Rezireksyon​—En Lansennyman ki fer Lefe lo ou

“Mon annan sa menm lesperans dan Bondye . . . ki tou dimoun bon konman move, pour resisite.”​—AKT 24:15.

1. Ki mannyer rezireksyon ti vin en size diskisyon devan Sannedren?

ALAFEN son trwazyenm vwayaz misyonner an 56 N.L., zapot Pol ti Zerizalenm. Apre ki bann Romen ti’n aret li, Pol ti ganny drwa pour paret devan gran lakour Zwif, Sannedren. (Akt 22:29, 30) Ler Pol ti obzerv bann manm sa lakour, i ti remarke ki serten zot ti bann Sadiseen e lezot ti bann Farizyen. Ti annan en gran diferans ant sa de group. Bann Sadiseen pa ti krwar dan rezireksyon; tandis ki bann Farizyen ti aksepte rezireksyon. Pour montre ki son pozisyon lo sa size, Pol ti dir: “Bann frer, mon en Farizyen e mon bann paran ti osi Farizyen. Mon pe ganny zize la devan zot akoz mon espere ki bann mor pou resisite!” Son parol ti kree en boulversman dan sa lasanble!—Akt 23:6-9.

2. Akoz Pol ti pare pour defann son krwayans dan rezireksyon?

² Plizyer lannen avan sa, ler Pol ti lo semen pour al Damas, i ti vwar en vizyon kot i ti antann lavwa Zezi. Pol ti menm demann Zezi: “Ki fodre mon fer Senyer?” Zezi ti reponn: “Leve e al Damas, la zot ava dir ou ki Bondye i oule ou fer.” Ler i ti ariv Damas, Ananyas en disip Kretyen ti trouv Pol, e i ti eksplik Pol: “Bondye nou bann zanset in swazir ou davans pour fer ou konn son lavolonte, pour war son sel Serviter Zis [Zezi apre son rezireksyon], e pour tann li koz avek ou direkteman.” (Akt 22:6-16) Alor i pa sirprenan ki Pol ti pare pour defann son krwayans dan rezireksyon.—1 Pyer 3:15.

Anons avek lezot Lespwar Rezireksyon

3, 4. Ki mannyer Pol ti montre ki i ti siport fidelman rezireksyon, e ki nou kapab aprann avek son legzanp?

³ Plitar, Pol ti al devan Gouverner Feliks. Sa zour, Tertilis, en orater piblik ki ti prezant ka bann Zwif kont Pol, ti akiz Pol konmkwa i sef en sekt e ki i ti pe provok dezord. San okenn ezitasyon, Pol ti reponn: “Mon rekonnet devan ou ki mon servi Bondye nou bann zanset an swivan sa Nouvo Semen ki zot, zot dir i fo.” Apre sa, Pol ti adres sa size prensipal, i ti dir: “Mon annan sa menm lesperans dan Bondye parey zot ki tou dimoun bon konman move, pour resisite.”—Akt 23:23, 24; 24:1-8, 14, 15.

⁴ Apepre de zan plitar, Porsiis Festis ki ti siksed Feliks, ti envit Lerwa Erod Agripa pour zot kestyonn Pol ki sa letan ti en prizonnyen. Festis ti eksplike ki bann Zwif pa ti dakor avek sa ki Pol ti dir konsernan “en serten Zezi ki’n mor . . . i vivan.” Ler i ti prezant son defans, Pol ti demande: “Akoz, zot ki la zot war li enposib pour krwar ki Bondye i resisit bann mor?” Apre i ti anonse: “Me Bondye in protez mwan ziska ozordi e mon ankor la pour mwan anons sa avek tou dimoun, pti konman gran. Mon pa pe anons lot keksoz ki sa ki Moiz ek bann profet in dir devre arive. Setadir ki Mesi i devre soufer, e ki li premye pour resisite parmi bann mor, i ava proklanm lalimyer avek pep Zwif osi byen ki avek lezot nasyon.” (Akt 24:27; 25:13-22; 26:8, 22, 23) Wi, Pol  ti siport fidelman lansennyman rezireksyon! Nou osi parey Pol, nou kapab anons avek konviksyon ki i pou annan en rezireksyon. Me ki mannyer nou ekspekte dimoun reazir? Petet menm parey avek dan letan Pol.

5, 6. (a) Ki mannyer dimoun ti reazir anver lansennyman bann zapot lo rezireksyon? (b) Kwa ki tre enportan ler nou eksprim nou lespwar dan rezireksyon?

⁵ Annou egzamin sa ki ti arive pli boner pandan dezyenm vwayaz misyonner Pol (apepre 49-52 N.L.) ler i ti vizit Atenn. I ti rezonn avek sa bann dimoun ki ti krwar dan plizyer bondye e ankouraz zot pour rekonnet plan Bondye pour ziz tou dimoun avek ladrwatir par en zonm ki I ti’n swazir. Sa zonm pa ti lot ki Zezi. Pol ti eksplike ki Bondye in donn laprev ki sa pou arive par resisit Zezi. Ki mannyer dimoun ti reazir? Nou lir: “Kan zot ti tann Pol koz lo size rezireksyon, i annan serten ki ti monk li, me lezot ti dir, ‘Nou ava ekout ou koz lo sa size en lot fwa.’ ”—Akt 17:29-32.

⁶ Sa reaksyon ti en pe parey avek sa ki Pyer ek Zan ti eksperyanse en pe letan apre Lapannkot lannen 33 N.L. La ankor bann Sadiseen ti enplike dan sa deba. Akt 4:1-4 i rakont nou sa ki ti pase: “Pyer ek Zan ti ankor pe koz avek bann dimoun, ler bann pret, bann gard Tanp ek bann Sadiseen ti arive. Zot ti byen ankoler akoz sa de zapot ti pe ansenny bann dimoun e ti pe anons zot ki Zezi ti’n resisite, e zot ti pe afirmen ki bann mor i kapab resisite.” Me lezot dimoun ti byen reazir. “Bokou parmi bann ki ti’n tann sa mesaz ti krwar, e lakantite krwaryan ti ariv anviron 5000 zonm.” Alor, i evidan ki nou kapab ekspekte ki dimoun i reazir dan diferan fason ler nou koz lo nou lespwar rezireksyon. An rapor avek sa, i tre enportan ki nou fortifye nou lafwa dan sa lansennyman.

Lafwa ek Rezireksyon

7, 8. (a) Parey dan en let adrese pour kongregasyon Korentyen dan premye syek ti montre, ki mannyer lafwa i kapab napa valer? (b) Ki mannyer en konprenezon egzakt lo lespwar rezireksyon i separ bann vre Kretyen avek lezot?

⁷ Pa tou dimoun ki ti vin Kretyen dan premye syek N.L. ki ti trouv li fasil pour aksepte lespwar rezireksyon. Serten ki ti vwar li difisil ti asosye avek kongregasyon Korent. Pol ti ekrir zot: “Mon’n transmet zot, avan tou, lansennyman ki mwanmenm mon’n resevwar, Kris in mor pour nou pese, parey Lekritir in dir, i ti ganny antere e i ti resisite son trwazyenm zour, dapre Lekritir.” Apre Pol ti konfirm sa laverite par mansyonnen ki apre son rezireksyon, Zezi ti “aparet avek plis ki 500 son bann disip ansanm,” laplipar zot ti ankor vivan. (1 Korentyen 15:3-8) Answit i ti rezonnen: “Alor si nou prese ki Kris in resisite parmi bann mor: ki mannyer serten parmi zot i kapab dir ki napa rezireksyon pour mor? Si napa rezireksyon bann mor alor Kris osi pa’n resisite. Si Kris pa’n resisite, sa ki nou prese i anven e zot lafwa osi i anven.”—1 Korentyen 15:12-14.

⁸ Wi, lansennyman rezireksyon i sitan en lansennyman debaz ki lafwa Kretyen i anven si rezireksyon pa ganny aksepte konman en realite. Annefe, en konprenezon egzakt lo rezireksyon i separ vre Kretyen avek sa ki fo. (Zenez 3:4; Ezekyel 18:4) Pour sa rezon Pol ti enkli lansennyman rezireksyon parmi “lansennyman elemanter” vre larelizyon Kretyen. Annou determinen pour  “avanse pour ariv dan en matirite adilt.” Pol ti ankouraz nou: “Tousala nou pou fer si Bondye i permet nou.”—Ebre 6:1-3.

Lespwar Rezireksyon

9, 10. Ki Labib i oule dir ler i refer avek rezireksyon?

⁹ Pour nou fer nou lafwa dan rezireksyon vin pli for, annou egzamin serten kestyon parey: Ki Labib i oule dir ler i refer avek rezireksyon? Konman lansennyman rezireksyon i fer byen resorti lanmour Zeova? Larepons pour sa bann kestyon pou fer nou vin pli pros avek Bondye e anmenmtan ed nou ansenny lezot dimoun.—2 Timote 2:2; Zak 4:8.

¹⁰ Sa mo “rezireksyon” i tradiksyon en mo Grek ki literalman vedir “debout ankor.” Ki sa lekspresyon i enplike? Dapre Labib, lespwar rezireksyon i sa konviksyon ki en dimoun mor i kapab viv ankor. Labib i osi montre ki sa dimoun i resisite swa avek en lekor imen ouswa konman en lespri. Sa i depan lo si sa dimoun i annan lespwar pour viv lo later oubyen dan lesyel. Nou ranpli avek ladmirasyon pour lanmour, lasazes ek pwisans Zeova ki evidan dan sa lespwar rezireksyon merveye.

11. Ki rezireksyon i fer posib pour bann serviter swazir Bondye?

¹¹ Zezi ek son bann frer swazir i resisite konman bann lespri ki pou fer li posib pour zot servi dan lesyel. (1 Korentyen 15:35-38, 42-53) Ansanm zot pou servi konman bann dirizan dan Rwayonm Mesyanik, ki pou fer later vin en Paradi. Anba gidans Zezi konman Gran Pret, bann Kretyen swazir i form en group pret rwayal. Zot pou fer disponib bann byenfe sakrifis Zezi pour bann dimoun ki pou viv dan sa nouvo lemonn ladrwatir. (Ebre 7:25, 26; 9:24; 1 Pyer 2:9; Revelasyon 22:1, 2) Antretan, sa bann Kretyen swazir ki ankor lo later i anvi ki Bondye i kontinyen aksepte zot. Ler zot mor, zot pou ganny zot rekonpans atraver en rezireksyon pour lavi imortel dan lesyel konman bann lespri. (2 Korentyen 5:1-3, 6-8, 10; 1 Korentyen 15:51, 52; Revelasyon 14:13) Pol ti ekrir: “Si nou’n ganny konpletman ini avek li dan lanmor, parey pour li, demenm nou pou ini avek li dan en rezireksyon parey pour li.” (Romen 6:5) Ki Labib i montre pour sa bann ki rezireksyon pou permet zot viv ankor lo later konman bann imen? Ki mannyer sa lespwar rezireksyon i kapab fer zot vin pli pros avek Bondye? Legzanp Abraam i ansenny nou bokou keksoz lo sa size.

Rezireksyon ek Lanmitye avek Zeova

12, 13. Ki baz solid pour annan lafwa dan rezireksyon Abraam ti annan?

¹² Abraam ki Labib ti dekrir konman “zanmi Bondye” ti en zonm ki ti annan en lafwa remarkab. (Zak 2:23) Pol ti mansyonn trwa fwa legzanp lafwa Abraam dan son lalis bann zonm ek fanm fidel ki trouve dan Ebre sapit 11. (Ebre 11:8, 9, 17) Dan son trwazyenm fwa, Pol ti mansyonn lafwa ki Abraam ti demontre ler i ti pare pour ofer son garson Izaak konman en sakrifis. Abraam ti  konvenki ki sa promes en desandans atraver Izaak ti garanti par Zeova. Menm si Izaak ti bezwen mor konman en sakrifis, Abraam “ti mazin dan limenm ki Bondye i annan sa pouvwar pour menm resisit en dimoun mor.”

¹³ Parey i ti arive, ler Zeova ti vwar ki degre for lafwa Abraam ti ete, i ti fer laranzman pour servi en zannimo pour ranplas konman en sakrifis. Toudmenm, leksperyans Izaak ti servi konman en senbol rezireksyon. Parey Pol ti eksplike: “Pour sa rezon, senbolikman, Abraam ti reganny son garson.” (Ebre 11:19) Deplis, Abraam ti deza annan en baz solid pour krwar dan rezireksyon. Eski pa Zeova ti redonn Abraam abilite pour fer zanfan, ler li ek son madanm Sara ti zwenn ansanm dan zot vye zour pour fer Izaak, zot garson?—Zenez 18:10-14; 21:1-3; Romen 4:19-21.

14. (a) Dapre Ebre 11:9, 10, ki Abraam ti espere? (b) Pour ganny bann benediksyon Rwayonm dan nouvo lemonn, ki fodre arive avek Abraam? (c) Ki mannyer nou kapab ganny bann benediksyon Rwayonm?

¹⁴ Pol ti dekrir Abraam konman en etranze ki ti reste anba latant ki “ti pe esper sa lavil avek fondasyon solid, ki Bondye i limenm arsitek e konstrikter.” (Ebre 11:9, 10) Sa pa ti en vre lavil parey Zerizalenm, kot tanp Bondye ti ete. Okontrer, sa ti en lavil senbolik. I ti Rwayonm Bondye dan lesyel ki konpoze avek Kris Zezi ek son 144,000 dirizan. Sa 144,000 dirizan dan lesyel avek laglwar i osi ganny apele “lavil sent, Nouvel-Zerizalenm,” “nouvel-marye” Kris. (Revelasyon 21:2) An 1914, Zeova ti enstal Zezi konman Lerwa Mesyanik dan Rwayonm e demann li pour diriz omilye son bann lennmi. (Psonm 110:1, 2; Revelasyon 11:15) Pour ki Abraam, “zanmi Bondye” i ganny bann benediksyon sa Rwayonm ler i dirize, fodre ki i viv ankor. Pareyman, pour nou ganny bann benediksyon Rwayonm, fodre nou vivan dan nouvo lemonn Bondye swa konman manm sa gran lafoul ki pou sirviv Armagedon oubyen sa bann ki pou resisite. (Revelasyon 7:9, 14) Me lo kwa lespwar rezireksyon i baze?

Lanmour Bondye —Baz Lespwar Rezireksyon

15, 16. (a) Ki mannyer sa premye profesi dan Labib i etablir baz pour nou lespwar rezireksyon? (b) Konman ler nou krwar dan rezireksyon i fer nou vin pli pros avek Zeova?

¹⁵ Nou relasyon pros avek nou bon Papa Zeova, nou lafwa for parey pour Abraam, ek nou lobeisans anver komannman Bondye i fer li posib pour Zeova deklar nou drwat e pour li vwar nou konman son zanmi. Sa i donn nou loportinite pour benefisye ler Rwayonm i dirize. An realite, sa premye profesi rikorde dan Parol Bondye dan Zenez 3:15 i etablir sa baz pour lespwar rezireksyon ek lanmitye avek Bondye. I pa zis predir ki latet Satan pou ganny kraze me osi ki Desandans fanm Bondye pou ganny blese dan son talon. Lanmor Zezi lo poto ti parey konmsi en blesir dan talon. Son rezireksyon apre trwa zour plitar ti geri sa blesir e fer li posib pour aksyon konkret ganny pran kont “sa enn ki annan pouvwar donn lanmor, setadir dyab.”—Ebre 2:14.

¹⁶ Pol i rapel nou ki “Bondye in prouv son lanmour pour nou: Kan nou ti ankor peser,  Kris in mor pour nou.” (Romen 5:8) Lapresyasyon pour sa gran labonte i vreman fer nou vin pli pros avek Zezi e avek nou bon Papa dan lesyel.—2 Korentyen 5:14, 15.

17. (a) Ki lespwar Zob ti demontre i annan? (b) Ki Zob 14:15 i fer nou konnen lo Zeova, e ki mannyer sa i fer ou santi?

¹⁷ Zob, en zonm fidel ki ti viv avan lepok bann Kretyen, pe osi esper en rezireksyon. Zob ti soufer en kantite par sa ki Satan ti fer avek li. Kontrerman avek son bann fo konpanyon, ki pa ti zanmen mansyonn rezireksyon, Zob ti trouv konsolasyon dan sa lespwar e i ti demande: “Si en zonm kosto i mor, eski i kapab viv ankor?” Zob li menm ti reponn: “Toulezour mon korve mon pou espere, ziska mon soulazman i arive.” Par adres son Bondye, Zeova, Zob ti rekonnet: “Ou pou apel mwan, e mon pou reponn ou.” Konsernan santiman nou bon Kreater, Zob ti dir: “Ou pou vreman anvi vwar travay ou lanmen.” (Zob 14:14, 15) Wi, Zeova i vreman anvi vwar sa letan kot tou bann fidel pou retourn vivan dan rezireksyon. Sa i sirman fer nou vin pli pros avek Zeova ler nou reflesir lo lanmour ek labonte ki i demontre anver nou menm si nou enparfe!—Romen 5:21; Zak 4:8.

18, 19. (a) Ki lespwar Danyel i annan pour viv ankor? (b) Ki nou pou egzaminen dan nou prosen lartik?

¹⁸ Profet Danyel, ki lanz Bondye ti dekrir konman en zonm tre presye ti servi Zeova fidelman pour en bon pe letan. (Danyel 10:11, 19) Danyel ti reste fidel depi ler i ti al an egzil an 617 A.N.L., ziska son lanmor en pe letan apre ki i ti ganny en vizyon an 536 A.N.L., pandan trwazyenm lannen Siris, lerwa Pers. (Danyel 1:1; 10:1) En pe letan pandan trwazyenm lannen dominasyon Siris, Danyel ti ganny en vizyon lo en seri pouvwar mondyal ki ti pou swiv kanmarad e fini avek sa gran ladetres ki pe vini. (Danyel 11:1–12:13) Lefe ki i pa ti kapab byen konpran sa vizyon, Danyel ti demann sa lanz ki ti delivre sa mesaz: “Mon senyer, kwa ki pou lafen sa bann keksoz?” Ler sa lanz ti reponn li i ti atir latansyon lo “letan lafen,” kot “bann ki annan bon zizman pou konpran.” Ki lavenir ti pou rezerve pour Danyel? Sa lanz ti dir li: “Ou pou repoze, me ou pou debout pour ganny ou par alafen bann zour.” (Danyel 12:8-10, 13) Danyel pou retourn vivan “kan bann zis i a resisite” pandan Renny Milener Kris.—Lik 14:14.

 ¹⁹ Nou byen pros avek lafen e nou pli pros avek konmansman Renny Milener Kris ki ler nou ti vin bann krwayan. Alors nou devret demann nou lekor, ‘Eski mon pou la dan sa nouvo lemonn pour asosye avek Abraam, Zob, Danyel ek lezot zonm ek fanm fidel?’ Nou pou la si nou reste pros avek Zeova e obeir son bann komannman. Dan nou prosen lartik nou pou egzamin pli profon lespwar rezireksyon pour nou kapab konnen lekel ki pou resisite.

Eski ou rapel?

• Ki mannyer dimoun ti reazir ler Pol ti anons son lespwar dan rezireksyon?

• Akoz sa lespwar rezireksyon i separ bann vre Kretyen avek sa ki fo?

• Ki mannyer nou konnen ki Abraam, Zob ek Danyel ti annan lafwa dan rezireksyon?

[Kestyon]

[Portre lo paz 15]

Pol ti anons avek konviksyon lespwar rezireksyon devan Gouverner Feliks

[Portre lo paz 16]

Akoz Abraam ti annan lafwa dan rezireksyon?

[Portre lo paz 18]

Lespwar rezireksyon ti konsol Zob

[Portre lo paz 18]

Danyel pou retourn vivan kan bann zis i resisite