‘Byennere bann ki konsyan zot Bezwen spirityel’

KAN bann zwazo i leve bomaten, souvannfwa zot sante pour en pti pe letan, epi zot anvole pour al rod nouritir. Aswar zot retourn dan zot nik, sant ankor en pti pe e apre zot tonm dormi. Pandan serten sezon zot zwenn ansanm pour fer piti, epi zot ponn zot dizef e sonny zot piti. Lezot zannimo i viv preski menm kalite lavi avek bann zwazo.

Me nou imen nou diferan. I vre ki nou manze, dormi e fer zanfan. Me laplipar nou, nou pa satisfe avek zis sa bann keksoz. Nou anvi konnen akoz nou la lo later. Nou oule annan en bi dan lavi ek en lespwar pour lavenir. Sa bann bezwen pli profon i montre ki nou imen nou annan en kalite ki inik. Sa i spirityalite, oubyen sa bezwen ek kapasite pour pran keksoz spirityel.

Kree dan resanblans Bondye

Labib i eksplike akoz sa lentere pour keksoz spirityel i dan nou. Labib i dir: “Bondye ti kree zonm dan son resanblans, dan resanblans Bondye i ti kree li. I ti kree zonm ek fanm.” (Zenez 1:27) Lefe ki nou’n ganny kree “dan resanblans Bondye,” sa i vedir ki menm si nou’n ganny tase avek pese ek lenperfeksyon, nou annan sa abilite pour reflekte serten kalite ki Bondye i annan. (Romen 5:12) Par egzanp, nou kapab fabrik keksoz. Nou osi annan en serten degre lasazes, nou konpran kwa lazistis, e nou annan sa abilite pour kontan lezot. Deplis, nou kapab reflesir lo lepase e osi plàn pour lavenir.—Proverb 4:7; Eklezyast 3:1, 11; Mika 6:8; Zan 13:34; 1 Zan 4:8.

 Nou abilite spirityel i pli evidan atraver sa dezir ki nou annan pour ador Bondye. Si nou pa byen satisfer sa dezir pour annan en bon relasyon avek nou Kreater, nou pa pou zanmen kapab trouv vre boner ki pou dire pour leternite. Zezi ti dir: “Byennere bann ki pov an-espri [oubyen konsyan zot bezwen spirityel, NW ].” (Matye 5:3) Me nou devret fer sir ki nou satisfer sa bezwen avek laverite, savedir laverite lo Bondye, lo son bann standar ek son plan pour limanite. Kote nou kapab trouv laverite? Nou kapab trouv li dan Labib.

“Ou Parol i Laverite”

Zapot Pol ti ekrir: “Tou Lekritir i enspire par Bondye e i itil pour ansennyen, pour koriz lerer, pour remet drwat.” (2 Timote 3:16) Parol Pol i an akor avek sa ki Zezi ti dir Bondye dan son lapriyer: “Ou parol i laverite.” Ozordi nou konn sa Parol konman Labib e i pou byen pour nou verifye si nou krwayans ek standar i an akor avek sa ki Labib i dir.—Zan 17:17.

Kan nou konpar nou krwayans avek Parol Bondye, nou pe imit bann dimoun dan ansyen lavil Bere ki ti fer sir ki tou sa ki Pol ti ansenny zot ti an akor avek Lekritir. Olye kritik bann dimoun dan lavil Bere, Lik ti felisit zot pour zot latitid. I ti ekrir: “Zot ti resevwar Parol Bondye avek bokou lentere. Toulezour zot ti etidye Lekritir pour war si sa ki Pol ti dir zot ti vre.” (Akt 17:11) Lefe ki ozordi i annan en kantite lansennyman lo moralite ek larelizyon ki kontredir kanmarad, i tre enportan ki nou imit legzanp bann dimoun dan lavil Bere ki ti annan en bon leta lespri.

En lot fason pour idantifye laverite, i par obzerve konman ki i enfliyans lavi bann dimoun. (Matye 7:17) Par egzanp, viv an akor avek laverite Labib i devret fer en dimoun vin en pli bon mari oubyen papa, en pli bon madanm ouswa manman, e sa i kontribye pour fer en fanmiy vin pli ere e ogmant lakontantman en dimoun. Zezi ti dir: ‘Ere dimoun ki ekoute e obei parol Bondye.’—Lik 11:28.

Parol Zezi i fer nou mazin sa ki son Papa dan lesyel ti dir bann Izraelit: “Mwan Zeova, mon ou Bondye, sa Enn ki pe ansenny ou pour ou prop byenfe, sa Enn ki pe fer ou mars dan sa semen ki ou devret marse. Si selman ou byen atantif anver mon bann komannman! Alor ou lape pou vin zis parey en larivyer e ou ladrwatir parey bann laroul dan lanmer.” (Izai 48:17, 18) San dout, sa zoli parol pou tous tou sa bann ki kontan labonte ek ladrwatir!

Serten i plifere ekout “sa ki zot Zorey i oule tande”

Bondye ti dir sa parol byen tousan avek bann Izraelit akoz zot ti pe ganny anbete avek bann mansonz relizye. (Psonm 106:35-40) Nou osi nou bezwen fer atansyon bann mansonz. Pol ti ekrir konsernan bann swadizan Kretyen: “En letan pe vini, kot dimoun pou nepli siport lansennyman laverite. Me zot pou swiv zot prop dezir; zot pou rasanble en kantite ansenyan otour zot pour dir zot sa ki zot zorey i oule tande.  Zot pou nepli oule ekout laverite.”—2 Timote 4:3, 4.

Bann sef relizye i dir dimoun sa ki zot zorey i oule tande par toler bann pratik ki satisfer bann move dezir, tel parey sèks an deor maryaz, omoseksyalite, e bwar tro bokou. Labib i klerman fer resorti ki dimoun ki aksepte e fer sa bann keksoz “pa pou erit Rwayonm Bondye.”—1 Korentyen 6:9, 10; Romen 1:24-32.

Byensir, i demann kouraz pour viv an akor avek bann standar Labib, sirtou kan nou ganny sikannen. Me nou kapab fer li. Parmi bann Temwen Zeova i annan en kantite ki pa ti kapab viv san drog, ki ti en soular, gerye, voler, manter, e viv en lavi dezord. Me malgre sa, zot ti pran aker Parol Bondye e avek led lespri sen zot in kapab fer sanzman dan zot lavi pour kapab viv “en lavi ki Bondye i aprouve.” (Kolosyen 1:9, 10; 1 Korentyen 6:11) Vi ki zot in fer lape avek Bondye, zot osi ganny lape lespri e parey nou pou vwar, zot annan en vre lespwar pour lavenir.

Lespwar Rwayonm

Sa lespwar pour annan lape dirab pour tou imen obeisan ki Labib i ofer pou ganny akonpli atraver Rwayonm Bondye. Ler i ti pe montre konman pour priye, Zezi ti dir: “Ki ou Renny i ganny etabli; ki ou lavolonte i ganny akonpli lo later parey dan lesyel.” (Matye 6:10) Wi, selman Rwayonm Bondye ki kapab fer sir ki lavolonte Bondye i ganny fer isi lo later. Akoz? Parski sa Rwayonm dan lesyel, en gouvernman ki pe ganny dirize par Zezi Kri, i mwayen ki Zeova i servi pour demontre Son drwa pour diriz later.—Psonm 2:7-12; Danyel 7:13, 14.

Konman lerwa dan sa Rwayonm, Zezi Kri pou liber bann imen obeisan avek tou kalite lesklavaz, enkli pese Adan avek son maladi ek lanmor ki i’n anmennen. Revelasyon 21:3, 4 i dir: “Aprezan Bondye in fer son demer parmi zonm . . . I [Zeova] pou eswiy tou larm dan zot lizye. Lanmor pou nepli egziste. Pou nepli annan ni dey, ni plere, ni soufrans, parski lemonn ansyen in disparet.”

Pou annan lape dirab lo later antye. Akoz nou kapab asire? Izai 11:9 i donn nou larepons: “Zot [bann sitwayen sa Rwayonm] pa pou fer okenn keksoz mal oubyen koz okenn destriksyon dan tou mon montanny sen, akoz later pou vreman ranpli avek konnesans Zeova zis parey delo i  kouver lanmer.” Wi, tou dimoun lo later sa letan pou annan konnesans egzakt lo Bondye e pou obeir li. Eski sa lesperans i fer ou leker kontan? Si wi, la i lemoman pour konmans pran “konnesans Zeova.”

Eski ou pou ekout sa Mesaz Rwayonm?

Par mwayen sa Rwayonm, Bondye pou elimin tou travay Satan e i pou ansenny bann dimoun Son semen ladrwatir. I pa drol alors ki Zezi ti konsantre plis lo sa Rwayonm dan son lansennyman. I ti dir: “Mon bezwen anons Bonn Nouvel konsernan Rwayonm Bondye . . . parski se pour sa, ki Bondye in anvoy mwan.” (Lik 4:43) Kris ti donn lord son bann disip pour partaz sa menm mesaz avek lezot dimoun. (Matye 28:19, 20) Zezi ti predir: “Sa Bonn Nouvel Rwayonm pou ganny anonse partou dan lemonn pour tou dimoun konnen; e apre sa, lafen pou arive.” (Matye 24:14) Sa lafen pe vini byen vit. Alors, pa i enportan ki bann dimoun senser i ekout sa bon nouvel ki sov lavi!

Albert, ki nou ti mansyonnen dan lartik avan, ti tann sa mesaz Rwayonm kan son madanm ek son garson ti konmans etidye Labib avek bann Temwen Zeova. Okonmansman Albert ti annan dout. I ti menm demann en pret dan son parwas pour vizit son madanm ek son garson pour montre zot ki bann Temwen i ansenny sa ki fo. Me sa pret pa ti anvi enterfer. Alor, Albert ti deside ekout en diskisyon lo Labib avek bi pour detekte okenn mansonz dan lansennyman Temwen Zeova. Apre zis en sesyon, i ti konmans partisipe dan letid e i ti vreman anvi konn plis. Plitar, i ti eksplike akoz i ti sanz son latitid. I ti dir: “Sanmenm sa ki mon ti pe toultan rode.”

Finalman, Albert ti konmans satisfer son bezwen spirityel e i pa ti zanmen get deryer. Sa laverite dan Labib ti donn li sa ki i ti pe rode toudilon son lavi. Sa i solisyon pour lenzistis ek koripsyon ki pe ravaz lasosyete ek en lespwar pour lavenir. Laverite dan Labib ti donn li lape lespri. Eski ou bezwen spirityel pe ganny satisfe? Petet ou kapab pran en pti pe letan pour lir sa bann kestyon lo paz 6. Si ou anvi ganny plis lenformasyon, bann Temwen Zeova pou byen kontan pour ed ou.

[Bwat/Portre lo paz 6]

Eski Ou Bezwen Spirityel Pe Ganny Satisfe?

Eski ou satisfe avek lansennyman spirityel ki ou pe gannyen? Nou envit ou pour lir sa bann kestyon swivan e met en mark obor sak kestyon ki ou kapab byen reponn.

□ Ki sennla Bondye e ki mannyer i apele?

□ Lekel Zezi Kri? Akoz i ti bezwen mor? Ki mannyer ou kapab benefisye avek son lanmor?

□ Eski Dyab i egziste? Si wi, kote i sorti?

□ Ki arive avek nou ler nou mor?

□ Ki plan Bondye i annan pour later ek imen?

□ Kisisa Rwayonm Bondye?

□ Ki standar Bondye lo moralite?

□ Ki rol Bondye in donn mari ek madanm dan en fanmiy? Ki serten prensip dan Labib ki ede fer en fanmiy pli ere?

Si ou pa asire ki larepons sa bann kestyon, ou kapab demann en kopi sa brosir Sa ki Bondye i ekspekte nou fer. I’n ganny pibliye par Temwen Zeova dan preski 300 langaz. Sa brosir i diskit 16 topik debaz lo Labib e i donn en larepons ki baze lo Labib pour tou sa bann kestyon anler.

[Portre lo paz 4]

Kontrerman avek zannimo, imen i annan en bezwen spirityel

[Portre lo paz 5]

“Zot pou rasanble en kantite ansenyan otour zot pour dir zot sa ki zot zorey i oule tande.”—2 Tim. 4:3

[Portre lo paz 7]

Rwayonm Bondye dan lanmen Zezi Kri pou anmenn lape dirab