Nou nepli viv pour nou menm
Nou nepli viv pour nou menm
“[Kris in] mor pour tou bann vivan pour ki bann vivan i nepli viv pour zot menm.”—2 KORENTYEN 5:15.
1, 2. Ki komannman ki ti pous bann disip Zezi dan premye syek pour sirmont legois?
SA ZOUR ti dernyen sware ki Zezi ti pou pase lo later. Dan ankor detrwa er-d-tan i ti pou donn son lavi pour tou bann ki ti pou annan lafwa dan li. Sa zour swar, Zezi ti dir son bann zapot fidel en kantite keksoz enportan. Enn parmi ti en komannman ki ti enplik en kalite ki ti pou idantifye zot konman son bann disip. I ti dir zot: “La mon donn zot en konmannman nouvo: kontan kanmarad. Zot devre kontan kanmarad parey mwan mon’n kontan zot. Dimoun pou war ki zot mon bann disip si zot kontan kanmarad.”—Zan 13:34, 35.
2 Vre Kretyen i bezwen kontan kanmarad e pare pour montre konsern anver bezwen zot konpanyon Kretyen avan sa ki pour zot. Zot devret pare pour menm ‘donn zot lavi pour zot bann zanmi.’ (Zan 15:13) Ki mannyer bann premye Kretyen ti azir anver sa nouvo komannman? En ekriven dan dezyenm syek ki apel Tertullian ti ekrir sa ki lezot ti dir lo bann Kretyen dan son travay renonmen apele Apology. I ti ekrir: ‘Gete konman zot kontan kanmarad; zot menm pare pou mor pour kanmarad.’
3, 4. (a) Akoz nou devret rezet sa tandans pour vin egois? (b) Ki nou pou egzaminen dan sa lartik?
3 Nou osi nou bezwen ‘anmenn fardo kanmarad, parski an fezan sa nou obei lalwa Kris.’ (Galat 6:2) Me legoism i enn bann pli gro lobstak ki kapab anpes nou obeir lalwa Kris e ‘kontan Senyer nou Bondye avek tou nou leker, nou lam ek lespri e pour kontan nou prosen parey nou menm.’ (Matye 22:37-39) Vi ki nou enparfe nou annan sa tandans pour mazin zis nou menm. Deplis, nou bezwen fer fas avek presyon lavi, konpetisyon ki egziste kot lekol oubyen dan landrwa travay, e nou bezwen lite pour ganny bann keksoz esansyel dan lavi. Tousala i fer sa tandans egois ki nou’n ne avek vin pli for ankor. Sa tandans pour vin egois pa pe diminyen. Zapot Pol ti averti nou: “Dan bann dernyen zour . . . zonm pou mazin zis zot lekor.”—2 Timote 3:1, 2, Phillips.
4 Ver lafen son minister lo later, Zezi ti donn son bann disip trwa pa ki zot devret pran pour ed zot sirmont legoism. Lekel sa trwa pa, e konman nou kapab benefisye avek son lenstriksyon?
En Remed efikas!
5. Kan Zezi ti pe prese dan nor Galile ki i ti dir son bann disip, e akoz sa ti sok zot?
5 Zezi ti pe prese obor Sezare Filip ki sitye dan nor Galile. Vi ki sa landrwa ti zoli e trankil, i ti paret pli bon pour repoze ki pour koz lo fer sakrifis. Pourtan kan i ti laba, Zezi ti dir son bann disip: “Mon bezwen al Zerizalenm. Mon pou soufer en kantite par bann ansyen, sef pret ek bann profeser lalwa. Mon pou ganny met a-mor, me apre trwa zour mon pou resisite.” (Matye 16:21) Sirman sa bann parol ti’n bezwen sok son bann disip, parski depi tou sa letan zot ti pe ekspekte zot Lider etablir son Rwayonm isi lo later!—Lik 19:11; Akt 1:6.
6. Akoz Zezi ti koriz Pyer dan en fason sever?
6 Deswit Pyer “ti anmenn [Zezi] akote e repros li. I ti dir Zezi, ‘Zanmen Senyer! Sa pa pou zanmen ariv ou.’ ” Ki ti reaksyon Zezi? “Zezi ti tournen e dir li, ‘Ale! Sorti la Satan! Ou en ros dan mon semen, ou pa mazin parey Bondye me konman zonm.’ ” Pa sa ti de latitid konpletman diferan! Zezi ti pare pour aksepte sa misyon ki Bondye ti’n donn li. Sa misyon ti pou finalman enkli son lanmor lo en poto dan ankor detrwa mwan. Tandis ki Pyer li, i ti pe mazin pran tou keksoz fasil, parski i ti dir avek Zezi: “Zanmen Senyer!” San dout Pyer ti dir sa avek en bon lentansyon. Kantmenm sa, Zezi ti koriz li parski sa zour i ti’n les li ganny enfliyanse par Satan. Pyer pa ti pe “mazin parey Bondye me konman zonm.”—Matye 16:22, 23.
7. Dapre Matye 16:24, ki bann pa bann disip Zezi i bezwen pran?
7 Ozordi nou kapab tann menm parol ki Pyer ti dir Zezi. Souvannfwa, lemonn i ankouraz en dimoun pour ‘pa fatig li’ oubyen pour ‘swiv sa semen ki pli fasil.’ Lo lot kote, sa ki Zezi ti dir i konpletman diferan avek leta lespri sa lemonn. I ti dir son bann disip: “Si en dimoun i oule vin avek mwan, fodre ki i aret mazin zis li menm e pran [son poto martir e kontinyen, NW ] swiv mwan.” (Matye 16:24) The New Intrepreter’s Bible i dir: “Sa i pa en lenvitasyon pour bann ki pa ankor vin disip, me i pe montre ki savedir vin en disip pour bann ki’n fini aksepte lenvitasyon Kris.” Bann Kretyen i bezwen pran sa trwa pa ki Zezi in mansyonnen dan sa verse. Annou egzamin sak pa.
8. Eksplike ki savedir aret mazin zis nou menm.
8 Premyerman nou bezwen aret mazin zis nou menm. Sa mo Grek ki’n ganny tradwir “aret mazin zis limenm” i vedir ki nou pare pour rezet bann dezir egois oubyen bann lavantaz personnel. Aret mazin zis nou menm i pa vedir ki tanzantan nou pa fer serten keksoz ki fer nou plezir. I pa osi vedir ki nou pa kapab detann nou oubyen nou fer martir nou lekor. Nou nepli ‘pour nou menm’ dan le sans ki nou pare pour donn Zeova nou lavi ek tou sa ki nou annan. (1 Korentyen 6:19, 20) Olye mazin zis nou menm, nou lavi i santre lo Bondye. Aret mazin zis nou menm i enplik en determinasyon pour fer lavolonte Bondye menm si i pa sa keksoz ki normalman nou ti pou anvi fer. Nou montre nou devosyon anver Bondye par dedye nou lavi avek li, epi batize. Apre sa, nou lite pour reste fidel avek nou dedikasyon pour larestan nou lavi.
9. (a) Ki en poto martir ti reprezante, ler Zezi ti ankor lo later? (b) Dan ki sans nou pran nou poto martir?
9 Dezyenm pa, nou bezwen pran nou poto martir. Dan premye syek, en poto martir ti reprezant soufrans, laont ek lanmor. Ordinerman, zis bann kriminel ki ti ganny touye lo en poto matir oubyen zot lekor ti ganny kite anpandan lo en poto. Kan Zezi ti dir sa parol, i ti pe montre ki en Kretyen i devret pare pour aksepte ki i pou ganny persekite, rezete oubyen menm ganny touye. Tousala pou arive akoz i pa fer parti lemonn. (Zan 15:18-20) Nou standar konman Kretyen i fer nou diferan avek sa lemonn, alors lemonn i kapab koz an mal lo nou. (1 Pyer 4:4) Sa i kapab arive kot lekol, dan nou landrwa travay oubyen menm dan nou fanmiy. (Lik 9:23) Me nou pare pour ganny rezete par lemonn parski nou nepli viv pour nou menm. Zezi ti dir: “Zot byennere, kan en dimoun i ensilte zot, persekit zot, e koz manti pour dir tou sort keksoz mal kont zot akoz zot mon disip. Rezoui e santi zot ere akoz zot annan en gran rekonpans dan lesyel.” (Matye 5:11, 12) Annefe, annan laprouvasyon Bondye i sa keksoz pli enportan.
10. Ki savedir kontinyen swiv Zezi?
10 Trwazyenmman, Zezi ti dir ki nou bezwen kontinyen swiv li. Dapre Expository Dictionary of The New Testament Words par William Vine, sa mo Grek ki’n ganny tradwir “swiv” i vedir akonpanny en dimoun. “Enn ki pe fer menm larout.” Premye Zan 2:6 i dir: “Sa ki dir ki i ini avek li [Bondye] i devre mars dan menm semen ki i’n [Kris] marse.” Ki mannyer Zezi ti marse? Zezi ti kontan son Papa dan lesyel ek son bann disip, alor sa ti anpes legoism devlope dan li. Zapot Pol ti ekrir: “Kris li pa ti esey rod sa ki ti fer li plezir.” (Romen 15:3) Zezi ti pli konsernen avek sitiasyon lezot olye sa ki pour li, menm ler i ti fatige oubyen lafen. (Mark 6:31-34) Zezi ti osi fer bokou zefor pour prese e ansenny lezot. Eski pa nou devret imit li anmezir ki avek devouman nou akonpli nou misyon pour fer ‘tou pep vin bann disip, e ansenny zot pour obei tou sa ki Zezi in komande’? (Matye 28:19, 20) Dan tou sa bann domenn, Kris in kit en legzanp pour nou, e nou bezwen “swiv” byen son legzanp.—1 Pyer 2:21.
11. Akoz i enportan pour aret mazin zis nou menm, pran nou poto martir e kontinyen swiv Zezi?
11 I tre enportan ki nou aret mazin zis nou menm, pran nou poto martir e kontinyen swiv Zezi. Ler nou fer tousala i en remed pour sirmont legoism, ki en lobstak ki anpes nou demontre lanmour. Anplis ki sa, Zezi ti dir: “Sa ki oule sov son lavi pou perdi li, me sa ki perdi son lavi akoz mwan, i ava sov li. Ki i pou servi en dimoun si i ganny lemonn antye e i perdi son lavi? Oubyen ki i kapab donnen an retour pour son lavi?”—Matye 16:25, 26.
Nou pa kapab servi de Met
12, 13. (a) Ki sa zenn dirizan ti anvi konnen ler i ti demann Zezi konsey? (b) Ki konsey Zezi ti donn sa zennonm e akoz?
12 Detrwa mwan apre ki Zezi ti’n met lanfaz lo nesesite pour son bann disip aret mazin zis zot menm, en zenn dirizan ris ti apros Zezi e dir: “Met, ki fodre mon fer pour mwan ganny lavi eternel?” Zezi ti dir li, “obei bann konmannman.” Apre, i ti sit detrwa sa bann komannman. Sa zennonm ti dir: “Mon’n obei tou sa bann konmannman.” I paret ki sa zonm ti senser e i ti’n fer tou sa ki i ti kapab pour obeir bann komannman dan Lalwa. Alor i ti demande: “Ki mon devre fer ankor?” Pour reponn li, Zezi ti ofer li en lenvitasyon. I ti dir li: “Si ou oule vin parfe [oubyen “konplet,” New American Standard Bible], ale, vann tou sa ki ou posede e partaz sa larzan avek bann pov, e ou ava ganny en trezor dan lesyel. Apre vini e swiv mwan.”—Matye 19:16-21.
13 Zezi ti remarke ki si sa zennonm ti anvi servi Zeova avek tou son nanm, i ti pou bezwen debaras li avek son larises ki ti pe pran tou son letan dan lavi. En vre disip Kris pa kapab servi de met. I “pa kapab servi Bondye ek larises an menm-tan.” (Matye 6:24) I bezwen annan en ‘bon lizye,’ savedir enn ki fikse lo bann keksoz spirityel. (Matye 6:22) Kan nou pran sa ki nou annan e donn bann pov, nou pe fer sakrifis. Dan plas sa bann keksoz materyel, Zezi ti pe ofer sa zenn dirizan en privilez ki pa kapab ganny aste. Sa privilez pour anmas trezor dan lesyel. En trezor ki ti pou vedir lavi eternel pour li e permet li ganny sa privilez pour dirize ansanm avek Kris dan lesyel. Sa zennonm pa ti pare pour aret mazin zis li menm. “I ti ale byen tris, akoz i ti annan gran larises.” (Matye 19:22) Me bann disip Zezi pa ti azir parey sa zennonm.
14. Ki ti reaksyon sa kat peser ler Zezi ti envit zot pour swiv li?
14 De zan pli boner, Zezi ti lans en menm lenvitasyon avek kat peser, Pyer, Andre, Zak ek Zan. Sa letan, de zot ti pe lapes e lot de ti okipe pe aranz bann lasenn. Zezi ti dir zot: “Swiv mwan e mon a fer zot lapes dimoun.” Finalman, tou le kat ti les tonbe zot biznes lapes e swiv Zezi pour larestan zot lavi.—Matye 4:18-22.
15. Ki mannyer en Temwen Zeova dan nou letan ti fer sakrifis pour kapab swiv Zezi?
15 Bokou Kretyen ozordi in imit legzanp sa kat peser olye sa zenn dirizan ris. Zot in rezet larises ek bann gran loportinite dan sa lemonn zis pour zot kapab servi Zeova. En ser ki apel Debora i rakont nou son leksperyans: “Ler mon ti annan 22 zan mon ti bezwen pran en gro desizyon. Mon ti’n etidye Labib pour apepre sis mwan e mon ti anvi dedye mon lavi avek Zeova. Me mon fanmiy ti vreman opoz mwan. Zot ti bann bilyonner e zot ti panse ki si mon vin en Temwen sa ti pou anmenn laont lo zot akoz zot pozisyon dan lasosyete. Zot ti donn mwan 24 er-d-tan pour mwan deside kwa ki mon pli kontan. En lavi an roz oubyen laverite. Si mon pa ti aret frekant bann Temwen, mon pa ti pou ganny okenn byen avek mon fanmiy. Zeova ti ed mwan pour fer sa bon desizyon e i ti donn mwan sa lafors pour fer li. Pour 42 zan mon’n dan servis aplentan e mon pa’n regret nanryen. Ler mon get mon fanmiy, zot lavi napa en bi, zot pa zwaye. Alor, lefe ki mon’n rezet en lavi egois, en fason viv ki vedir zis plezir, mon’n kapab ganny eparnyen avek tousala. Ansanm avek mon msye mon’n kapab ed plis ki san dimoun aprann laverite. Pour mwan, sa bann zanfan spirityel i pli presye ki okenn larises materyel.” Plizyer milyon Temwen Zeova i santi menm parey. Eski ou osi ou santi koumsa?
16. Ki mannyer nou kapab montre ki nou nepli viv pour nou menm?
16 Vi ki zot pa anvi viv pour zot menm, sa santiman in pous plizyer milye Temwen Zeova pour servi konman pionye oubyen proklanmater aplentan. Lezot ki zot sitiasyon pa permet zot pour vin pionye, zot devlop lespri pionye e zot fer tou sa ki zot kapab pour siport travay predikasyon. Bann paran i demontre en menm leta lespri kan zot donn plis zot letan e met zot lentere personnel dan dezyenm plas pour zot kapab gid zot zanfan spirityelman. Dan en fason ou en lot, nou tou nou kapab montre ki nou met lentere Rwayonm premye dan nou lavi.—Matye 6:33.
Lanmour pour lekel ki motiv nou?
17. Kwa ki motiv nou pour fer sakrifis?
17 I pa toultan fasil pour demontre lanmour. Me reflesir lo kwa ki motiv nou. Pol ti ekrir: “Lanmour Kris i kontrol nou, parski nou asire ki en sel in mor pour tou dimoun . . . E i’n mor pour tou bann vivan pour ki bann vivan i nepli viv pour zot menm, me pour li ki’n mor e resisite pour zot.” (2 Korentyen 5:14, 15) Lanmour ki Kris in demontre anver nou ki motiv nou pour nepli viv pour nou menm. Pa sa i en motivasyon ki vreman pwisan! Vi ki Kris in mor pour nou, pa nou devret santi nou oblize pour viv pour li? Apre tou, lapresyasyon pour sa profon lanmour ki Bondye ek Zezi in demontre anver nou i motiv nou pour dedye nou lavi avek Bondye e pour vin disip Kris.—Zan 3:16; 1 Zan 4:10, 11.
18. Akoz i vo lapenn fer sakrifis?
18 Eski i vo lapenn pour nepli viv pour nou menm? Apre ki sa zenn dirizan ris pa ti aksepte lenvitasyon Zezi, Pyer ti demann Zezi: “Be nou alor ki’n kit tou keksoz pour swiv ou, ki nou pou gannyen?” (Matye 19:27) Vreman Pyer ek lezot zapot ti’n aret mazin zis zot menm. Ki zot ti pou gannyen konman rekonpans? Premyerman, Zezi ti koz lo sa privilez ki zot ti pou gannyen pour vin bann dirizan avek li dan lesyel. (Matye 19:28) Sa menm zour, Zezi ti koz lo benediksyon ki son bann disip ti pou kapab gannyen. I ti dir: “Tou sa ki’n kit son lakaz, son bann frer, son bann ser, son manman, son papa, son bann zanfan, oubyen son later akoz mwan e akoz Levanzil, pou ganny konmela san fwa plis . . . e dan lemonn fitir i a ganny lavi eternel.” (Mark 10:29, 30) Nou ganny bokou plis ki sa ki nou’n sakrifye. Eski pa nou bann papa, manman, frer, ser ek zanfan spirityel i annan plis valer ki okenn keksoz ki nou’n abandonnen akoz sa Rwayonm? Lekel ki ti annan en lavi pli satisfezan, Pyer ouswa sa zenn dirizan?
19. (a) Vre lazwa i depan lo kwa? (b) Ki nou pou diskite dan nou lartik swivan?
19 Par son parol ek aksyon, Zezi ti montre ki nou zwaye kan nou donnen e servi lezot, pa ler nou egois. (Matye 20:28; Akt 20:35) Kan nou nepli viv pour nou menm me nou kontinyen swiv Kris, depi konmela menm nou trouv gran satisfaksyon dan lavi e nou annan sa lespwar pou viv pour touzour. Byensir, kan nou aret mazin zis nou menm, Zeova i vin nou Met. Alors, nou vin lesklav Bondye. Akoz vin lesklav Bondye i fer nou lavi gou? Ki lefe i annan lo bann desizyon ki nou pran dan lavi? Sa lartik swivan pou diskit sa bann kestyon.
Eski ou rapel?
• Akoz nou devret rezet sa tandans pour vin egois?
• Ki savedir aret mazin zis nou menm, pran nou poto martir e kontinyen swiv Zezi?
• Kwa ki motiv nou pour nepli viv pour nou menm?
• Akoz i vo lapenn viv en lavi sakrifis?
[Kestyon]
[Portre lo paz 9]
“Zanmen Senyer!”
[Portre lo paz 11]
Lanmour i pous bann Temwen Zeova pour vin bann proklanmater devoue