Paran, pran Swen Bezwen ou Fanmiy
Paran, pran Swen Bezwen ou Fanmiy
“Si en dimoun i pa port swen son prop parante . . . i’n abandonn lafwa.”—1 TIMOTE 5:8.
1, 2. (a) Akoz i ankourazan pour vwar bann fanmiy asiste renyon Kretyen ansanm? (b) Nonm serten difikilte ki bann fanmiy i rankontre pour kapab ariv aler renyon.
LER ou get dan kongregasyon Kretyen avan en renyon i konmanse, petet ou kapab vwar bann zanfan byen prop e byen sanze pe asize obor zot paran. Eski pa i en plezir pour vwar ki sa bann fanmiy i kontan Zeova e annan lanmour antre zot? Me i fasil pour oubliy sa kantite zefor ki ganny fer pour prepar en fanmiy pour ariv renyon aler.
2 Dan laplipar ka, bann paran i tre okipe toudilon lazournen e zour ki i annan renyon, i annan plis keksoz ankor pour fer kot lakour. I annan manze pour prepare, louvraz pour fer, e travay lakour pour zanfan fini. Bann paran i anmenn pli gro lour, akoz zot ki bezwen fer sir ki tou dimoun i prop, ganny en keksoz pour manze, e pare aler. Byensir, avek zanfan keksoz ki ou pa pe ekspekte i ariv dan moman ki pli pa apropriye. Sa enn pli gran i desir son kannson ler i pe zwe. Sa enn pli pti, li i savir son manze lo li. Bann zanfan i konmans konplent zanmen fini. (Proverb 22:15) Son rezilta? Menm si paran in byen organiz zot pour sa zour, keksoz i kapab pa mars dapre plan. Kantmenm sa, preski toultan sa bann fanmiy i la kot Lasal Rwayonm byen avan ki renyon i konmanse. I vreman ankourazan pour vwar zot prezan semenn apre semenn, lannen apre lannen, anmezir ki bann zanfan i grandi pour servi Zeova!
3. Ki mannyer nou konnen ki Zeova i atas en gran valer avek bann fanmiy?
3 Menm si parler ou devwar konman en paran i kapab difisil e menm pran tou ou lenerzi, ou kapab asire ki Zeova i apresye en kantite ou zefor. Lafanmiy i en laranzman Zeova. Pour sa rezon, son Parol i dir ki i donn tou fanmiy “son vre non.” Savedir tou fanmiy i egziste gras a Zeova. (Efezyen 3:14, 15) Alor, ler ou konman paran, ou fer zefor pour akonpli ou rol dan lafanmiy dan sa bon fason, ou pe onor Souvren Senyer liniver. (1 Korentyen 10:31) Pa sa i en gran privilez? I apropriye ki nou egzamin devwar ki Zeova in donn bann paran. Dan sa lartik, nou pou vwar sa an rapor avek pran swen bezwen fanmiy. Annou egzamin trwa fason kot Bondye i ekspekte paran pran swen bezwen zot fanmiy.
Pran Swen Bezwen materyel
4. Dan fanmiy, ki laranzman Zeova in fer konsernan pran swen bezwen bann zanfan?
4 Zapot Pol ti ekrir: “Si en dimoun i pa port swen son prop parante sirtou bann ki viv dan son lakaz, i’n abandonn lafwa e i pir ki en non-krwaryan.” (1 Timote 5:8) Lekel ki zapot Pol ti pe mazinen ler i ti mansyonn “en dimoun” la dan sa verse? I ti pe mazin sef fanmiy, ki laplipar-di-tan i bann papa. Bondye i osi donn madanm en rol respektab konman en led pour son mari. (Zenez 2:18) Laplipar-di-tan bann madanm dan letan Labib ti ed zot mari pran swen bezwen zot fanmiy. (Proverb 31:13, 14, 16) Ozordi, pli ale i annan bokou fanmiy kot i annan zis en paran tousel. * Bokou paran tousel ki Kretyen pe fer en travay ekselan pour pran swen bezwen zot lakour. Byensir, i pli apropriye pour annan en papa ek en manman dan en fanmiy, kot sa papa i desarz son responsabilite.
5, 6. (a) Ki serten difikilte sa bann ki esey pran swen bezwen materyel zot fanmiy i rankontre? (b) Ki pwennvi anver travay ki pou ed bann paran Kretyen persevere?
5 Dan 1 Timote 5:8, ki kalite bezwen Pol ti annan antet? Konteks sa verse i endike ki Pol ti pe koz direkteman lo bezwen materyel en fanmiy. Ozordi dan sa lemonn, i annan bokou keksoz ki kapab fer li difisil pour en sef fanmiy pran swen bezwen materyel son fanmiy. Par egzanp, dan bokou pei i annan problenm ekonomik, bokou dimoun i perdi zot travay, napa lanplwa, e pri lavi i kontinyen monte. Kwa ki kapab ed en paran fer fas avek sa bann difikilte?
6 En paran ki pran swen bezwen materyel son fanmiy i devret mazinen ki i pe akonpli en travay ki Zeova in donn li. Parol ki Pol ti ganny enspire pour ekrir i montre ki en zonm ki kapab obeir sa komannman me i refize fer li, i parey en dimoun ki’n “abandonn lafwa.” En Kretyen pou fer tou son posib pour evit en tel latitid devan son Bondye. Me malerezman, bokou dimoun dan sa lemonn ozordi i annan “leker dir.” (2 Timote 3:1, 3) Annefe, bokou papa i evite desarz zot responsabilite e zot fanmiy i trouv zot san okenn sipor. Bann mari Kretyen pa devlop sa kalite leker dir e vin neglizan konsernan pran swen bezwen zot fanmiy. Kontrerman avek zot koleg travay, bann Kretyen ki pran swen bezwen zot fanmiy i konsider menm bann dernyen louvraz konman respektab e enportan. Pour zot sa i en mwayen pour fer plezir Zeova, vi ki sa bann louvraz i permet zot pran swen bezwen materyel zot fanmiy.
7. Akoz i apropriye ki paran i reflesir lo legzanp Zezi?
7 Bann sef fanmiy i kapab osi trouv li itil pour reflesir lo legzanp parfe Zezi. Mazinen ki dan en sans profetik, Labib i apel Zezi konman nou “Papa Eternel.” (Izai 9:6, 7) Konman “Dernyen Adan,” Zezi i ranplas “Premye zonm, Adan” konman papa sa bann ki demontre lafwa. (1 Korentyen 15:45) Kontrerman avek Adan ki ti vin en papa egois e mazin zis son prop lentere, Zezi li, i sa pli bon papa. Labib i dir lo Zezi: “La konman nou pou konnen kisisa lanmour. Zezi-Kri in donn son lavi pour nou.” (1 Zan 3:16) Wi, Zezi ti volonterman ofer son prop lavi pour lezot. Me osi dan lavi toulezour dan bann pti laspe i ti met bezwen lezot avan pour li. Paran, i byen ki ou imit sa leta lespri sakrifis.
8, 9. (a) Ki paran i kapab aprann avek legzanp bann zwazo konsernan pran swen zot zanfan? (b) Ki mannyer bokou paran Kretyen pe montre en leta lespri sakrifis?
8 Bann paran i kapab aprann bokou konsernan lanmour senser atraver parol ki Zezi ti dir avek pep rebel Bondye: “Konbyen fwa mon’n oule rasanble ou zanfan ansanm parey en mer-poul i rasanble son bann piti anba son lezel.” (Matye 23:37) Dan sa verse, Zezi ti koz lo en mer poul ki kouver son bann piti avek son lezel. Wi, bann paran i kapab aprann bokou atraver proteksyon ki en manman zwazo i ofer son bann piti. En manman zwazo pa pou ezite riske son lavi pour protez son bann piti kont danze. Me sa ki bann zwazo i fer toulezour i osi remarkab. Zot anvole ale vini pour rod manze. Menm ler zot lafors i pros pour fini, zot larg manze dan labek zot piti, ki anval li e souvan demann plis manze ankor. Bokou zannimo i montre ki Zeova in met lasazes dan zot dan fason ki zot pran swen avek zot piti.—Proverb 30:24.
9 Dan sa menm fason, bann paran Kretyen partou dan lemonn pe demontre en bon leta lespri sakrifis. Plito ou soufer ki les okenn maler ariv avek ou zanfan. Deplis, ou pou volonterman fer sakrifis toulezour pour pran swen bezwen ou zanfan. Bokou zot i lev granmaten pour fer bann travay dir oubyen fatigan. Ou travay dir pour donn bon manze ou fanmiy. Ou lite pour fer sir ki ou zanfan i annan lenz prop, en twa konvenab, ek en serten nivo ledikasyon. Ou kontinyen fer sa bann zefor zour apre zour, lannen ale lannen vini. Sirman sa kalite sakrifis ek kouraz i fer plezir Zeova! (Ebre 13:16) Me anmenmtan, ou konsyan ki ou bezwen pran swen avek ou fanmiy dan lezot fason pli enportan.
Pran Swen Bezwen spirityel
10, 11. Ki sa bezwen pli enportan ki imen i annan, e ki bann paran Kretyen i bezwen fer avan pour kapab satisfer sa bezwen dan zot zanfan?
10 Pran swen bezwen spirityel i pli enportan ankor ki pran swen bezwen materyel. Zezi ti dir: “Zonm pa viv zis lo dipen tousel me lo tou parol ki sorti dan labous Bondye.” (Matye 4:4; 5:3) Ou ki paran, ki ou kapab fer pour pran swen bezwen spirityel ou zanfan?
11 Lo sa size, petet napa en lot verse Labib ki ganny mansyonnen pli souvan ki Deterononm 6:5-7. Silvouple ouver ou Labib e lir sa bann verse. Remarke, ki premyerman bann paran i ganny konseye pour devlop zot prop spirityalite, devlop lanmour pour Zeova e pran aker son parol. Wi, fodre ki ou etidye serye Parol Bondye, lir Labib toulezour e reflesir lo sa ki ou lir pour ou devlop en bon konprenezon ek lanmour pour prensip, lalwa, ek fason azir Zeova. Sa pou fer ou leker ranpli avek bann zoli laverite sorti dan Labib ki pou pous ou pour santi lazwa, ladmirasyon, ek lanmour pour Zeova. Ou pou annan bokou bon keksoz pour partaz avek ou zanfan.—Lik 6:45.
12. Ki mannyer paran i kapab imit legzanp Zezi pour zot kapab fer antre laverite Labib dan zot zanfan?
12 Bann paran ki for spirityelman i ekipe pour aplik sa konsey ki trouve dan Deterononm 6:7, pour ‘fer antre’ parol Zeova dan zot zanfan sak fwa ki i annan en loportinite. ‘Fer antre’ i vedir ansenny e tous en dimoun par repet plizyer fwa. Zeova i konn tre byen ki nou tou, sirtou zanfan, i bezwen repetisyon pour kapab aprann. Pour sa rezon, Zezi ti servi repetisyon dan son minister. Par egzanp, ler i ti ansenny son bann disip nesesite pour annan limilite olye arogan e montre zot pli meyer ki lezot, Zezi ti trouv diferan fason pour repet sa menm prensip. I ti ansenny zot par rezonn avek zot, par servi legzanp, e menm donn legzanp pour montre ki mannyer pour aplik sa prensip. (Matye 18:1-4; 20:25-27; Zan 13:12-15) Me sa ki remarkab i ki Zezi pa ti zanmen montre li enpasyan. Pareyman, bann paran i bezwen trouv fason pour ansenny bann laverite debaz avek zot zanfan, avek pasyans repet bann prensip Zeova ziska ki zanfan i konpran e aplik zot.
13, 14. Kan ki bann paran i kapab fer antre laverite Labib dan zot zanfan, e par servi ki kalite lenformasyon?
13 Bann sesyon letid fanmiy i moman apropriye pour donn sa kalite lansennyman. Annefe, en letid Labib an fanmiy ki ganny fer regilyerman, ki ankourazan e gou i en laspe enportan dan spirityalite en fanmiy. Bann fanmiy Kretyen dan lemonn antye i trouv plezir dan sa bann letid. Zot servi bann piblikasyon ki Temwen Zeova i fourni e adapte letid avek bezwen zot zanfan. Sa liv Écoute le grand Enseignant in vin en benediksyon remarkab dan sa domenn, osi byen liv Les jeunes s’interrogent—Réponses pratiques. * Me letid fanmiy i pa sa sel letan pour ansenny zanfan.
14 Parey Deterononm 6:7 i montre, i annan bokou lokazyon ki ou konman paran ou kapab diskit bann keksoz spirityel avek ou zanfan. Ler zot pe vwayaz ansanm, travay ansanm, oubyen pe detann ansanm, ou kapab trouv loportinite pour pran swen bezwen spirityel ou zanfan. Byensir, pa fodre ki toultan ou fer en “sermon” avek ou zanfan lo bann laverite Labib. Me selman, esey gard konversasyon ou fanmiy lo bann keksoz ankourazan e spirityel. Par egzanp, i annan bokou lartik ki abord en gran varyete topik dan magazin Réveillez-vous! Ou kapab servi sa bann lartik pour koz lo bann zannimo ki Zeova in kree, bann zoli landrwa atraver lemonn, e sa zoli varyete kiltir ki egziste. Sa kalite konversasyon i kapab ankouraz bann zanfan pour lir plis bann piblikasyon ki lesklav fidel e pridan i fourni.—Matye 24:45-47.
15. Ki mannyer paran i kapab ed zot zanfan vwar predikasyon konman en keksoz enteresan e satisfezan?
15 Ler ou fer bann bon konversasyon avek ou zanfan, sa pou ed ou satisfer en lot zot bezwen spirityel. Bann zanfan Kretyen i bezwen aprann partaz zot lafwa dan en fason efikas avek lezot. Ler ou pe koz lo serten pwen enteresan dan Latour Veyer oubyen dan Réveillez-vous! ou kapab rod loportinite pour asosye sa lenformasyon avek predikasyon. Par egzanp, ou kapab demande: “Pa i ti pou gou si plis dimoun ti konn sa lo Zeova? Dapre ou, ki mannyer nou kapab fer en dimoun enterese avek sa size?” Sa bann kalite diskisyon i kapab ed zanfan devlop plis lentere pour partaz avek lezot sa ki zot pe aprann. Apre, ler ou zanfan i akonpanny ou dan predikasyon, zot vwar sa ki zot in diskite pe ganny met an pratik. Zot osi kapab aprann ki predikasyon i en travay ki gou e enteresan, ki anmenn bokou satisfaksyon ek lazwa.—Akt 20:35.
16. Ki zanfan i kapab aprann par ekout lapriyer zot paran?
16 Paran i osi pran swen bezwen spirityel zot zanfan ler zot pe priye. Zezi ti ansenny son bann disip ki mannyer pour priye e i ti priy avek zot dan diferan lokazyon. (Lik 11:1-13) Zis mazinen ki kantite zot in bezwen aprann zis par ekout Garson Zeova priye! Pareyman, ou zanfan i kapab aprann en kantite atraver ou lapriyer. Par egzanp, zot kapab aprann ki Zeova i anvi nou koz avek li libreman, tou sa ki sorti dan nou leker, e dir li nenport problenm ki nou kapab pe rankontre. Wi, ou lapriyer i kapab ed ou zanfan aprann en laverite tre esansyel: Zot kapab annan en relasyon avek zot Papa ki dan lesyel.—1 Pyer 5:7.
Pran Swen Bezwen emosyonnel
17, 18. (a) Ki mannyer Labib i montre lenportans montre lanmour bann zanfan? (b) Konman bann papa i devret imit Zeova pour eksprim lanmour pour zot zanfan?
17 Byensir, bann zanfan i osi annan bann bezwen emosyonnel ki enportan. Parol Bondye i dir paran ki degre enportan i ete pour satisfer sa bezwen. Par egzanp, bann zenn madanm i ganny konseye ‘pour kontan zot zanfan.’ Kontan zot zanfan i ganny asosye avek sa rapel pour bann zenn manman gard zot bon sans. (Tit 2:4, NW, not anba lo paz) Annefe, i fer sans pour montre lanmour en zanfan. Sa i ansenny en zanfan pour kontan lezot e i anmenn bann byenfe dirab. Lo lot kote, i bet pour pa montre lanmour en zanfan. I anmenn bokou douler e i montre ki sa paran pa’n imit Zeova, li ki montre ki i kontan nou en kantite malgre nou lenperfeksyon.—Psonm 103:8-14.
18 Zeova in menm fer premye pa pour montre lanmour son bann zanfan isi lo later. Parey 1 Zan 4:19 i dir, “Bondye in kontan nou an premye.” Sirtou zot bann papa, zot devret imit legzanp Zeova, par pran linisyativ pour devlop en relasyon pros avek zot zanfan. Labib i ankouraz bann papa pour evite irit zot zanfan, akoz “sa i kapab dekouraz zot.” (Kolosyen 3:21) En keksoz ki vreman fatig bann zanfan i sa lenpresyon ki en paran pa kontan oubyen pa apresye zot. Bann papa ki ezite eksprim zot santiman i devret mazin legzanp Zeova. Zeova ti menm koze depi lesyel pour eksprim son laprouvasyon ek lanmour pour son Garson. (Matye 3:17; 17:5) Sa ti’n bezwen vreman ankouraz Zezi! Pareyman, ler bann paran i dir bann pti parol ki montre zot apresye e kontan zot zanfan, sa i ankouraz e batir bann zanfan.
19. Akoz disiplin i enportan, e ki lekilib bann paran Kretyen i esey gannyen?
19 Byensir, paran pa demontre lanmour anver zot zanfan zis par parol. Lanmour i ganny demontre prensipalman par aksyon. Pran swen bezwen materyel e spirityel i kapab en fason ki en paran i eksprim son lanmour, sirtou ler zanfan i vwar ki paran pe fer tousala akoz zot vreman kontan zot. Disiplin i osi en fason enportan pour en paran demontre son lanmour. Annefe, Zeova “i koriz bann ki i kontan.” (Ebre 12:6) Lo lot kote, en paran ki pa disiplin son zanfan i montre ki i ay son zanfan! (Proverb 13:24) Zeova i toultan trouv sa bon lekilib, i disiplin dan “sa degre apropriye.” (Zeremi 46:28) Pour bann paran enparfe i pa toultan fasil ganny sa kalite lekilib. Me i vo lapenn fer tou ou zefor pour ganny sa lekilib. Bann disiplin ferm avek lanmour i ed en zanfan pour vin en dimoun ki ere e ki reisi dan lavi. (Proverb 22:6) Eski pa sanmenm ki tou paran Kretyen i anvi pour son zanfan?
20. Ki mannyer paran i kapab donn zot zanfan sa pli bon loportinite posib pour “swazir lavi”?
20 Ler zot bann paran, zot fer sa travay enportan ki Zeova in donn zot—pran swen bezwen materyel, spirityel, e emosyonnel zot zanfan—sa i anmenn bokou rekonpans. Ler ou fer sa ou donn ou zanfan sa pli bon loportinite pour “swazir lavi” e alor “reste vivan.” (Deterononm 30:19) Sa bann zanfan ki swazir pour servi Zeova e reste lo semen lavi anmezir ki zot vin matir i fer zot paran zwaye en kantite. (Psonm 127:3-5) Sa lazwa pou dir pour touzour! Me ki mannyer bann zenn i kapab loue Zeova konmela menm? Lartik swivan pou diskit sa size.
[Not anba lo paz]
^ par. 4 Dan sa diskisyon, referans i ganny fer avek zonm konman sa enn ki pran swen bezwen fanmiy. Me sa bann prensip i osi aplik pour bann madanm Kretyen ki sa responsabilite i tonm lo zot.
^ par. 13 Pibliye par Temwen Zeova.
Ki ou pou reponn?
Ki paran i kapab fer pour pran swen bezwen zot zanfan lo plan
• materyel?
• spirityel?
• emosyonnel?
[Kestyon]
[Portre lo paz 12]
Bokou zwazo i travay san arete pour fourni manze zot piti
[Portre lo paz 14]
Premyerman paran i devret devlop zot prop spirityalite
[Portre lo paz 15]
Paran i kapab trouv bokou lokazyon pour ansenny zot zanfan lo Kreater
[Portre lo paz 16]
Laprouvasyon paran i batir e ankouraz bann zanfan