Demontre Kontrol lo nou Lekor
Demontre Kontrol lo nou Lekor
“Serviter Senyer pa devret en dimoun ki fer kerel. Okontrer, i devre byen avek tou dimoun, kapab ansennyen e annan pasyans.”—2 TIMOTE 2:24.
1. Akoz parfwa ler nou pe fer bann aktivite Kretyen nou zwenn dimoun ki koz brit avek nou?
KI MANNYER ou reazir kan ou zwenn dimoun ki pa azir byen anver ou, oubyen anver sa ki ou reprezante? Kan zapot Pol ti pe dekrir bann dernyen zour, i ti dir ki dimoun pou “koz kont Bondye, . . . kalomni zot prosen, vyolan, kriel.” (2 Timote 3:1-5, 12) Ou kapab rankontre sa bann dimoun dan predikasyon oubyen dan bann lezot lokazyon.
2. Ki verse Labib ki kapab ed nou azir avek lasazes kan nou zwenn dimoun ki koz brit avek nou?
2 I pa vedir tou dimoun ki koz brit avek lezot napa lentere dan sa ki byen. Bann sitiasyon vreman difisil oubyen fristrasyon, i kapab fer dimoun koz brit avek lezot. (Eklezyast 7:7) Bokou dimoun i azir koumsa akoz zot reste e travay dan en lanvironnman kot tou dimoun i abitye koz brit avek kanmarad. Sa i pa vedir ki bann Kretyen i merit fer parey. Me ler nou konn tousala, i ed nou konpran akoz dimoun i koz brit avek lezot. Ki mannyer nou devret azir ler dimoun i koz brit avek nou? Proverb 19:11 i dir: “En zonm ki annan bon zizman pou sirman apez son lakoler.” Dan Romen 12:17, 18 nou trouv sa konsey: “Pa rann mal pour mal. . . . Fer tou sa ki depann lo ou pour viv anpe avek tou dimoun.”
3. Ki mannyer lape i enplike dan sa mesaz ki nou pe prese?
3 Si vreman nou kontan fer lape, sa pou evidan dan lafason ki nou azir. I pou evidan par sa ki nou dir e fer, petet osi par nou lekspresyon lo figir ek nou ton lavwa. (Proverb 17:27) Kan i ti anvoy son bann zapot prese, Zezi ti donn zot sa konsey: “Kan zot antre dan en lakaz, dir, ‘Lape i a avek zot.’ Si bann zabitan sa lakaz i resevwar zot, zot salitasyon lape i a reste avek sa lakaz; me si zot pa ganny resevwar, zot salitasyon lape i a retourn kot zot.” (Matye 10:12, 13) Sa mesaz ki nou pe anmennen i en bon nouvel. Labib i apel li “bonn nouvel lape,” bon nouvel “lagras Bondye” e “sa Bonn Nouvel Rwayonm.” (Akt 10:36; Akt 20:24; Matye 24:14) Nou bi se pa pour kritik bann dimoun pour sa ki zot krwar oubyen pour argimant avek zot lo zot krwayans, me plito pour partaz sa bon nouvel ki sorti dan Parol Bondye.
4. Ki ou kapab dir kan en dimoun i dir “Mon pa enterese” san ki ou’n eksplike akoz ou pe vizit li?
4 En dimoun i kapab dir nou dan en fason brit,“Mon pa enterese avek sa bann zafer,” san ki i’n vreman ekoute ki nou annan pour dir. Souvannfwa nou kapab zis dir, “Mon ti zis anvi lir en verse Labib avek ou.” Petet sa dimoun pou dakor. Oubyen dan lezot sitiasyon i kapab apropriye pour dir: “Mon ti anvi dir ou ki pou annan en letan kot pou napa lenzistis e tou dimoun pou aprann kontan kanmarad.” Me si sa dimoun pa montre lentere pour konn plis, ou kapab zis azoute: “Be oke mersi, petet en lot fwa.” Menm si sa dimoun pa’n reponn dan en bon fason, eski nou devret tir konklizyon ki i “pa merite tann sa mesaz”? Nenport ki fason dimoun i reazir, touzour gard antet sa konsey dan Labib pour “byen [ouswa dous,] avek tou dimoun . . . e annan pasyans” oubyen kontrol lo nou lekor.—2 Timote 2:24.
Brit, me inyoran
5, 6. Ki mannyer Sol ti azir avek bann disip Zezi e akoz?
5 Dan premye syek ti annan en zonm ki ti apel Sol. Sol ti byen renonmen pour son bann move parol e konman en dimoun vyolan. Labib i dir ki i ti “ranpli avek bann menas lanmor kont bann disip Senyer.” (Akt 9:1, 2) Plitar i ti admet ki i ti ‘blasfenm, persekit e ensilte lezot.’ (1 Timote 1:13) Menm si petet serten son bann fanmiy ti’n vin Kretyen, Sol ti dekrir son latitid anver bann disip Kris: “Mon ti sitan asarne kont zot ki mon ti al ziska dan bann lavil etranze pour persekit zot.” (Akt 23:16; 26:11; Romen 16:7, 11) Kan Sol ti pe azir dan sa fason, napa okenn levidans ki bann disip ti esey fer bann gran largiman an piblik avek li.
6 Akoz Sol ti azir koumsa? Plitar i ti ekrir: “Mon ti pe fer tousala dan linyorans, san lafwa.” (1 Timote 1:13) I ti en Farizyen ki’n ganny ansennyen dapre ‘Lalwa bann zanset.’ (Akt 22:3) Menm si son ansennyan Gamalyel ti ase ouver anver lezot krwayans, me Kaif ki ti gran pret e konpanyon Sol ti fanatik. Kaif ti enn parmi bann sef deryer sa konplo pour touy Zezi Kri. (Matye 26:3, 4, 63-66; Akt 5:34-39) Apre ki zot ti’n touy Zezi, Kaif ti fer sir ki bann zapot ti ganny bate e i ti severman ordonn zot pour aret pres lo non Zezi. Rafal ki Etyenn ti pe al ganny touye, Kaif ki ti diriz sa gran diskisyon dan Sannedren. (Akt 5:27, 28, 40; 7:1-60) Sol ti la pe gete kan bann dimoun ti touy Etyenn avek ros, e Kaif ti donn li permisyon pour al Damas pour kontinyen tyonbo bann disip Zezi. (Akt 8:1; 9:1, 2) Par les Kaif enfliyans li, Sol ti krwar ki i ti pe montre son devouman pour Bondye, me an realite i ti napa sa vre lafwa. (Akt 22:3-5) Pour fini kont, i pa ti kapab rekonnet ki Zezi ti sa vre Mesi. Me Sol ti realiz son fot kan Zezi ki ti’n resisite ti koz avek li dan en fason mirakile lo semen Damas.—Akt 9:3-6.
7. Ki ti arive avek Sol apre ki i ti’n zwenn Zezi lo semen Damas?
7 En pti pe letan apre, en disip ki ti apel Ananyas ti ganny anvoye pour al koz avek li. Si ou ti dan plas Ananyas, eski ou ti pou enpasyan pour al koz avek Sol? Ananyas ti per, me i ti koz byen avek Sol. Depi ki i ti zwenn Zezi lo semen Damas dan en fason mirakile, Sol ti’n sanz son latitid. (Akt 9:10-22) Plitar dimoun ti konn li konman zapot Pol, en misyonner devoue.
Dous me kouraze
8. Ki mannyer Zezi ti demontre menm latitid avek son Papa anver bann peser?
8 Zezi ti en proklanmater devoue ki ti dous me kouraze kan i ti fer fas avek dimoun. (Matye 11:29) I ti reflekte leta lespri son Papa dan lesyel, ki ankouraz bann move dimoun pour rezet sa ki mal. (Izai 55:6, 7) Zezi ti veye kan bann peser ti fer sanzman pour le meyer, e la i ti ankouraz zot. (Lik 7:37-50; 19:2-10) Olye ziz lezot dapre zot laparans, Zezi ti imit labonte, tolerans ek pasyans son Papa avek bi pour ed zot repantir. (Romen 2:4) I lavolonte Zeova ki tou dimoun i repantir e ganny sove.—1 Timote 2:3, 4
9. Ki nou aprann lo lafason ki Izai 42:1-4 ti ganny akonpli lo Zezi?
9 Levanzil Matye i dekrir pwennvi Zeova lo Zezi par sa bann parol profetik: “La mon Serviter ki mon’n swazir, sa enn ki mon kontan, e dan ki mon’n met tou mon lazwa. Mon pou met mon Lespri lo li, e i pou anons bann nasyon vre lazistis. I pa pou dispit oubyen kriy ek personn, zot pa pou tann li fer bann gran diskour dan lari. I pa pou kas bann pti banbou pliye, e i pa pou tenny en lalanp ki pe fimen. Ziska ki i fer lazistis ranport laviktwar. E tou nasyon i a met zot lespwar dan son non.” (Matye 12:17-21; Izai 42:1-4) Zis parey i’n ganny dir dan sa bann parol profetik, Zezi pa ti fer bann gran largiman avek personn. Menm si i ti anba presyon i ti koz lo laverite dan en fason ki ti tous bann ki ti annan leker senser.—Zan 7:32, 40, 45, 46.
10, 11. (a) Menm si bann Farizyen ti parmi bann pli gran lennmi Zezi, akoz i ti koz avek serten parmi zot? (b) Ki kalite larepons parfwa Zezi ti donn son bann lennmi, me ki i pa ti fer?
10 Pandan son minister, Zezi ti koz avek en kantite Farizyen. Menm si serten ti pe esey met li dan pyez ler i ti koze, Zezi pa ti tir konklizyon ki zot tou ti annan move motivasyon. Simon, en Farizyen ki paret ti kontan kritike, aparaman ti anvi konn Zezi en pe pli byen. Alor i ti envit Zezi pour manz ansanm avek li. Zezi ti aksepte sa lenvitasyon e i ti rann temwannyaz avek sa bann ki ti la sa zour. (Lik 7:36-50) Dan en lot lokazyon, en Farizyen byen enportan ki ti apel Nikodenm ti vin kot Zezi aswar an sou sekre. Zezi pa ti reprimann li akoz i ti vin tar aswar. Okontrer, i ti koz avek Nikodenm lo lanmour ki Bondye in demontre par anvoy son Garson lo later pour ouver semen pour tou bann ki pou demontre lafwa dan sa sakrifis ganny lavi. Avek ladouser Zezi ti fer resorti ki i tre enportan pour obeir bann laranzman Bondye. (Zan 3:1-21) Plitar Nikodenm ti defann Zezi kan bann Farizyen ti pe mal koz lo en bon keksoz ki Zezi ti’n fer.—Zan 7:46-51.
11 Zezi ti kapab rekonnet lipokrizi bann ki ti pe esey met li dan pyez. I pa ti zanmen fer bann gran diskisyon initil avek son bann lennmi. Me kan i ti apropriye, i ti zis donn en larepons bref me konvenkan par dir en prensip, servi en legzanp oubyen sit en verse. (Matye 12:38-42; 15:1-9; 16:1-4) Dan lezot ka, i pa ti reponn kan i ti remarke ki i pa vo lapenn.—Mark 15:2-5; Lik 22:67-70.
12. Menm si zot ti kriy avek li, konman Zezi ti ed sa bann dimoun?
12 Parfwa bann dimoun ki ti pe ganny kontrole par move lespri ti kriy avek Zezi. Me kantmenm sa i ti demontre kontrol lo son lekor e i ti menm servi son pwisans sorti kot Bondye pour soulaz sa bann tel dimoun. (Mark 1:23-28; 5:2-8, 15) Si ler nou al dan predikasyon nou zwenn serten dimoun ki ankoler oubyen kriy avek nou, parey Zezi nou bezwen demontre kontrol lo nou lekor e esey fer fas avek sa sitiasyon avek ladouser e esey pa ofans lezot.—Kolosyen 4:6.
Dan Lafanmiy
13. Akoz parfwa en dimoun ki konmans etidye Labib avek Temwen Zeova i ganny opoze par lezot manm son fanmiy?
13 Souvannfwa, bann Kretyen i bezwen demontre plis kontrol lo zot lekor dan lafanmiy. En dimoun ki’n vreman ganny touse par sa laverite dan Labib ti pou byen kontan si son fanmiy ti santi parey li. Me parey Zezi ti dir, bann lezot manm fanmiy i kapab pa kontan. (Matye 10:32-37; Zan 15:20, 21) I annan plizyer rezon akoz zot azir koumsa. Par egzanp, bann lansennyman dan Labib i kapab ed nou pour vin onnet, en dimoun responsab, e annan respe pour lezot, e Labib i osi montre nou ki dan nenport ki sitiasyon, nou pli gran responsabilite i anver nou Kreater. (Eklezyast 12:1, 13; Akt 5:29) Akoz nou fidelite anver Zeova, en dimoun i kapab ofanse si i santi ki son lenfliyans lo lezot manm son fanmiy pe diminyen. Kan nou pe fer fas avek en tel sitiasyon i vreman enportan ki nou swiv legzanp Zezi par demontre kontrol lo nou lekor.—1 Pyer 2:21-23; 3:1, 2.
14-16. Akoz serten manm fanmiy ki ti opoze okonmansman ti sanz zot latitid?
14 Bokou ki pe servi Zeova ozordi, zot msye oubyen madanm ouswa lezot manm fanmiy pa ti kontan ki zot ti pe fer bann sanzman ler zot ti konmans etidye Labib. I kapab bann ki ti opoze ti’n tann bann move komanter lo Temwen Zeova, e petet zot ti per pangar sa ti kapab anmenn en move lenfliyans kot lakour. Kwa ki ti ed zot pour sanz zot latitid? Dan plizyer ka, bon legzanp sa enn ki’n vin Kretyen ti annan en bon lefe lo zot. Par egzanp, i ti kontinyen aplik bann konsey Labib, regilyerman asiste renyon e partisip dan predikasyon anmenmtan ki i ti desarz son responsabilite dan fanmiy, e demontre kontrol kan lezot ti koz an mal lo li. Alor, parfwa lopozisyon sorti dan fanmiy ti diminyen.—1 Pyer 2:12.
15 Petet en dimoun ki opoz nou ti refize ekout sa leksplikasyon sorti dan Labib akoz lorgey oubyen i annan bann fo konsep lo nou. Sa ti leka avek en zonm sorti Letazini ki ti vreman patriyotik. En fwa kan son madanm ti’n al lasanble, i ti prepar son valiz e pran son semen ale. En lot fwa i ti sorti kot li avek en fizi, avek lentansyon pour touy son lekor. I ti blanm larelizyon son madanm pour lafason ki i ti pe azir. Me son madanm ti kontinyen fer zefor pour aplik bann konsey Labib. Ven tan plitar apre ki son madanm ti’n fini vin en Temwen Zeova, li osi i ti vin en Temwen Zeova. En madanm Lalbani ti ankoler akoz son fiy ti pe etidye Labib avek Temwen Zeova e apre batize. Son manman ti detrir son Labib 12 fwa. Me en zour i ti ouver en nouvo Labib ki son fiy ti’n les lo latab. Par azar i ti al tonm lo Matye 10:36, e i ti realize ki sa verse ti aplik pour li. Vi ki i ti ankor konsernen avek byennet son fiy, i ti akonpanny li ziska kot bato zour ki i ti pe al en lasanble Itali ansanm avek lezot Temwen. Kan i ti vwar sa lanmour, bann dimoun pe may kanmarad, sourir e tann zot pe riye dan lazwa, sa ti konmans fer li sanz son pwennvi lo bann Temwen Zeova. Pa bokou letan apre, i ti dakor pour etidye Labib. Ozordi i fer zefor pour ed bann dimoun ki okonmansman pa ti aksepte sa mesaz.
16 Dan en lot ka, en zonm ki kontan mars avek kouto, ti zwenn son madanm ler i ti pros pour ariv kot Lasal Rwayonm. I ti konmans servi bann move parol pour akiz li. Me byen zantiy son madanm ti reponn: “Vin dan Lasal Rwayonm e ou a vwar pour ou menm.” I ti aksepte, e avek letan i ti vin en ansyen.
17. Si parfwa i annan en move latmosfer dan lakour en Kretyen, ki konsey dan Labib ki kapab ede?
17 Menm si tou dimoun kot ou i en Kretyen, akoz lenperfeksyon parfwa i kapab arive ki i annan en move latmosfer dan fanmiy e bann parol blesant i kapab ganny servi. Se pour sa rezon ki i ti enportan pour bann Kretyen dan kongregasyon Efez ganny sa konsey: “Debaras zot avek tou move santiman, tou iritasyon, tou lakoler. Fer disparet tou kriye ek lensilt. Evite annan okenn santiman mesanste.” (Efezyen 4:31) Aparaman sa lanvironnman ki bann Efezyen ti ladan, zot lenperfeksyon, e dan serten ka zot lavi lepase ti enfliyans zot. Kwa ki ti pou ed zot sanze? ‘Zot leker ek zot lespri ti bezwen konpletman sanze.’ (Efezyen 4:23) Zot ti devret etidye Parol Bondye, reflesir lo ki mannyer sa i devret enfliyans zot lavi, asosye avek bann konpanyon Kretyen, e fer bann lapriyer senser. Par fer tousala, fri lespri Bondye ti pou pli evidan dan zot lavi. Zot ti pou aprann “vin bon, ranpli avek lafeksyon pour kanmarad; e pardonn kanmarad, parey Bondye in pardonn zot dan Kris.” (Efezyen 4:32) San fatig nou avek sa ki lezot i fer, nou devret demontre kontrol lo nou lekor, vin bon, annan lafeksyon, e pare pour pardonnen. Anfet nou pa devret “rann mal pour mal.” (Romen 12:17, 18) Imit nou Bondye par demontre en lanmour senser pour lezot i toultan en bon keksoz pour fer.—1 Zan 4:8.
Konsey pour tou Kretyen
18. Akoz sa konsey dan 2 Timote 2:24 ti apropriye pour en ansyen dan lavil Efez, e ki mannyer sa konsey i kapab benefisye tou Kretyen?
18 Sa konsey pour “annan pasyans” oubyen kontrol lo nou lekor i aplik pour tou Kretyen. (2 Timote 2:24) Me premyerman sa konsey ti ganny donnen avek Timote akoz i ti bezwen li ler i ti pe servi konman en ansyen dan kongregasyon Efez. Serten dan sa kongregasyon ki pa ti per pour koze ti pe eksprim zot pwennvi e zot ti pe ansenny fo lansennyman. Vi ki zot pa ti vreman konpran bi Lalwa Moiz, zot pa ti arive konpran lenportans annan lafwa, lanmour ek en bon konsyans. Lefe ki zot ti orgeye, sa ti fer annan diskord kan zot ti konmans fer bann gran diskisyon. Zot pa ti arive konpran pwen enportan dan lansennyman Kris e lenportans pour annan en latasman avek Bondye. Pour kapab met sa sitiasyon anba kontrol, Timote ti pou bezwen ferm konsernan laverite, me i ti pou bezwen tret son bann frer avek douser. Zis parey bann ansyen ozordi, Timote ti konnen ki kongregasyon pa ti pour li e ki i ti pou bezwen tret zot dan en fason ki promot lanmour ek linite.—Efezyen 4:1-3; 1 Timote 1:3-11; 5:1, 2; 6:3-5.
19. Akoz i enportan pour nou tou “rod limilite”?
19 Bondye ti ankouraz son pep pour “rod limilite.” (Tsefanya 2:3) Sa lekspresyon Ebre ki’n ganny tradwir “rod limilite,” i enplik andir bann difikilte avek pasyans, san pran lakoler, oubyen annan sa lanvi pour revanze. Annou senserman sipliy Zeova pour led, pour ki nou kapab demontre kontrol lo nou lekor, e byen reprezant li, menm kan nou dan bann sitiasyon difisil.
Ki ou’n aprann?
• Kan dimoun i maltret ou, ki verse Labib ki kapab ed ou?
• Akoz Sol ti mal azir?
• Ki mannyer legzanp Zezi i ed nou pour byen azir avek tou dimoun?
• Ki byenfe sa i kapab anmennen si nou demontre kontrol dan lafason ki nou koze dan lakour?
[Kestyon]
[Portre lo paz 15]
Menm si Sol ti annan en move repitasyon, Ananyas ti tret li avek labonte
[Portre lo paz 17]
En Kretyen ki fidelman akonpli son responsabilite i kapab diminyen lopozisyon son fanmiy