Rod Lape Lespri

ALBERT ti en zonm marye ki ere avek de zoli zanfan. Me i ti santi ki i mank serten keksoz dan son lavi. En letan ler i ti bezwen lalit pour ganny en travay, i ti enplike dan politik e swiv sistenm sosyalis. I ti menm vin en manm aktif dan parti Kominis dan son rezyon.

Me pa bokou letan apre, Albert ti dezapwente avek sistenm Kominism. I ti sorti net dan politik e devoue tou son letan avek son fanmiy. Son bi dan lavi ti pour fer sir ki son fanmiy ti ere. Kantmenm sa, Albert ti ankor pe santi en plas vid dan li; i pa ti ankor santi sa vre lape lespri.

Pa zis Albert ki’n pas atraver sa leksperyans. Bokou dimoun in pratik diferan kalite ideolozi, filozofi, ek larelizyon pour kapab trouv en vre bi dan lavi. Dan bann pei devlope diran bann lannen 60, en mouvman apele Ipi, ti rebel kont valer moral ek sosyal dan sa lepok. Bann zenn sirtou ti servi drog ki kontrol lespri e swiv bann filozofi ki swadizan bann ansennyan spirityel ti ansennyen pour rod boner ek vre rezon pour viv. Me sa mouvman pa ti kapab anmenn vre boner. Okontrer, i’n ede prodwir bann zenn ki pa kapab viv san drog, ki imoral, e sa in kontribye pour anmenn lasosyete dan konfizyon moralman.

Pour plizyer syek, bokou dimoun in esey rod boner atraver larises, pouvwar, oubyen atraver letid avanse. Finalman, tousala in anmenn dezapwentman. Zezi ti dir: “Fer atansyon, lavaris akoz lavi en zonm pa  depann lo larises ki i posede.” (Lik 12:15) Okontrer, tay deryer larises laplipar-di-tan pa anmenn boner. Labib i dir: “Me bann ki oule vin ris i tonm dan tantasyon e dan pyez en kantite dezir bet e move, ki plonz dimoun dan larin e fer zot maler. Lanmour larzan i rasin tou lemal. Serten dimoun, pour posed larzan . . . in met zot lekor dan en kantite tourman.”—1 Timote 6:9, 10.

Alors, konman en dimoun i kapab trouv lape lespri ek en bi dan lavi? Eski i en keksoz ki vin par leksperyans, konmsi ou pe esey tap en keksoz dan fernwanr? Non, gran mersi i pa koumsa. Parey nou pou vwar dan lartik swivan nou pou trouv solisyon kan nou satisfer en bezwen tre enportan, anfet en bezwen ki zis imen ki annan.

[Portre lo paz 3]

Eski tay deryer larises, pouvwar, oubyen letid avanse pou ed ou trouv lape lespri?