Lekel ki pou resisite?

“Pa bezwen etonnen ler mon dir sa, akoz sa ler pe arive kan tou bann mor ki dan tonbo pou tann son lavwa, e zot pou sorti dan zot tonbo.”​—ZAN 5:28, 29.

1. Ki lanons remarkab Moiz ti tande kot sa brousay ki ti pe brile, e lekel ki ti repet sa parol plitar?

EN KEKSOZ vreman drol ti arive plis ki 3,500 lannen pase. Moiz ti pe okip mouton patrias Yitro. Obor montanny Oreb, lanz Zeova ti aparet avek Moiz dan en laflanm dife dan en brousay. Sa resi dan Egzod i dir ki “anmezir ki i ti kontinyen gete, sa brousay ti pe pran dife e pourtan sa brousay pa ti brile.” Apre en lavwa sorti dan sa brousay ti apel li. Sa lavwa ti dir: “Mwan Bondye ou papa, Bondye Abraam, Bondye Izaak ek Bondye Zakob.” (Egzod 3:1-6) Plitar dan premye syek, Zezi, Garson Bondye ti repet sa menm parol.

2, 3. (a) Ki rekonpans ki pe esper Abraam, Izaak, ek Zakob? (b) Ki kestyon ki ganny souleve?

² Zezi ti pe diskit avek detrwa Sadiseen, ki pa ti krwar dan rezireksyon. Zezi ti dir: “Lo size ki bann mor pou resisite, menm Moiz ti montre sa dan sa pasaz lo size sa zarbis ki ti pe brile, ler i ti apel Senyer, ‘Bondye Abraam, Bondye Izaak ek Bondye Zakob.’ Annefe, i pa en Bondye dimoun mor, me dimoun vivan; akoz pour li tou i vivan.” (Lik 20:27, 37, 38) Ler Zezi ti dir sa parol, i ti pe konfirmen ki dapre pwennvi Bondye, Abraam, Izaak ek Zakob ki lontan ti’n mor ti ankor vivan dan memwar Bondye. Parey Zob, zot esper lafen zot “korve,” zot pe espere pour ganny leve dan lanmor. (Zob 14:14) Dan nouvo lemonn Bondye, zot pou resisite.

³ Me ki nou pou dir lo sa plizyer bilyon dimoun ki’n mor toudilon listwar imen? Eski zot osi zot pou ganny resisite? Avan ler nou ganny en larepons satisfezan pour sa kestyon, annou vwar dan Parol Bondye kote dimoun i ale ler zot mor.

Kote bann Mor i ete?

4. (a) Kote dimoun i ale ler zot mor? (b) Kwa sa Seol?

⁴ Labib i dir ki bann mor “pa konn nanryen ditou.” Ler en dimoun i mor i pa ganny tourmante dan lanfer, oubyen espere avek lagoni dan lelenm, me i senpleman retourn an pousyer. Pour sa rezon, Parol Bondye i konsey bann vivan: “Tou sa  ki ou lanmen i trouve pour fer, fer li avek ou lafors, parski napa ni travay, ni plan, ni konnesans, ni lasazes dan Seol kot ou pe ale.” (Eklezyast 9:5, 10; Zenez 3:19) Pour bokou dimoun sa mo “Seol” i pa en mo ki zot familye avek. I en mo Ebre ki dimoun pa tro konn son lorizin. Bokou larelizyon i ansennyen ki bann mor i ankor vivan. Me parey Parol Bondye i montre sa bann ki dan Seol i mor, san konn nanryen ki pe pase. Seol i latonm kot tou dimoun i ale.

5, 6. Kote Zakob ti ale ler i ti mor, e lekel ki i ti zwenn laba?

⁵ Dan Labib, sa mo Seol i aparet pour premye fwa dan Zenez 37:35. Apre ki patrias Zakob ti krwar ki son garson byenneme ti’n mor, i ti refize ganny konsole, i ti dir: “Mon pou desann dan Seol an dey pour mon garson!” Vi ki i ti krwar ki son garson in mor, Zakob ti anvi mor e al dan Seol. Plitar, son nef zanfan pli aze ti anvi anmenn Benzamen, son pli zenn garson, Lezip pour ganny manze akoz lafanmin. Me Zakob ti refize, i ti dir: “Mon garson pa pou desann avek zot, akoz son frer in mor e i reste zis li. Si en aksidan fatal i ariv li lo semen kot zot pe ale, alor zot pou sirman fer mon seve blan al dan Seol avek latristes.” (Zenez 42:36, 38) Sa de verse i asosye lanmor avek Seol, me pa avek serten kalite lavi apre lanmor.

⁶ Resi dan Zenez i montre ki Zozef ti vin administrater manze Lezip. Alor, Zakob ti kapab al laba pour reini avek Zozef. Apre sa, Zakob ti reste dan sa pei ziska son lanmor alaz 147 an. An armoni avek son swe avan son lanmor, bann garson Zakob ti anmenn son lekor dan pei Kanaan e zot ti anter li dan kavern Makpela. (Zenez 47:28; 49:29-31; 50:12, 13) Alor, Zakob ti ganny antere avek Izaak, son papa, e Abraam son granpapa.

‘Reini avek zot Zanset’

7, 8. (a) Kote Abraam ti ale ler i ti mor? Eksplike. (b) Kwa ki montre ki lezot ti al dan Seol ler zot ti mor?

⁷ Pli boner ler Zeova ti konfirm son lalyans avek Abraam e promet ki son desandans ti pou vin bokou, i ti osi endike ki pou arive avek Abraam. Zeova ti dir: “Tandis ki ou, ou pou al ver ou zanset anpe; ou pou ganny antere en bon laz.” (Zenez 15:15) Sanmenm ki ti arive. Zenez 25:8 i dir ki ‘Abraam ti mor apre en bon laz, vye, e i ti ganny reini avek son pep.’ Ti lekel son pep? Zenez 11:10-26 i mansyonn son bann zanset depi Sem, garson Noe. Alor, ler Abraam ti mor i ti reini avek sa bann dimoun ki ti deza pe dormi dan Seol.

⁸ Sa lekspresyon “reini avek son pep” i aparet souvan dan Lekritir Ebre. Alor, i lozik pour dir ki Ismael garson Abraam ek Aaron frer Moiz, ti al dan Seol ler zot ti mor e laba zot pe esper en rezireksyon. (Zenez 25:17; Nonm 20:23-29) Pareyman, Moiz osi ti al dan Seol, menm si personn pa konnen kote son latonm ti ete. (Nonm 27:13; Deterononm 34:5, 6) Zozye ki ti ranplas Moiz konman dirizan Izrael, ansanm avek en zenerasyon an antye ti osi desann dan Seol dan lanmor.—Ziz 2:8-10.

9. (a) Ki mannyer Labib i montre ki sa mo Ebre “Seol” ek sa mo Grek “Lades” i refer avek en menm landrwa? (b) Ki lespwar i annan pour sa bann ki dan Seol, oubyen Lades?

⁹ Plizyer syek plitar, David ti vin lerwa 12 tribi Izrael. Apre i ti dormi dan lanmor avek son bann zanset. (1 Lerwa 2:10) Eski li osi ti dan Seol? Zour Lapannkot lannen 33 N.L., zapot Pyer ti refer avek lanmor David e i ti mansyonn Psonm 16:10: “Ou pa pou abandonn mon nanm dan Seol.” Apre ki i ti’n dir ki David ti ankor dan son latonm, Pyer ti aplik sa parol avek Zezi e i ti endike ki David “ti war davans sa  ki ti pou arive, e i ti pe koz lo rezireksyon Mesi ler i ti dir: ‘I pa’n ganny abandonnen dan lemonn lanmor [oubyen “Lades,” NW ] e son lekor pa’n vin lapouritir.’ Bondye in resisit sa Zezi ki mon pe koz lo sa size, e nou tou, nou temwen.” (Akt 2:29-32) La, Pyer ti servi sa mo Grek, “Lades,” ki parey avek sa mo Ebre “Seol.” Alor, sa bann ki ganny mansyonnen zot dan Lades i dan menm kondisyon avek bann ki dan Seol. Zot pe dormi, pe esper en rezireksyon.

Eski i annan bann move Dimoun dan Seol?

10, 11. Akoz nou kapab dir ki serten move dimoun in al dan Seol, oubyen Lades ler zot mor?

¹⁰ Apre ki Moiz ti diriz nasyon Izrael an deor Lezip, serten dimoun ti rebele ler sa nasyon ti dan dezer. Moiz ti dir bann dimoun pour separ zot avek sa bann sef rebel—Kora, Datann, ek Abiram. Zot ti pe al trouv zot lanmor dan en fason vyolan. Moiz ti eksplike: “Si sa bann dimoun i mor parey tou imen e zot ganny pini parey tou imen, alor pa Zeova ki’n anvoy mwan. Me Zeova pou kree en keksoz ki’n deza ganny kree, si later i bezwen ouver son labous e anval zot ek tou zot keksoz e ki zot bezwen desann dan Seol vivan, alor zot pou sirman konnen ki sa bann zonm ti napa okenn respe pour Zeova.” (Nonm 16:29, 30) Alor ki swa later i ouver e anval zot oubyen dife i bril zot parey dan ka Kora ek sa 250 Levit ki ti avek li, tou sa bann rebel ti fini dan Seol oubyen Lades.—Nonm 26:10.

¹¹ Simei, ki ti modi Lerwa David, ti ganny pini par Salomon ki ti lerwa apre David. David ti demande: “Pa les li ale san ki i ganny pini, akoz ou en zonm ki saz e ou konn byen ki ou devret fer avek li e ou devret fer son seve blan desann dan Seol avek disan.” Salomon ti fer Benaya touy Simei. (1 Lerwa 2:8, 9, 44-46) En lot dimoun ki Benaya ti egzekite ti Yoab, ansyen sef larme Izrael. Son seve blan pa ti “al anpe dan Seol.” (1 Lerwa 2:5, 6, 28-34) Sa de legzanp i prouve ki parol dan kantik David i vre: “Bann dimoun mesan pou retourn ver Seol, wi tou bann nasyon ki pe oubliy Bondye.”—Psonm 9:17.

12. Lekel li Aitofel, e kote i ti ale ler i ti mor?

¹² Aitofel ti konseye personnel David. Son konsey ti ganny apresye konmsi i ti sorti kot Zeova li menm. (2 Samyel 16:23) Malerezman, sa serviter fidel ti vin en tret e pran par dan en rebelyon dirize par Absalonm, garson David. I paret ki David ti pe refer avek sa levennman ler i ti ekrir: “I pa ti en lennmi ki ti konmans ensilte mwan; sankwa mon ti pou siport sa. I pa ti en dimoun ki ti ay mwan en kantite ki ti met li parlao mwan, sankwa mon ti pou kasyet.” David ti kontinyen: “Ki dezolasyon i ariv  lo zot! Les zot desann vivan dan Seol; akoz bann move keksoz in dan zot pandan ki zot ti pe reste konman bann etranze.” (Psonm 55:12-15) Ler zot ti mor, Aitofel ek son bann konpanyon ti al dan Seol.

Lekel ki dan Zeenn?

13. Akoz Zida i ganny apele “garson destriksyon”?

¹³ Annou konpar sitiasyon David avek sa ki Zezi, pli gran David, ti eksperyanse. Zida Iskaryot ki ti enn parmi sa 12 zapot Kris, ti vin en tret parey Aitofel. Me aksyon traizon Zida ti pli grav ki pour Aitofel. Zida ti azir kont sel Garson Bondye. Dan en lapriyer alafen son minister lo later, Garson Bondye ti dir sa lo son bann disip: “Pandan ki mon ti avek zot, mon ti protez zot avek pouvwar ou non, sa non ki ou ti donn mwan. Mon ti prezerv zot e napa enn ki’n perdi, eksepte [garson destriksyon, NW ], pour realiz sa ki Lekritir in dir.” (Zan 17:12) Ler Zezi ti refer avek Zida konman “garson destriksyon,” Zezi ti endike ki ler Zida ti mor, ti napa lespwar pour li resisite. I pa ti reste dan memwar Bondye. I pa ti al dan Seol, me i ti al dan Zeenn. Kisisa Zeenn?

14. Ki Zeenn i reprezante?

¹⁴ Zezi ti kondann bann sef relizye dan son letan akoz zot ti fer sak zot disip “merit [“Zeenn,” NW ].” (Matye 23:15) Dan sa letan, dimoun ti konn byen Vale Inonm. Sa ti en landrwa zet salte kot lekor bann kriminel ki ti’n ganny egzekite e ki pa ti merit en lanterman apropriye ti ganny zete. Pli boner, Zezi li menm ti mansyonn Zeenn dan son Sermon lo montanny. (Matye 5:29, 30) Son lodyans ti klerman konpran sinifikasyon senbolik sa mo. Zeenn ti reprezant destriksyon konplet san lespwar en rezireksyon. Apard ki Zida Iskaryot dan letan Zezi, eski i annan lezot ki pa’n al dan Seol oubyen Lades me zot in al dan Zeenn, ler zot in mor?

15, 16. Lekel ki ti al dan Zeenn ler i ti mor, e akoz zot ti al laba?

¹⁵ Premye koup imen, Adan ek Ev ti ganny kree parfe. Zot ti volonterman fer pese. Devan zot ti annan swa lavi eternel oubyen lanmor. Zot ti dezobei Bondye e pran kote avek Satan. Ler zot ti mor zot ti napa okenn lespwar benefisye avek sakrifis Kris. Okontrer, zot ti al dan Zeenn.

¹⁶ Kaen, premye garson Adan, ti touy son frer Abel e apre sa i ti viv an tayan. Zapot Zan ti dekrir Kaen konman enn ki “apartenir a dyab.” (1 Zan 3:12) I fer sans pour dir ki parey son paran, Kaen osi in al dan Zeenn ler i ti mor. (Matye 23:33, 35) Sa i en sitiasyon ki konpletman diferan avek Abel ki ti en zonm drwat! Pol ti eksplike: “Par lafwa, Abel ti ofer en sakrifis meyer ki sa ki pour Kaen. Akoz sa, Bondye ti deklar li konman en zis, parski i ti aprouv son lofrann. Par son lafwa Abel i pe kontinyen koze menm si i’n mor.” (Ebre 11:4) Wi, konmela Abel i dan Seol pe esper en rezireksyon.

En “Premye Rezireksyon” e “resisite pour en Lavi meyer”

17. (a) Pandan sa “letan lafen” lekel ki al dan Seol? (b) Ki sa bann ki dan Seol ek dan Zeenn pou gannyen?

¹⁷ Bokou dimoun ki lir sa lartik pou mazin lo sitiasyon sa bann ki’n mor pandan sa “letan lafen.” (Danyel 8:19) Revelasyon sapit 6 i dekrir lakours kat sevalye dan nou letan. I enteresan fer resorti ki sa enn dernyen i apel Lanmor e Lades i swiv li. Alor, bokou dimoun ki mor avan ler akoz bann levennman ek kondisyon ki sa kat sevalye i reprezante i fini dan Lades, kot zot esper en rezireksyon dan nouvo lemonn Bondye. (Revelasyon 6:8) Alor, ki lespwar pour sa bann ki dan Seol (Lades) ek sa bann dan  Zeenn? I pou annan en rezireksyon pour sa ki dan Seol e pour bann dan Zeenn, destriksyon eternel savedir zot pou nepli egziste.

18. Ki posibilite “sa premye rezireksyon” i ofer?

¹⁸ Zapot Zan ti ekrir: “Byennere e beni, tou bann ki partisip dan sa premye rezireksyon. Dezyenm lanmor pou napa okenn pouvwar lo zot. Zot pou vin pret pour Bondye e pour Kris, e zot pou renny avek li pandan 1000 an.” Sa bann ki pou vin bann dirizan ansanm avek Kris pou ganny “sa premye rezireksyon.” Me ki lespwar i annan pour larestan limanite?—Revelasyon 20:6.

19. Ki mannyer serten i benefisye atraver en rezireksyon “pour en lavi meyer”?

¹⁹ Depi letan Eliya ek Elisa de serviter Bondye, sa mirak rezireksyon in fer dimoun retourn vivan ankor. Pol ti dir: “Bann madanm ti reganny vivan zot fanmir ki ti’n mor. Lezot ti ganny tortire an-mor, me refiz delivrans pour zot kapab resisite pour en lavi meyer.” Wi, sa bann serviter fidel ti antisip en rezireksyon ki pou ofer zot pa zis detrwa lannen ki ti pou swiv apre par lanmor, me sa posibilite pour viv pour touzour! Sa pou sirman fer zot ganny “resisite pour en lavi meyer.”—Ebre 11:35.

20. Ki nou pou egzaminen dan nou lot lartik?

²⁰ Si nou mor fidelman avan Zeova i met en lafen avek sa move sistenm, nou annan sa lespwar ki serten pour ganny “resisite pour en lavi meyer.” Sa rezireksyon i anmenn en lavi meyer akoz i vin avek posibilite pour ganny lavi eternel. Zezi ti promet: “Pa bezwen etonnen ler mon dir sa, akoz sa ler pe arive kan tou bann mor ki dan tonbo pou tann son lavwa, e zot pou sorti dan zot tonbo.” (Zan 5:28, 29) Dan nou lot lartik nou pou egzamin en pe plis bi rezireksyon. I pou montre konman lespwar rezireksyon i fortifye nou pour vin bann ki reste fidel e ed nou devlop en leta lespri sakrifis.

Eski ou rapel?

• Akoz Zeova i ganny dekrir konman Bondye “bann vivan”?

• Ki kondisyon sa bann ki dan Seol?

• Ki pou arive avek sa bann ki dan Zeenn?

• Ki mannyer serten pou benefisye par ganny “resisite pour en lavi meyer”?

[Kestyon]

[Portre lo paz 21]

Parey Abraam, bann ki al dan Seol pou ganny resisite

[Portre lo paz 23]

Akoz Adan ek Ev, Kaen, ek Zida Izkaryot ti al dan Zeenn?