Pa zis nou Aksyon ki sov nou me osi Labonte Leker
Pa zis nou Aksyon ki sov nou me osi Labonte Leker
“Zot in ganny sove, par lafwa dan li . . . pa rezilta travay, pour ki personn pa vant son lekor.”—EFEZYEN 2:8, 9.
1. Ki mannyer bann Kretyen i diferan avek lezot dimoun an zeneral an rapor avek zot lakonplisman, e akoz?
OZORDI dimoun i vreman fyer pour sa ki zot akonpli, e zot pa ezite pour vant zot lekor. Me bann Kretyen i diferan. Zot evite koz plis ki fodre lo sa ki zot in fer, menm konsernan sa ki zot fer an rapor avek vre ladorasyon. Menm si zot vreman kontan travay ki pep Zeova in akonpli konman en group, zot pa koz en kantite lo sa ki zot in fer personnelman dan sa travay. Parski zot konsyan ki dan servis Zeova annan bon motivasyon i pli enportan ki lakonplisman personnel. Nenport dimoun ki finalman ganny sa kado lavi eternel, pou ganny li pa akoz sa ki i’n akonpli, me akoz son lafwa ek labonte leker Bondye.—Lik 17:10; Zan 3:16.
2, 3. Pour ki rezon Pol ti vant son lekor e akoz?
2 Zapot Pol ti konn sa tre byen. Apre ki i ti’n priy Zeova trwa fwa pour tir ‘sa soufrans dan son lekor,’ Zeova ti reponn li: “Mon lagras [oubyen labonte leker] i tou sa ki ou bezwen; parski mon pisans i azir dan lafebles.” Avek limilite Pol ti aksepte desizyon Zeova. I ti dir: “Alor mon prefere vant mon lekor lo size mon febles, pour ki pisans Kris i repoz lo mwan.” Nou tou nou devret anvi imit limilite ki Pol ti demontre.—2 Korentyen 12:7-9.
3 Menm si Pol ti desarz son responsabilite Kretyen dan en fason remarkab, i ti rekonnet ki tou sa ki i ti akonpli pa ti akoz serten abilite dan li. Avek limilite i ti dir: “Mon pli pti ki pli pti parmi manm pep Bondye, pourtan Bondye in donn mwan sa privilez pour anons bann non-Zwif Levanzil larises san limit Kris.” (Efezyen 3:8) Parol Pol i montre ki i pa ti annan sa latitid pour vant son lekor oubyen krwar i pli byen ki lezot. “Bondye i opoz bann ki annan lorgey me i donn son lagras bann ki annan limilite.” (Zak 4:6; 1 Pyer 5:5) Eski nou swiv legzanp Pol, konsider nou pli pti ki pli pti parmi nou bann frer ek ser?
“Konsider lezot pli enportan”
4. Akoz parfwa nou kapab vwar li difisil pour konsider lezot pli enportan ki nou?
4 Zapot Pol ti konsey bann Kretyen: “Pa fer nanryen par lespri egois e vantar, me avek limilite konsider lezot pli enportan ki ou.” (Filipyen 2:3) Sa i kapab difisil sirtou si nou annan serten responsabilite. Petet i kapab difisil pour nou akoz a en serten degre nou’n ganny enfliyanse par sa leta lespri konpetisyon ki popiler dan sa lemonn ozordi. I kapab ki ler nou ti zanfan nou ti ganny ansennyen pour fer konpetisyon avek nou frer ek ser kot lakour oubyen avek nou kanmarad lekol. Petet toultan nou ti ganny ankouraze pour vin sa pli bon atlet oubyen sa pli bon etidyan. Byensir, i byen pour nou donn nou meyer dan nenport keksoz apropriye ki nou fer. Me bann Kretyen pa donn zot meyer zis pour atir latansyon ki pa neseser lo zot menm. Okontrer zot fer sa pour zot benefisye plennman avek sa ki zot pe fer oubyen petet pour ki lezot i benefisye. Me i kapab danzere si nou toultan anvi ganny felisite konman sa enn ki pli bon. Ki mannyer sa?
5. Si sa leta lespri konpetisyon pa ganny kontrole, ki rezilta i kapab anmennen?
5 Si en dimoun pa kontrol sa dezir, sa leta lespri konpetisyon oubyen vantar i kapab fer li mank respe pour lezot e osi vin arogan. I kapab zalou abilite ek privilez ki lezot i annan. Proverb 28:22 i dir: “En zonm ki groker pe tay deryer bann keksoz valer, me i pa konnen ki i pou perdi tou.” I kapab menm esey anvi ganny pozisyon ki i pa’n ganny konfye. Pour zistifye son aksyon i kapab konmans konplent e kritik lezot, e sa i bann tandans ki bann Kretyen i bezwen evite. (Zak 3:14-16) Antouleka, i riske vin en dimoun ki met li avan lezot.
6. Ki mannyer Labib i averti nou kont en leta lespri konpetisyon?
6 Alors, Labib i enplor bann Kretyen: “Annou pa orgeye, annou pa pran lakoler avek kanmarad, e annou pa groker avek kanmarad.” (Galat 5:26) Zapot Zan ti koz lo en Kretyen ki paret ti’n devlop sa kalite latitid. I ti dir: “Mon’n ekri en let [kongregasyon, NW ]; me Dyotref ki kontan plas sef, pa aksepte mon lotorite. Pour sa rezon, si mon vini, mon pou montre tou sa ki i pe fer, bann parol mesanste ek kalomni ki i pe dir lo mwan.” Pa i tris pour en Kretyen tonm dan en sitiasyon koumsa!—3 Zan 9, 10.
7. Ki en Kretyen pou anvi evite fer ozordi dan sa lemonn travay konpetitif?
7 Byensir, i pa rezonnab pour mazinen ki en Kretyen i kapab konpletman evit tou konpetisyon. Par egzanp, son travay i kapab enplik fer konpetisyon ekonomik avek lezot dimoun ouswa biznes ki pe ofer menm prodwi oubyen menm servis. Me menm dan bann sitiasyon koumsa, en Kretyen pou anvi fer son biznes dan en fason ki demontre respe, lanmour ek konsiderasyon. I pou rezet bann pratik ilegal oubyen ki pa apropriye pour en Kretyen fer. I pou osi evite ki lezot i konn li konman en dimoun ki annan en leta lespri konpetisyon e ki mazin zis li menm. I pa pou mazinen ki vin pli bon dan nenport aktivite i keksoz pli enportan dan lavi. Si en Kretyen i bezwen azir dan sa fason konsernan bann aktivite lemonn, pa i pli enportan pour li azir dan sa menm fason dan domenn ladorasyon!
“San ki i bezwen konpar li avek sa ki pour lezot”
8, 9. (a) Akoz bann ansyen napa okenn rezon pour fer konpetisyon antre zot? (b) Akoz 1 Pyer 4:10 i aplik pour tou serviter Bondye?
8 Latitid ki bann Kretyen i devret annan dan zot ladorasyon i ganny dekrir dan sa parol enspire: “Sakenn i devre egzamin son prop aksyon, alor si i annan keksoz pour fer li fyer, i ava fyer pour son prop aksyon san ki i bezwen konpar li avek sa ki pour lezot.” (Galat 6:4) Vi ki bann ansyen dan kongregasyon i rekonnet ki zot pa pe fer konpetisyon antre kanmarad, alor zot annan bon korporasyon e zot travay kotakot avek kanmarad parey en lekor. Zot kontan kontribisyon ki sakenn i kapab fer pour byennet kongregasyon an zeneral. Alor, zot evite fer konpetisyon ki pou gat sa lape antre zot, e ansanm dan linite zot donn en bon legzanp kongregasyon.
9 Akoz zot laz, leksperyans, oubyen abilite, serten ansyen i kapab pli kalipa ki lezot, oubyen zot kapab annan pli bon zizman. Se pour sa rezon ki bann ansyen i annan diferan responsabilite dan lorganizasyon Zeova. Olye fer konparezon, zot gard antet sa konsey: “Sakenn antre zot, konman en bon ladministrater bann don ki Bondye in donn zot, itiliz sa bann don spesyal ki zot in resevwar pour fer dibyen lezot.” (1 Pyer 4:10) An realite, sa verse i aplik pour tou serviter Zeova, parski nou tou a en serten degre nou’n ganny sa konnesans egzakt konman en kado e nou osi annan sa privilez pour pres sa bon nouvel.
10. Ki sa sel fason ki Bondye pou aksepte nou servis sakre?
10 Nou servis sakre i fer plezir Zeova zis ler nou fer li avek lanmour ek devosyon, me pa ler nou servi li pour met nou pli o ki lezot. Alor i enportan pour annan en pwennvi balanse lo sa ki nou fer dan servis Bondye. Menm si personn pa kapab byen ziz motivasyon lezot, Zeova li “i pe evalye leker.” (Proverb 24:12; 1 Samyel 16:7) Tanzantan i byen ki nou demann nou lekor sa kestyon, ‘Kwa ki motiv mwan pour partisip dan servis Zeova?’—Psonm 24:3, 4; Matye 5:8.
En bon Pwennvi lo nou Servis
11. Ki kestyon nou kapab demande konsernan nou aktivite Kretyen?
11 Si nou motivasyon i tre enportan pour nou ganny laprouvasyon Zeova, ziska ki degre alor nou devret konsernen avek nou aksyon pour demontre nou lafwa? Si nou pe servi Zeova avek sa bon motivasyon, eski i vreman enportan gard en rikord lo sa ki nou fer oubyen ki kantite nou fer? Sa i bann kestyon rezonnab, vi ki nou pa anvi konsider bann sif pli enportan ki sa ki nou fer dan servis Zeova, oubyen konsider en bon rapor lo nou aktivite Kretyen konman keksoz pli enportan.
12, 13. (a) Nonm serten rezon akoz nou fer en rapor lo nou predikasyon. (b) Akoz nou zwaye kan nou get rapor mondyal lo nou aktivite predikasyon?
12 Remarke ki sa liv Organized to Do Jehovah’s Will i dir: “Bann premye disip Zezi ti enterese avek bann rapor lo progre ki ti annan dan sa travay predikasyon. (Mark 6:30) Liv Akt i dir nou ki ti annan apepre 120 dimoun ki ti la kan lespri sen ti desann lo bann disip zour Lapannkot. Pa bokou letan apre lakantite disip ti ogmante, sorti 3,000 pour ariv ziska 5,000. (Akt 1:15; 2:5-11, 41, 47; 4:4; 6:7) Pa sa bann ogmantasyon ti’n bezwen ankouraz bann disip!” Pour sa menm rezon ozordi, bann Temwen Zeova i fer zefor pour gard en rapor egzakt konsernan lakonplisman parol Zezi dan lemonn antye: “Sa Bonn Nouvel Rwayonm pou ganny anonse partou dan lemonn pour tou dimoun konnen; e apre sa, lafen pou arive.” (Matye 24:14) Sa bann rapor i donn nou en nide kler lo sa ki pe ganny akonpli dan lemonn antye. Zot montre kote i annan plis bezwen, ki kalite e kantite piblikasyon ki neseser pour fer avanse travay predikasyon.
13 Alor, fer en rapor lo nou aktivite predikasyon i permet nou akonpli nou travay pour pres sa bon nouvel Rwayonm dan en fason pli efikas. Deplis, pa i ankourazan kan nou tann konsernan travay ki nou bann frer ek ser pe fer dan lezot parti lemonn! Kan nou tande ki i annan ogmantasyon dan lemonn antye, sa i fer nou zwaye, i pous nou pour fer plis e i fer nou asire ki Zeova pe beni nou. Pa nou apresye ler nou realize ki nou prop rapor i enkli dan sa rapor mondyal! Nou rapor i pti kan nou konpar li avek rapor mondyal, me Zeova i remark sa ki nou fer. (Mark 12:42, 43) Pa oubliye ki san ou rapor, sa rapor mondyal pa pou konplet.
14. Apard ki prese e ansennyen, ki i enplike dan nou ladorasyon?
14 Byensir, bokou keksoz ki en Temwen i fer pour akonpli son responsabilite konman en serviter Zeova pa ganny enkli dan son rapor. Par egzanp, dan sa rapor ou pa enkli ou letid personnel, lasistans renyon ek partisipasyon dan renyon, ou responsabilite dan kongregasyon, led ki ou donn bann frer ek ser, led finansyel ki ou donnen pour siport sa travay predikasyon, ek lezot ankor. Menm si nou rapor servis i enportan, dan en sans i ed nou pour kontinyen devoue dan predikasyon e pour pa vin inaktif. Me nou bezwen konsider li dan en fason apropriye. Nou pa devret vwar li konman en permi oubyen en paspor spirityel ki determinen si nou kalifye pour ganny lavi eternel.
‘Devoue pour fer dibyen’
15. Menm si zis aksyon tousel pa kapab sov nou, akoz zot esansyel?
15 I kler ki aksyon tousel pa kapab sov nou, me kantmenm sa zot esansyel. Se pour sa rezon bann Kretyen i ganny apele ‘en pep ki apartenir a li, en pep devoue pour fer dibyen’ e zot osi ganny ankouraze pour “rode konman pous kanmarad pour annan lanmour e fer sa ki byen.” (Tit 2:14; Ebre 10:24) En lot ekriven Labib ki apel Zak, i dir nou dan en fason pli direk: “Parey, lekor san lespri i mor, demenm, lafwa san bann laksyon i mor.”—Zak 2:26.
16. Kwa ki pli enportan ki aksyon, me akoz nou bezwen fer atansyon?
16 Menm si bon aksyon i enportan, motivasyon par deryer sa bann aksyon i pli enportan ankor. Alor i saz pour nou egzamin nou motivasyon detanzaot. Me vi ki napa personn ki kapab vreman konn motivasyon lezot, alors nou bezwen fer byen atansyon ki nou pa ziz lezot. Zapot Pol i demann sa kestyon: “Ki ou ete pour ziz serviter en lot?” Larepons i kler: “Si i reste byen ferm . . . ou si i tonbe, sa i zafer son met.” (Romen 14:4) Zeova konman sa pli gran Met, ek son Ziz, Zezi Kri, pou ziz nou pa zis baze lo nou aksyon, me baze osi lo nou motivasyon, loportinite, nou lanmour ek nou devosyon. Zis Zeova ek Zezi Kri ki kapab byen zize si nou’n fer sa ki zapot Pol ti ankouraz bann Kretyen pour fer: “Fer tou pour paret devan Bondye konman en zonm ki’n fer leksperyans, konman en zouvriye ki napa nanryen pour onte me ki anons byen mesaz laverite.”—2 Timote 2:15; 2 Pyer 1:10; 3:14.
17. Anmezir ki nou pe fer zefor pour donn nou meyer, akoz nou devret gard antet Zak 3:17?
17 Zeova i rezonnab dan sa ki ekspekte nou fer. Dapre Zak 3:17, “lasazes ki sorti dan lesyel . . . i modere” oubyen rezonnab. (Nou ki’n met an italik.) Pa i pou saz, e en vre lakonplisman pour nou, si nou imit Zeova dan sa domenn? Alor, nou pa devret etablir bann lobzektif ki pa rezonnab oubyen ki enposib akonpli pour nou menm ouswa pour nou bann frer ek ser.
18. Ki nou ekspekte gannyen letan nou annan en pwennvi balanse lo nou aksyon ek labonte leker Zeova?
18 Osi lontan ki nou annan en pwennvi balanse lo nou aksyon pour demontre nou lafwa e lo labonte Zeova, nou pou touzour dan lazwa, ki en mark ki idantifye bann vre serviter Zeova. (Izai 65:13, 14) Nenport ki kantite nou pe fer personnelman, nou kapab rezwir bann benediksyon ki Zeova pe donn son pep konman en group. Par kontinyen fer “lapriyer ek siplikasyon,” ansanm avek remersiman, nou pou demann Bondye son led pour nou donn nou meyer. Kan nou fer sa, nou kapab asire ki ‘lape Bondye ki depas tou konpreansyon imen i ava gard nou leker ek nou lespri dan Kris-Zezi.’ (Filipyen 4:4-7) Wi, nou ganny konsolasyon ek lankourazman lefe ki nou konnen ki pa zis nou aksyon tousel ki sov nou, me osi labonte leker Zeova!
Eski ou kapab eksplike akoz bann Kretyen
• pa vant zot lekor pour sa ki zot in fer?
• i evite annan en leta lespri konpetisyon?
• i fer en rapor lo zot aktivite predikasyon?
• i evite ziz lezot konpanyon Kretyen?
[Kestyon]
[Portre lo paz 27]
Bann ansyen i kontan kontribisyon ki sakenn i kapab fer pour byennet kongregasyon