Eski ou fidel dan tou Keksoz?
Eski ou fidel dan tou Keksoz?
‘Bann ki fidel dan pti keksoz, i osi fidel dan sa ki enportan.’—LIK 16:10.
1. Nonm en fason ki Zeova i fidel.
ESKI ou’n deza vwar ki i arive avek lonbraz en pye dibwa pandan lazournen? Wi, groser ek direksyon sa lonbraz i kontinyen sanze! Souvannfwa, bann proze ek promes imen i parey en lonbraz ki pe toultan sanze. Parkont, li Zeova pa sanze avek letan. Disip Zak ti dir sa lo Zeova: “Bondye, Papa tou lalimyer ki pa zanmen sanze, e kot ki napa menm lonbraz en sanzman.” (Zak 1:17) Zeova i toultan parey e nou kapab kont lo li menm dan bann pli pti detay. I “en Bondye fidel.”—Deterononm 32:4.
2. (a) Akoz nou devret egzamin nou lekor pour vwar si nou fidel? (b) Ki kestyon konsernan fidelite nou pou egzaminen?
2 Ki mannyer Bondye i vwar fidelite son bann adorater? Menm parey avek David, ki ti dir sa lo zot: “Mon lizye i lo bann fidel lo later, pour ki zot reste avek mwan. Sa enn ki pe mars dan en fason san defo, se li menm ki pou servi mwan.” (Psonm 101:6) Wi, Zeova i kontan fidelite son bann serviter. Sanmenm rezon zapot Pol ti ekrir: ‘Bann administrater zot devret ganny trouve fidel.’ (1 Korentyen 4:2) Ki i enplike dan demontre fidelite? Dan ki laspe nou lavi nou devret montre nou fidel? Ki bann byenfe nou gannyen ler nou “mars dan en fason san defo”?
Ki savedir montre nou fidel
3. Kwa ki determinen si nou fidel?
3 Ebre 3:5 i dir: “Moiz li, ti fidel dan lakaz Bondye.” Ki profet Moiz ti fer ki ti fer li fidel? Ler tabernak ti pe ganny konstri e enstale, “Moiz ti fer dapre tou sa ki Zeova ti’n demann li. I ti fer egzakteman parey.” (Egzod 40:16) Konman bann adorater Zeova, nou montre nou fidelite par servi li avek lobeisans. Sa i sirman enkli reste fidel avek Zeova ler nou rankontre bann tes oubyen leprev difisil. Me reisi fer fas avek bann gro leprev i pa sa sel fakter ki determin nou fidelite. Zezi ti dir : “Bann ki onnet [oubyen “fidel,” NW ] dan pti keksoz, i osi onnet dan sa ki enportan, e bann ki malonnet dan pti keksoz i osi malonnet dan sa ki enportan.” (Lik 16:10) Nou bezwen reste fidel menm dan bann keksoz ki paret pa enportan.
4, 5. Ler nou fidel “dan pti keksoz,” ki sa i montre?
4 Demontre lobeisans sak zour “dan pti keksoz” i enportan pour de rezon. Premyerman, i montre ki mannyer nou santi anver lotorite Zeova. Mazin sa leprev ki ti teste fidelite Adan ek Ev. Sa ki Zeova ti demann zot fer pa ti prezant okenn difikilte pour zot. Zot ti kapab manz tou kalite manze dan zarden Edenn. Zot ti bezwen senpleman pa manz fri zis en pye dibwa, sa i “pye konnesans bon e move.” (Zenez 2:16, 17) Si zot ti fidelman obeir sa senp lord, sa ti pou’n demontre ki sa premye koup imen i siport dominasyon Zeova. Swiv lenstriksyon Zeova dan nou lavi toulezour i montre ki nou siport son dominasyon.
5 Dezyenmman, fason ki nou azir “dan pti keksoz” i enfliyans fason ki nou pou azir “dan keksoz enportan,” savedir, ler nou rankontre bann sitiasyon pli serye dan lavi. An rapor avek sa, annou vwar sa ki ti ariv Danyel ek son trwa konpanyon Ebre fidel—Ananya, Misael ek Azarya. Zot ti’n ganny anmennen an egzil Babilonn an 617 A.N.L. Petet zot ti ankor adolesan ler zot ti ganny anmennen dan lakour Lerwa Neboukadnetsar. Laba lerwa ti deside donn zot son bann bon manze ek diven pour nouri zot toulezour pour trwa zan, pour ki alafen sa letan zot kapab debout devan lerwa.—Danyel 1:3-5.
6. Ki leprev Danyel ek son trwa konpanyon Ebre ti fer fas avek dan lakour rwayal Babilonn?
6 Me sa ki lerwa Babilonnyen ti pe ofer zot ti vin en defi pour sa kat zenn Ebre. I tre probab ki parmi sa bann bon manze lerwa ti annan serten nouritir ki Lalwa Moiz ti defann manze. (Deterononm 14:3-20) Petet zot pa ti senny byen sa bann zannimo, e si sa kat zenn Ebre ti manz bann lavyann koumsa zot ti pou kas Lalwa Bondye. (Deterononm 12:23-25) I kapab osi ki sa bann manze ti’n ganny ofer avek zidol, parey ti koutim bann adorater Babilonnyen avan manz en repa konminyon.
7. Ki lobeisans Danyel ek son trwa zanmi ti demontre?
7 Restriksyon lo sa ki zot manze pa ti paret en keksoz enportan pour bann dimoun dan lakour lerwa Babilonn. Me Danyel ek son bann zanmi ti determinen dan zot leker pour pa sali zot par manz keksoz ki Lalwa Bondye ti defann. Sa ti en size ki ti enplik zot lwayote ek fidelite anver Bondye. Alor zot ti demann legim ek delo, e zot ti ganny sa bann keksoz. (Danyel 1:9-14) Pour serten dimoun ozordi, petet sa ki sa kat zennonm ti fer pa paret annan en tre gran lenportans. Me zot lobeisans anver Bondye ti montre zot pozisyon anver Son lotorite.
8. (a) Ki sa gro leprev ki ti teste fidelite sa trwa Ebre? (b) Ki ti rezilta sa leprev, e ki sa i montre?
8 Montre fidelite dan sa ki ti paret napa lenportans ti prepar sa trwa zanmi Danyel pour fer fas avek en pli gro leprev. Get dan liv Danyel sapit 3, e lir pour ou menm ki mannyer sa trwa Ebre ti fer fas avek santans lanmor, akoz zot ti refize ador stati annor ki Lerwa Neboukadnetsar ti’n fer mete. Ler zot ti ganny anmennen devan lerwa, zot ti anons zot determinasyon avek konfyans: “Si fodre, nou Bondye ki nou pe servi i kapab sov nou. I pou sov nou dan sa four dife vreman so e dan ou lanmen, O lerwa. Si non, ou pou arive konnen, O lerwa, ki ou bann bondye i pa sa bann ki nou pe servi, e sa stati annor ki ou’n met debout la, nou pa pou adore.” (Danyel 3:17, 18) Eski Zeova ti sov zot? Sa bann solda ki ti anvoy sa trwa zennonm dan sa four ti mor, me sa trwa zenn Ebre fidel ti sorti vivan, ni menm en bren seve lo zot latet pa ti ganny brile avek lasaler sa four! Vi ki zot ti abitye reste fidel, sa ti ede prepar zot reste fidel dan en leprev pli dir. Pa sa i montre lenportans pour fidel dan bann pti keksoz?
Fidel avek “Larises malonnet”
9. Dekrir konteks parol Zezi dan Lik 16:10.
9 Avan ki Zezi ti mansyonn sa prensip konsernan en dimoun ki fidel dan pti keksoz i osi fidel dan keksoz enportan, Zezi ti konsey sa bann ki ti ekout li: “Servi larises malonnet pour fer zanmi, dan en fason ki ler larises i a nepli egziste, sa bann zanmi i a resevwar ou dan zot demer eternel.” Apre sa, Zezi ti dir sa parol konsernan fidel dan pti keksoz. Epi i ti dir: “Alor, si ou pa’n onnet dan sa ki konsern larises malonnet, lekel ki pou konfye ou bann vre larises? . . . En serviter pa kapab servi de met; swa i pou deteste enn e kontan lot, oubyen i pou devoue anver enn e mepriz lot. Ou pa kapab servi Bondye ek larises an menm-tan.”—Lik 16:9-13.
10. Ki mannyer nou kapab montre nou fidel dan fason ki nou servi “larises malonnet”?
10 Dapre konteks, sa ki Zezi i dir dan Lik 16:10 i aplik premyerman avek fason ki nou servi “larises malonnet” savedir nou byen oubyen resours materyel. Zot ganny apele malonnet akoz larises materyel, sirtou larzan, i anba kontrol bann imen enparfe. Deplis, en dezir pour ganny larises i kapab fer en dimoun fer bann keksoz malonnet. Nou montre fidelite par montre lasazes dan fason nou servi nou keksoz materyel. Olye servi zot pour bann bi egois, nou anvi servi zot pour fer avanse lentere Rwayonm e pour ed sa bann ki dan bezwen. Par montre fidelite dan sa fason, nou fer zanmi avek Zeova ek Zezi Kri, zot ki posed bann “demer eternel.” Zot pou resevwar nou dan sa bann landrwa, donn nou lavi eternel swa dan lesyel oubyen dan Paradi lo later.
11. Akoz nou devret eksplik bann dimoun ki nou aksepte kontribisyon pour sa travay ki Temwen Zeova pe fer dan lemonn antye?
11 Mazin osi bann dimoun ki nou donn Labib oubyen piblikasyon baze lo Labib ler nou anons mesaz Rwayonm. Kan nou eksplik zot ki nou aksepte zot kontribisyon ki zot fer pour sa travay ki pep Zeova pe fer dan lemonn antye, pa nou pe ofer zot en loportinite pour servi byen zot resours materyel? Menm si Lik 16:10 i aplik prensipalman avek fason pour servi resours materyel, sa prensip dan sa verse i osi aplikab dan lezot laspe lavi.
Lonnekte i vreman enportan
12, 13. Dan ki laspe nou kapab demontre lonnekte?
12 Zapot Pol ti ekrir: “Nou sir ki nou annan en konsyans kler, parski nou oule fer sa ki byen [oubyen “onnet,” NW ] dan tou sirkonstans.” (Ebre 13:18) “Tou sirkonstans” i sirman enkli tou keksoz ki enplike dan bann zafer larzan. Nou pey nou det e nou taks aler e onnetman. Akoz? Nou fer li akoz nou konsyans e pli enportan akoz nou kontan Bondye e nou obeir son lenstriksyon. (Romen 13:5, 6) Ki nou fer ler nou trouv en keksoz ki pa pour nou? Nou rod fason pour retourn sa keksoz avek son met. I donn en bon temwannyaz ler nou eksplik rezon ki’n pous nou pour retourn avek keksoz sa dimoun!
13 Demontre fidelite ek lonnekte dan tou keksoz i enkli lonnekte dan nou landrwa travay. Lonnekte dan nou fason travay i atir latansyon lo sa kalite Bondye ki nou reprezante. Nou pa ‘vol’ letan par fer pares. Okontrer, nou travay dir, konmsi nou pe fer li pour Zeova. (Efezyen 4:28; Kolosyen 3:23) Dapre en estimasyon dan en pei Lerop, en kar travayer ki rod konze dokter i fer li par malonnekte. Bann vre serviter Bondye pa envant bann lekskiz pour pa al travay. Parler, bann Temwen Zeova i ganny ofer promosyon akoz zot anplwayer i vwar zot lonnekte ek zot bon travay.—Proverb 10:4.
Fidelite dan nou Travay Predikasyon
14, 15. Nonm serten fason ki nou kapab montre nou fidel dan predikasyon.
14 Ki mannyer nou montre nou fidel dan sa minister ki nou’n gannyen? Labib i dir: “Annou touzour rann glwar Bondye, setadir, annou toultan loue son non par nou labous.” (Ebre 13:15) Pres regilyerman i fason prensipal pour montre nou fidel dan predikasyon. Ki mannyer nou kapab les en mwan pase san ki nou koz lo Zeova ek son plan? Partisip regilyerman dan travay predikasyon i osi ed nou pour vin pli kalipa e efikas.
15 Aplik bann sizesyon dan Latour Veyer ek Nou minister Rwayonm i en lot fason pour montre nou fidel dan predikasyon. Ler nou prepar e servi bann prezantasyon ki ganny sizere oubyen lezot ki aplikab, pa nou remarke ki nou ganny plis rezilta dan nou predikasyon? Ler nou zwenn en dimoun ki montre lentere dan mesaz Rwayonm, eski nou deswit fer zefor pour devlop son lentere? Ki nou pou dir konsernan bann letid Labib ki nou kapab konmanse avek bann dimoun enterese? Eski nou kondwir sa bann letid Labib dan en fason responsab e nou fer li regilyerman? Nou fidelite dan predikasyon i kapab fer nou ek sa bann ki ekout nou ganny lavi.—1 Timote 4:15, 16.
Kontinyen reste separe avek Lemonn
16, 17. Dan ki fason nou kapab montre nou separe avek lemonn?
16 Ler Zezi ti pe priy Bondye, i ti dir sa lo son bann disip: “Mon’n donn zot ou mesaz, e lemonn in ay zot, parski zot pa fer parti lemonn parey mwan mon pa fer parti lemonn. Mon pa demann ou pour tir zot dan Zan 17:14-16) Petet nou ferm e determinen pour kontinyen reste separe avek lemonn dan bann gro keksoz parey pa enterfer dan bann zafer sa lemonn, pa selebre bann lafet relizye e rezet limoralite. Me ki nou pou dir konsernan bann pti keksoz? Eski i kapab nou pe ganny enfliyanse par fason sa lemonn san ki nou realize? Par egzanp, si nou pa fer atansyon, nou kapab fasilman vwar nou pe sanz dan en fason ki pa respektab e ki pa apropriye! Montre nou fidel i osi vedir ki nou sanz dan en fason ‘respektab e konvenab.’ (1 Timote 2:9, 10) Wi, “nou pa oule plas okenn lobstak devan personn, pour ki nou servis pour Bondye pa ganny blanmen. Me okontrer nou fer tou nou posib pour viv konman bann serviter Bondye.”—2 Korentyen 6:3, 4.
lemonn, me mon demann ou, pour prezerv zot kont sa enn ki apel Malen. Zot pa fer parti lemonn parey mwan mon pa fer parti lemonn.” (17 Akoz nou annan sa dezir pour onor Zeova, nou sanz dan en fason respektab dan nou bann renyon kongregasyon. I osi leka ler nou rasanble ansanm dan nou bann lasanble. Nou lenz i devret adapte pour sa lokazyon e byen prezantab. Sa i servi konman en temwannyaz pour lezot ki pe obzerv nou. Menm bann lanz i remark nou aktivite, parey ti leka avek Pol ek son bann konpanyon Kretyen. (1 Korentyen 4:9) Annefe, nou devret toultan sanz dan en fason apropriye. Pour serten, montre zot fidel dan kalite lenz ki zot mete i kapab paret en pti zafer, me dan lizye Zeova i enportan.
Beni pour montre nou fidel
18, 19. Ki benediksyon fidelite i anmennen?
18 Bann vre Kretyen i ganny apele bann ‘bon administrater’ labonte Bondye ki ganny demontre dan diferan fason. Alor, zot desarz zot responsabilite “avek lafors ki Bondye i donn” zot. (1 Pyer 4:10, 11) Deplis, konman bann administrater, Zeova i konfye nou avek keksoz ki pa pour nou personnelman. Sa i son labonte, ki par egzanp i ganny demontre dan predikasyon. Anmezir ki nou montre nou bann bon administrater, nou depan lo lafors ki Bondye i donnen, “sa pisans ki napa son parey.” (2 Korentyen 4:7) Sa i vreman en bon formasyon pour ed nou fer fas avek nenport leprev ki kapab arive alavenir!
19 Sa psalmis ti sante: “Zot tou son bann fidel, kontan Zeova. Zeova pe protez bann ki fidel.” (Psonm 31:23) Annou determinen pour montre nou fidel, annan konfyans total ki Zeova i ‘Sover pour tou dimoun, sirtou pour bann fidel.’—1 Timote 4:10.
Eski ou rapel?
• Akoz nou devret ‘fidel dan pti keksoz’?
• Ki mannyer nou kapab montre nou fidel
an rapor avek lonnekte?
dan predikasyon?
par reste separe avek lemonn?
[Kestyon]
[Portre lo paz 13]
Fidel dan sa ki pti, fidel osi dan sa ki enportan
[Portre lo paz 16]
‘Montre ou onnet dan tou sirkonstans’
[Portre lo paz 16]
Prepar byen pour predikasyon i en bon fason pour montre nou fidel
[Portre lo paz 17]
Sanz dan en fason respektab