Nou Zanfan​—en Leritaz presye

“Gete! Bann garson i en leritaz sorti kot Zeova; fri vant i en rekonpans.”​—PSONM 127:3.

1. Ki mannyer sa premye pti baba ti vin an egzistans?

ANNOU konsider sa levennman merveye ki Zeova in fer posib par lafason ki i ti kree sa premye zonm ek fanm. Tou le de, Adan konman papa, ek Ev konman manman, ti zwe en rol pour form en selil ki apre ti devlope dan vant Ev pour vin en nouvo lavi. Sa ti premye pti baba ki en zonm ek en fanm ti fer. (Zenez 4:1) Ziska ozordi, nou ranpli avek ladmirasyon ler nou reflesir lo konsepsyon ek nesans en zanfan e bokou dimoun i dekrir li konman en mirak.

2. Akoz ou kapab dir sa ki arive dan vant en madanm ansent i en mirak?

² Dan lespas apepre 270 zour, sa premye selil ki formen dan vant sa manman apre ki i annan relasyon avek sa papa, i grandi pour vin en pti baba ki konpoze avek plizyer santenn bilyon selil. Dan sa premye selil i annan lenstriksyon neseser pour prodwir plis ki 200 kalite selil. Par swiv sa bann lenstriksyon, ki personn pa kapab konpran oprofon, sa bann selil ki telman konplike i devlop dan sa lord ek fason egzakt pour form en nouvo lavi!

3. Akoz bokou dimoun ki rezonnen i dakor ki Bondye ki responsab pour nesans en nouvo imen?

³ Be lekel ki vreman responsab pour fer pti baba? Sirman i sa Enn ki’n kree lavi li menm. En psalmis ti sante: “Konnen ki Zeova i Bondye. Se li ki’n fer nou, pa nou menm.” (Psonm 100:3) Paran, zot konn byen ki sa nouvo lavi presye ki zot in fer pa’n vin akoz zot annan serten abilite eksepsyonnel. Zis en Bondye ki annan en gran lasazes ki kapab responsab pour formasyon merveye en nouvo lavi imen. Pour plizyer milye lannen, bann dimoun ki rezonn byen in rekonnet ki formasyon en zanfan dan vant son manman i posib akoz i annan en Gran Kreater. Eski ou annan sa menm pwennvi?—Psonm 139:13-16.

4. Ki sa defo ki imen i annan ki Zeova napa?

⁴ Me eski Zeova i en Kreater ki napa santiman, ki ti zis fer li posib pour en zonm ek en fanm kapab fer zanfan? Serten dimoun napa santiman, me Zeova pa zanmen koumsa. (Psonm 78:38-40) Psonm 127:3 i dir: “Gete! Bann garson [ek bann fiy osi] i en leritaz sorti kot Zeova; fri vant i en rekonpans.” Annou aprezan vwar kisisa en leritaz e ki sa i montre nou.

En Leritaz ek en Rekonpans

5. Akoz zanfan i en leritaz?

⁵ En leritaz i parey en kado. Souvannfwa bann paran i travay dir pour kit en leritaz pour zot zanfan. Sa leritaz i kapab larzan, propriyete, oubyen serten keksoz ki ti annan valer pour zot. Nenport leritaz ki en paran i kit pour son zanfan i montre ki sa paran i kontan son zanfan. Labib i dir ki Bondye in donn paran zot zanfan konman en leritaz. Zot en zoli kado sorti kot li. Si ou en paran, eski ou krwar ki ou  aksyon i montre ki ou konsider ou zanfan konman en kado ki Kreater liniver in konfye avek ou?

6. Ki plan Bondye ti annan par permet imen fer zanfan?

⁶ Zeova ti donn imen sa kado pour ki later i ranpli avek bann desandans Adan ek Ev. (Zenez 1:27, 28; Izai 45:18) Zeova pa ti kree li menm sak dimoun, parey i ti fer avek sa plizyer milyon lanz. (Psonm 104:4; Revelasyon 4:11) Okontrer, Bondye ti deside pour kree imen avek abilite pour fer zanfan ki ti pou resanble zot paran. I en gran privilez pour en manman ek en papa met o monn en nouvo lavi e pour pran swen avek li! Ou ki paran, eski ou remersi Zeova ki’n fer li posib pour ou ganny sa leritaz presye?

Aprann avek Legzanp Zezi

7. Kontrerman avek sa ki serten paran i fer, ki mannyer Zezi ti montre lentere ek konpasyon pour imen?

⁷ I malere pour dir ki pa tou paran ki konsider zanfan konman en rekonpans. Bokou paran i montre en pti gin konpasyon pour zot zanfan. Sa bann paran koumsa pa imit latitid Zeova oubyen son Garson. (Psonm 27:10; Izai 49:15) Kontrerman avek sa bann paran, annou egzamin lentere senser ki Zezi ti montre pour bann manrmay. Menm avan Zezi ti vin lo later konman en imen—ler i ti en lespri pwisan dan lesyel—Labib i dir ki i ti “pran bokou plezir” dan bann imen. (Proverb 8:31, Rotherham) Son lanmour pour bann imen ti telman gran ki i ti pare pour donn son lavi pour nou pour ki nou kapab ganny lavi eternel.—Matye 20:28; Zan 10:18.

8. Ki mannyer Zezi ti donn en bon legzanp bann paran?

⁸ Ler i ti lo later, Zezi ti donn en tre bon legzanp bann paran. Annou vwar ki i ti fer. Menm si i ti tre okipe e anba presyon, Zezi ti pas letan avek bann zanfan. I ti asize e get zot zwe dan bazar e i ti mansyonn serten keksoz ki i ti vwar zot fer dan son lansennyman. (Matye 11:16, 17) Zour ki i ti vwayaz Zerizalenm pour dernyen fwa, Zezi ti konnen ki i ti pou soufer e ganny touye. Alor ler dimoun ti anmenn bann manrmay pour vwar Zezi, son bann disip ti esey fer zot ale kekfwa akoz zot pa ti anvi Zezi anba en kantite presyon. Me Zezi ti koriz son bann disip. Son parol i montre ki i ti “pran bokou plezir” dan bann zanfan. I ti dir: “Les bann zanfan vin kot mwan, pa anpes zot.”—Mark 10:13, 14.

9. Akoz sa ki nou fer i kapab pli enportan ki sa ki nou dir?

⁹ Nou kapab aprann atraver legzanp Zezi. Ler bann zanfan i apros nou, ki mannyer nou azir, menm ler nou okipe? Eski nou fer parey Zezi ti fer? Sa ki zanfan i bezwen, sirtou avek zot paran, i sa ki Zezi ti pare pour donn zot. Savedir son letan ek latansyon. I vre i enportan pour dir ou zanfan ki “ou kontan li.” Me aksyon i fer plis lefe ki parol. Pa zis sa ki ou dir ki demontre ou lanmour me plis ankor sa ki ou fer. Ou demontre ou lanmour par donn ou zanfan ou letan, latansyon, e par pran swen avek zot. Me menm si ou fer tousala i kapab ki nou pa trouv sa rezilta ki nou anvi deswit. I demann pasyans. Nou kapab aprann pran pasyans si nou imit fason ki Zezi ti azir avek son bann disip.

 Pasyans ek Lafeksyon Zezi

10. Ki mannyer Zezi ti ansenny son bann disip en leson lo limilite, e eski sa leson ti efikas okonmansman?

¹⁰ Zezi ti konnen ki son bann disip ti pe lager antre zot konsernan lekel ki pli enportan. En zour, apre ki i ti’n ariv Kapernaoum avek son bann disip, Zezi ti demann zot: “ ‘Ki zot ti pe diskite dan semen?’ Me zot ti reste trankil, parski dan semen zot ti pe diskite avek kanmarad lo lekel ki pli enportan parmi zot.” Olye koriz zot severman, avek pasyans Zezi ti donn zot en leson pratik pour esey ansenny zot limilite. (Mark 9:33-37) Eski sa ti anmenn sa rezilta ki i ti oule vwar? Pa toudswit. Apepre sis mwan plitar, Zak ek Zan ti fer zot manman demann Zezi pour zot ganny pli bon pozisyon dan Rwayonm. Ankor enn fwa, avek pasyans Zezi ti koriz zot fason panse.—Matye 20:20-28.

11. (a) Ki bann disip Zezi pa ti fer apre ki zot ti ariv dan en lasanm anler avek Zezi? (b) Ki Zezi ti fer, e eski son zefor ti anmenn en bon rezilta sa zour?

¹¹ En pe letan plitar, Lapak lannen 33 N.L. ti arive, e Zezi ti zwenn son bann zapot an prive pour selebre sa levennman. Ler zot ti ariv dan sa lasanm anler, personn parmi sa 12 zapot pa ti pran linisyativ pour lav lipye kanmarad. Sa senp travay ti en koutim sa letan ki en serviter oubyen en madanm dan sa lakour ti fer. (1 Samyel 25:41; 1 Timote 5:10) Zezi ti’n bezwen vreman tris pour vwar ki son bann disip ti pe kontinyen montre ki zot anvi ganny pozisyon! Alor Zezi ti lav zot lipye e apre i ti senserman demann zot pour swiv son legzanp pour servi kanmarad. (Zan 13:4-17) Eski zot ti swiv son legzanp? Labib i dir ki plitar dan sa menm sware “bann disip ti konmans diskite antre zot lekel parmi zot ki ti pou ganny konsidere pli enportan.”—Lik 22:24.

12. Ki mannyer paran i kapab imit Zezi dan zot zefor pour ansenny zot zanfan?

¹² Ler ou zanfan pa fer sa ki ou konsey li pou fer, ou ki paran, eski ou realize ki mannyer Zezi ti’n bezwen santi? Mazinen ki Zezi pa ti aret esey ed son bann zapot, menm si zot ti pran letan pour koriz zot defo. Finalman son pasyans ti anmenn bon rezilta. (1 Zan 3:14, 18) Paran, ou devret imit lanmour ek pasyans Zezi. Pa zanmen aret fer zefor pour elve ou zanfan.

13. Akoz en paran pa devret koz dan en fason brit avek en zanfan ki anvi konn en keksoz?

¹³ Bann zanfan i bezwen santi ki zot paran i kontan zot e enterese avek zot. Zezi ti anvi konnen ki son bann disip ti pe mazinen, alor i ti ekoute ler zot ti demann bann kestyon. I ti demann zot ki zot panse lo serten keksoz. (Matye 17:25-27) Wi ekout atantivman e demontre lentere senser i form parti en bon lansennyman. Ler en zanfan i anvi konn en keksoz, en paran pa devret fer sa zanfan ale par dir li dan en fason brit: “Donn mwan en lape! Be la en ler pour ou vin dir mwan tousala?” Si en paran i vreman okipe, i devret dir sa zanfan ki zot a diskit sa zafer plitar. Apre sa, bann paran i devret fer  sir ki sa size i ganny diskite. Dan sa fason sa zanfan pou santi ki son paran i vreman enterese avek li, e i pou pli fasil pour li koz avek son paran.

14. Ki paran i kapab aprann avek Zezi konsernan montre lafeksyon zot zanfan?

¹⁴ Eski i apropriye pour paran montre zot lafeksyon par met zot lanmen lo zepol zot zanfan e anmay zot? La ankor, bann paran i kapab aprann avek Zezi. Labib i dir ki “i ti pran bann zanfan dan son lebra, enpoz lanmen lo zot e beni zot.” (Mark 10:16) Dapre ou, ki mannyer sa bann zanfan ti santi? Sirman sa ti tous zot leker, e zot ti santi zot atire avek Zezi! Si i annan vre lafeksyon ek lanmour ant paran ek zanfan, zanfan pou azir pli byen anver zefor paran pour disiplin e ansenny zot.

Konbyen Letan Zanfan i bezwen avek Paran?

15, 16. Ki sa konsep popiler lo elve zanfan, e aparaman akoz sa konsep in devlope?

¹⁵ Serten in demande si zanfan i vreman bezwen en kantite letan ek latansyon zot paran. I annan serten dimoun ki siport sa konsep ki dir ki zanfan pa bezwen en kantite letan zot paran osi lontan ki sa pti gin letan ki zot pase ansanm i itil, i ganny byen organize e aranze davans. Eski sa konsep i enn ki bon, ki’n ganny fer avek byennet bann zanfan antet?

¹⁶ En ekriven ki’n koz avek bokou zanfan ti dir ki sa ki zot “pli anvi avek zot paran i plis letan,” ansanm avek en “latansyon konplet.” I enteresan pour dir ki en dokter ti fer sa remark: “Sa konsep in devlope akoz paran i santi zot koupab. Dimoun ti pe ekskiz zot lekor pour pas mwens letan avek zot zanfan.” Ki kantite letan paran i devret pase avek zot zanfan?

17. Ki zanfan i bezwen avek zot paran?

¹⁷ Labib pa dir ki kantite letan. Me bann Izraelit ti ganny ankouraze pour koz avek zanfan kot zot, ler zot ti marse lo semen, ler zot ti asize, e ler zot ti leve. (Deterononm 6:7) Sa i klerman montre ki paran i bezwen kominik avek zot zanfan e ansenny zot konstaman toulezour.

18. Ki mannyer Zezi ti profit tou loportinite pour form son bann disip, e ki paran i kapab aprann atraver sa?

¹⁸ Zezi ti reisi form son bann disip ler i ti manz avek zot, vwayaz avek zot, e menm ler i ti pe repoze avek zot. I ti profit sak loportinite pour ansenny zot. (Mark 6:31, 32; Lik 8:1; 22:14) Pareyman, bann paran Kretyen i devret vey sak loportinite pour etablir e mentenir bon kominikasyon avek zot zanfan e pour form zot dan semen Zeova.

 Ki ou devret ansennyen e ki mannyer pour fer li

19. (a) Apard ki pas letan avek zanfan, ki sa lot keksoz ki neseser? (b) Ki paran i devret sirtou ansenny zanfan?

¹⁹ Senpleman pas letan avek zanfan e menm ansenny zot i pa sifi pour reisi elve zot. En keksoz tre enportan i sa ki ganny ansennyen. Remarke ki mannyer Labib i met lanfaz lo kwa ki devret ganny ansennyen. I dir: “Sa bann parol ki mon pe dir ou ozordi . . . ou bezwen fer zot antre dan ou garson.” Lekel sa “bann parol” ki zanfan i bezwen ganny ansennyen? Evidaman, i sa bann parol ki’n ganny mansyonnen avan, setadir: “Ou devret kontan Zeova ou Bondye avek tou ou leker, avek tou ou nanm, e avek tou ou lafors.” (Deterononm 6:5-7) Zezi ti dir ki sa i komannman Bondye ki pli enportan. (Mark 12:28-30) Bann paran i devret sirtou ansenny zot zanfan lo Zeova. Zot devret eksplik zot zanfan akoz ki zis Zeova tousel ki merit nou devosyon ek tou nou lanmour.

20. Ki bann paran dan letan ansyen ti ganny demande pour ansenny zot zanfan?

²⁰ Me “sa bann parol” ki paran i ganny ankouraze pour ansenny zot zanfan i enkli plis ki zis kontan Bondye avek tou nou leker. Dan sapit presedan dan Deterononm, ou pou remarke ki Moiz ti repet lalwa ki Bondye ti ekrir lo tablet ros. Sa i sa Dis Komannman. Sa bann lalwa i enkli lord pour pa koz manti, pa vole, pa touye, e pa fer adilter. (Deterononm 5:11-22) Alor bann paran dan letan ansyen ti ganny montre lenportans pour ansenny zot zanfan valer moral. Fodre bann paran Kretyen ozordi i donn sa bann menm lenstriksyon zot zanfan, si zot anvi ed zot zanfan ganny en lavenir ere e an sekirite.

21. Ki savedir sa lenstriksyon pour ‘fer antre’ Parol Bondye dan bann zanfan?

²¹ Remarke ki bann paran ti ganny dir ki mannyer zot devret ansenny “sa bann parol,” oubyen komannman, avek zot zanfan: “Ou devret fer zot antre dan ou garson.” Sa  mo ‘fer antre’ i vedir “ansenny e fer konnen par repetisyon oubyen par konsey: ankouraz oubyen fer reste dan lespri.” An realite, Bondye pe dir bann paran etablir en progranm lenstriksyon lo Labib ki annan pour bi fer antre keksoz spirityel dan lespri zot zanfan.

22. Ki bann paran Izraelit ti ganny demande pour fer pour enstri zot zanfan e ki sa i vedir?

²² En tel progranm i demann zefor ek determinasyon delapar bann paran. Labib i dir: “Ou devret anmar zot [“sa bann parol,” oubyen komannman Bondye] konman en siny lo ou lanmen e zot devret servi konman en bando ant ou lizye; e ou devret ekrir zot lo lankadreman laport ou lakaz e lo ou laport.” (Deterononm 6:8, 9) Sa pa vedir ki paran i devret literalman ekrir lalwa Bondye lo lankadreman laport ek lo laport, anmar en kopi lalwa lo lanmen zot zanfan e met ant zot lizye. Okontrer, lide prensipal i ki paran i devret konstaman rapel zot zanfan lansennyman Bondye. Zot devret ansenny zot zanfan dan en fason regilye e konstaman, ki konmsi lansennyman Bondye i devan zot zanfan toultan.

23. Ki nou pou egzaminen semenn prosen?

²³ Ki serten keksoz tre enportan ki paran i devret ansenny zot zanfan? Akoz i enportan ozordi ki zanfan i ganny ansennyen e formen pour protez zot lekor? Ki sa led ki disponib pour paran ansenny byen zot zanfan? Sa bann kestyon ek lezot ki konsern bokou paran pou ganny egzaminen dan prosen lartik.

Ki ou pou reponn?

• Akoz bann paran i devret konsider zot zanfan presye?

• Ki paran ek lezot i kapab aprann avek Zezi?

• Ki kantite letan paran i devret pase avek zot zanfan?

• Ki zanfan i devret ganny ansennyen, e ki mannyer sa lansennyman i devret ganny donnen?

[Kestyon]

[Portre lo paz 20]

Ki paran i kapab aprann atraver fason ki Zezi ti ansennyen?

[Portre lo paz 21]

Kan e ki mannyer bann paran Izraelit ti bezwen ansenny zot zanfan?

[Portre lo paz 22]

Paran i devret gard lansennyman Bondye devan zot zanfan