Bann Pwen enteresan dan Liv Rit
Parol Bondye i vivan
Bann Pwen enteresan dan Liv Rit
I EN levennman ankourazan lo fidelite ant de madanm. I en resi lo lapresyasyon pour Zeova e pour konfyans dan son laranzman. I en zistwar ki atir latansyon lo sa gran lentere ki Zeova ti annan pour zanset Mesi. I en resi tousan lo lazwa ek latristes en fanmiy. Liv Rit i enkli tousala e bokou plis ankor.
Liv Rit i kouver apepre 11 lannen “dan lepok kan bann ziz ti pe rann lazistis” Izrael. (Rit 1:1) Bann levennman ki’n ganny rikorde in kapab ariv boner dan letan bann Ziz, vi ki propriyeter sa landrwa, Boaz, enn bann personnaz dan sa levennman reel, ti garson Raab dan letan Zozye. (Zozye 2:1, 2; Rit 2:1; Matye 1:5) I paret ki profet Samyel ki ti ekrir sa resi an 1090 A.N.L. I sel liv dan Labib ki port non en madanm ki pa ti en Izraelit. Mesaz ki annan ladan “i vivan e i annan pisans.”—Ebre 4:12.
“KOT OU ALE MON POU ALE”
Kan Naomi ek Rit ti ariv Betleenm, zot ti atir latansyon tou dimoun. Bann madanm dan sa lavil ti demann avek sa enn ki pli aze: “Pa Naomi sa?” Pour reponn, Naomi ti dir: “Pa apel mwan Naomi. Apel mwan Mara, akoz Tou Pwisan in fer keksoz vreman anmer pour mwan. Ler mon ti ale mon ti annan en kantite, me Zeova in fer mwan retourn lanmen vid.”—Rit 1:19-21.
Kan en lafanmin Izrael ti fer son fanmiy sorti Betleenm pour al dan pei Moab, Naomi ti “annan en kantite” dan le sans ki i ti annan en msye ek de garson. Me en pe letan apre ki zot ti’n etablir zot Moab, son msye, Elimelek, ti mor. Plitar, sa de garson ti marye avek de madanm Moabit, Orpa ek Rit. Apepre dizan plitar, sa de garson ti mor san fer zanfan. Zot ti kit sa trwa madanm tousel. Ler Naomi, zot belmer, ti deside pour retourn Zida, sa de vev ti al avek li. Dan semen, Naomi ti sipliy son de belfiy pour retourn Moab e rod bann msye parmi zot pep. Orpa ti dakor pour retournen. Me Rit ti reste avek Naomi, e i ti dir: “Kot ou ale mon pou ale, e kot ou pas lannwit mon pou pas lannwit. Ou pep pou vin mon pep, e ou Bondye mon Bondye.”—Rit 1:16.
Sa de vev, Naomi ek Rit, ti ariv Betleenm zis okonmansman rekolt lorz. Rit ti profit en laranzman ki ti dan Lalwa Bondye, e i ti konmans pran sa ki reste dan plantasyon ki ti pou en fanmiy pros Elimelek, en Zwif aze apele Boaz. Rit ti ganny laprouvasyon Boaz e i ti kontinyen pran sa ki reste dan plantasyon “ziska ki rekolt lorz ek rekolt dible” ti fini.—Rit 2:23.
Larepons pour bann Kestyon lo Labib:
1:8—Akoz Naomi ti demann son de belfiy pour retourn “sakenn kot lakour son manman” olye kot lakour zot papa? Labib pa dir si papa Orpa ti ankor vivan sa letan. Me papa Rit ti ankor vivan. (Rit 2:11) Kantmenm sa, Naomi ti koz lo lakour zot manman, petet i ti pe mazinen ki ler i koz lo zot manman sa ti pou fer zot rapel rekonfor ki vin atraver lafeksyon en manman. Sa ti pou sirtou rekonfort sa bann fiy ki ti dan tro bokou latristes akoz zot ti pe al kit zot belmer ki zot ti kontan en kantite. Sa ki i ti dir i kapab osi montre ki kontrerman avek Naomi, manman Rit ek Orpa ti annan en lakour byen stab.
1:13, 21—Eski Zeova ti fer lavi anmer pour Naomi e fer son maler? Non. Naomi pa ti blanm Bondye pour okenn maler ki’n arive. Me vi ki tousala ti’n ariv li, i ti mazinen ki Zeova ti kont li. I ti tris e dezapwente. Deplis, dan sa letan annan zanfan ti ganny vwar konman en benediksyon sorti kot Bondye e pa kapab fer zanfan konman en malediksyon. Vi ki i ti napa pti zanfan e son de garson ti’n mor, Naomi ti kapab santi ki Zeova ti’n imilye li.
2:12—Ki “saler parfe” Rit ti gannyen sorti kot Zeova? Rit ti ganny en garson e i ti ganny sa privilez pour vin enn parmi bann zanset en dimoun pli enportan dan listwar—zanset Zezi Kri.—Rit 4:13-17; Matye 1:5, 16.
Leson pour nou:
1:8; 2:20. Menm si Naomi ti fer fas avek bann maler, i ti gard son konfyans dan labonte leker Zeova. Nou osi nou devret fer parey, sirtou ler nou pe fer fas avek bann leprev dir.
1:9. En lakour pa devret zis en landrwa kot bann manm fanmiy i manze e dormi. I devret en landrwa anpe pour repoze ek rekonfor.
1:14-16. Orpa ti “retourn kot son pep ek son bann bondye.” Rit pa ti fer sa. I ti kit konfor ek sekirite son pei natal e reste fidel avek Zeova. Par devlop lanmour fidel pour Bondye e demontre en leta lespri sakrifis, sa pou ede anpes bann dezir egois domin nou e ‘retourn an aryer e ganny detri.’—Ebre 10:39.
2:2. Rit ti anvi profit sa provizyon pour pran sa ki reste ki ti’n ganny met an plas pour benefisye bann etranze ek bann pov. I ti en dimoun ki ti annan limilite. En Kretyen ki dan bezwen pa devret tro fyer pour aksepte led avek lanmour bann konpanyon Kretyen oubyen led gouvernman ki i kapab bezwen.
2:7. Menm si Rit ti annan drwa pran sa ki reste, i ti demann permisyon avan i ti fer sa. (Levitik 19:9, 10) Sa ti en siny limilite. I byen pour nou “rod limilite,” akoz “bann dimoun ki annan limilite pou reste lo later, e zot pou vreman tir bokou plezir dan labondans lape.”—Tsefanya 2:3; Psonm 37:11.
2:11. Rit pa ti zis en fanmiy pour Naomi. I ti en vre zanmi. (Proverb 17:17) Zot lanmitye ti solid akoz i ti baze lo bann kalite parey lanmour, fidelite, konpran santiman kanmarad, labonte, ek sakrifis. Pli enportan, i ti baze lo zot spirityalite—zot dezir pour servi Zeova e pour parmi son bann adorater. Nou osi nou annan bann bon loportinite pour devlop bann lanmitye senser avek bann vre adorater Zeova.
2:15-17. Menm ler Boaz ti fer li posib pour redwir lakantite travay ki Rit ti fer , “i ti kontinyen pran sa ki reste dan plantasyon ziska aswar.” Rit ti en dimoun ki ti travay dir. En Kretyen i devret annan en repitasyon konman en dimoun ki travay dir.
2:19-22. Naomi ek Rit ti annan bann bon konversasyon tou le swar. Sa enn ki pli aze ti enterese avek sa ki sa enn pli zenn pe fer. Zot tou le de zot ti eksprim zot panse ek zot santiman. Pa i devret koumsa dan en fanmiy Kretyen?
2:22, 23. Kontrerman avek fiy Zakob, Dina, Rit ti frekant bann adorater Zeova. Sa i en bon legzanp pour nou!—Zenez 34:1, 2; 1 Korentyen 15:33.
NAOMI TI GANNY “EN KANTITE”
Naomi ti tro vye pour fer zanfan. Alor i ti demann Rit pour ranplas li dan en maryaz ki ti pou prezerv leritaz son fanmiy, oubyen maryaz bofrer. Rit ti swiv gidans Naomi, e i ti demann Boaz pour azir konman sa enn ki ti pou prezerv sa leritaz. Boaz ti pare pour fer sa. Me ti annan en fanmiy pli pros ki ti devret ganny sa loportinite.
Boaz pa ti perdi letan pour rezourd sa ka. Son lannmen menm, i ti rasanble dis ansyen Betleenm devan sa zonm e ti demann li si i pare pour prezerv sa leritaz. Sa zonm ti refize. Alor, Boaz ti azir konman sa enn ki pou prezerv sa leritaz e i ti marye avek Rit. Zot ti fer en garson, Obed, granpapa Lerwa David. Aprezan bann madanm Betleenm ti dir avek Naomi: “Beni Zeova . . . I’n vin sa enn ki’n sanz ou lavi, e ki pour soutenir ou dan ou lavyeyes, akoz ou belfiy ki vreman kontan ou e ki pli meyer ki set garson pour ou, ki’n donn li nesans.” (Rit 4:14, 15) Sa madanm ki ti’n retourn Betleenm “lanmen vid” ti’n reganny “en kantite”!—Rit 1:21.
Larepons pour bann Kestyon lo Labib:
3:11—Kwa ki ti fer Rit ganny sa repitasyon konman “en bon madanm”? Se pa “laparans: avek seve trese” oubyen “bann bizou an-or, zoli lenz ki kout ser” ki ti fer lezot admir Rit. Plito, i ti sa “labote enteryer, dan leker”—son fidelite ek lanmour, son limilite, son devouman ek lespri sakrifis. Nenport madanm ki annan lakrent pour Bondye ki anvi annan en repitasyon parey Rit i devret fer bokou zefor pour devlop sa bann kalite.—1 Pyer 3:3, 4; Proverb 31:28-31.
3:14—Akoz Rit ek Boaz ti lev avan soley leve? I pa ti akoz en keksoz imoral ti’n arive pandan lannwit e zot ti anvi kasyet. Sa ki Rit ti fer sa zour swar ti an armoni avek sa ki ti abitye ganny fer par en madanm ki pe rod drwa maryaz bofrer. I ti azir an armoni avek lenstriksyon Naomi. Deplis, sa ki Boaz ti dir i montre klerman ki i pa ti vwar nanryen mal dan sa ki Rit ti’n fer. (Rit 3:2-13) Aparaman, Rit ek Boaz ti lev byen boner pour ki personn pa konmans fann bann rimer.
3:15—Pour ki rezon Boaz ti donn Rit sis mezir lorz? I paret ki sa fason azir i vedir ki apre sis zour travay, son lannmen ti pou en zour repo. Alors, pareyman zour repo Rit ti pros. Boaz ti fer sir ki Rit ti pou ganny “en landrwa repo” dan lakour son msye. (Rit 1:9; 3:1) I kapab osi ki sis mezir lorz i se tou ki Rit ti kapab anmennen lo son latet.
3:16—Akoz Naomi ti demann Rit: “Lekel ou, mon fiy?” Eski i pa ti rekonnet son belfiy? I posib ki Naomi pa ti rekonnet Rit, akoz ler Rit ti retourn kot Naomi, i ti ankor fernwanr. Me sa kestyon i kapab osi pe vedir ki Naomi ti pe demann konsernan nouvo lidantite Rit an rapor avek sa ki i ti’n fer pour prezerv sa leritaz.
4:6—Dan ki fason en dimoun ki ti pe prezerv leritaz en lot dimoun ti pou kapab “rin” son prop leritaz? Premyerman, si en dimoun pov ti vann sa later ki i’n erite, en dimoun ki ti pe prezerv leritaz en lot dimoun ti pou bezwen aste sa later. I ti pou bezwen aste li a en pri ki ti’n ganny determinen par lakantite lannen ki ti reste ziska prosenn Zibile. (Levitik 25:25-27) Sa ti pou redwir valer propriyete sa dimoun ki ti pe prezerv sa leritaz. Deplis, si Rit ti ganny en garson, se sa garson non pa fanmiy sa dimoun ki ti pe prezerv sa leritaz ki ti pou erit sa later ki’n ganny aste.
Leson pour nou:
3:12; 4:1-6. Boaz ti swiv laranzman Zeova avek bokou latansyon. Eski nou fer atansyon ler nou pe swiv bann prosedir teokratik?—1 Korentyen 14:40.
3:18. Naomi ti annan konfyans dan Boaz. Eski nou osi pa nou annan menm konfyans dan bann konpanyon Kretyen fidel? Rit ti pare pour fer maryaz bofrer avek en zonm ki i pa ti konn ditou, en zonm ki son non pa dan Labib. (Rit 4:1) Akoz? Parski i ti annan konfyans dan laranzman Bondye. Eski nou osi nou annan menm konfyans? Par egzanp, ler nou pe mazin pour rod en msye ouswa en madanm pour marye avek, eski nou ekout sa konsey pour marye “selon Senyer”?—1 Korentyen 7:39.
4:13-16. Menm si i ti en Moabit e en ansyen adorater bondye Kemos, Rit ti ganny en zoli privilez. Sa i demontre sa prensip ki dir “i pa depann ni lo sa ki zonm i oule, ni lo son zefor, me zis lo Bondye ki pran pitye.”—Romen 9:16.
“Dan son Ler ki i’n fikse, [Bondye] i a elev zot”
Liv Rit i dekrir Zeova konman en Bondye ki annan labonte leker, ki azir an faver son bann serviter fidel. (2 Kronik 16:9) Ler nou reflesir lo lafason ki Rit ti ganny beni, nou vwar lenportans pour met nou konfyans dan Bondye avek lafwa konplet, e vreman krwar “ki i egziste e ki i rekonpans tou bann ki rod li.”—Ebre 11:6.
Rit, Naomi, ek Boaz in met tou zot konfyans dan laranzman Zeova, e zot in rekolte sa ki bon. Pareyman, “Bondye i fer tou, dan tou sirkonstans, pour byennet tou bann ki kontan li, pour tou bann ki i’n swazir dapre son plan.” (Romen 8:28) Annou pran aker konsey zapot Pyer: “Alor avek limilite plas zot anba kontrol pisans Bondye pour ki dan son ler ki i’n fikse, i a elev zot. Desarz tou zot sousi lo li, parski limenm ki pran swen avek zot.”—1 Pyer 5:6, 7.
[Portre lo paz 29]
Eski ou konnen akoz Rit pa ti abandonn Naomi?
[Portre lo paz 30]
Kwa ki ti donn Rit sa repitasyon konman “en bon madanm”?
[Portre lo paz 31]
Ki “saler parfe” Rit ti gannyen sorti kot Zeova?