“Kontinyen prouve sa ki zot ete”

“Kontinyen teste pour vwar si zot dan lafwa, kontinyen prouve sa ki zot ete.” —2 Korentyen 13:5, NW.

1, 2. (a) Ki mannyer dout konsernan nou krwayans i kapab afekte nou? (b) Ki sitiasyon ki ti egziste Korent dan premye syek ki ti’n kapab fer serten pa asire ki mannyer pour marse?

DAN son pe vwayaze dan lakanpanny, en zonm i ariv en landrwa kot i annan plizyer semen. Lefe i pa asire ki semen ki pou anmenn li kot i anvi ale, i demann dimoun direksyon me sakenn i dir li diferan keksoz. Dan son konfizyon, i pa kapab kontiny son larout. Devlop bann dout lo nou krwayans i kapab fer menm lefe lo nou. Sa bann dout i kapab anpes nou fer desizyon, e sa i kapab fer nou pa asire ki semen pour ale.

² En sitiasyon ti arive ki ti’n kapab fer menm lefe lo serten dimoun dan kongregasyon Korent dan premye syek. “Bann zapot ki pas zot pour siperyer” ti pe kestyonn lotorite zapot Pol. Zot ti dir: “Bann let Pol i dir e sever, me ler i la an personn parmi nou, i feb e parol ki i dir napa gran valer.” (2 Korentyen 10:7-12; 11:5, 6) Sa kalite pwennvi ti’n kapab fer serten dimoun dan kongregasyon Korent pa asire ki mannyer pour marse.

3, 4. Akoz nou devret enterese avek konsey ki Pol ti donn bann Korentyen?

³ Pol ti etablir sa kongregasyon dan lavil Korent pandan son vizit laba dan lannen 50 N.L. I ti reste “en an edmi dan Korent, e i ti ansenny bann zabitan Laparol Bondye.” Annefe, “bokou Korentyen ki ti tann Pol ti osi krwar e ti ganny batize.” (Akt 18:5-11) Pol ti annan en gran lentere dan byennet spirityel son bann konpanyon Kretyen dan lavil Korent. Deplis, bann Korentyen ti’n ekrir Pol pour demann li konsey lo serten size. (1 Korentyen 7:1) Alor i ti donn zot bann konsey ekselan.

⁴ Pol ti ekrir: “Kontinyen teste pour vwar si zot dan lafwa, kontinyen prouve sa ki zot ete.” (2 Korentyen 13:5; NW ) Aplik sa konsey ti pou’n protez sa bann frer ek ser dan lavil Korent pour zot pa annan dout konsernan fason ki zot devret marse. Sa konsey i kapab protez nou dan sa menm fason osi. Alor, ki mannyer nou kapab swiv konsey Pol? Ki mannyer nou kapab teste si nou dan lafwa? Deplis ki i enplike dan prouve ki nou nou ete?

‘Kontinyen teste pour vwar si nou dan Lafwa’

5, 6. Ki standar nou annan pour teste si nou dan lafwa, e akoz sa i pli bon standar?

⁵ Normalman dan en tes i annan en lobze oubyen dimoun ki pe ganny teste e sa tes i ganny fer dapre en mezir oubyen en standar. Dan sa ka, sa keksoz ki pe ganny teste i pa lafwa, savedir lansanm nou krwayans ki nou’n aksepte. Se nou menm endividyelman ki pe ganny teste. Nou annan en standar parfe pour fer sa tes. Psalmis David ti dir dan en kantik ki i ti konpoze: “Lalwa Zeova i parfe, i fer en dimoun retournen. Rapel Zeova i diny konfyans, i fer sa ki napa leksperyans saz. Bann lord Zeova  i drwat, i fer leker rezwir; komannman Zeova i prop, i fer lizye briye.” (Psonm 19:7, 8) Labib i kontyen bann lalwa parfe, lord drwat, bann rapel diny konfyans ek komannman prop Zeova. Sa mesaz ki annan dan Labib i sa standar parfe pour teste nou lekor.

⁶ Zapot Pol ti dir konsernan sa mesaz enspire par Bondye: “Parol Bondye i vivan e i annan pisans. I pli koupe ki en lepe ki koup de kote. I kapab penetre ziska separasyon lam ek lespri, zwentir ek lanmwel lezo. I arive desifre tou dezir ek sekre leker imen.” (Ebre 4:12) Wi, parol Bondye i kapab teste nou leker—sa ki nou vreman ete anndan. Ki mannyer nou kapab aplik sa mesaz pwisan ki koupe dan nou prop lavi? Sa psalmis ti dir klerman ki mannyer nou kapab aplik parol Bondye pour teste nou leker. I ti sante: “Byennere sa zonm ki . . . pran plezir dan lalwa Zeova, e i lir son lalwa avwabas lizour e aswar.” (Psonm 1:1, 2) “Lalwa Zeova” i trouve dan Parol Bondye, Labib. Nou bezwen pran plezir pour lir Parol Zeova. Annefe, nou bezwen met letan dekote pour lir li avwabas, oubyen pour reflesir lo la. Ler nou fer sa, nou bezwen les sa ki’n ganny ekrir dan Labib teste nou.

7. Ki sa fason prensipal pour teste si nou dan lafwa?

⁷ Alor, fason prensipal pour teste si nou dan lafwa, i lir e reflesir lo Parol Bondye. Apre, egzaminen ziska ki degre nou kondwit i an armoni avek sa ki nou’n aprann. Nou kontan ki nou ganny bokou led pour konpran Parol Bondye.

8. Ki mannyer bann piblikasyon ‘lesklav fidel e pridan’ i ed nou teste si nou dan lafwa?

⁸ Zeova in fourni lansennyman ek lenstriksyon atraver bann piblikasyon pibliye par ‘lesklav fidel e pridan,’ ki eksplik Labib. (Matye 24:45) Par egzanp, konsider sa bwat avek tit “Kestyon pour Refleksyon” alafen laplipar sapit dan liv Apros avek Zeova. * Sa laspe dan sa liv i vreman donn bann bon loportinite pour en dimoun reflesir! Plizyer size ki ganny diskite dan nou magazin, Latour Veyer ek Réveillez-vous!, i osi ed nou pour teste si nou dan lafwa. Konsernan bann lartik lo liv Proverb dan bann dernyen nimero Latour Veyer, en ser Kretyen ti dir: “Mon trouv sa bann lartik vreman itil. Zot ed mwan egzaminen si mon fason koze, konportman, ek latitid i vreman an armoni avek standar drwat Zeova.”

9, 10. Ki provizyon Zeova in donn nou pour kontinyen teste si nou dan lafwa?

⁹ Nou osi ganny en kantite gidans ek lankourazman dan bann renyon kongregasyon ek lasanble. Sa i parmi bann provizyon spirityel ki Bondye in fer pour sa bann ki Izai ti profetize: “I devret arive dan bann dernyen zour ki montanny kot lakaz Zeova pou ganny byen etabli parlao latet bann montanny, e i pou sirman ganny mete parlao bann kolin; e tou bann nasyon pou al ver li. Bokou dimoun pou sirman  ale e dir: ‘Vini, annou mont lo montanny Zeova, . . . e i pou enstri nou konsernan son semen, e nou pou mars dan son santye.’ ” (Izai 2:2, 3) I vreman en benediksyon pour ganny sa kalite lenstriksyon konsernan semen Zeova.

¹⁰ Bann konsey sorti kot bann ki annan kalifikasyon spirityel, enkli bann ansyen, i en lot fason pour teste nou lekor. Konsernan zot, Labib i dir: “Mon bann frer si zot arive sirprann en dimoun pe fer en keksoz mal, zot ki posed Lespri Bondye, zot devre redres li avek en lespri ladouser. Sakenn vey byen son prop lekor, fer atansyon ki ou pa ganny tante.” (Galat 6:1) Nou vreman rekonesan pour sa led ki redres nou!

11. Ki i enplike dan teste si nou dan lafwa?

¹¹ Nou piblikasyon, renyon Kretyen, bann ansyen—tousala i bann provizyon merveye sorti kot Zeova. Me fodre ki nou egzamin nou prop lekor pour teste si nou dan lafwa. Alor ler nou pe lir nou bann piblikasyon oubyen ekout konsey sorti dan Labib, nou bezwen demann nou lekor: ‘Eski mon koumsa? Eski mon fer sa? Eski mon pe reste atase avek lansennyman Kretyen?’ Nou latitid anver lenformasyon ki nou gannyen atraver sa bann provizyon i osi annan en lenfliyans lo nou kondisyon spirityel. Labib i dir: ‘Zonm natirel pa resevwar bann keksoz Lespri Bondye, akoz i en lafoli pour li . . . Zonm spirityel i kapab ziz tou.’ (1 Korentyen 2:14, 15) Pa nou devret fer zefor pour gard en pwennvi pozitif e spirityel lo sa ki nou lir dan nou bann liv, magazin, ek lezot piblikasyon e sa ki nou tande dan nou bann renyon e avek bann ansyen?

‘Kontinyen prouve sa ki nou ete’

12. Ki i enplike dan prouve sa ki nou ete?

¹² Prouve sa ki nou ete i enplik fer en evalyasyon lo nou lekor. Wi, nou kapab dan laverite, me ki nivo nou spirityalite i ete? Prouve sa ki nou ete i enplik demontre matirite e annan en vre lapresyasyon pour provizyon spirityel.

13. Dapre Ebre 5:14, kwa ki prouve nou matir?

¹³ Ki keksoz nou kapab rode dan nou pour nou konnen si nou en Kretyen matir? Zapot Pol ti ekrir: “Nouritir solid i pour bann adilt ki par leksperyans zot konn fer diferans ant sa ki byen ek sa ki mal.” (Ebre 5:14) Nou demontre ki nou matir par konn fer diferans ant sa ki byen ek sa ki mal. Zis parey en atlet i bezwen antrenn son lekor plizyer fwa avan ki i kapab fer byen dan son sport, demenm nou bezwen devlop leksperyans par aplik bann prensip Labib pour nou kapab konn fer diferans ant sa ki byen ek sa ki mal.

14, 15. Akoz nou devret fer zefor serye pour etidye bann keksoz profon dan Parol Bondye?

¹⁴ Me avan ki nou kapab konn fer diferans ant sa ki byen ek sa ki mal fodre ki nou  ganny konnesans. Alor, en letid personnel serye i esansyel. Ler nou fer letid personnel regilyerman, sirtou lo bann keksoz profon dan Parol Bondye, nou abilite pour konn fer diferans ant sa ki byen ek mal i amelyore. Dan lepase, i’n annan bokou size profon ki’n ganny diskite dan Latour Veyer. Ki mannyer nou azir ler nou ganny bann lartik ki diskit lo bann topik profon? Eski nou tant pour evit zot zis akoz zot annan “serten pasaz difisil pour konpran”? (2 Pyer 3:16) Okontrer, nou fer plis zefor pour konpran sa ki pe ganny dir.—Efezyen 3:18.

¹⁵ Me si nou trouv li difisil pour fer letid personnel? I enportan ki nou esey fer zefor pour devlop en gou pour letid. * (1 Pyer 2:2) Pour nou devlop matirite fodre ki nou nouri nou avek bann nouritir solid, savedir bann laverite pli profon dan Parol Bondye. Sansan, nou abilite pour konn fer diferans ant sa ki byen ek sa ki mal pou definitivman reste limite. Me demontre matirite, i enplik plis ki kapab konn fer diferans ant sa ki byen ek sa ki mal. Dan lavi toulezour nou bezwen servi sa konnesans ki nou gannyen atraver letid Labib oprofon.

16, 17. Ki konsey disip Zak i donnen konsernan ‘met an pratik’?

¹⁶ Laprev sa ki nou ete i osi evidan dan fason ki nou demontre lapresyasyon pour laverite, savedir keksoz ki nou fer ki montre nou lafwa. Disip Zak ti servi en bon legzanp pour dekrir sa fason pour egzamin nou lekor. I ti dir: “Pa zis ekout laparol me osi met li an pratik. Sa ki zis ekout laparol, me pa met li an pratik, i parey en zonm ki get son figir dan laglas. Apre ki i’n byen war  li dan laglas, i ale e oubliy deswit konman i ti ete. Me sa ki egzamin byen lalwa parfe, lalwa laliberte e ki persevere, e ki pa zis ekoute pour oubliye apre, me ki met an pratik, Bondye pou beni li dan tou son laktivite.”—Zak 1:22-25.

¹⁷ Zak pe dir: ‘Get byen dan laglas Parol Bondye, e evalye ou lekor. Kontinyen fer sa e egzamin ou lekor avek sa ki ou trouve dan Parol Bondye. Apre pa oubliy deswit sa ki ou’n vwar. Fer bann koreksyon neseser.’ Swiv sa konsey i kapab parler difisil.

18. Akoz i kapab difisil pour swiv konsey Zak?

¹⁸ Pran par egzanp sa nesesite pour partisip dan travay predikasyon Rwayonm. Pol ti ekrir: ‘Dimoun ki krwar dan son leker, i ganny zistifye, me sa ki anons avek son labous pou ganny sove.’ (Romen 10:10) Nou bezwen fer detrwa azisteman pour kapab anons avek nou labous pour ganny sove. Pour laplipar nou, partisip dan predikasyon i pa en keksoz ki vin natirel. Alors, pour vin bann proklanmater devoue e donn sa travay sa plas ki i merite dan nou lavi i demann fer ankor plis sanzman ek sakrifis. (Matye 6:33) Me enn fwa ki nou konmans fer sa travay Bondye, nou kontan akoz sa louanz ki i anmennen pour Zeova. Alor, eski nou bann proklanmater Rwayonm devoue?

19. Ki nou devret fer pour demontre lafwa?

¹⁹ Ki nou devret fer pour demontre lafwa? Pol i dir: “Kontinyen pratik sa ki zot in aprann e resevwar avek mwan, swa sa ki zot in tann mwan dir ouswa sa ki zot in war mwan fer. E Bondye, ki donn nou son lape i ava avek zot.” (Filipyen 4:9) Nou prouve ki nou ete par pratik sa ki nou’n aprann, aksepte, tande e vwar, setadir fer tou sa ki enplike dan dedikasyon Kretyen e vin en disip. Atraver profet Izai Zeova i enstri nou: “La sa semen. Mars lo la.”—Izai 30:21.

20. Ki kalite dimoun ki vin en gran benediksyon pour kongregasyon?

²⁰ Bann zonm ek madanm ki etidye seryezman Parol Bondye, ki pres sa bon nouvel avek devouman, ki san defo dan zot fidelite, e ki siport fidelman Rwayonm Bondye, i en gran benediksyon pour kongregasyon. Zot prezans i azout stabilite avek sa kongregasyon ki zot asosye avek. Zot vin vreman itil, sirtou akoz i annan sitan en kantite nouvo pour pran swen avek. Ler nou pran aker konsey Pol pour ‘kontinyen teste si nou dan lafwa, kontinyen prouve sa ki nou ete,’ nou osi nou vin en bon lenfliyans pour lezot.

Pran Plezir pour fer Lavolonte Bondye

21, 22. Ki mannyer nou kapab pran plezir pour fer lavolonte Bondye?

²¹ Lerwa David dan ansyen Izrael ti sante: “O mon Bondye, mon’n pran plezir pour fer ou lavolonte, e ou lalwa i oprofon dan mwan.” (Psonm 40:8) David ti pran plezir pour fer lavolonte Bondye. Akoz? Parski lalwa Zeova ti dan leker David. David ti napa dout konsernan fason ki i devret marse.

²² Ler lalwa Bondye i oprofon dan nou, nou asire ki semen nou pou mars ladan. Nou pran plezir pour fer lavolonte Bondye. Alor, annou fer bokou zefor anmezir ki nou servi Zeova avek nou leker.—Lik 13:24.

[Not anba lo paz]

Eski ou rapel?

• Ki mannyer nou kapab teste si nou dan lafwa?

• Kwa ki enplike dan demontre ki nou ete?

• Kwa ki montre nou en Kretyen matir?

• Ki mannyer nou aksyon pour demontre nou lafwa i ed nou egzamin sa ki nou ete?

[Kestyon]

[Portre lo paz 9]

Eski ou konn fason prensipal pour teste si ou dan lafwa?

[Portre lo paz 10]

Nou demontre nou matirite Kretyen par servi nou abilite pour fer diferans ant sa ki byen ek sa ki mal

[Portre lo paz 11]

Nou demontre ki nou ete ler nou pa zis ekoute pour oubliye, me nou met an pratik laparol