Ki Lenfliyans Zezi Kri i annan lo ou?

DAPRE sa ki nou’n egzaminen dan sa lartik avan, eski i annan okenn dout ki lansennyman Zezi i annan en gran lefe lo lemonn antye? Me kestyon ki nou tou nou devret demann nou lekor i, “Ki lenfliyans lansennyman Zezi i annan lo mwan?”

Zezi ti abord diferan topik dan son lansennyman. Bann leson enportan ki zot transmet i kapab fer lefe dan tou laspe ou lavi. Annou konsantre lo sa ki Zezi ti ansennyen konsernan bann priyorite dan lavi, devlop lanmitye avek Bondye, devlop bann bon relasyon avek lezot, rezourd bann problenm, e evit vyolans.

Etablir bann Priyorite dan Lavi

Lavi dan sa lemonn i telman pe al vit ozordi ki i pran bokou nou letan ek lenerzi ki souvan keksoz spirityel napa plas dan nou lavi. Konsider ka en zonm dan son 20  tan, ki nou pou apel li Jerry. Menm si i kontan fer konversasyon lo bann keksoz spirityel e i apresye sa ki i aprann, i dir avek latristes: “Mon zis napa letan pour fer sa bann konversasyon regilyerman. Mon travay sis zour dan lasemenn. Dimans i mon sel zour òf. Apre ki mon’n fer sa ki mon bezwen fer, mon tro fatige.” Si ou dan menm sitiasyon, ou kapab benefisye avek sa ki Zezi ti ansennyen dan son Sermon lo montanny.

Zezi ti dir avek sa lafoul ki ti’n rasanble pour ekout li: “Pa bezwen trakase, ki zot pou manze e ki zot pou bwar pour viv, oubyen ki zot pou mete. Eski lavi pa i pli enportan ki manze, e lekor pa i pli enportan ki lenz? Get bann zwazo ki anvole dan lezer; zot pa senm lagrenn, zot pa rekolte, e zot pa met an rezerv dan stor, pourtan zot Papa ki dan lesyel i nouri zot! E zot, eski pa zot annan plis valer ki bann zwazo? . . . Alor pa bezwen pran traka e demann zot lekor, ‘Ki nou pou manze? Ki nou pou bwar? Ki nou pou mete?’ Bann payen ki rod tousala. Me zot Papa ki dan lesyel i konn tou sa ki zot bezwen. Rod plito Rwayonm Bondye ek son lazistis, e limenm i a donn zot anplis tou lezot keksoz osi.” (Matye 6:25-33) Ki nou aprann atraver sa?

Zezi pa ti pe dir ki nou pa devret pran swen avek nou bezwen fizik ek pour nou fanmiy. Labib i dir: “Si en dimoun i pa port swen son prop parante sirtou bann ki viv dan son lakaz, i’n abandonn lafwa e i pir ki en non-krwayan.” (1 Timote 5:8) Me Zezi ti promet ki si nou donn priyorite bann keksoz spirityel, Bondye pou fer sir ki nou ganny lezot keksoz ki nou bezwen. Parol Zezi i montre nou kwa ki devret vin nou priyorite. Ler nou swiv sa konsey nou pou trouv boner, akoz Labib i dir: “Ere bann ki konsyan zot bezwen spirityel.”—Matye 5:3, NW.

Devlop Lanmitye avek Bondye

Bann ki konsyan zot bezwen spirityel i realize ki i neseser devlop en bon relasyon avek Bondye. Ki mannyer nou devlop en bon relasyon avek nenport dimoun? Pa nou esey konn sa dimoun pli byen? Nou pran letan pour aprann konn son pwennvi, latitid, abilite, lakonplisman ek son bann diferan gou, sa ki i kontan e pa kontan. I menm zafer ler nou pe esey devlop en lanmitye avek Bondye. I neseser ki nou ganny konnesans egzakt lo li. Ler Zezi ti pe priy son Papa konsernan son bann disip, i ti dir: “Lavi eternel . . . savedir ki zot konn ou konman sel vre Bondye, ek Zezi-Kri ki ou’n anvoye.” (Zan 17:2, 3) Wi, pour devlop lanmitye avek Bondye i neseser ki nou konn li. Sel sours pour ganny sa konnesans i Parol enspire Bondye, Labib. (2 Timote 3:16) Nou bezwen met letan dekote pour etidye Labib.

Me konnesans lo li menm pa ase. Dan sa menm lapriyer, Zezi ti dir: “Zot [son bann disip] in obei ou parol.” (Zan 17:6) Nou pa devret zis pran konnesans lo Bondye me osi azir an armoni avek sa konnesans. Eski i annan en lot fason pour nou kapab vin zanmi Bondye? Eski nou kapab vreman ekspekte nou lanmitye avek en dimoun grandi si par ekspre nou azir dan en fason ki kontrer avek son pwennvi ek prensip? Alors,  pwennvi Bondye ek son bann prensip i devret gid tou nou lepa. Annou egzaminen konman de son bann prensip i aplik dan nou relasyon avek lezot.

Devlop bann bon Relasyon avek lezot

En fwa, Zezi ti rakont en pti zistwar pour ansenny en leson enportan dan relasyon imen. I ti koz lo en lerwa ki ti anvi regle son kont avek son bann serviter. Me enn parmi zot ti annan en gro det e i ti napa mwayen pour repey li. Sa met ti demande ki sa zonm, son madanm, ek son zanfan i ganny vann pour pey sa det. Sa enn ki ti dwa li ti tonm azenou e sipliy li: “Pran pasyans avek mwan, e mon a pey ou tou.” Sa met ti pran pitye e i ti efas tou son det. Me sa serviter ti ale, i ti vwar enn son kanmarad travay ki ti dwa li en pti sonm larzan, e i ti demann li pour repey li. Menm si son kanmarad ti sipliy li pour pran pitye, sa serviter ti fer li ganny met dan prizon ziska ki i ti pey tou sa ki i dwa. Ler lerwa ti tann sa, i ti ankoler. I ti demande: “Pa ou ti devret pran pitye pour ou kanmarad parey mon ti pran pitye pour ou?” I ti fer anprizonn sa serviter ki pa ti oule pardonnen ziska ki i ti repey tou sa ki i ti dwa. Leson ki Zezi ti oule fer resorti dan sa zistwar ti: “Koumsa menm ki mon Papa ki dan lesyel pou fer avek zot si zot pa pardonn zot frer avek tou zot leker.”—Matye 18:23-35.

Konman imen enparfe, nou annan en kantite defo. Nou pa pou zanmen kapab fini pey Bondye sa gro det ki nou’n akimile akoz nou bann pese. Sel keksoz nou kapab fer se rod son pardon. Zeova i pare pour pardonn nou pour tou nou bann mankman, akondisyon ki nou pardonn nou bann frer ek ser pour pese ki zot in fer kont nou. Sa i en leson vreman pwisan! Zezi ti ansenny son bann disip pour priye: “Pardonn nou nou pese, parey nou pardonn bann ki’n fer nou ditor.”—Matye 6:12.

Rezourd Problenm kot son Rasin

Zezi ti konpran tre byen natir imen. Son konsey lo ki mannyer pour rezourd problenm, ti par koriz rasin sa problenm li menm. Annou vwar de legzanp.

Zezi ti dir: “Zot in tande ki Lalwa ti demann nou zanset: ‘Pa fer krim; sa ki fer krim pou ganny anmennen devan lakour’. Me mwan mon dir zot: tou sa ki pran lakoler avek son frer pou ganny anmenn devan lakour.” (Matye 5:21, 22) La Zezi ti montre ki rasin sa problenm i al pli lwen ki sa krim li menm. I konmans dan latitid sa kriminel, sa santiman dan son leker ki i pa’n kontrole. Si dimoun ti anpes rankin oubyen lakoler devlope, personn pa ti pou mazinen pour fer krim. En kantite versman disan ti pou’n ganny evite si dimoun ti aplik sa lansennyman!

Remarke konman Zezi ti idantifye rasin en lot problenm ki anmenn en kantite latristes. I ti dir lafoul: “Zot in tande ki i’n ganny dir: ‘Pa komet adilter.’ Me mwan mon dir zot: en dimoun ki get en madanm en lot zonm avek dezir in deza komet adilter avek li dan son leker. Si ou lizye drwat i fer ou fer pese, aras li e zet li.” (Matye 5:27-29) Zezi ti dir ki sa problenm i konmans pli lwen ki sa aksyon li menm. Sa problenm i arive akoz bann move dezir. Si en dimoun i evite mazin bann move dezir e i ‘aras zot’ dan son lespri, dan sa ka i pou kapab evite fer adilter.

“Met ou Lepe dan son Plas”

Sa zour swar ki Zezi ti ganny trai e arete, enn son disip ti tir son lepe pour defann li. Zezi ti donn li sa lord: “Met ou lepe dan son plas. Tou sa ki servi lepe pou mor par lepe.” (Matye 26:52) Son lannmen bomaten, Zezi ti dir avek Pons Pilat: “Mon Rwayonm pa  sorti lo sa later. Si mon Rwayonm ti sorti lo sa later, mon bann serviter ti a lager pour defann mwan kont lotorite Zwif. Non mon Rwayonm pa sorti lo sa later.” (Zan 18:36) Eski sa lansennyman i pratik?

Ki ti latitid bann premye Kretyen anver sa ki Zezi ti ansennyen lo vyolans? Liv The Early Christian Attitude to War i dir: “Vi ki zot [bann lansennyman Zezi] ti konsider tou aksyon vyolan e fer ditor lezot konman kont lalwa, sa [ti] klerman endike ki i defann pran par dan lager . . . Bann premye Kretyen ti swiv egzakteman sa ki Zezi ti dir, e zot ti konpran ki lansennyman Zezi ti vedir ki zot devret vin bann dimoun zantiy e evit servi vyolans konman en mwayen pour reziste lezot. Zot ti asosye zot larelizyon avek lape; zot ti severman kondann lager akoz sa kantite versman disan ki enplike.” Pa listwar ti pou diferan si tou bann ki dir zot Kretyen ti’n vreman swiv sa lansennyman!

Ou kapab benefisye avek tou Lansennyman Zezi

Bann lansennyman Zezi ki nou’n egzaminen i atiran, senp, e pwisan. Tou dimoun i kapab benefisye ler zot konn son lansennyman e met zot an pratik. *

Bann Temwen Zeova dan ou rezyon pou kontan pour ed ou vwar konman ou kapab benefisye avek bann pli bon lansennyman ki okenn imen in deza donnen. Nou envit ou pour kontakte bann Temwen Zeova oubyen ekrir lo sa ladres lo paz 2 dan sa magazin.

[Not anba lo paz]

[Portre lo paz 5]

“Zot Papa ki dan lesyel i nouri zot”

[Portre lo paz 7]

Lansennyman Zezi i kapab annan en bon lenfliyans lo ou lavi