Zeova i “rekonpans tou bann ki rod li”

“Sa ki apros kot Bondye i devre krwar ki i egziste e ki i rekonpans tou bann ki rod li.”​—EBRE 11:6.

1, 2. Akoz serten serviter Zeova i kapab lager avek bann santiman negatif?

“BARBARA ti dir: “Mon en Temwen Zeova pour preski 30 tan, me mon pa’n zanmen santi mon merite ganny apele en temwen. * Menm si mon’n fer pionye e ganny bokou lezot privilez, tousala pa ase pour fer mwan krwar ki mon merite ganny apele en Temwen.” Keith i eksprim preski menm santiman. I dir: “Parler mon ti santi ki mon pa vo nanryen akoz bann serviter Zeova i annan bokou rezon pour zwaye, me mwan non. Sa ti fer mwan santi mon koupab, ki ti zis fer keksoz vin pli pir.”

² Bokou serviter fidel Zeova, swa dan lepase oubyen ozordi, in lager avek menm santiman. Eski parler sa in deza ariv ou? Petet ou ganny anvair par en problenm apre lot, tandis ki ou bann konpanyon Kretyen i paret pe rezwir lavi, konmsi zot napa okenn traka e zot byennere. Sa i kapab fer ou santi ki ou napa laprouvasyon Zeova oubyen ou pa ni merit son latansyon. Me pa krwar sa. Labib i asir nou: “[Zeova] pa’n ni mepriz oubyen degout lafliksyon sa enn aflize; e i pa’n kasyet son figir avek li, e ler i ti kriy li pour led i ti tande.” (Psonm 22:24) Sa parol profetik lo Mesi i montre ki Zeova pa zis antann son bann fidel me i osi rekonpans zot.

3. Akoz presyon sa lemonn i kapab afekte nou?

 ³ Presyon sa lemonn i afekte tou dimoun, menm bann serviter Zeova. Nou viv dan en lemonn dominen par Satan, pli gran lennmi Zeova. (2 Korentyen 4:4; 1 Zan 5:19) Olye ki bann serviter Zeova i ganny proteze dan en fason mirakile, an realite, zot target prensipal Satan. (Zob 1:7-12; Revelasyon 2:10) Alor, ziska letan fikse Bondye, nou bezwen persevere dan difikilte e “priye tou letan” avek konfyans ki Zeova i pran swen avek nou. (Romen 12:12) Nou pa devret les presyon sa lemonn fer nou krwar ki nou Bondye, Zeova, pa kontan nou!

Bann Legzanp Perseverans dan Lepase

4. Mansyonn serten legzanp serviter fidel Zeova ki ti andir bann sitiasyon difisil.

⁴ Bokou serviter Zeova dan lepase ti andir bann sitiasyon tre difisil. Par egzanp, Ana ti sagren akoz i ti napa zanfan. Pour li sa sitiasyon ti konmsi Bondye ti’n oubliy li. (1 Samyel 1:9-11) Ler Larenn Zezabel ti pe tay deryer Eliya pour touy li, avek lafreyer Eliya ti priy Zeova: “Ase! Aprezan, Zeova, pran mon lavi, akoz mon pa pli byen ki mon bann zanset.” (1 Lerwa 19:4) Zapot Pol ti’n bezwen santi ki son lenperfeksyon ti en lour lo li ler i ti admet: “Kan mon oule fer sa ki byen, mon zis kapab fer sa ki mal.” I ti azoute: “Malere! La sa ki mon ete!”—Romen 7:21-24.

5. (a) Ki mannyer Ana, Eliya, ek Pol ti ganny rekonpanse? (b) Ki rekonfor nou kapab gannyen dan Parol Bondye si nou pe lager avek bann santiman negatif?

⁵ Byensir, nou konnen ki Ana, Eliya, ek Pol zot tou zot in persevere dan servis Zeova, e I ti rekonpans zot en kantite. (1 Samyel 1:20; 2:21; 1 Lerwa 19:5-18; 2 Timote 4:8) Kantmenm sa, zot ti lager avek diferan kalite santiman ki imen i annan, parey latristes, dezespwar, ek lafreyer. Alor, nou pa devret sirprann si parler nou ganny bann santiman negatif. Me ki ou kapab fer, ler bann lenkyetid lavi i fer ou demann ou lekor si Zeova i vreman kontan ou? Ou kapab ganny rekonfor dan Parol Bondye. Par egzanp, dan lartik avan, nou ti diskit parol Zezi ki Zeova in kont ‘bann bren seve lo nou latet.’ (Matye 10:30) Sa parol ankourazan i montre ki Zeova i enterese en kantite avek sakenn son serviter. Rapel osi legzanp Zezi lo bann sren. Si Zeova i remark menm enn sa bann pti zwazo ki tonm ater, akoz i pou inyor ou sitiasyon?

6. Ki mannyer Labib i kapab en sours rekonfor pour sa bann ki lager avek bann santiman negatif?

⁶ Eski i vre ki nou imen enparfe nou kapab presye dan lizye Kreater tou pwisan, Zeova? Wi! Annefe, i annan plizyer pasaz dan Labib ki asir nou sa. Ler nou pran aker sa bann pasaz Labib, nou kapab repet menm parol avek sa psalmis ki ti dir: “Ler mon ti annan bokou panse troublan dan mwan, ou prop konsolasyon ti konmans kares mwan.” (Psonm 94:19) Annou vwar serten sa bann parol konsolan dan Parol Bondye ki pou ed nou rekonnet plis ankor ki Bondye i apresye nou e i pou rekonpans nou anmezir nou kontinyen fer son lavolonte.

 “Propriyete spesyal” Zeova

7. Ki profesi ankourazan Zeova ti donnen atraver Malaki avek sa nasyon koronpi?

⁷ Pandan bann lannen 400 avan nou lepok, bann Zwif ti dan en sitiasyon deplorab. Bann pret ti pe aksepte bann zannimo ki pa apropriye e zot ti pe ofer zot konman sakrifis lo lotel Zeova. Bann ziz ti pe fer lapliferans. Grigri, mansonz, frod ek adilter ti partou kote. (Malaki 1:8; 2:9; 3:5) Malaki ti anons en profesi sirprenan avek sa nasyon ki ti vreman koronpi. Avek letan, Zeova ti pou anmenn son pep ankor dan en kondisyon ki i aprouve. Nou lir: “Zeova bann larme in dir, ‘Zot pou sirman vin pour mwan, zour ki mon pe prodwir en propriyete spesyal. Mon pou montre zot konpasyon, zis parey en zonm i montre konpasyon son garson ki pe servi li.’ ”—Malaki 3:17.

8. Akoz Malaki 3:17 i kapab osi ganny aplike avek gran lafoul?

⁸ Profesi Malaki i annan en lakonplisman dan nou letan an rapor avek bann Kretyen swazir, ki en nasyon spirityel konpoze avek 144,000 zot. Sa nasyon i vreman “en propriyete spesyal” oubyen “en pep ki pour Bondye.” (1 Pyer 2:9) Profesi Malaki i kapab osi ankourazan pour “gran lafoul” ki pe “debout devan tronn e devan Lanyo, dan rob blan.” (Revelasyon 7:4, 9) Zot vin en sel troupo avek bann Kretyen swazir, anba en sel Berze, Zezi Kri.—Zan 10:16.

9. Akoz pep Zeova i “en propriyete spesyal” pour li?

⁹ Ki mannyer Zeova i vwar sa bann ki swazir pour servi li? Parey Malaki 3:17 i endike, i vwar zot parey en bon papa i vwar son garson. Remark osi sa parol tousan ki i servi pour dekrir son pep—“en propriyete spesyal.” Lezot tradiksyon Labib i tradwir sa fraz “sa ki pour mwan,” “mon posesyon pli presye,” e “mon bizou.” Akoz Zeova i konsider sa bann ki servi li sitan spesyal koumsa? Premyerman akoz i en Bondye ki apresye lezot. (Ebre 6:10) I apros avek sa bann ki servi li avek tou zot leker e i vwar zot spesyal.

10. Ki mannyer Zeova i protez son pep?

¹⁰ Eski ou annan en keksoz valer ki ou konsider konman ou propriyete spesyal? Pa ou fer tou pour protez li? Zeova i fer menm keksoz avek son “propriyete spesyal.” I vre, i pa protez son pep kont tou leprev ek maler ki arive dan lavi. (Eklezyast 9:11) Me Zeova i kapab e i pou protez son bann serviter fidel spirityelman. I donn zot sa lafors ki zot bezwen pour andir nenport leprev. (1 Korentyen 10:13) Pour sa rezon, Moiz ti dir avek pep Bondye, bann Izraelit: “Pran kouraz e for. . . . Zeova ou Bondye i sa enn ki pe mars avek ou. I pa pou zanmen abandonn ou oubyen kit ou pour touzour.” (Deterononm 31:6) Zeova i tret byen son pep. Pour li, zot “en propriyete spesyal.”

Zeova i kontan rekonpanse

11, 12. Ki mannyer ler nou rekonnet Zeova konman sa enn ki rekonpans nou i ed nou reziste bann dout?

¹¹ Lefe ki Zeova i rekonpans son bann serviter, sa i en lot levidans ki i apresye zot. I ti dir bann Izraelit: “Teste mwan, silvouple, dan sa domenn, gete si mon pa ava ouver baro lapli dan lesyel avek zot e si mon pa ava devid en benediksyon lo zot ziska ki i ava nepli annan ankor bezwen.” (Malaki 3:10) Byensir, finalman Zeova pou rekonpans son bann serviter avek lavi eternel. (Zan 5:24; Revelasyon 21:4) Sa rekonpans presye i montre grander lanmour ek zenerozite Zeova. I osi montre ki i vreman apresye sa bann ki swazir pour servi li. Aprann vwar Zeova konman en dimoun ki rekonpans nou avek  gran ker, i kapab ed nou konbat okenn doutans konsernan nou pozisyon devan Bondye. Annefe, Zeova i ankouraz nou pour vwar li konman sa enn ki rekonpans nou! Pol ti ekrir: “Sa ki apros kot Bondye i devre krwar ki i egziste e ki i rekonpans tou bann ki rod li.”—Ebre 11:6.

¹² Byensir, nou servi Zeova akoz nou kontan li—pa zis akoz i promet pour rekonpans nou. Kantmenm sa, gard antet lespwar en rekonpans i apropriye e i pa vedir ki nou egois. (Kolosyen 3:23, 24) Akoz son lanmour pour nou e sa gran valer ki i atase avek nou, Zeova i pran linisyativ e rekonpans bann ki kontinyen rod li.

13. Akoz sakrifis Zezi Kri i pli gran levidans lanmour Zeova pour nou?

¹³ Pli gran levidans ki imen i presye dan lizye Zeova i sakrifis Zezi Kri. Zapot Pol ti ekrir: “Bondye in telman kontan lemonn ki i’n donn son sel Garson, pour ki nenport ki, ki krwar dan li, pa pou mor, me i a ganny lavi eternel.” (Zan 3:16) Si Zeova in pare pour sakrifye Zezi Kri pour nou, i pa kapab pran nou pour nanryen ditou oubyen pa kontan nou. Annefe, si Zeova in pey sitan en gran pri pour nou—ofer son sel Garson—i bezwen sirman kontan nou en kantite.

14. Kwa ki montre ki mannyer Pol ti konsider sakrifis Zezi Kri?

¹⁴ Alor, si en ler nou santi ki nou pa vo nanryen, reflesir lo sa sakrifis. Wi, vwar sa kado konman en provizyon ki Zeova pe ofer ou personnelman. Sanmenm sa ki zapot Pol ti fer. Rapel sa ki i ti dir: “Malere! La sa ki mon ete!” Me apre i ti dir: “Gran mersi Bondye par Zezi-Kri nou Senyer!” ki’n “kontan mwan e ki’n donn son lavi pour mwan.” (Romen 7:24, 25; Galat 2:20, nou ki’n met an italik.) Pol pa ti egois ler i ti dir sa parol. I ti senpleman annan konfyans ki Zeova i apresye li personnelman. Parey Pol, ou osi ou devret aprann vwar sa sakrifis konman en kado personnel sorti kot Bondye. Zeova pa zis en Sover pwisan me avek lanmour i osi rekonpans nou.

Fer atansyon “bann Riz Dyab”

15-17. (a) Ki mannyer Dyab i kapitaliz lo bann santiman negatif? (b) Ki lankourazman nou kapab gannyen atraver leksperyans Zob?

¹⁵ Kantmenm sa, ou kapab vwar li difisil pour krwar ki sa bann konsolasyon ki dan Parol Bondye i vreman pour ou. Petet ou santi ki sa rekonpans pour viv pour touzour dan nouvo lemonn Bondye i en keksoz ki lezot i kapab gannyen, me ou, ou pa merit sa. Si ou santi koumsa, ki ou kapab fer?

¹⁶ Sirman ou konn byen konsey ki Pol ti donn bann Efezyen: “Met lo zot tou bann lekipman batay ki Bondye i donnen, pour ki zot a kapab reziste kont tou bann riz Dyab.” (Efezyen 6:11) Premye keksoz ki vin dan nou lespri ler nou mazin bann riz Satan, se kontan larzan ek limoralite, e sa i normal. Sa bann tantasyon in vin en latrap pour bokou parmi pep Bondye ki swa dan lepase e dan nou letan. Me nou pa devret inyor en lot riz Satan. Sa i son zefor pour konvenk dimoun ki Zeova pa kontan zot.

¹⁷ Dyab i kontan kapitaliz lo sa kalite santiman pour sey detourn dimoun avek Bondye. Mazin parol ki Bildad ti dir Zob: “Ki mannyer zonm mortel i kapab annan rezon devan Bondye, oubyen ki mannyer sa enn ki en fanm in donn nesans i kapab prop? Gete! I menm annan lalin, e i pa kler, e menm bann zetwal zot pa prop dan son lizye. Konbyen plis en zonm mortel, ki en moutouk, e en garson zonm, ki en lever!” (Zob 25:4-6; Zan 8:44) Eski ou kapab mazinen ki mannyer sa parol ti’n bezwen demoraliz  Zob? Alor pa les Satan dekouraz ou. De lot kote, fer atansyon bann trik Satan pour ki ou ganny sa kouraz ek lafors pour lager pli dir pour fer sa ki byen. (2 Korentyen 2:11) Zob li, menm si i ti bezwen ganny korize, Zeova ti rekonpans son perseverans par donn li de fwa plis sa ki i ti’n perdi.—Zob 42:10.

Zeova “i pli gran ki nou Leker”

18, 19. Ki mannyer Bondye i “pli gran ki nou leker,” e dan ki fason “i konn tou” keksoz?

¹⁸ I vre i kapab difisil pour sirmont bann santiman dekourazman si zot for dan nou. Me lespri Zeova i kapab ed ou pour ptit-a-pti detri “tou bann rezonnman . . . kont konnesans Bondye.” (2 Korentyen 10:4, 5) Ler ou santi ki bann panse negatif pe anvair ou, reflesir lo parol zapot Zan: “La ki mannyer nou pou konnen ki nou apartenir avek laverite, ki nou posed lasirans devan li. Se ki dan nenport ki sirkonstans ki nou leker i kondann nou, nou konnen ki Bondye i pli gran ki nou leker e i konn tou.”—1 Zan 3:19, 20.

¹⁹ Ki sa fraz “Bondye i pli gran ki nou leker” i vedir? Parler, nou leker i kapab kondann nou, sirtou ler nou byen konsyan nou lenperfeksyon ek defo ki fer nou santi ki nou pa vo nanryen. Oubyen akoz nou lavi pase, nou annan sa tandans pour annan bann panse negatif lo nou, konmsi napa nanryen ki nou pou fer ki fer Zeova aksepte nou. Parol zapot Zan i asir nou ki Zeova i pli gran ki sa! I pa get zis nou bann fot me i vwar nou vre potansyel. I osi konn nou motivasyon ek lentansyon. David ti ekrir: “Li i konn byen avek ki nou’n ganny formen, i mazinen ki nou lapousyer.” (Psonm 103:14) Wi, Zeova i konn nou pli byen ki nou konn nou prop lekor!

“En Kouronn Labote” ek “Tirban en Lerwa”

20. Ki profesi Izai konsernan restorasyon i montre lo fason ki Zeova i vwar son bann serviter?

²⁰ Atraver profet Izai, Zeova ti donn son ansyen pep lespwar pour ganny reetablir dan zot pei ankor. Ler zot ti an egzil Babilonn, sa rekonfor ek lasirans ti sanmenm ki bann dimoun dekouraze ti bezwen! Ler Zeova ti get dan lavenir kot son pep ti pou retourn dan zot pei natal, i ti dir: “Ou bezwen vin en kouronn labote dan lanmen Zeova, e tirban en lerwa dan lanmen ou Bondye.” (Izai 62:3) Avek sa parol, Zeova ti abiy son pep avek dinite ek labote. Ozordi i’n fer menm keksoz avek son pep Izrael spirityel. I konmsi i’n met zot anler pour tou dimoun admire.

21. Ki mannyer ou kapab ganny konfyans ki Zeova pou rekonpans ou perseverans?

²¹ Menm si sa profesi i ganny akonpli prensipalman lo bann Kretyen swazir, i montre sa dinite ki Zeova i akord tou sa bann ki servi li. Alor, ler ou ganny bann dout, mazinen ki menm si ou enparfe, ou kapab presye parey “en kouronn labote” e “tirban en lerwa” pour Zeova. Alor kontinyen fer son leker kontan par fer zefor pour fer son lavolonte. (Proverb 27:11) Par fer sa, ou kapab annan konfyans ki Zeova pou rekonpans ou perseverans!

[Not anba lo paz]

Eski ou rapel?

• Ki mannyer nou “en propriyete spesyal” pour Zeova?

• Akoz i enportan pour vwar Zeova konman sa enn ki rekonpans nou?

• Ki bann “riz Dyab” nou bezwen veye?

• Dan ki fason Bondye i “pli gran ki nou leker”?

[Kestyon]

[Portre lo paz 23]

Pol

[Portre lo paz 23]

Eliya

[Portre lo paz 23]

Ana

[Portre lo paz 24]

Dan Parol Bondye i annan bokou panse ankourazan