Eski ou Lager avek ou bann Santiman?

PRESKI toudilon son lavi, Lena in lager avek son bann santiman negatif. I ti dir: “Sa plizyer lannen ki mon’n ganny abize seksyelman pandan mon lanfans in fer mwan perdi en kantite sa respe ki mon devret annan pour mon lekor. Mon ti santi mwan nepli annan valer.” Simone osi i reflesir lo son zenntan e i dir: “Ofon mon leker ti annan en plas vid e mon ti santi ki mon enferyer.” Sa gran latristes ki sa bann kalite santiman i anmennen i paret komen partou ozordi. En lorganizasyon ki donn konsey bann adolesan i dir ki preski lanmwatye dimoun ki telefonnen i dir ki “zot toultan santi ki zot enferyer.”

Dapre serten eksper, dimoun i ganny bann santiman ki zot enferyer ler lezot i fer zot santi ki zot pa vo nanryen. En dimoun i kapab devlop sa kalite panse ler lezot i toultan dispit avek li, kritik li severman, oubyen ensilte li. Nenport ki lakoz sa problenm, bann konsekans i kapab afekte e menm detri en dimoun. En letid medikal ki ti ganny fer resaman ti  dekouver ki dimoun ki annan santiman negatif lo zot menm, i tant pour napa konfyans dan zot lekor ek lezot, e san realize zot pe detrir bann relasyon pros avek lezot. En rapor lo sa letid i dir: “Dan en sans zot ‘kree’ sa menm sitiasyon ki zot per i arive.”

Dimoun ki santi koumsa i souvannfwa ganny afekte avek sa ki Labib i apel zot prop “panse troublan.” (Psonm 94:19) Toultan zot santi ki zot pa ase alaoter. Kan en keksoz i al mal, deswit zot blanm zot lekor. Kantmenm lezot i kapab felisit zot pour sa ki zot in fer, ofon zot leker zot santi ki to-ou-tar lezot pou dekouver zot febles. Lefe ki zot krwar zot pa merite zwaye, en kantite i konport zot dan en fason ki fer zot ditor e zot santi zot napa lafors pour sanze. Lena, ki nou’n mansyonnen pli boner, ti devlop en problenm manze ki grav akoz i ti krwar i pa vo nanryen. I admet: “Mon pa ti santi mwan kapab fer okenn sanzman.”

Eski dimoun ki pe lager avek sa bann “panse troublan” pou santi koumsa pour larestan zot lavi? Eski i annan okenn keksoz ki kapab ganny fer pour konbat sa bann santiman? Labib i fer resorti bann prensip ek konsey pratik ki’n ed bokou dimoun pour ranport laviktwar dan sa lalit. Lekel serten sa bann prensip, e ki mannyer zot in ed bann ki ti pe soufer trouv lazwa dan lavi? Sa lot lartik pou eksplike.