lafyerte dan son Bondye.—Psonm 34:2.
Zot ti vreman apresye zot Lidantite
12, 13. Nonm serten serviter Bondye ki ti fyer pour annan en relasyon avek Bondye.
12 Si nou egzamin e imit lafwa bann fidel serviter ki ti fyer pour annan en relasyon avek Bondye, menm si zot ti bezwen fer fas avek difikilte, sa pou ed nou pli byen apresye nou lidantite Kretyen. Pran par egzanp Zozef, garson Zakob. Byen zenn i ti ganny vann konman en lesklav e ganny anmennen Lezip. I ti vreman lwen avek son Papa ki ti annan lakrent pour Bondye, e laba i pa ti ganny sa lafeksyon ek sipor parey dan son pei. Laba Lezip ti napa personn ki Zozef ti kapab koz avek pour ganny bon konsey. I ti osi bezwen fer fas avek bann sitiasyon difisil ki ti teste son standar moral ek son konfyans dan Bondye. Me i kler ki i ti fer bokou zefor pour gard son lidantite konman en serviter Bondye e i ti reste atase avek sa ki i ti konnen i byen. Zozef ti fyer ki i ti en serviter Zeova menm si i ti pe viv dan en lanvironnman difisil, e i pa ti per pour eksprim son santiman.—Zenez 39:7-10.
13 Apepre wit san zan plitar, en fiy Izraelit ki ti’n vin lesklav en zeneral larme Siryen ki ti apel Naamann, pa ti oubliy son lidantite konman en serviter Zeova. Ler i ti ganny loportinite, avek kouraz i ti rann temwannyaz lo Zeova kan i ti dir ki Elisa i en profet sa vre Bondye. (2 Lerwa 5:1-19) Detrwa lannen plitar, en zenn Lerwa ki ti apel Yosiya ti reetablir vre ladorasyon, repar tanp Bondye, e fer sa pep retourn ver Zeova menm si i ti viv parmi bann dimoun koronpi. I ti fyer pour son lafwa ek ladorasyon. (2 Kronik, sapit 34, 35) Danyel ek son trwa konpanyon Ebre an Babilonn pa ti zanmen oubliy zot lidantite konman bann serviter Zeova, e menm anba presyon ek tantasyon zot ti reste san defo. San dout, zot ti fyer ki zot ti bann serviter Zeova.—Danyel 1:8-20.
Fyer pour ou Lidantite Kretyen
14, 15. Konman nou kapab montre ki nou fyer pour nou lidantite Kretyen?
14 Sa bann serviter Bondye ti reisi akoz zot ti devlop en bon lafyerte pour zot pozisyon devan Bondye. Me nou ozordi? Konman nou kapab montre ki nou fyer nou Kretyen?
15 Premyerman, nou bezwen annan en profon lapresyasyon ki nou en Temwen Zeova, akoz nou annan benediksyon Bondye ek son laprouvasyon. Bondye i konn tre byen lekel ki pour li. Zapot Pol ki ti viv dan en letan kot dimoun ti konfize lo larelizyon ti ekrir: “Senyer i konnen bann ki pour li.” (2 Timote 2:19; Nonm 16:5) Zeova i fyer ler i vwar bann “ki pour li.” I dir: “Sa ki pe tous ou, pe tous mon kannet lizye.” (Zekarya 2:8) Wi, Zeova i kontan nou. An retour nou relasyon avek li i devret baze lo profon lanmour ki nou annan pour li. Pol ti ekrir: “Si en dimoun i kontan Bondye, Bondye i konn li.”—1 Korentyen 8:3.
16, 17. Akoz bann Kretyen, zenn konman vye i kapab fyer pour zot leritaz spirityel?
16 Bann zenn ki’n grandi konman Temwen Zeova i devret egzamin zot lekor pour vwar si zot lidantite Kretyen pe vin pli for baze lo en relasyon avek Bondye. Zot pa kapab zis depan lo lafwa zot paran. Konsernan sak Kretyen, Pol ti ekrir: “Si i reste byen ferm dan son servis ou si i tonbe, sa i zafer son met.” Alor Pol ti dir apre: “Sakenn antre nou pou bezwen rann kont devan Bondye pour son prop lekor.” (Romen 14:4, 12) I kler ki en dimoun pa pou kapab annan en relasyon entim e dirab avek Zeova si i zis aksepte san gran lentere ladorasyon son paran Kretyen.
17 Toudilon listwar i’n annan en kantite Temwen Zeova. I konmans depi lepok Abel en zonm fidel—apepre 6,000 an pase—ziska ozordi kot i annan en “gran lafoul” Temwen ek plizyer lezot serviter Zeova ki pou rezwir lavi eternel dan lavenir. (Revelasyon 7:9; Ebre 11:4) Nou parmi sa bann dernyen lo sa gran lalis serviter fidel Zeova. Pa nou vreman annan en leritaz spirityel ki merveye!
18. Ki mannyer nou bann prensip ek standar i fer nou separe avek sa lemonn?
18 Nou lidantite Kretyen i osi enkli bann prensip, kalite, standar ek bann karakteristik ki idantifye nou konman Kretyen. I sa “semen,” sa sel semen ki pou fer nou reisi dan lavi e fer plezir Bondye. (Akt 9:2; Efezyen 4:22-24) Wi, konman Kretyen annou “egzamin tou keksoz” e “gard sa ki bon”! (1 Tesalonisyen 5:21) Nou konn tre byen sa gran diferans ki egziste ant Kretyen ek sa lemonn ki elwannyen avek Bondye. Zeova in klerman fer ladiferans ant vre ladorasyon ek sa ki fo. I ti dir sa atraver profet Malaki: “Ankor enn fwa zot pou kapab vwar ladiferans ant en dimoun drwat ek enn mesan, ant enn ki pe servi Bondye ek enn ki pa’n servi li.”—Malaki 3:18.
19. Ki bann vre Kretyen pa pou zanmen vini?
19 Vi ki i enportan pour nou fyer akoz nou Bondye dan sa lemonn konfize , kwa ki pou kapab ed nou gard en bon lafyerte pour nou Bondye e vreman apresye nou lidantite Kretyen? Nou pou trouv bann bon sizesyon dan nou lot lartik. Anmezir ki nou pou fer sa, ou pou kapab asire ki: Bann vre Kretyen pa pou zanmen vin parey “bann ki napa lentere dan Bondye.”
[Not anba lo paz]
^ par. 7 Sa pe refer avek nou lidantite Kretyen. Me pour bann ki annan serten problenm mantal, i kapab neseser ki zot rod lezot led.
Eski ou rapel?
• Ki mannyer Kretyen i kapab “fer vantar dan . . . Senyer”?
• Ki leson ou’n tire dan legzanp Moiz ek Azaf?
• Nonm serten serviter ki ti fyer pour servi Bondye.
• Konman nou kapab montre ki nou fyer pour nou lidantite Kretyen?
[Kestyon]
[Portre lo paz 14]
Pour en pe letan, Moiz ti annan dout lo son lekor
[Portre lo paz 15]
Bokou serviter Zeova dan lepase ti fyer pour zot lidantite