“Zot in ganny aste pour en Pri”
“Zot in ganny aste pour en Pri”
“Zot in ganny aste pour en pri. Alor rann glwar Bondye.”—1 KORENTYEN 6:20.
1, 2. (a) Dapre Lalwa Moiz, ki mannyer en lesklav Izraelit ti bezwen ganny trete? (b) Ki en lesklav ti kapab fer si i ti kontan son met?
DAPRE Holman Illustrated Bible Dictionary, “dan letan ansyen, lesklavaz ti vreman komen e i ti ganny aksepte dan bokou landrwa.” Sa diksyonner ti osi dir ki “lekonomi Lezip, Lagres, ek Ronm ti depan lo travay ki bann lesklav ti fer. Dan premye syek, enn dan trwa dimoun Itali ek enn dan senk dimoun dan lezot pei ti en lesklav.”
2 Menm si lesklavaz ti osi egziste dan ansyen Izrael, Lalwa Moiz ti fer sir ki bann lesklav Ebre ti ganny proteze. Par egzanp, Lalwa ti dir ki en Izraelit ti kapab servi konman en lesklav pa plis ki sis an. Me apre sis an i ti “pou ganny libere san bezwen pey nanryen.” Bann lareg lo konman pour tret en lesklav ti vreman zis e ti osi montre konpasyon. Se pour sa rezon ki Lalwa Moiz ti fer sa laranzman: “Si sa lesklav i ensiste, ‘Mon vreman kontan mon met, mon madanm ek mon bann garson; mon pa anvi ganny libere,’ alor, son met i bezwen anmenn li pros avek sa vre Bondye e i devret anmenn li obor laport oubyen obor lankadreman laport. Son met i bezwen pers son zorey avek en keksoz pwent, e i devret vin son lesklav pour en letan endefini.”—Egzod 21:2-6; Levitik 25:42, 43; Deterononm 15:12-18.
3. (a) Ki kalite lesklav bann Kretyen dan premye syek ti aksepte pour vini? (b) Kwa ki pous nou pour servi Bondye?
3 Sa laranzman kot en lesklav ti kapab volonterman servi son met ti en avangou sa kalite lesklavaz ki bann vre Kretyen i anba la. Par egzanp, detrwa ekriven Labib tel parey Pol, Zak, Pyer ek Zid ti dir ki zot ti bann lesklav oubyen serviter Bondye ek Kris. (Tit 1:1; Zak 1:1; 2 Pyer 1:1; Zid 1) Pol ti fer bann Kretyen Tesalonik mazinen ki zot ti’n “abandonn bann zidol pour servi [oubyen “vin lesklav,” NW ] Bondye vivan e vre.” (1 Tesalonisyen 1:9) Kwa ki ti pous sa bann Kretyen pour volonterman vin lesklav Bondye? Si nou retourn lo bann lesklav Izraelit, kwa ki ti fer zot pa anvi ganny libere? Eski pa i akoz zot ti kontan zot met? Konman Kretyen, lanmour pour Bondye i pous nou pour vin son lesklav. Kan nou aprann konn e kontan sa vre Bondye vivan, nou ganny pouse pour servi li “avek tou [nou] leker ek tou [nou] nanm.” (Deterononm 10:12, 13) Me ki i enplike pour vin lesklav Bondye ek Kris? Ki lefe sa i annan lo nou lavi?
“Fer tou pour Laglwar Bondye”
4. Ki mannyer nou vin lesklav Bondye ek Kris?
4 Sa mo lesklav in ganny dekrir konman “en dimoun ki propriyete legal en lot dimoun e ki bezwen toultan obeir.” Nou vin propriyete legal Zeova ler nou dedye nou lavi avek li e batize. Zapot Pol ti eksplike: “Zot pa pour zotmenm; parski zot in ganny aste pour en pri.” (1 Korentyen 6:19, 20) Byensir, sa pri i sakrifis oubyen ranson ki Zezi Kri ti fer. Ki swa nou bann Kretyen swazir oubyen zot konpanyon ki pou reste lo later, sa sakrifis in fer li posib pour Bondye aksepte nou konman son serviter. (Efezyen 1:7; 2:13; Revelasyon 5:9) Alors, depi zour nou batenm nou ti “vin pour Zeova.” (Romen 14:8, NW ) Vi ki nou’n ganny aste avek disan presye Zezi Kri, nou osi vin son lesklav e nou oblize obeir son bann komannman.—1 Pyer 1:18, 19.
5. Ki premye lobligasyon nou annan konman lesklav Zeova, e ki mannyer nou kapab akonpli li?
5 Bann lesklav i bezwen obeir zot met. Nou servis i volonter e lanmour pour nou Met ki pous nou pour fer sa. Premye Zan 5:3 i dir: “Annefe, la lanmour Bondye: ki nou obei son konmannman; e son bann konmannman i pa en fardo.” Alor, nou lobeisans i laprev ki nou kontan nou met e ki nou pare pour soumet avek li. I evidan dan tou sa ki nou fer. Zapot Pol ti dir: “Ki [swa] ou manze, oubyen ki ou bwar, ou nenport kwa ki ou fer, fer tou pour laglwar Bondye.” (1 Korentyen 10:31) Dan nou lavi toulezour, menm dan bann pti keksoz nou anvi montre ki nou “lesklav pour Zeova.”—Romen 12:11, NW.
6. Ki mannyer ler nou lesklav Bondye i annan en lefe lo desizyon ki nou pran dan lavi? Donn en legzanp.
6 Par egzanp, ler nou pe fer bann desizyon nou pou seryezman anvi gard antet lavolonte Zeova, ki nou Met dan lesyel. (Malaki 1:6) Bann desizyon ki difisil i kapab teste nou lobeisans anver Bondye. Alors, eski nou pou ekout son konsey olye ki swiv sa ki nou leker “tret” e “move” i dir nou? (Zeremi 17:9) Pa bokou letan apre ki Melisa, en ser selibater ti’n batize, en zennonm ti tonm anmoure avek li. I ti paret en bon dimoun e i ti’n deza konmans etidye Labib avek Temwen Zeova. Me en ansyen ti apros Melisa pour montre li akoz i saz pour swiv komannman Zeova pour marye “selon Senyer.” (1 Korentyen 7:39; 2 Korentyen 6:14) Melisa i dir: “I pa ti fasil pour mwan swiv sa konsey. Me vi ki mon ti’n dedye mon lavi pour fer lavolonte Bondye, mon ti deside pour obeir son lenstriksyon.” Ler i reflesir lo sa ki ti arive i dir: “Mon vreman kontan ki mon’n swiv sa konsey. Pa bokou letan apre sa zonm ti aret etidye. Si mon ti’n kontinyen avek sa relasyon, ozordi mon ti pou’n marye avek en non krwayan.”
7, 8. (a) Akoz nou pa devret toultan pe rod fason pour fer plezir zonm? (b) Donn en legzanp pour montre konman nou kapab sirmont lafreyer zonm.
7 Si nou lesklav Bondye nou pa kapab vin lesklav zonm. (1 Korentyen 7:23) I vre, nou tou nou ti pou kontan vin popiler, me nou bezwen mazinen ki bann standar Kretyen i diferan avek sa ki pour lemonn. Pol ti demande: “Eski mon pe rod fer plezir bann zonm?” I ti konklir: “Si mon ti ankor pe fer plezir bann zonm, mon ti pou nepli en serviter [oubyen “lesklav,” NW ] Kris.” (Galat 1:10) Nou pa kapab zis les presyon lezot domin nou e fer plezir zonm. Alors, ki nou kapab fer ler lezot i met presyon lo nou?
8 Annou egzamin legzanp en zenn Kretyen Lespanny ki apel Elena. Plizyer son bann kanmarad dan laklas ti donn disan. Zot ti konnen ki Elena ti en Temwen Zeova e i pa ti pou donn disan oubyen aksepte transfizyon disan. Kan i ti ganny sa loportinite pour eksplik son pozisyon devan laklas, i ti pare pour fer en prezantasyon. Elena i eksplike: “Fransman mon ti per pour fer sa. Me mon ti fer en bon preparasyon e mon ti sirprann par rezilta ki mon ti gannyen. Mon bann koleg ti respe mwan e mon ansennyan ti dir mwan ki i ti admir travay predikasyon ki mon ti pe fer. Anplis ki sa, mon ti kontan ki mon’n defann Zeova e ki mon’n kapab klerman eksplike dapre Labib akoz nou refiz disan.” (Zenez 9:3, 4; Akt 15:28, 29) Wi, konman lesklav Bondye ek Kris nou diferan. Annefe, lezot i kapab respe nou si nou pare pour defann nou lafwa avek respe.—1 Pyer 3:15.
9. Ki nou aprann lo sa lanz ki ti aparet avek zapot Zan?
9 Ler nou konsyan ki nou lesklav Bondye sa i osi kapab ed nou pour toultan annan limilite. En zour, zapot Zan ti sitan enpresyonnen par en vizyon ekstraordiner ki i ti gannyen lo Zerizalenm dan lesyel, ki i ti tonm ater pour ador sa lanz ki ti’n ganny anvoye par Bondye. Me sa lanz ti dir li: “Atansyon, pa fer sa! Mwan mon en kanmarad travay [oubyen en “lesklav,” NW ] parey ou pour ou e parey ou bann frer, bann profet ek tou bann ki obei parol sa liv. Ador Bondye.” (Revelasyon 22:8, 9) Pa sa i en zoli legzanp ki sa lanz in kite pour tou bann lesklav Bondye! Serten Kretyen i kapab annan en responsabilite spesyal dan kongregasyon. Me Zezi ti dir: “Si enn parmi zot i oule vin enportan i bezwen vin zot serviter. E sa ki oule vin premye parmi zot i bezwen vin lesklav zot tou.” (Matye 20:26, 27) Zis parey bann disip Zezi nou tou nou bann lesklav.
“Nou’n zis fer nou Devwar”
10. Donn serten legzanp dan Labib pour montre ki i pa ti toultan fasil pour bann serviter fidel fer lavolonte Bondye.
10 I pa toultan fasil pour bann imen enparfe fer lavolonte Bondye. Profet Moiz ti ezite kan Zeova ti demann li pour ale e tir bann Izraelit dan lesklavaz Lezip. (Egzod 3:10, 11; 4:1, 10) Kan Yona ti ganny en latas pour al dir bann zabitan Niniv ki zot ti pou ganny detrir, “i ti leve e sove pour al Tarsis devan Zeova.” (Yona 1:2, 3) Barouk ki ti sekreter profet Zeremi, ti konplent akoz i ti’n ganny ase. (Zeremi 45:2, 3) Ki nou devret fer ler nou dezir oubyen sa ki nou pli kontan i an konfli avek lavolonte Bondye? Nou kapab trouv larepons dan en parabol ki Zezi ti rakonte.
11, 12. (a) Fer en rezimen lo parabol Zezi dan Lik 17:7-10. (b) Ki leson nou aprann dan sa parabol?
11 Zezi ti koz lo en lesklav ki pandan lazournen ti’n pran swen avek troupo son met lo laferm. Apre 12 er-d-tan travay dir, sa lesklav ti ariv kot lakaz byen fatige. Me son met pa ti envit li pour asize e manz en bon repa. Okontrer i ti dir li: “Prepar mon manze, apre sanze e vin servi mwan; ler mon a’n fini manze e bwar, apre ou a manze e bwar.” Sa lesklav ti bezwen servi son met premye e apre la i ti kapab servi son lekor. Pour termin sa parabol Zezi ti dir: “Zot osi, ler zot in fini fer sa ki zot ti’n ganny ordonnen pour fer, dir dan zotmenm, ‘Nou senpleman en bann serviter initil; nou’n zis fer nou devwar.’ ”—Lik 17:7-10.
12 Zezi pa ti rakont sa parabol pour montre ki Zeova pa apresye sa ki nou fer dan son servis. Labib i dir klerman: “Bondye pa enzis pour li oubliy travay ki zot in fer, ni lanmour ki zot in montre pour li.” (Ebre 6:10) Okontrer, Zezi ti oule fer resorti ki en lesklav pa kapab fer plezir son lekor oubyen konsantre lo son prop bezwen. Kan nou ti dedye nou lavi avek Bondye e swazir pour vin son lesklav, nou ti dakor pour met son lavolonte premye avan sa ki pour nou. Alors, nou bezwen les lavolonte Bondye pas avan sa ki pour nou.
13, 14. (a) Dan ki sitiasyon ki nou bezwen fer bokou zefor? (b) Akoz nou devret les lavolonte Bondye pas premye?
13 I kapab demann bokou zefor pour nou regilyerman etidye Parol Bondye ek bann piblikasyon ki ‘lesklav fidel e pridan’ i fourni nou. (Matye 24:45) Sa i kapab leka si toultan nou’n vwar li en problenm pour asize pour lir oubyen si en piblikasyon pe diskit bann keksoz profon dan Parol Bondye. (1 Korentyen 2:10) Alors, eski pa nou devret rod letan pour fer letid personnel? I kapab ki nou bezwen disiplin nou lekor pour asize e pran letan pour etidye. Si nou pa fer sa, nou pa pou kapab devlop en lapeti pour “nouritir solid [ki] pour bann adilt.”—Ebre 5:14.
14 Par egzanp, ler nou sorti travay byen fatige apre en gran lazournen, i kapab ki nou bezwen fors nou lekor pour asiste Renyon. Oubyen pour pres avek dimoun ki nou pa konnen i kapab pa sa keksoz ki nou ti pou kontan fer. Zapot Pol ti rekonnet ki parfwa nou kapab pres sa bon nouvel menm si nou pa ti anvi fer li. (1 Korentyen 9:17) Annefe, nou fer sa bann keksoz akoz Zeova, nou Met dan lesyel ki nou kontan, i’n dir nou ki nou bezwen fer li. Eski pa nou toultan santi nou satisfe e reganny sa lafors apre ki nou’n fer zefor pour etidye, asiste renyon e al prese?—Psonm 1:1, 2; 122:1; 145:10-13.
Pa get bann Keksoz “deryer”
15. Ki mannyer Zezi in kit en legzanp pour nou konsernan soumisyon avek Bondye?
15 Zezi ti demontre sa pli gran legzanp soumisyon anver son Papa dan lesyel. I ti dir son bann disip: “Mon’n sorti dan lesyel pour vin fer, non pa mon prop lavolonte, me lavolonte sa enn ki’n anvoy mwan.” (Zan 6:38) Ler i ti pe enkyet dan zarden Zetsemane, Zezi ti priye: “Mon Papa, si i posib elwanny sa lakoup avek mwan! E pourtan pa selon mon lavolonte me selon ou lavolonte.”—Matye 26:39.
16, 17. (a) Ki mannyer nou devret vwar bann keksoz ki nou’n kit deryer? (b) Montre konman Pol ti’n byen fer pour konsider bann loportinite dan lemonn konman “salte.”
16 Zezi i anvi ki nou reste fidel anver nou desizyon pour vin lesklav Bondye. I ti dir: “Nenport ki ki konmans travay e get [bann keksoz] deryer li, i pa bon pour Rwayonm Bondye.” (Lik 9:62) Kan nou lesklav Bondye i pa pou byen pour nou toultan mazin bann keksoz ki nou’n kit deryer. Okontrer, nou devret apresye sa ki nou’n gannyen depi ki nou’n swazir pour vin lesklav Bondye. Pol ti ekrir bann Filipyen: “Mon konsider tou keksoz konpletman konman en pert, akoz sa valer bokou pli siperyer ki annan dan konnesans mon Senyer, Kris Zezi. Akoz li, mon’n rezet tou, mon konsider tousala konman salte, pour mwan kapab ganny Kris.”—Filipyen 3:8.
17 Zis mazin tou sa bann keksoz ki Pol ti konsider konman salte e ki i ti’n abandonnen pour kapab ganny bann rekonpans spirityel konman en lesklav Bondye. I pa’n zis kit deryer bann konfor sa lemonn me osi sa posibilite pour vin en dirizan dan larelizyon Zwif. Si Pol ti kontinyen pratik larelizyon Zwif i ti’n kapab ariv ziska menm pozisyon ki Simeon, garson son ansennyan, Gamalyel. (Akt 22:3; Galat 1:14) Menm si i ti annan serten dout, Simeon ti enn bann sef Farizyen e i ti zwe en gran rol dan rebelyon bann Zwif kont bann Romen dan lannen 66-70 N.L. Me i ti ganny touye dan sa konfli swa par bann rebel Zwif oubyen par larme Romen.
18. Donn en legzanp pour montre konman sa ki nou akonpli spirityelman i anmenn rekonpans.
18 En kantite Temwen Zeova in swiv legzanp Pol. Jean [en fiy] i rakont nou: “Detrwa lannen apre ki mon ti’n fini lekol, mon ti ganny en plas travay konman sekreter en avoka byen renonmen Lonn. Mon ti kontan mon travay e mon ti ganny en bon pti larzan. Me dan mon leker mon ti konnen ki mon ti kapab fer plis pour Zeova. Finalman mon ti deside pour kite e antre dan servis pionye. Mon vreman kontan ki mon ti pran sa desizyon preski 20 tan pase! Mon servis aplentan in vreman anrisi mon lavi plis ki okenn travay sekreter ki mon ti’n kapab fer. Napa pli gran satisfaksyon ki ou kapab gannyen ki vwar konman Parol Zeova i kapab sanz en dimoun. Ou vreman kontan ler ou konnen ki ou’n zwe en rol pour ed lezot sanze. Sa ki nou donn Zeova i nanryen konpare avek sa ki nou gannyen.”
19. Ki nou devret determinen pour fer e akoz?
19 Avek letan nou sitiasyon i kapab sanze. Antouka, nou dedikasyon avek Bondye pa zanmen sanze. Nou toultan lesklav Bondye e i les nou deside ki mannyer nou pou pli byen servi nou letan, lenerzi, abilite ek lezot lavantaz ki nou annan. Alors, desizyon ki nou fer dan sa domenn i kapab montre ki kantite nou kontan Bondye. I pou osi montre ziska ki degre nou pare pour fer bann sakrifis. (Matye 6:33) Nenport ki sitiasyon nou ladan, eski pa nou devret determinen pour donn Zeova nou meyer? Pol ti ekrir: “Si nou donn avek bonn volonte nou don i ganny aksepte par Bondye dapre sa ki nou annan, non pa dapre sa ki nou napa.”—2 Korentyen 8:12.
Ou pe “prodwi Fri”
20, 21. (a) Ki kalite fri bann lesklav Bondye i prodwir? (b) Ki mannyer Zeova i rekonpans bann ki donn li zot meyer?
20 I pa en fardo pour vin lesklav Bondye. Okontrer, i retir nou dan en kalite lesklavaz ki kapab fer nou perdi nou lazwa. Pol ti ekrir: “Aprezan zot in ganny libere avek pese, e zot in vin lesklav Bondye, benefis ki zot gannyen se ki zot prodwi fri sangtifikasyon e son rekonpans final se lavi eternel.” (Romen 6:22) Konman lesklav Bondye nou prodwir fri sangtifikasyon dan le sans ki nou annan en kondwit ki sen oubyen prop moralman. Anplis ki sa, i pou permet nou ganny lavi eternel dan lavenir.
21 Zeova i demontre zenerozite anver son lesklav. Ler nou fer nou mye dan son servis, i “ouver son baro lapli dan lesyel” pour nou e i vers lo nou en benediksyon “ziska ki ava nepli annan ankor bezwen.” (Malaki 3:10) Pa i pou en plezir pour nou kontinyen vin lesklav Zeova pour touzour!
Eski ou rapel
• Akoz nou vin lesklav Bondye?
• Ki mannyer nou demontre ki nou soumet avek lavolonte Bondye?
• Akoz nou devret pare pour met lavolonte Zeova avan sa ki pour nou?
• Akoz nou pa devret ‘get bann keksoz deryer’?
[Kestyon]
[Portre lo paz 14]
Sa laranzman kot en lesklav Izraelit ti kapab volonterman servi son met ti en avangou sa kalite lesklavaz pour Kretyen
[Portre lo paz 15]
Ler nou batize nou vin lesklav Bondye
[Portre lo paz 15]
Kretyen i met lavolonte Bondye premye