Aprann konn Fason azir Zeova

“Fer mwan konn ou bann semen . . . pour ki mon ava konn ou.”—EGZOD 33:13.

1, 2. (a) Akoz Moiz ti azir dan sa fason kan i ti vwar en Ezipsyen pe bat en Izraelit? (b) Ki Moiz ti bezwen aprann pour li kapab ganny servi par Zeova?

MOIZ ti grandi dan lakour Faraon e i ti ganny enstri dan lasazes ki bann dirizan Lezip ti atas en gran lenportans avek. Me kantmenm sa, Moiz ti realize ki i pa ti en Ezipsyen. Son paran ti bann Ebre. Kan i ti annan 40 an, Moiz ti al gete ki sitiasyon son bann frer ek ser Izraelit ti ladan. Kan i ti vwar en Ezipsyen pe bat en Izraelit, sa ti tous li. I ti touy sa Ezipsyen. Moiz ti pran kote avek pep Zeova e i ti panse ki Bondye ti pe servi li pour liber son bann frer ek ser. (Akt 7:21-25; Ebre 11:24, 25) Kan sa nouvel ti fannen, bann dirizan Lezip ti konsider Moiz konman en rebel, alor i ti bezwen taye pour kapab sov son lavi. (Egzod 2:11-15) Si Moiz ti anvi Bondye i servi li, i ti pou bezwen vin pli familye avek fason ki Zeova i fer keksoz. Eski Moiz ti pou les li ganny ansennyen par Zeova?—Psonm 25:9.

² Pour ankor 40 an, Moiz ti reste an egzil konman en berze. Aparaman son bann frer ek ser Izraelit pa ti apresye li, me olye ankoler, Moiz ti pare pour soumet avek sa ki Bondye ti’n permet ariv li. Menm si plizyer lannen ti pase san ki i ti ganny rekonnet, Moiz ti les Bondye rafin li. Pa dapre son prop pwennvi me anba lenfliyans lespri sen Bondye i ti ekrir: “Moiz, ti en zonm ki ti annan plis limilite ki tou zonm ki ti lo sirfas later.” (Nonm 12:3) Zeova ti servi Moiz dan bann fason remarkab. Si nou osi nou devlop limilite, Zeova pou beni nou.—Tsefanya 2:3.

Moiz i ganny konfye en Latas

3, 4. (a) Ki latas Zeova ti donn Moiz? (b) Ki sipor Moiz ti gannyen?

³ En zour obor montanny Oreb dan rezyon Sinai, en lanz ki ti pe reprezant Zeova ti koz avek Moiz. I ti dir li: “Mon’n vreman vwar soufrans ki mon pep i ladan Lezip, e kan zot ti ganny forse pour travay mon ti antann zot lapel; parski mon konn tre byen douler ki zot pe sibir. Mon pe desann pour al sov zot dan lanmen bann Ezipsyen e mon pou tir zot laba e anmenn zot dan en bon pei ki gran. En pei kot i koul dile ek dimyel.” (Egzod 3:2, 7, 8) An akor avek sa parol, Bondye ti annan en travay pour donn Moiz, me i ti pou bezwen fer li dan lafason ki Zeova ti oule.

⁴ Sa lanz ti kontinyen dir Moiz: “Aprezan vini e les mwan anvoy ou kot Faraon, e fer bann Izraelit, mon pep, sorti Lezip.” Me Moiz ti ezite, i pa ti santi li kalifye e si i ti depan lo li menm definitivman i pa ti pou kalifye. Me Zeova ti asir li: “Mon pou avek ou.” (Egzod 3:10-12) Zeova ti donn Moiz sa pouvwar pour fer bann mirak pour prouve ki vreman Bondye ki’n anvoy li. Son frer, Aaron, ti pou akonpanny li konman son portparol. Zeova ti pou fer zot konnen ki zot ti pou dir e fer. (Egzod 4:1-17) Eski Moiz ti pou fidelman akonpli sa latas?

5. Akoz lafason ki bann Izraelit ti azir ti en tes pour Moiz?

⁵ Okonmansman bann ansyen dan Izrael ti met zot konfyans dan Moiz ek Aaron. (Egzod 4:29-31) Me toudswit apre, bann zofisye Izraelit ti blanm Moiz ek son frer pour fer Faraon ek son bann serviter pli ay zot ankor.  (Egzod 5:19-21; 6:9) Ler bann Izraelit ti pe kit Lezip, zot ti per kan zot ti vwar bann Ezipsyen dan saret pe vini deryer zot. Lanmer rouz devan zot e bann Ezipsyen deryer zot, sa ti fer bann Izraelit fini vwar lanmor e zot ti blanm Moiz pour sa. Ki mannyer ou ti pou’n reazir? Menm si bann Izraelit ti napa bato, anba direksyon Zeova, Moiz ti demann zot pour lev kan e met pare pour kontiny zot traze. Apre Bondye ti separ Lanmer Rouz an de, dan milye ti sek e bann Izraelit ti kapab traverse.—Egzod 14:1-22.

En Kestyon pli enportan ki Delivrans

6. Lo kwa Zeova ti met lanfaz ler i ti donn Moiz en latas pour fer?

⁶ Kan Bondye ti donn Moiz sa latas, i ti met lanfaz lo lenportans ki son non ti pou annan. Respe pour sa non ek sa Enn ki ganny reprezante par sa non, ti tre enportan. Ler i ti ganny demande lekel son non, Zeova ti dir Moiz: “Mon pou vin sa ki mon oule vini.” Anplis ki sa, Moiz ti pou dir bann Izraelit: “Zeova Bondye zot zanset, Bondye Abraam, Bondye Izaak ek Bondye Zakob, in anvoy mwan kot zot.” Zeova ti azoute: “Sa i mon non pour en letan endefini, e sa i mon memoryal pour zenerasyon apre zenerasyon.” (Egzod 3:13-15) Ozordi lo later antye son bann serviter i ankor konn li konman Zeova.—Izai 12:4, 5; 43:10-12.

7. Menm si Faraon ti arogan, ki Bondye ti demann Moiz pour fer?

⁷ Onon Zeova, Moiz ek Aaron ti al devan Faraon pour dir li sa mesaz. Me avek larogans, Faraon ti dir: “Lekel li Zeova, ki mon devret obeir li pour les Izrael ale? Mon pa konn Zeova ditou, e deplis, mon pa pou les Izrael ale.” (Egzod 5:1, 2) Faraon ti annan leker dir e i pa ti onnet. Me Zeova ti demann Moiz pour kontinyen al dir Faraon son mesaz. (Egzod 7:14-16, 20-23; 8:1, 2, 20) Moiz ti kapab remarke ki Faraon ti ankoler. Eski i ti pou vo lapenn kontinyen koz avek li? Bann Izraelit ti vreman anvi ganny delivre. Faraon pa ti pou zanmen sanz son nide. Ki ou ti pou’n fer?

8. Ki byenfe lafason ki Zeova in azir avek Faraon in anmennen, e ki lefe sa bann levennman i devret annan lo nou?

⁸ Moiz ti dir Faraon ankor en lot mesaz: “Se sa ki Zeova, Bondye bann Ebre in dir: ‘Les mon pep ale pour zot kapab servi mwan.’ ” Bondye ti osi dir: “Parski mon ti’n kapab avans mon lanmen pour anvoy lepidemi lo ou ek ou pep pour ki ou ganny efase lo sa later. Se pour sa rezon ki mon’n les ou viv, pour montre ou mon pwisans pour ki mon non i ganny proklanmen lo later antye.” (Egzod 9:13-16) Par detrir Faraon, Zeova ti annan pour bi servi son pwisans dan en fason ki ti pou vin konman en lavertisman pour tou bann ki opoz li. Sa i enkli Satan Dyab ki plitar Zezi ti apel li “sa enn ki gouvern lemonn.” (Zan 14:30; Romen 9:17-24) Parey ti’n ganny dir, sa non Zeova ti ganny proklanmen dan lemonn antye. Son pasyans ti fer li posib pour protez bann Izraelit ek plizyer dimoun sorti dan lezot nasyon ki ti vin ador Zeova ansanm avek bann Izraelit. (Egzod 9:20, 21; 12:37, 38) Depi sa letan, lefe ki non Zeova in ganny proklanmen partou, sa in anmenn byenfe pour  plizyer milyon dimoun ki’n aksepte sa vre ladorasyon.

Fer fas avek en Pep difisil

9. Ki mannyer bann Izraelit ti mank respe pour Zeova?

⁹ Bann Izraelit ti konn non Bondye. Kan Moiz ti koz avek zot i ti servi sa non, me zot pa ti toultan montre respe pour sa enn ki annan sa non. Pa bokou letan apre ki Zeova ti’n fer mirak pour sov bann Izraelit Lezip, ki ti arive ler zot pa ti fasilman ganny bon delo pour bwar? Zot ti konplent kont Moiz. Apre zot ti konmans konplent konsernan manze. Moiz ti averti zot ki zot pa ti pe konplent zis kont li ek Aaron me osi kont Zeova. (Egzod 15:22-24; 16:2-12) Lo montanny Sinai, Zeova ti donn bann Izraelit Lalwa, ansanm avek bann siny ekstraordiner. Me kantmenm sa, sa pep ti dezobei par fer en pti bef annor pour zot adore e zot ti dir ki zot ti pe fer “en lafet pour Zeova.”—Egzod 32:1-9.

10. Akoz sa ki Moiz ti demande dan Egzod 33:13 i vreman enteres bann ansyen ozordi?

¹⁰ Ki mannyer Moiz ti pou fer fas avek en pep ki Zeova ti dir zot latet i dir? Moiz ti sipliy Zeova: “Si mon’n trouv faver devan ou lizye, fer mwan konn ou bann semen silvouple, pour ki mon ava konn ou, afen ki mon kapab trouv faver dan ou lizye.” (Egzod 33:13) Ozordi sa pep ki bann ansyen i pran swen avek i annan bokou plis limilite ki nasyon Izrael. Me pareyman bann ansyen i priye: “Fer mwan konn ou bann semen, O Zeova; Ansenny mwan ou bann santye.” (Psonm 25:4) Konnesans lo lafason ki Zeova i azir, i fer li posib pour bann ansyen fer fas avek bann diferan sitiasyon dan en fason ki an akor avek Parol Bondye e ki al byen avek personnalite Zeova.

Sa ki Zeova i ekspekte avek son Pep

11. Ki gidans Zeova ti donn Moiz e akoz sa i enteres nou?

¹¹ Sa ki Zeova ti ekspekte son pep fer ti ganny dir lo montanny Sinai. Plitar Moiz ti ganny de tablet an ros ki ti annan sa Dis Komannman lo la. Ler i ti pe desann sorti lo montanny, i ti vwar bann Izraelit pe ador en pti bef annor. Degre Moiz ti ankoler i ti zet sa de tablet ater e zot ti kase. Ankor enn fwa, Zeova ti ekrir sa Dis Komannman lo de tablet ros ki Moiz ti’n refer. (Egzod 32:19; 34:1) Menm si i ti fer dezyenm fwa ki Bondye ti donn sa bann komannman, zot pa ti sanze. Moiz ti pou bezwen viv an armoni avek sa bann komannman. Zeova ti fer Moiz byen konpran ki kalite Bondye i ete e i ti menm montre li ki mannyer i devret azir konman Son reprezantan. Bann Kretyen pa anba Lalwa Moiz, me Zeova ti donn Moiz en kantite prensip ki pa’n sanze e ki ankor aplik pour tou serviter Zeova ozordi. (Romen 6:14; 13:8-10) Annou egzamin serten sa bann prensip.

12. Vi ki Zeova ti demann bann Izraelit en devosyon zis pour li tousel, ki lefe sa ti’n devret annan lo zot?

 ¹² Donn Zeova en devosyon zis pour li tousel. Bann Izraelit ti la kan Zeova ti dir ki i oule en devosyon zis pour li tousel. (Egzod 20:2-5) Bann Izraelit ti’n vwar en kantite levidans ki Zeova i sa vre Bondye. (Deterononm 4:33-35) San get sa ki lezot nasyon ti pe fer, Zeova ti fer kler ki i pa pou aksepte okenn form ladorasyon zidol ek grigri parmi son pep. Zot devosyon pour li pa ti devret vin zis konman en routin. Zot tou zot ti bezwen kontan Zeova avek tou zot leker, zot nanm ek tou zot lafors. (Deterononm 6:5, 6) Sa ti pou enkli zot fason koze, kondwit, anfet tou laspe zot lavi. (Levitik 20:27; 24:15, 16; 26:1) Zezi Kri ti osi fer kler ki Zeova i oule en devosyon zis pour li tousel.—Mark 12:28-30; Lik 4:8.

13. Akoz bann Izraelit ti bezwen seryezman obeir Bondye, e kwa ki devret motiv nou pour obeir li? (Eklezyast 12:13)

¹³ Seryezman obeir komannman Zeova. Bann Izraelit ti bezwen ganny rapele ki ler zot ti’n fer en lalyans avek Zeova, zot ti’n dakor pour seryezman obeir li. Zot ti rezwir zot laliberte dan en kantite fason, me dan bann domenn kot Zeova ti’n donn zot son komannman zot ti pou bezwen obeir li seryezman. Si zot ti fer sa, sa ti pou montre zot lanmour pour Bondye e ansanm avek zot desandans, zot ti pou benefisye akoz tou sa ki Zeova ti demann zot ti pour zot prop dibyen.—Egzod 19:5-8; Deterononm 5:27-33; 11:22, 23.

14. Ki mannyer Bondye ti aksantye sa nesesite avek bann Izraelit pour met bann keksoz spirityel dan premye plas?

¹⁴ Met bann keksoz spirityel dan premye plas. Bann Izraelit pa ti devret les bann keksoz dan lavi toulezour afekte zot aktivite spirityel. Zot lavi pa ti devret santre zis lo bann keksoz dan lavi toulezour. Sak semenn Zeova ti met serten letan dekote pour fer bann keksoz sakre, pandan sa letan zot ti pou zis fer bann aktivite ki relye avek ladorasyon sa vre Bondye. (Egzod 35:1-3; Nonm 15:32-36) Sak lannen plis letan ti bezwen ganny met dekote pour fer bann lasanble sen. (Levitik 23:4-44) Pandan sa letan, zot ti pou ganny sans koz lo bann keksoz ekstraordiner ki Zeova ti’n fer, zot ti pou ganny bann rapel lo son fason azir e zot ti pou kapab montre lapresyasyon pour son labonte. Anmezir ki zot ti eksprim zot devosyon anver Zeova, zot ti pou annan plis lakrent ek lanmour pour Bondye e zot ti pou osi ganny ede pour mars dan son semen. (Deterononm 10:12, 13) Sa bann bon prensip ki’n ganny tire dan sa bann lenstriksyon i benefisye bann serviter Zeova ozordi.—Ebre 10:24, 25.

Apresye bann Kalite Zeova

15. (a) Akoz Moiz ti benefisye ler i ti apresye bann kalite Zeova? (b) Ki bann kestyon ki kapab ed nou reflesir oprofon lo bann kalite Zeova?

¹⁵ Lapresyasyon ki Moiz ti annan pour bann kalite Zeova ti pou ed li fer fas avek sa pep. Egzod 34:5-7 i dir ki Bondye ti pas devan figir Moiz e dir: “Zeova, Zeova, en Bondye ki annan mizerikord ek konpasyon, ki pa ankoler vitman, e ki annan en kantite labonte leker ek laverite, prezerv labonte leker pour plizyer milye, pardonn fot, lofans ek pese, me dan okenn ka i pa pou akord gras pour pinisyon, i pe anmenn pinisyon pour fot bann papa lo bann garson e lo bann pti zanfan, lo trwazyenm zenerasyon e lo katriyenm zenerasyon.” Pran letan pour reflesir lo sa bann verse. Demann ou lekor: ‘Ki savedir sak sa bann kalite? Konman Zeova ti demontre sa bann kalite? Dan ki fason bann ansyen i kapab demontre sa bann kalite? Ki lefe sak sa bann kalite i devret annan lo sa ki nou fer?’ Annou konsider detrwa legzanp.

16. Ki mannyer nou kapab ogmant nou konprenezon lo mizerikord Bondye, e akoz i enportan pour fer sa?

¹⁶ Zeova i “en Bondye ki annan mizerikord  ek konpasyon.” Si ou annan liv Étude perspicace des Écritures, akoz ou pa lir sa ki’n ganny ekrir anba “Mizerikord”? Oubyen ou kapab fer resers lo sa size par servi Watch Tower Publications Index ouswa sa progranm konpiter Wacthtower Library (CD-ROM). * Servi konkordans pour get bann verse Labib ki pe refer avek mizerikord. Ou pou vwar ki menm si parfwa Zeova i anmenn pinisyon, son mizerikord i enkli en profon konpasyon ek tandres. Son mizerikord i pous li pour fer aksyon pour anmenn soulazman pour son pep. En laprev i kan Bondye ti pran swen avek bann Izraelit. I ti soutenir zot fizikman e spirityelman dan zot vwayaz ziska Later Promiz. (Deterononm 1:30-33; 8:4) Kan zot ti fer bann fot, avek mizerikord Zeova ti pare pour pardonnen. I ti montre mizerikord anver bann Izraelit. Pa son bann serviter ozordi i devret demontre plis konpasyon anver kanmarad!—Matye 9:13; 18:21-35.

17. Ki mannyer nou konprenezon lo konpasyon Bondye i kapab promot vre ladorasyon?

¹⁷ Mizerikord Zeova i mars ansanm avek konpasyon. Si ou annan en diksyonner, lir definisyon “konpasyon.” Konpar sa definisyon avek bann verse ki koz lo Zeova konman en Bondye ki annan konpasyon. Labib i montre ki konpasyon Bondye i enkli en gran lentere pour bann ki dan bezwen parmi son pep. (Egzod 22:26, 27) Dan nenport ki pei, en etranze oubyen rezidan sa pei i kapab vwar zot dan en sitiasyon difisil. Kan Zeova ti pe ansenny son pep pour pa fer lapliferans e montre labonte anver sa bann tel dimoun, Zeova ti rapel zot ki zot osi zot ti bann etranze Lezip. (Deterononm 24:17-22) Me nou konman pep Bondye ozordi? Kan nou annan konpasyon sa i ed nou vin pros avek kanmarad e i atir lezot ver ladorasyon Zeova.—Akt 10:34, 35; Revelasyon 7:9, 10.

18. Ki nou aprann lo limit ki Zeova ti mete ant Izrael ek bann nasyon dan zalantour?

¹⁸ Menm si bann Izraelit ti enterese avek lezot nasyon sa pa ti devret ranplas zot lanmour pour Zeova ek son bann standar moral. Bann Izraelit ti ganny ansennyen pour pa adopte fason fer bann nasyon dan zalantour, zot bann koutim relizye ek zot stil lavi imoral. (Egzod 34:11-16; Deterononm 7:1-4) Sa i osi aplik pour nou ozordi. Nou bezwen vin en pep sen, zis parey Zeova nou Bondye i sen.—1 Pyer 1:15, 16.

19. Ki mannyer ler nou konpran pwennvi Zeova lo sa ki mal i kapab protez nou?

¹⁹ Pour fer sir ki Moiz i konpran Son pwennvi, Zeova ti fer kler ki menm si i pa toler  pese, i pa ankoler vitman. I donn nou ase letan pour aprann konn sa ki i ekspekte nou fer e viv an armoni avek sa ki nou pe aprann. Kan nou repantir i pare pour pardonnen, me i pa akord gras pour bann ki merite ganny pini pour bann pese grav ki zot fer. Zeova ti fer Moiz konpran ki sa ki bann Izraelit i fer, pou kapab annan en bon oubyen move lefe lo zot desandans. Kan nou apresye lafason ki Zeova i azir, sa i kapab anpes nou blanm Bondye pour sitiasyon ki nou menm nou’n met nou lekor ladan. I kapab osi anpes nou konklir ki Bondye i tarde.

20. Kwa ki kapab ed nou pour byen azir avek nou bann frer ek ser, e osi avek bann ki nou zwenn dan predikasyon? (Psonm 86:11)

²⁰ Si ou anvi ogmant ou konnesans lo Zeova ek son fason azir, kontinyen fer resers e reflesir kan ou lir Labib. Pran letan pour egzamin sa bann zoli laspe dan personnalite Zeova. Priye pour rode konman ou kapab imit Bondye e pli byen viv an akor avek son plan. Sa pou kapab ed ou pour pa tonm dan latrap, azir byen avek ou bann frer ek ser, e pour ed lezot konn e kontan nou Bondye merveye.

[Not anba lo paz]

Ki ou’n aprann?

• Akoz i ti enportan pour Moiz annan limilite, e akoz i enportan pour nou osi?

• Ki bon rezilta sa ti anmennen kan Moiz ti kontinyen dir Faraon sa ki Zeova ti’n dir li?

• Ki serten prensip remarkab ki Moiz ti aprann, e ki aplik pour nou osi?

• Ki mannyer nou kapab ogmant nou konprenezon lo bann kalite Zeova?

[Kestyon]

[Portre lo paz 9]

Moiz ti fidelman dir Faraon mesaz Zeova

[Portre lo paz 10]

Zeova ti donn Moiz son lalwa

[Portre lo paz 12]

Reflesir lo bann kalite Zeova