Protez nou Lidantite Kretyen

“Se sa ki Zeova i dir: ‘Zot mon bann temwen.’ ”—IZAI 43:10.

1. Ki kalite dimoun Zeova i atir anver li?

LER ou al kot Lasal Rwayonm, pran letan pour get byen otour ou. Lekel ki ou pou vwar kot sa landrwa ladorasyon? Petet ou pou kapab vwar bann zenn ki serye pe ekout atantivman bann bon konsey sorti dan Labib. (Psonm 148:12, 13) I kapab ki ou pou osi vwar bann papa ki pe fer bokou zefor pour fer plezir Bondye menm si zot pe viv dan en lemonn ki mank respe pour lavi fanmiy. Petet ou pou remark serten ki avanse dan laz pe fidelman viv an akor avek zot dedikasyon anver Zeova. (Proverb 16:31) Zot tou zot kontan Zeova en kantite. Zeova in kontan pour annan en relasyon avek zot. Garson Bondye ti konfirmen: “Personn pa kapab vin kot mwan, si mon Papa ki’n anvoy mwan, pa atir li kot mwan.”—Zan 6:37, 44, 65.

2, 3. Akoz i difisil pour nou gard nou lidantite konman Kretyen?

² Pa nou kontan pour form parti avek en pep ki annan laprouvasyon ek benediksyon Zeova? Me i pa touzour fasil pour nou gard nou lidantite konman Kretyen dan sa bann “letan difisil.” (2 Timote 3:1) Sirtou pour bann zenn ki pe grandi dan en fanmiy Kretyen. En zenn i rakont nou: “Kantmenm mon ti pe asiste bann renyon Kretyen, mon ti napa okenn  lobzektif spirityel e pour dir laverite, mon ti napa okenn dezir pour servi Zeova.”

³ Serten ki annan sa dezir senser pour servi Zeova i kapab ganny afekte par presyon lezot ki vreman for, lenfliyans lemonn, ek bann tandans pour fer sa ki mal. Kan nou anba bokou presyon, ptit-a-pti sa i kapab fer nou perdi nou lidantite Kretyen. Par egzanp, bokou dimoun ozordi i vwar bann standar Labib lo moralite konman en vye konsep oubyen i pa adapte avek nou letan. (1 Pyer 4:4) Serten i panse ki i pa enportan pour ador Bondye parey li i anvi. (Zan 4:24) Dan son let ki i ti ekrir bann Efezyen, Pol ti dir ki lemonn i annan en leta “lespri,” oubyen en latitid ki lamazorite dimoun i aksepte. (Efezyen 2:2) Sa leta lespri i met presyon lo dimoun pour fer zot aksepte fason panse sa lemonn ki pa konn Zeova.

4. Konman ki Zezi ti met lanfaz lo nesesite pour nou protez nou lidantite konman Kretyen?

⁴ Me konman bann serviter ki’n dedye nou lavi avek Zeova, ki swa nou zenn oubyen vye, nou konsyan ki i pou malere pour nou perdi nou lidantite Kretyen. Sel fason pour nou ganny en bon pwennvi lo nou lidantite Kretyen i par egzamin standar Zeova e sa ki i ekspekte nou fer. Apre tou, nou’n ganny kree dan son resanblans. (Zenez 1:26; Mika 6:8) Labib i konpar nou lidantite konman Kretyen avek en lenz ki ler nou mete tou dimoun i kapab vwar. Zezi ti donn en lavertisman pour nou letan: “La, mon pe vini konman en voler! Byennere sa ki reste vizilan, e ki gard son lenz lo li pour li pa al touni e ensi pa les war son laont.” * (Revelasyon 16:15) Nou pa anvi retir sa bann kalite Kretyen ek standar nou kondwit ki ganny konpare avek en lenz e les sa lemonn Satan moul nou dan son fason. Si sa ti arive, nou ti pou perdi nou “lenz.” En tel sitiasyon ti pou anmenn regre ek laont.

5, 6. Akoz i enportan pour reste stab spirityelman?

⁵ Ler en dimoun i toultan konsyan ki i en Kretyen, sa i annan en gran lefe lo lafason ki i anmenn son lavi. Akoz sa? Si en serviter Zeova i perdi son lidantite, finalman i kapab napa en bon direksyon oubyen lobzektif kler dan son lavi. Labib i toultan pe averti nou kont sa danze. Disip Zak ti dir: “En dimoun ki doute i parey laroul lo lanmer ki divan i anmennen e pous dan tou direksyon. En tel dimoun fodre pa ki i mazinen ki i pou ganny okenn keksoz avek Senyer, parski i en dimoun endesi e enserten dan sa ki i fer.”—Zak 1:6-8; Efezyen 4:14; Ebre 13:9.

⁶ Ki mannyer nou kapab protez nou lidantite Kretyen? Kwa ki kapab ed nou pour pli byen konsyan ki nou annan en gran privilez pour ador sa enn Tre O? Silvouple egzamin sa bann diferan fason swivan.

Travay dir pour batir ou Lidantite Kretyen

7. Akoz i vo lapenn sipliy Zeova pour egzamin nou?

⁷ Kontinyen batir ou relasyon avek Zeova. En relasyon avek Zeova i keksoz pli presye ki en  Kretyen i annan. (Psonm 25:14; Proverb 3:32) Si nou konmans annan dout lo nou lidantite Kretyen, nou devret byen egzamin kalite ek profonder nou relasyon avek Zeova. David ti sipliye: “Egzamin mwan Zeova e teste mwan; pirifye mon ronnyon ek mon leker.” (Psonm 26:2) Akoz i enportan ki Zeova i egzamin nou? Parski nou pa kapab depan lo nou menm pour ziz nou motivasyon ek nou profon santiman. Zis Zeova ki kapab konpran ki kalite dimoun nou ete anndan, nou motivasyon, nou panse ek nou santiman.—Zeremi 17:9, 10.

8. (a) Konman nou kapab benefisye ler nou ganny teste par Zeova? (b) Ki led ou’n gannyen pour progrese konman en Kretyen?

⁸ Kan nou pe demann Zeova pour egzamin nou, nou pe envit li pour teste nou. I kapab les bann sitiasyon arive ki pou revel nou vre motivasyon e sa ki annan dan nou leker. (Ebre 4:12, 13; Zak 1:22-25) Nou devret kontan pour ganny teste parski sa bann tes i donn nou en loportinite pour demontre ki degre nou fidel avek Zeova. Sa bann tes i kapab montre si nou ‘san defo e konplet kot i pa mank nou nanryen.’ (Zak 1:2-4) Anmenmtan ki nou pe ganny teste nou kapab vin pli for spirityelman.—Efezyen 4:22-24.

9. Akoz i enportan pour konvenki ki sa ki Labib i ansennyen i laverite? Eksplike.

⁹ Fodre ou konvenki ki sa ki ou’n aprann dan Labib i laverite. Nou kapab konmans perdi nou lidantite konman serviter Zeova si i pa solidman baze lo konnesans dan Labib. (Filipyen 1:9, 10) Tou Kretyen ki swa zenn oubyen vye i devret konvenki ki sa ki i krwar, i laverite sorti dan Labib. Pol ti konsey son bann konpanyon Kretyen: “Egzamin tou keksoz; gard sa ki bon.” (1 Tesalonisyen 5:21) Bann zenn ki’n grandi dan en fanmiy Kretyen, i devret realize ki zot pa kapab vin vre Kretyen zis akoz lafwa zot paran. David ti ankouraz son garson Salomon pour “konn Bondye ou papa e servi li avek tou ou leker.” (1 Kronik 28:9) I pa ti sifi pour zenn Salomon zis get son papa pe batir son lafwa dan Zeova. Li menm i ti bezwen konn Zeova e sanmenm sa ki i ti fer. I ti demann Bondye: “Donn mwan lasazes ek konnesans pour ki mon a kapab al devan sa pep e pour ki mon a kapab rantre.”—2 Kronik 1:10.

10. Akoz napa nanryen mal ler nou demann bann kestyon senser avek en bon lentansyon?

¹⁰ Pour kapab annan en lafwa for nou bezwen ganny konnesans. Pol ti dir: “Lafwa i vin par mesaz ki nou tande.” (Romen 10:17) Ki i ti oule dir par sa? I ti pe dir ki ler nou nouri nou avek Parol Bondye, nou batir nou lafwa ek konfyans dan Zeova, dan son bann promes e dan son lorganizasyon. Kan nou demann bann kestyon senser lo Labib nou kapab ganny bann bon larepons. Deplis, Pol i donn nou en konsey dan Romen 12:2. I ankouraz nou pour nou menm etidye pour fer sir “sa ki bon, sa ki fer plezir, sa ki parfe.” Be ki mannyer nou kapab fer sa? Par ganny en konnesans egzakt lo “laverite.” (Tit 1:1) Lespri sen i kapab ed nou konpran bann size difisil. (1 Korentyen 2:11, 12) Nou devret priye pour ganny led Bondye kan nou pa kapab konpran en keksoz. (Psonm 119:10, 11, 27) Zeova i anvi ki nou konpran, krwar e obeir son parol. I pare pour reponn bann kestyon ki ganny demande avek en bon lentansyon.

Determinen pour fer Plezir Bondye

11. (a) Ki dezir ki kapab fer nou tonbe? (b) Ki mannyer nou kapab ganny sa kouraz pour reziste presyon lezot?

¹¹ Fer plezir Bondye olye zonm. I toutafe  normal ki parler nou anvi asosye avek lezot pour montre ki nou ete. Nou tou nou bezwen zanmi e ler lezot i aksepte nou sa i fer nou kontan. Pandan ladolesans osi byen pandan bann lezot laz dan lavi, lenfliyans lezot i kapab vreman for. I kapab fer nou annan sa dezir pour imit oubyen fer plezir lezot. Me nou bann zanmi oubyen lezot kanmarad pa toultan pe mazin sa ki pli meyer pour nou. Parfwa zot zis anvi en zanmi pour donn zot lanmen fer sa ki mal. (Proverb 1:11-19) Kan en Kretyen i les presyon lezot kontrol li, normalman i esey kasyet son lidantite. (Psonm 26:4) Me zapot Pol ti averti nou: “Pa bezwen kopye sa lemonn otour ou.” (Romen 12:2, The Jerusalem Bible) Zeova i donn nou sa kouraz pour fer fas avek okenn presyon sa lemonn.—Ebre 13:6.

12. Ki prensip ek legzanp ki kapab fortifye nou pour pran en pozisyon ferm kan nou konfyans dan Bondye i ganny teste?

¹² Kan sa lemonn i met presyon lo nou pour esey fer nou perdi nou lidantite Kretyen, nou devret mazinen ki nou fidelite avek Bondye i pli enportan ki lopinyon piblik oubyen tandans lamazorite dimoun. Sa parol dan Egzod 23:2 i en bon prensip pour nou: “Ou pa devret swiv lafoul pour fer sa ki mal.” Ler lamazorite bann Izraelit ti doute si Zeova i kapab akonpli Son promes, avek determinasyon Kaleb ti refize swiv lamazorite dimoun. I ti annan konfyans dan bann promes Zeova e i ti ganny rekonpanse pour son pozisyon ferm. (Nonm 13:30; Zozye 14:6-11) Eski ou pare pour protez ou relasyon avek Bondye par reziste sa presyon ki lamazorite dimoun i kapab met lo ou?

13. Akoz i saz pour fer lezot konnen ki nou en Kretyen?

¹³ Fer lezot konnen ki ou en Kretyen. En proverb i dir ki en pli bon defans i en latak. Sa i vre kan nou defann nou lidantite Kretyen. Kan bann Izraelit dan letan Ezra ti ganny opoze akoz zot zefor pour fer lavolonte Zeova, zot ti dir: “Nou serviter sa Bondye lesyel ek later.” (Ezra 5:11) Si nou les kritik ek fason azir bann move dimoun afekte nou, nou kapab sitan per ki nou aret servi Zeova. Si nou toultan pe esey fer plezir tou dimoun, nou pa pou kapab al pli devan. Alors, pa bezwen per. I pli bon ki ou fer lezot konnen ki ou en Temwen Zeova. Avek respe me dan en fason ferm, ou kapab eksplik zot ou bann standar, ou krwayans ek ou pozisyon konman en Kretyen. Les lezot konnen ki ou’n fer en rezolisyon pour reste fidel avek bann standar onivo Zeova lo moralite. Fer zot konpran klerman ki ou fidelite konman en Kretyen pa kapab ganny negosye. Montre zot ki ou fyer pour ou bann standar moral. (Psonm 64:10) Kan ou determinen pour demontre ou fidelite konman en Kretyen, sa i kapab fortifye ou, protez ou, e i menm kapab pous lezot pour anvi konn Zeova ek son pep.

14. Eski nou devret dekouraze ler dimoun i boufonn oubyen sikann nou? Eksplike.

¹⁴ I vre, serten i kapab boufonn ou oubyen  opoz ou. (Zid 18) Kantmenm lezot pa enterese ler ou eksplik zot ou bann standar pa bezwen dekouraze. (Ezekyel 3:7, 8) Menm si ou pli determinen, ou pa pou zanmen kapab fer dimoun ki pa oule krwar aksepte sa ki ou krwar. Zis mazin Faraon. Okenn fleo oubyen mirak, ni menm lanmor son garson premye ne pa ti arive konvenk li ki Moiz ti’n ganny anvoye par Zeova. Alors, pa les lafreyer pour zonm afekte ou. Kan nou annan konfyans ek lafwa dan Bondye, sa i kapab ed nou sirmont lafreyer.—Proverb 3:5, 6; 29:25.

Get Lepase e batir pour Lavenir

15, 16. (a) Ki leritaz spirityel nou annan? (b) Ki mannyer nou kapab benefisye letan nou servi Parol Bondye pour reflesir lo nou leritaz spirityel?

¹⁵ Apresye ou leritaz spirityel. Kan bann Kretyen i servi Parol Bondye pour reflesir lo sa leritaz spirityel ki zot annan, sa i pou anmenn bann byenfe. Sa leritaz i enkli laverite dan Parol Zeova, lespwar pour lavi eternel ek sa privilez pour reprezant Bondye konman bann proklanmater sa bon nouvel. Eski ou kapab vwar ki rol ou annan parmi son bann Temwen, sa group privilezye ki’n ganny sa manda pour sov lavi dimoun atraver travay predikasyon lo sa Rwayonm? Pa bliye, Zeova li menm ki’n dir: “Zot mon bann Temwen.”—Izai 43:10.

¹⁶ Ou kapab demann ou lekor sa bann kestyon swivan: ‘Ki kantite presye sa leritaz spirityel i ete pour mwan? Eski mon sitan apresye li ki pour mwan fer lavolonte Bondye i premye keksoz dan mon lavi? Eski mon sitan apresye li  ki i fortifye mwan pour reziste okenn tantasyon ki kapab fer mwan perdi sa leritaz?’ Nou leritaz spirityel i osi kapab fer nou vreman santi ki nou kapab rezwir sa sekirite spirityel selman dan lorganizasyon Zeova. (Psonm 91:1, 2) Kan nou revwar listwar lorganizasyon Zeova dan nou letan, sa i kapab fer nou santi ki napa okenn keksoz oubyen dimoun ki kapab detrir pep Zeova lo sa later.—Izai 54:17; Zeremi 1:19.

17. Ki nou bezwen anplis ki zis depan lo nou leritaz spirityel?

¹⁷ Sirman nou pa kapab zis depan lo nou leritaz spirityel. Nou tou nou bezwen devlop en relasyon entim avek Bondye. Apre ki Pol ti’n travay dir pour batir lafwa bann Kretyen dan lavil Filip, i ti ekrir zot: “Alor mon bann byenneme, parey ki zot in touzour obei mwan ler mon ti avek zot, i pli enportan pour obei mwan aprezan ki mon absan. Travay pour zot delivrans avek lafreyer ek reverans.” (Filipyen 2:12) Nou pa kapab depan lo en lot dimoun pour nou ganny sove.

18. Ki mannyer bann aktivite Kretyen i kapab ogmant nou lapresyasyon pour nou lidantite Kretyen?

¹⁸ Partisip o maksimonm dan bann aktivite Kretyen. I’n ganny dir ki “travay i annan en gran lenfliyans lo lidantite en dimoun.” Ozordi bann Kretyen in ganny sa manda pour fer en travay tre enportan pour pres sa bon nouvel lo Rwayonm Bondye ki’n ganny etablir dan lesyel. Pol ti dir: “Konman zapot pour bann pep non-Zwif, mon kontan sa responsabilite.” (Romen 11:13) Nou travay predikasyon i fer nou diferan avek sa lemonn e nou partisipasyon dan sa travay i en par tre enportan ki idantifye nou konman Kretyen. Kan nou okipe avek lezot aktivite teokratik, tel parey asiste renyon Kretyen, partisip dan progranm pour konstri bann Lasal Rwayonm, fer zefor pour ed bann ki dan bezwen e lezot aktivite ankor, sa i kapab fer nou pli apresye nou lidantite konman Kretyen.—Galat 6:9, 10; Ebre 10:23, 24.

En bon Lidantite i anmenn en kantite Benediksyon

19, 20. (a) Ki byenfe ou menm ou’n gannyen konman en Kretyen? (b) Lo kwa nou vre lidantite i baze?

¹⁹ Pran en pe letan pour reflesir lo sa kantite benediksyon ki nou’n gannyen akoz nou bann vre Kretyen. I en privilez ki nou annan pour ganny rekonnet par Zeova. Profet Malaki ti dir: “Bann ki annan lakrent pour Zeova ti koz avek kanmarad, sakenn avek son konpanyon, e Zeova ti kontinyen port latansyon e ekoute. En liv souvenir ti konmans ganny ekrir devan li pour bann ki annan lakrent pour Zeova e pour bann ki pans lo son non.” (Malaki 3:16) Bondye i kapab vwar nou konman son zanmi. (Zak 2:23) Nou lavi i annan en bi, en vre sans e i ranpli avek bann bon lobzektif. Nou osi annan sa lespwar pour ganny lavi eternel.—Psonm 37:9.

²⁰ Mazinen ki ou vre lidantite ek ou valer konman en imen i ganny determinen par Bondye, pa par sa ki lezot i kapab mazinen lo ou. Lezot i kapab ziz nou dapre bann standar imen ki napa valer. Lanmour ek lentere ki Bondye i demontre dan nou i donn nou sa vre baz pour krwar ki i apresye nou, parski nou son pep. (Matye 10:29-31) An retour nou lanmour pour Bondye i kapab fer nou pli apresye nou lidantite e i kapab fer nou vwar sa pli bon direksyon dan lavi. “Si en dimoun i kontan Bondye, Bondye i konn li.”—1 Korentyen 8:3.

[Not anba lo paz]

Eski ou rapel?

• Akoz i enportan ki Kretyen i protez zot lidantite?

• Ki mannyer nou kapab batir nou lidantite Kretyen?

• Ler nou bezwen deside lekel ki nou pou fer plezir, kwa ki kapab ed nou fer en bon desizyon?

• Ler nou vreman apresye nou lidantite, konman ki sa i prepar nou lavenir?

[Kestyon]

[Portre lo paz 21]

Partisip o maksimonm dan bann aktivite Kretyen i kapab fer nou pli apresye nou lidantite Kretyen