Maryaz i kapab reisi dan sa Lemonn ozordi

“Annan lanmour ki soud tou keksoz parfetman ansanm dan larmoni.” —Kolosyen 3:14.

1, 2. (a) Kwa ki ankourazan ler nou get dan kongregasyon Kretyen? (b) Dekrir en maryaz reisi.

LER nou get dan kongregasyon Kretyen, eski pa i ankourazan pour vwar sitan en kantite koup marye ki’n reste fidel avek kanmarad pour 10, 20, 30 oubyen menm plis lannen ki sa ankor? Zot in reste fidel avek kanmarad dan botan ensi ki movetan.—Zenez 2:24.

² Laplipar zot pou admet ki zot lavi maryaz i pa enn kot tou i an roz. En obzervater ti ekrir: “Bann maryaz ki ere i pa enn ki napa traka oubyen problenm. I annan son botan ek movetan . . . Me dan en fason ou en lot . . . sa bann dimoun in reste ansanm malgre [bann problenm] lavi modern.” Bann koup ki’n reisi in aprann fer fas avek bann tanpet ek kriz ki vin avek sa presyon lavi, sirtou si zot annan bann zanfan. Sa bann koup in aprann atraver leksperyans ki vre lanmour “i reste pour touzour.”—1 Korentyen 13:8.

3. Ki bann statistik i montre lo maryaz ek divors, e ki sa i fer nou demande?

³ De lot kote, plizyer milyon maryaz in kase. En rapor i dir: “Ozordi lanmwatye dan tou maryaz Letazini i ekspekte fini par divors. Lanmwatye dan sa bann divors pou ariv pandan sa premye 7.8 lannen maryaz . . . Parmi sa 75 poursan dimoun ki remarye, 60 poursan pou divors ankor.” Menm bann pei ki ti napa bokou ka divors in eksperyans en ogmantasyon. Par egzanp, Zapon bann ka divors in ogmant par preski 100 poursan dan sa bann dernyen lannen. Lekel serten sa bann presyon ki’n kree sa sitiasyon, bann presyon ki menm parler i afekte bann manm kongregasyon Kretyen? Kwa ki neseser pour fer en maryaz reisi malgre zefor Satan pour kas sa laranzman?

 Evit bann Pyez

4. Nonm serten fakter ki kapab afekte en maryaz.

⁴ Parol Bondye i ed nou konpran bann fakter ki kapab afekte en lavi maryaz. Par egzanp, konsider parol zapot Pol lo kondisyon ki pou egziste pandan sa bann dernyen zour: “Dan bann dernyen zour pou annan letan difisil. Parski zonm pou vin egois, kontan larzan, vantar, arogan zot pou koz kont Bondye, dezobeisan anver zot paran, engra, mank respe pour keksoz sen, zot pou annan leker dir, san pitye, kalomni zot prosen, vyolan, kriel, lennmi sa ki fer dibyen; zot pou tret, annan karakter vif, anfle avek lorgey, kontan plezir plis ki Bondye, zot pou montre en laparans lapiete, me rezet son vre pisans. Pa asosye ou avek bann dimoun koumsa.”—2 Timote 3:1-5.

5. Akoz en dimoun ki “egois” i met son maryaz an danze, e ki konsey Labib i donnen dan sa domenn?

⁵ Ler nou egzamin parol Pol, nou remarke ki bokou sa bann keksoz ki i ti mansyonnen i kapab kontribye pour kas en maryaz. Par egzanp, sa bann ki “egois” i mazin zis zot lekor e zot napa konsiderasyon pour lezot. Bann mari oubyen madanm ki egois i fer tou pour ganny sa ki zot anvi. Zot pa pare pour les pase sa ki zot kontan pour fer plezir en lot. Eski en latitid koumsa pou ede fer en maryaz ere? Ditou. Zapot Pol ti donn en bon konsey bann Kretyen, enkli bann koup marye: “Pa fer nanryen par lespri egois e vantar, me avek limilite konsider lezot pli enportan ki ou. Zot pa devre pran ka zis avek zot prop lentere, me osi avek lentere lezot.”—Filipyen 2:3, 4.

6. Ki mannyer lanmour larzan i kapab afekte relasyon de dimoun marye?

⁶ Lanmour larzan i kapab kree divizyon ant en mari ek son madanm. Pol ti averti: “Bann ki oule vin ris i tonm dan tantasyon e dan pyez en kantite dezir bet e move, ki plonz dimoun dan larin e fer zot maler. Lanmour larzan i rasin tou lemal. Serten dimoun, pour posed larzan in egare lwen avek lafwa e zot in met zot lekor dan en kantite tourman.” (1 Timote 6:9, 10) Malerezman, sa i en realite dan bokou maryaz ozordi. Bokou dimoun marye ki tay deryer larzan i negliz bezwen zot partner, enkli sa nesesite pour sipor emosyonnel e pour pas bann bon moman ansanm.

7. Dan serten ka, ki kalite konportman ki’n anmenn enfidelite dan maryaz?

⁷ Pol ti osi dir ki dan bann dernyen zour, serten pou ‘tret, annan leker dir, san pitye.’ Ve maryaz i en promes solannel pour en linyon permanan ant de dimoun, e i pa devret fini par traizon. (Malaki 2:14-16) Me parfwa bann ki’n marye i al kontan en lot dimoun an deor zot maryaz. En madanm ki dan son bann 30 ekek lannen e ki son mari in kit li, i dir ki menm avan son mari ti ale, i ti tro pros e montre tro bokou lafeksyon anver lezot madanm. I pa ti realize ki i ti pe azir dan en fason ki pa apropriye pour en zonm marye. Sa ti bles son madanm en kantite e i ti esey averti li konsernan sa move direksyon ki i ti pe pran. Kantmenm sa, sa zonm ti fer adilter. Menm si i ti ganny averti avek lanmour, sa zonm pa ti anvi fer atansyon. I ti tonm fasilman dan latrap.—Proverb 6:27-29.

8. Kwa ki kapab fer en dimoun komet adilter?

⁸ Lavertisman Labib lo adilter i byen kler! “Nenport dimoun ki komet adilter avek en madanm i napa en bon motivasyon, sa ki fer li pe detri son prop lavi.” (Proverb 6:32) Souvannfwa, adilter i pa en aksyon ki ariv en sel kou. Parey Zak en ekriven Labib i fer resorti, normalman en pese parey adilter i ariv selman apre ki en dimoun in ganny sa panse e i kontinyen mazin lo la. (Zak 1:14, 15) Ptit-a-pti fidelite sa dimoun anver sa enn ki i ti promet pour reste fidel avek pour touzour i afeblir. Zezi ti dir: “Zot in tande ki i’n ganny dir: ‘Pa komet adilter.’ Me mwan  mon dir zot: en dimoun ki get madanm en lot zonm avek dezir in deza komet adilter avek li dan son leker.”—Matye 5:27, 28.

9. Ki bon konsey ki trouve dan Proverb 5:18-20?

⁹ Alors, sa konsey ki liv Proverb i ankouraz nou pour swiv i pli bon fason pour en dimoun reste fidel: “Ki ou sours delo i beni, e ou trouv lazwa avek madanm ou zenntan, en serf adorab ek en kabri montanny sarman. Les son tete satisfer ou toultan. Pran plezir konstaman dan son lanmour. Alor, mon garson, akoz ou devret pran plezir dan en fanm ki ou pa konnen oubyen may en fanm etranze?”—Proverb 5:18-20.

Pa taye pour marye

10. Akoz i saz pour pran letan pour konn en dimoun avan marye avek li?

¹⁰ Problenm dan maryaz i kapab arive ler de dimoun i marye tro vit. Petet zot tro zenn e napa leksperyans. Petet osi zot pa pran ase letan pour byen konn kanmarad—sa ki zot kontan e pa kontan, zot lobzektif dan lavi, zot fanmiy. I saz pour pran pasyans, pour pran letan pour konn kanmarad. Mazin Zakob, garson Izaak. I ti bezwen travay set an pour son fitir boper avan ki i ti kapab marye avek Rasel. I ti pare pour fer sa akoz son santiman ti baze lo vre lanmour, me pa lo labote fizik.—Zenez 29:20-30.

11. (a) Ki linyon maryaz i anmenn ansanm? (b) Akoz servi byen nou parol i enportan dan maryaz?

¹¹ Maryaz i pli ki zis en relasyon romantik. Sa linyon maryaz i anmenn ansanm de dimoun ki sorti dan diferan fanmiy, avek sakenn son personnalite ek santiman, e souvan diferan nivo ledikasyon. Parler maryaz i anmenn de dimoun avek diferan kiltir oubyen langaz ansanm. Menm si i napa sa bann diferans antre zot, maryaz i omwen anmenn de dimoun ansanm, ki annan abilite pour eksprim diferan lopinyon lo tou sort keksoz. Sa i en realite dan en lavi maryaz. Fason ki sa de dimoun i eksprim zot lopinyon i kapab par toultan pe kritike e konplent, oubyen par koz dan en fason ankourazan e fortifyan. Wi, avek nou parol nou kapab swa geri oubyen bles nou msye oubyen madanm. Bann koze san en kontrol i kapab met en gro presyon lo en maryaz.—Proverb 12:18; 15:1, 2; 16:24; 21:9; 31:26.

12, 13. Ki sa pwennvi realistik lo maryaz ki nou ganny ankouraze pour annan?

¹² Alor, i saz pour pran letan pour vreman arive konn sa dimoun ki ou anvi marye avek. En ser eksperyanse in deza dir: “Ler ou pe mazin pour marye avek en dimoun, mazin petet dis keksoz esansyel ki ou ti a kontan vwar dan sa dimoun. Si ou kapab trouv selman set, demann ou lekor, ‘Eski mon pare pour inyor sa trwa lezot ki manke? Eski mon pou kapab toulezour siport sa bann mankman?’ Si ou annan dout, tyonbo lanmenm e reflesir ankor.” Byensir, ou bezwen realistik. Si ou anvi marye, gard antet ki ou pa pou zanmen trouv en partner ki parfe. Me anmenmtan, ou osi ou pa pou en partner ki parfe pour sa dimoun ki ou marye avek!—Lik 6:41.

¹³ Maryaz i enplik sakrifis. Pol ti met lanfaz lo sa ler i ti dir: “Mon oule ki zot san traka. En zonm ki pa marye i enkyet li avek travay Bondye, akoz i oule fer plezir Bondye. Me en zonm marye i enkyet li avek bann zafer lemonn, ki mannyer i pou fer plezir son madanm. Son lentere i ganny partaze. Pareyman en madanm san mari ou en zenn fiy i enkyet li avek zafer Senyer, pour konsakre son lekor ek son lespri, me en madanm marye i enkyet li avek bann zafer lemonn, ki mannyer i pou fer plezir son mari.”—1 Korentyen 7:32-34.

Akoz serten Maryaz pa reisi

14, 15. Kwa ki kapab kontribye pour afeblir sa relasyon dan maryaz?

¹⁴ En ser Kretyen ti ganny afekte bokou  resaman ler son mari ti kit li apre 12 an maryaz e konmans en relasyon avek en lot madanm. Eski sa ser ti remark okenn lendikasyon ki sa ti kapab arive? Sa ser i eksplike: “I ti ariv en staz kot i ti nepli priye. I ti servi bann leskiz bet pour mank renyon ek predikasyon. I ti pretann ki i tro okipe oubyen tro fatige pour pas letan avek mwan. I pa ti oule koz avek mwan. I ti nepli diskit bann keksoz spirityel avek mwan. Ti tris pour vwar li koumsa. I ti nepli sa zonm ki mon ti’n marye avek.”

¹⁵ Lezot i dir ki zot ti remark preski menm keksoz, enkli negliz letid personnel, lapriyer, e asiste bann renyon Kretyen. Andotmo, bokou dimoun ki finalman kit zot partner in les zot relasyon avek Zeova afeblir. Sa i fer zot nepli konsantre lo bann keksoz spirityel. Zeova nepli en Bondye vivan pour zot. Sa nouvo lemonn nepli en realite pour zot. Dan serten ka, sa dimoun i vin feb spirityelman menm avan i devlop en relasyon an deor son maryaz.—Ebre 10:38, 39; 11:6; 2 Pyer 3:13, 14.

16. Kwa ki fer en maryaz solid?

¹⁶ De lot kote, en koup ki tre ere i fer resorti ki zot reisi dan zot maryaz gras a zot relasyon spirityel ki for. Zot priye e etidye ansanm. Sa mari i dir: “Nou lir Labib ansanm. Nou al dan predikasyon ansanm. Nou kontan fer keksoz ansanm.” Sa leson i kler: Mentenir en bon relasyon avek Zeova pou kontribye en kantite pour fer en maryaz solid.

Fodre realis e kominike

17. (a) Ki sa de keksoz ki kontribye pour fer en maryaz reisi? (b) Ki mannyer Pol ti dekrir lanmour Kretyen?

¹⁷ I annan de lezot keksoz ki kontribye pour fer en maryaz reisi: lanmour Kretyen ek kominikasyon. Ler de dimoun i anmoure avek kanmarad, zot tant pour inyor defo kanmarad. Zot kapab antre dan lavi maryaz avek bann gran gran ekspektasyon, petet baze lo sa ki zot in lir dan bann zistwar lanmour oubyen sa ki zot in vwar dan film. Me avek letan, sa koup i bezwen fer fas avek realite. Se la ki bann pti defo oubyen bann pti  manni iritan i kapab vin bann gro problenm. Si sa i arive, bann Kretyen i bezwen demontre fri lespri sen, e lanmour i form parti sa fri. (Galat 5:22, 23) Wi, lanmour i vreman for, pa lanmour romantik me lanmour Kretyen. Pol ti dekrir sa kalite lanmour Kretyen, ler i ti dir: “Lanmour i pasyan, e i bon; . . . Lanmour pa rod son prop lentere; i pa pran lakoler, e i pa gard rankin. . . . Lanmour i pardonn tou, i krwar tou, i esper tou, i siport tou.” (1 Korentyen 13:4-7) I kler ki vre lanmour i pran an konsiderasyon febles imen. I realistik parski i pa ekspekte perfeksyon.—Proverb 10:12.

18. Ki mannyer kominikasyon i kapab fortifye en relasyon?

¹⁸ Kominikasyon i osi enportan. Nenport ki kantite letan de dimoun in marye avek kanmarad, zot devret koz avek kanmarad e vreman ekout kanmarad. En mari i dir: “Nou eksprim fransman nou santiman me dan en fason amikal.” Avek letan, en mari oubyen en madanm i aprann pour ekout pa zis sa ki’n ganny dir me osi sa ki pa’n ganny dir. Andotmo, avek letan, en koup ere i aprann rekonnet panse ek santiman kanmarad ki pa ganny eksprimen. Serten madanm in dir ki zot mari pa vreman ekout zot. Serten mari zot, zot in konplent ki zot madanm i paret anvi koz zis ler i pa en bon moman. Pour kominik byen nou bezwen annan konpasyon e konpran kanmarad. Bann bon kominikasyon i benefisye sa mari osi byen ki son madanm.—Zak 1:19.

19. (a) Akoz i kapab difisil pour demann leskiz? (b) Kwa ki pou motiv nou pour demann leskiz?

¹⁹ Parler, kominikasyon i enkli demann leskiz. Sa i pa toultan fasil. I demann limilite pour en dimoun admet son fot. Me i vreman fer en gran diferans dan en maryaz! En leskiz senser i kapab evit en sitiasyon ki kapab plitar vin size en largiman. I osi fer li posib pour sa de dimoun kapab vreman pardonn kanmarad e osi trouv solisyon pour en problenm. Pol ti dir: “Siport kanmarad, pardonn kanmarad sak fwa ki enn ant zot i ofans en lot. Parey Senyer ti pardonn zot, zot osi pardonn kanmarad. E par lao tousala, annan lanmour ki soud tou keksoz parfetman ansanm dan larmoni.”—Kolosyen 3:13, 14.

20. Ki mannyer en Kretyen i devret tret son partner an prive e dan prezans lezot?

²⁰ Soutenir kanmarad i osi en keksoz esansyel dan en maryaz. En mari ek madanm Kretyen i devret kapab met konfyans dan kanmarad, e depann lo kanmarad. Zot pa devret kraz kanmarad oubyen dan okenn lezot fason fer kanmarad perdi konfyans dan son lekor. Nou ki’n marye, nou devret felisit nou partner, e pa kritik zot severman. (Proverb 31:28b) Sirtou, nou pa devret abes zot par fer bann dyok bet e san reflesir lo zot. (Kolosyen 4:6) Ler de dimoun marye i annan labitid pour eksprim lafeksyon pour kanmarad sa i fer zot lanmitye pli for. En touse oubyen en pti mo lafeksyon i kapab dir: “Mon ankor kontan ou. Mon kontan ki ou avek mwan.” Sa i serten fakter ki kapab enfliyans en relasyon e ed maryaz reisi dan sa lemonn ozordi. I annan lezot fakter e sa lartik swivan pou ofer lezot gidans biblik lo ki mannyer pour fer maryaz reisi. *

[Not anba lo paz]

Eski ou kapab eksplike?

• Ki serten fakter ki kapab afekte en maryaz?

• Akoz i pa saz pour depese marye?

• Ki lefe spirityalite i fer lo en maryaz?

• Ki bann fakter ki ede fer en maryaz reste solid?

[Kestyon]

[Portre lo paz 26]

En bon relasyon avek Zeova i ed en koup fer zot maryaz reisi