Annan Konfyans dan Parol Zeova

“Mon’n met konfyans dan ou parol.”​—PSONM 119:42.

1. Ki nou kapab dir lo ekriven sa Psonm e lo son karakter?

SA EKRIVEN ki ti ekrir Psonm 119 ti apresye parol Zeova. I probab ki sa Psonm ti ganny ekrir par Izkiya letan i ti ankor Prens Zida. Sa bann santiman ki ganny eksprimen dan sa kantik enspire i al tre byen avek karakter Izkiya, ki ti “kontinyen reste atase avek Zeova” kan i ti lerwa Zida. (2 Lerwa 18:3-7) I annan en keksoz ki tre evidan: Sa ekriven ti konsyan son bezwen spirityel.—Matye 5:3.

2. Ki tenm Psonm 119 e ki mannyer sa kantik in ganny ekrir?

² En pwen enportan dan Psonm 119, i valer parol Bondye oubyen son mesaz. * Sa ekriven ti ekrir sa 176 verse sa kantik dan lord alfabet, petet pour fer li fasil pour dimoun rapel. Dan langaz Ebre, sak sa 22 kouple dan Psonm 119 i annan 8 laliny ki konmans avek menm let dapre lord alfabet Ebre. Sa psonm i baze lo parol Bondye, lalwa, bann rapel, fason azir Bondye, lord, lareg, komannman, ek son bann zizman. Dan sa lartik ek sa lot ki pou swiv, nou pou servi en tradiksyon egzakt Lekritir Ebre pour diskit Psonm 119. Par reflesir lo leksperyans ki bann serviter Zeova dan lepase e ozordi in pas atraver, sa i devret ogmant nou lapresyasyon pour sa kantik enspire. I devret osi ogmant nou lapresyasyon pour Parol Bondye, Labib.

Nou obeir Parol Bondye e nou trouv Lazwa

3. Eksplike e donn legzanp pour montre ki savedir vin san defo.

³ Pour kapab ganny vre lazwa nou bezwen mars dapre lalwa Bondye. (Psonm 119:1-8) Si nou fer sa, Zeova pou vwar nou “san defo.” (Psonm 119:1) Pour vin san defo i pa vedir ki nou parfe, me i enplik en gro zefor pour fer lavolonte Zeova. Konman en zonm ki ti “mars avek sa vre Bondye,” Noe ti montre ki i ti “san defo parmi son bann kontanporen.” Sa patrias fidel ansanm avek son fanmiy pa ti mor kan deliz ti arive, akoz i ti swiv direksyon Zeova. (Zenez 6:9; 1 Pyer 3:20) Pareyman, si nou anvi reste vivan zour sa lemonn i ganny detrir, nou bezwen byen obeir bann lord Bondye e fer son lavolonte.—Psonm 119:4.

4. Ki nou bezwen fer pour kapab trouv lazwa ek sikse?

⁴ Zeova pa pou zanmen abandonn nou si nou loue li avek en leker drwat e kontinyen obeir son bann lareg. (Psonm 119:7, 8) Bondye pa ti abandonn Zozye, lider bann Izraelit, ki ti aplik sa konsey pour ‘lir sa liv lalwa lizour konman aswar pour ki i fer tou sa ki’n ganny ekrir ladan.’ Ler i ti fer sa, i ti trouv sikse e i ti demontre lasazes dan tou sa ki i ti fer. (Zozye 1:8) Ler i ti pres pour mor, Zozye ti ankor pe loue  Bondye e i ti kapab rapel bann Izraelit: “Zot konn byen avek tou zot leker e avek tou zot nanm ki napa okenn parol parmi tou bann bon parol ki Zeova zot Bondye in dir zot ki pa’n reisi.” (Zozye 23:14) Zis parey Zozye ek ekriven Psonm 119 ti fer, nou kapab trouv lazwa ek sikse par loue Zeova e annan konfyans dan son parol.

Parol Zeova i fer nou reste prop

5. (a) Eksplike konman i posib reste prop spirityelman? (b) Ki led en zenn ki’n fer pese grav i kapab gannyen?

⁵ Nou kapab vin prop spirityelman si nou les parol Bondye ed nou reste vizilan. (Psonm 119:9-16) Sa i leka menm si nou paran pa’n donn nou en bon legzanp. Menm si son papa ti ador zidol, Izkiya ti rezet sa ki mal, posibleman bann lenfliyans payen. Meton en zenn ozordi ki pe servi Zeova i fer en pese grav. Repantans, lapriyer, led son paran, osi led ranpli avek lanmour delapar bann ansyen, i kapab ed sa zenn vin parey Izkiya, pour rezet sa ki mal e reste vizilan.—Zak 5:13-15.

6. Lekel sa de madanm ki ti rezet sa ki mal e les parol Bondye ed zot reste vizilan?

⁶ Menm si Raab ek Rit ti viv bokou letan avan ki Psonm 119 ti ganny ekrir, zot ti rezet sa ki mal. Raab ki ti sorti Kanaan ti en prostitye. Me i ti ganny rekonnet pour son lafwa konman en serviter Zeova. (Ebre 11:30, 31) Rit ki ti en Moabit ti abandonn son bann fo bondye pour servi Zeova e pour swiv Lalwa ki Zeova ti’n donn Izrael. (Rit 1:14-17; 4:9-13) Sa de madanm ki pa ti Izraelit, ti les parol Bondye ed zot reste vizilan e zot ti ganny sa gran privilez pour vin zanset Zezi Kri.—Matye 1:1, 4-6.

7. Konman ki Danyel ek sa trwa zenn Ebre in kit en bon legzanp konsernan reste prop spirityelman?

⁷ “Tandans dan leker zonm i move depi son lanfans,” me bann zenn i kapab swiv en bon semen menm dan sa lemonn koronpi ki anba pouvwar Satan. (Zenez 8:21; 1 Zan 5:19) Konman bann egzile an Babilonn, Danyel ek sa trwa zenn Ebre ti les parol Bondye ed zot reste vizilan. Par egzanp, zot pa ti anvi sali zot lekor avek bann bon manze ki lerwa ti’n fer prepare. (Danyel 1:6-10) Bann Babilonnyen ti manz bann zannimo sal ki Lalwa Moiz ti defann manze. (Levitik 11:1-31; 20:24-26) Zot pa ti toultan fer sennyen bann zannimo ki zot ti atrape, e lefe ki zot ti manz lavyann ki pa ti’n sennyen, zot ti kas lalwa Bondye konsernan disan. (Zenez 9:3, 4) I pa drol alor ki sa trwa Ebre pa ti anvi servi bann bon manze ki lerwa ti’n fer prepare! Sa bann zenn ki ti atase avek Bondye ti reste prop spirityelman e zot in kit en bon legzanp.

Parol Bondye i ed nou reste fidel

8. Ki latitid ek konnesans nou bezwen annan si nou anvi konpran e aplik lalwa Bondye?

⁸ En keksoz enportan ki kapab ed nou reste  fidel avek Zeova, i lapresyasyon profon pour parol Bondye. (Psonm 119:17-24) Si nou parey sa ekriven ki ti ganny enspire pour ekrir sa Psonm, nou pou vreman anvi konpran “bann keksoz merveye” dan lalwa Bondye. Nou pou kontinyelman anvi konn bann zizman Zeova e montre gran lapresyasyon pour son bann rapel. (Psonm 119:18, 20, 24) Si depi lontan nou’n dedye nou lavi avek Zeova, oubyen nou’n fek fer li, eski nou’n devlop en lanvi pour “dile pir parol Bondye”? (1 Pyer 2:1, 2) Nou bezwen konpran bann lansennyman debaz dan Labib, e sa pou fer li pli fasil pour nou kapab konpran e aplik lalwa Bondye.

9. Ki nou devret fer ler zonm i demann nou pour fer sa ki kont lalwa Bondye?

⁹ Nou kapab vreman kontan bann rapel sorti kot Bondye. Me ki nou pou fer si bann “prens” i koz kont nou pour en rezon ou lot? (Psonm 119:23, 24) Ozordi, souvannfwa bann dimoun dan gouvernman i esey fors nou pour met bann lalwa zonm avan sa ki pour Bondye. Ki ou pou fer ler zonm pe demann ou pour fer sa ki kont lavolonte Bondye? Nou profon lanmour pour parol Bondye pou ed nou reste fidel avek Zeova. Parey bann zapot Zezi ki ti ganny persekite, nou pou dir: “Nou devre obei Bondye plito ki zonm.”—Akt 5:29.

10, 11. Donn legzanp pour montre ki mannyer nou kapab reste fidel avek Zeova menm anba bann pli gro leprev.

¹⁰ Nou kapab reste fidel avek Zeova menm anba bann pli gro leprev. (Psonm 119:25-32) Si nou anvi reste san defo devan Bondye, nou bezwen pare pour les nou ganny ansennyen e senserman priy pour gidans Bondye. Nou devret osi swazir “sa semen fidelite.”—Psonm 119:26, 30.

¹¹ Izkiya ki petet ti ekrir Psonm 119, ti swazir “sa semen fidelite.” I ti fer sa menm si i ti antoure avek bann fo adorater e menm si i ti’n kapab ganny boufonnen avek bann manm dan lakour rwayal. I tre probab ki sa sagrinasyon ti anpes li dormi. (Psonm 119:28) Me Izkiya ti met son konfyans dan Bondye, i ti en bon lerwa e i ti fer sa ki drwat devan Zeova. (2 Lerwa 18:1-5) Si nou depan lo Bondye, nou osi nou kapab andir bann leprev e reste fidel avek li.—Zak 1:5-8.

Parol Zeova i donn nou Kouraz

12. Ki mannyer personnelman nou kapab aplik Psonm 119:36, 37 dan nou lavi?

¹² Ler nou les nou ganny gide par parol Bondye nou ganny sa kouraz pour fer fas avek bann leprev. (Psonm 119:33-40) Avek limilite nou rod gidans Zeova pour ki nou kapab obeir  son lalwa avek tou nou leker. (Psonm 119:33, 34) Parey sa psalmis nou demann Bondye: “Diriz mon leker ver ou bann rapel, pa anver bann profi” oubyen “profi malonnet.” (Psonm 119:36; vwar not anba lo paz) Parey zapot Pol nou “fer sa ki byen dan tou sirkonstans.” (Ebre 13:18) Si en anplwayer i anvi nou fer en keksoz malonnet, nou bezwen annan sa kouraz pour reste atase avek gidans Bondye, e Zeova i toultan beni nou kan nou fer sa. Anfet, i ed nou kontrol tou bann move tandans. Alors, annou priye: “Fer mwan pa vwar sa ki initil.” (Psonm 119:37) Zanmen nou pou anvi konsider bann keksoz initil ki Bondye i deteste konman dezirab. (Psonm 97:10) Pornografi ek grigri i de parmi sa bann lezot keksoz initil ki nou pa pou anvi ganny kontak avek.—1 Korentyen 6:9, 10; Revelasyon 21:8.

13. Ki mannyer bann disip Zezi ki ti’n ganny persekite ti ganny sa kouraz pour pres avek lardyes?

¹³ Ler nou annan konnesans egzakt lo parol Bondye, sa i donn nou sa konfyans pour nou kapab pres avek kouraz. (Psonm 119:41-48) Nou bezwen annan kouraz pour kapab reponn sa enn ki pe repros nou. (Psonm 119:42) Parfwa nou kapab vin parey bann disip Zezi ki ti priye kan zot ti ganny persekite: “Senyer, . . . permet ou bann serviter anons ou mesaz avek lasirans san okenn lafreyer.” Ki rezilta sa ti anmennen? “Zot ti ranpli avek Sent-Espri e zot ti konmans anons mesaz Bondye san okenn lafreyer.” Pareyman, Souvren Senyer i donn nou sa kouraz pour anons son parol avek lardyes.—Akt 4:24-31.

14. Kwa ki ed nou pour pres avek kouraz parey Pol?

¹⁴ Nou pou ganny sa kouraz pour prese san okenn lakanmizri, si nou kontan “sa parol laverite” e kontinyen ‘obeir lalwa Bondye.’ (Psonm 119:43, 44) Si nou etidye seryezman parol Bondye sa pou ekip nou pour koz lo bann rapel Zeova devan bann lerwa. (Psonm 119:46) Lapriyer ek lespri sen, pou ed nou dir sa bon parol dan en bon fason. (Matye 10:16-20; Kolosyen 4:6) Avek kouraz, Pol ti koz lo bann rapel Zeova devan bann dirizan dan premye syek. Par egzanp i ti donn temwannyaz Gouverner Romen, Feliks, ki ti “ekout sa ki i ti annan pour dir konsernan lafwa dan Kris Zezi.” (Akt 24:24, 25) Pol ti osi rann en temwannyaz devan Gouverner Festis ek Lerwa Agripa. (Akt 25:22–26:32) Avek led Zeova, nou osi nou kapab vin bann temwen ki annan kouraz, ki pa zanmen “onte pour anons Levanzil.”—Romen 1:16.

Parol Bondye i rekonfort nou

15. Ki mannyer Parol Bondye i kapab rekonfort nou kan lezot i sikann nou?

¹⁵ Nou kapab depan lo rekonfor ki Parol Zeova i fourni. (Psonm 119:49-56) I annan defwa ki nou vreman bezwen sa rekonfor. Konman Temwen Zeova nou koz avek lardyes. Me kantmenm sa, “bann ki annan toupe” savedir bann ki annan lodas pour mal azir anver Bondye, parfwa zot sikann nou en kantite. (Psonm 119:51) Anmezir ki nou pe priye, nou kapab mazin bann keksoz pozitif dan Parol Bondye, alor nou menm nou kapab trouv sa rekonfor. (Psonm 119:52) Anmenmtan ki nou pe sipliy Bondye, nou kapab mazin en lalwa oubyen en prensip dan Labib ki donn nou sa rekonfor ek kouraz ki nou bezwen dan sa moman difisil.

16. Ki bann serviter Bondye pa’n fer menm si zot in ganny persekite?

¹⁶ Sa bann ki ti annan toupe e ki ti pe sikann sa psalmis, ti bann Izraelit, en nasyon ki ti pep Bondye. Pa sa ti fer onte! Alor, annou determinen pour pa rezet lalwa Bondye parey bann Izraelit ti fer. (Psonm 119:51) Kan zot ti pe ganny persekite par bann Nazi ek lezot persekisyon parey, plizyer milye serviter Bondye ti refize rezet bann lalwa ek prensip sorti dan Parol Bondye. (Zan 15:18-21) I pa en fardo pour obeir Zeova, parski son bann lareg i parey bann melodi ki rekonfort nou.—Psonm 119:54; 1 Zan 5:3.

Montre Lapresyasyon pour Parol Zeova

17. Ler nou apresye parol Bondye ki sa i pous nou pour fer?

¹⁷ Nou montre ki nou apresye parol Bondye  ler nou obeir son parol. (Psonm 119:57-64) Sa psalmis ti promet ki i pou obeir parol Zeova, e menm dan milye lannwit i ti sote pour remersye Bondye pour Son bann zizman ki drwat. Si nou sote dan lannwit, pa sa i en bon loportinite pour nou montre nou lapresyasyon dan lapriyer! (Psonm 119:57, 62) Nou lapresyasyon pour parol Bondye i pous nou pour les nou ganny ansennyen par Bondye e i fer nou anvi vin konpanyon sa bann ki annan lakrent pour Zeova. (Psonm 119:63, 64) Napa bann pli bon konpanyon ki zot lo sa later!

18. Ki mannyer Zeova i reponn nou lapriyer kan bann dimoun mesan in anmar nou avek zot lakord?

¹⁸ Kan nou priye avek tou nou leker e avek limilite nou demann Zeova pour ansenny nou, nou pe adousi son leker e nou kapab asire ki i pou beni nou. Nou vreman bezwen priye kan ‘bann dimoun mesan i anmar nou avek zot lakord.’ (Psonm 119:58, 61) Zeova i kapab koup sa lakord ki nou bann lennmi in anmar nou avek e delivre nou pour ki nou kapab kontinyen pres lo sa Rwayonm e fer disip. (Matye 24:14; 28:19, 20) Nou’n toultan vwar sa dan bann pei kot nou travay ti’n ganny restrikte.

Lafwa dan Parol Bondye

19, 20. Konman i kapab byen pour soufer?

¹⁹ Lafwa dan Bondye ek son parol i ed nou andir bann leprev e kontinyen fer son lavolonte. (Psonm 119:65-72) Menm si bann ki annan toupe ti’n fann mansonz lo li, sa psalmis ti sante: “I byen ki mon’n soufer.” (Psonm 119:66, 69, 71) Konman i kapab byen pour en serviter Zeova andir bann leprev?

²⁰ Kan nou andir bann leprev san dout nou senserman sipliy Zeova, e sa i fer nou vin pli pros avek li. Petet nou kapab pran plis letan pour etidye son parol e fer pli gro zefor pour aplik li. Sa i fer nou lavi gou. Me si lafason ki nou azir anver difikilte i revel serten move tre dan nou, tel parey mank pasyans ek lorgey? Lapriyer senser, led sorti dan Parol Bondye ek son lespri sen, i kapab ed nou sirmont sa bann move tre e pli byen devlop sa nouvo personnalite. (Kolosyen 3:9-14) Anplis ki sa, nou lafwa i vin pli for kan nou andir bann leprev. (1 Pyer 1:6, 7) Pol ti benefisye avek bann leprev ki i ti pas ladan akoz sa ti fer li depan plis lo Zeova. (2 Korentyen 1:8-10) Eski nou les bann soufrans annan en bon lefe lo nou?

Pa zanmen perdi Konfyans dan Zeova

21. Ki arive ler Bondye i fer bann ki annan toupe onte?

²¹ Parol Bondye i donn nou en baz solid pour annan konfyans dan Zeova. (Psonm 119:73-80) Si nou vreman annan konfyans dan nou Kreater, nou pou napa okenn rezon pour kanmi. Akoz sa ki lezot i fer, nou bezwen ganny rekonforte e nou kapab anvi priye: “Sa bann ki annan toupe pou onte.” (Psonm 119:76-78) Kan Zeova i fer sa bann tel dimoun onte, savedir zot bann move aksyon pou ganny dekouver e son non sen pou ganny glorifye. Nou kapab asire ki alafendizour, bann ki persekit pep Bondye pa akonpli nanryen. Par egzanp, zot pa zanmen e pa pou zanmen kapab fer disparet bann Temwen Zeova, ki met konfyans dan Bondye avek tou zot leker.—Proverb 3:5, 6.

22. Dan ki sans sa psalmis ti “parey en boutey dan lafimen”?

²² Kan nou ganny persekite, parol Bondye i ogmant nou konfyans dan li. (Psonm 119:81-88) Vi ki bann ki annan toupe ti pe persekit li, sa psalmis ti santi li “parey en boutey dan lafimen.” (Psonm 119:83, 86) Dan letan Labib,  bann boutey ti ganny fer avek lapo zannimo, e zot ti servi li pour met delo, diven ek lezot labwason ladan. Kan sa bann boutey pa ti pe servi, zot ti kapab retresi si zot ti’n ganny mete anpandan dan en lakwizin kot ti annan en ta lafimen. Eski difikilte ek persekisyon in deza fer ou santi “parey en boutey dan lafimen”? Si wi, annan konfyans dan Zeova e priye: “Gard mwan vivan akoz ou labonte leker, pour ki mon kapab obeir rapel ki sorti dan ou labous.”—Psonm 119:88.

23. Ki nou’n egzaminen dan Psonm 119:1-88, e ki nou kapab demann nou lekor anmezir ki nou enpasyan pour etidye Psonm 119:89-176?

²³ Ziska prezan dan Psonm 119:1-88, nou’n egzaminen ki Zeova i demontre son labonte leker anver son bann serviter akoz zot annan konfyans dan son parol, zot apresye son bann lalwa, rapel ek komannman. (Psonm 119:16, 47, 64, 70, 77, 88) I kontan ler i vwar bann ki’n dedye zot lavi avek li pe reste vizilan dapre son parol. (Psonm 119:9, 17, 41, 42) Anmezir ki ou enpasyan pour etidye larestan verse dan sa zoli Psonm, petet ou kapab demann ou lekor, ‘Eski mon vreman les parol Zeova ekler mon semen?’

[Not anba lo paz]

Ki ou pou reponn?

• Ki nou bezwen fer pour trouv vre lazwa?

• Ki mannyer parol Zeova i fer nou reste prop spirityelman?

• Dan ki fason parol Bondye i donn nou kouraz ek rekonfor?

• Akoz nou bezwen annan lafwa dan Zeova ek son parol?

[Kestyon]

[Portre lo paz 4]

Rit, Raab, ek sa trwa zenn Ebre an egzil Babilonn ti reste vizilan dapre parol Bondye

[Portre lo paz 5]

Avek kouraz, Pol ti koz lo bann rapel Bondye devan bann lerwa