Byenfe ki nou gannyen ler nou reste fidel

DAN serten pei, bann zanfan i kontan fer malis kanmarad par met tref lo zot poulover. Sa bann tref i reste atase avek sa poulover, e nenport kwa ki sa zanfan i kapab fer, ki swa i marse, taye, sakouy li oubyen sote, zot reste kole lo son poulover. Sel fason pour debaras li avek sa bann tref, i bezwen retir zot enn par enn. Pour bann pti manrmay, ler zot get sa, sa i gou pour zot.

Byensir, pa tou dimoun ki kontan tref lo zot lenz, me tou dimoun i sirprann lefe ki tref i kapab reste kole koumsa. En dimoun ki fidel i azir menm parey avek tref. I gard en relasyon ki dire. I reste fidel avek devwar ek lobligasyon ki vin avek sa relasyon, menm kan sitiasyon i fer li difisil. Sa mo “fidel,” i fer nou mazin bann kalite tel parey, senserite, lwayote ek devosyon. I kapab ki ou apresye kan lezot i fidel avek ou, me eski ou, ou determinen pour reste fidel avek lezot? Si wi, avek ki sennla ou bezwen reste fidel?

Fidelite dan Maryaz i esansyel

Maryaz i en domenn kot fidelite i tre enportan, me i fer lapenn pour dir ki i sa domenn kot fidelite pe nepli egziste. En msye ek madanm ki reste fidel avek zot ve maryaz, savedir ki reste ansanm e fer keksoz pour zot tou le de benefisye, in pran en pa enportan pour zot trouv boner ek sekirite. Akoz? Parski imen in ganny kree avek sa bezwen pour montre li fidel avek lezot e pour lezot fidel avek li. Kan Adan ek Ev ti marye dan zarden Edenn, Bondye ti dir: “En zonm pou kit son papa ek son manman e i devret atase avek son madanm.” Menm keksoz ti pou aplik pour en madanm; i ti pou atase avek son msye. Msye ek madanm ti pou fidel e korpere avek kanmarad.—Zenez 2:24; Matye 19:3-9.

Byensir, sa ti en bann lannen pase. Eski sa i vedir ki fidelite dan lavi maryaz ozordi pa adapte avek nou letan? Laplipar dimoun pou dir non. Dan en resers ki ti ganny fer Lalmanny, 80 poursan dimoun ti dir ki fidelite dan maryaz i tre enportan. En lot serve ti ganny fer pour dekouver bann pli zoli kalite dan zonm ek fanm. En group zonm ti ganny demande pour nonm senk kalite ki zot pli kontan dan bann madanm, e en group madanm ti nonm senk kalite ki zot pli kontan dan bann msye. Fidelite, ti sa kalite ki bann madanm ek zonm ti pli apresye.

Wi, fidelite i form parti en fondasyon solid pour en maryaz reisi. Me parey nou ti vwar dan lartik avan, dimoun i pli apresye fidelite ki met li an pratik. Par egzanp, sa kantite divors dan bokou pei i montre ki enfidelite i egziste partou. Ki mannyer bann koup i kapab reziste sa tandans e reste fidel avek kanmarad?

 Fidelite i fer Maryaz dire

Fidelite i ganny demontre kan sakenn i rod fason pour montre zot devosyon anver kanmarad. Par egzanp, i pli bon pour dir “nou” olye “mon”—“nou zanmi,” “nou zanfan,” “nou lakaz,” “nou leksperyans,” eksetera. Kan zot pe fer bann plan ek desizyon, ki swa konsernan lakaz, travay, lafason pour elve zanfan, detant, vakans oubyen bann aktivite relizye, msye ek madanm i bezwen pran an konsiderasyon santiman ek lopinyon kanmarad.—Proverb 11:14; 15:22.

Fidelite i ganny demontre kan sakenn i montre ki zot bezwen kanmarad. En dimoun ki’n marye i enkyet kan son msye oubyen madanm pe vin tro pros avek en dimoun lot sèks. Labib i konsey bann zonm pour reste atase “avek madanm [zot] zenntan.” En msye pa devret les sa lanvi pour atir latansyon en lot madanm domin li. Definitivman i devret evite annan okenn relasyon seksyel avek en lot madanm. Labib i dir ki nenport dimoun ki komet adilter avek en madanm i en lenbesil e sa ki pe fer li pe detri li menm. Bann madanm i ekspekte demontre sa menm standar onivo lo fidelite.—Proverb 5:18; 6:32.

Eski i vo lapenn fer zefor pour reste fidel dan maryaz? Byensir. I fer maryaz vin pli stab e dirab, tou le de i benefisye personnelman. Par egzanp, kan en msye i fidelman pran byen swen avek son madanm, son madanm i santi li an sekirite e sa pou ed li demontre son bann pli bon kalite. Sa i osi leka pour en msye. Lefe ki i determinen pour reste fidel avek son madanm, sa pou ed li devlop en devosyon anver bann prensip drwat dan tou laspe son lavi.

Kan en msye ek madanm i pas atraver movetan, si zot fidel avek kanmarad zot pou santi zot an sekirite. De lot kote, dan en maryaz kot msye ek madanm pa fidel, konman problenm i arive premye keksoz ki zot mazinen i separasyon oubyen divors. Kan zot fer sa desizyon olye rezourd problenm, souvannfwa i anmenn plis problenm ankor. Dan bann lannen 1980, en eksper lanmod byen popiler, ti kit son madanm ek son fanmiy. Eski konman en zonm lib i ti trouv boner? Ven tan plitar i ti admet ki “i ti santi li tousel, agase, e i pa ti kapab ganny sonmey aswar akoz i ti anvi dir bonswar son zanfan.”

Fidelite ant Paran ek Zanfan

Kan bann paran i fidel avek kanmarad, i annan plis sans ki zot zanfan osi pou aprann reste fidel. Alavenir, bann zanfan ki’n grandi dan en fanmiy ki fidel e kot i annan lanmour, pou vwar li pli fasil pour zot azir dan en bon fason anver zot msye oubyen madanm ek zot paran ki’n vin vye.—1 Timote 5:4, 8.

Byensir, pa toultan ki paran i tonm malad avan zanfan. Parfwa en paran i bezwen  toultan pran swen avek en zanfan. Sa i sitiasyon ki de Temwen Zeova, Herbert ek Gertrud, ti trouv zot ladan pour plis ki 40 tan. Zot garson, Dietmar, toudilon son lavi ti soufer avek muscular dystrophy, en maladi ki afekte bann misk. Pour sa dernyen set an avan son lanmor an Novanm 2002, lizour konman aswar Dietmar ti bezwen swen ek latansyon. Avek lanmour, son paran ti donn li tou sa ki i ti bezwen. Zot ti menm enstal en lekipman medikal kot zot, e zot ti ganny en formasyon dan domenn medikal. Pa sa i en bon legzanp fidelite dan fanmiy!

Fidelite i enportan antre Zanmi

Birgit i dir ki “en dimoun i kapab zwaye menm si i pa’n marye, me i difisil pour zwaye si nou napa en zanmi.” Petet ou dakor avek sa. Ki swa ou’n marye oubyen ou selibater, en bon zanmi ki fidel avek ou pou fer ou leker kontan e i pou fer ou lavi gou. Byensir, si ou’n marye ou msye oubyen madanm i devret sa zanmi ki ou pli pros avek.

Kan nou pe koz lo zanmi, nou pa pe senpleman refer avek bann senp relasyon ki nou annan avek nou vwazen, koleg, oubyen avek dimoun ki nou zwenn detanzaot. Pour vin en vre zanmi i demann en kantite letan, lenerzi ek langazman. I en gran keksoz pour vin zanmi avek en dimoun. Ler nou zanmi avek en dimoun nou ganny bann privilez, me i osi enplik responsabilite.

I enportan pour annan bon kominikasyon avek nou zanmi. Sa kalite kominikasyon i kapab ganny fer akoz en bezwen. Birgit i dir: “Kan enn ant nou de i annan en problenm, nou telefonn kanmarad enn fwa oubyen de fwa dan lasemenn. Kan mon konnen ki i la e pare pour ekoute, sa i rekonfort mwan.” Zistans pa en baryer ant zanmi. Gerda ek Helga i reste plizyer milye kilomet avek kanmarad, me kantmenm sa pour plis ki 35 an zot de bon zanmi. Gerda i dir: “Nou toultan ekrir kanmarad, rakont nou leksperyans ki swa i gou oubyen tris, e nou koz lo nou santiman pli profon. Ler mon ganny let sorti kot Helga mon leker i oule deborde avek lazwa. Nou mazin menm keksoz avek kanmarad.”

Fidelite i enportan pour fer zanmi. Kan enn i vin enfidel sa i kapab gat sa relasyon ki’n dire pour en kantite letan. I komen pour bann zanmi konsey kanmarad menm lo bann keksoz ki konfidansyel. En zanmi pou dir sa ki sorti dan son leker san okenn lafreyer ki i pou ganny gro latet, oubyen ki son parol pou ganny fannen. Labib i dir: “En vre konpanyon i kontan ou toultan, e i en frer ki’n ne pour letan ladetres.”—Proverb 17:17.

Vi ki nou zanmi i annan lenfliyans lo lafason ki nou panse, santi e azir, i enportan ki nou fer zanmi avek dimoun ki zot fason viv i parey pour nou. Par egzanp, fer sir ou fer zanmi avek bann ki annan menm krwayans avek ou, menm pwennvi lo moralite, e menm standar avek ou lo sa ki byen ek mal. Bann tel zanmi pou ed ou akonpli ou lobzektif. Deplis, pour ki rezon ou pou anvi vin pros avek en dimoun ki napa menm standar ek menm pwennvi lo moralite parey ou? Labib i montre nou akoz i enportan pour swazir bon zanmi. I dir: “Sa ki mars avek bann dimoun saz pou vin saz, me sa ki frekant bann enbesil pou mal pase.”—Proverb 13:20.

Fidelite i en Kalite ki nou kapab aprann

Kan en zanfan i met tref lo lenz son kanmarad, i pou toultan anvi kontinyen fer li. I menm parey avek en dimoun ki fidel. Akoz? Akoz pli nou fidel, pli i fasil pour nou demontre  sa kalite. Si depi pti pti en zanfan i aprann demontre fidelite dan lafanmiy, plitar i pou vwar li pli fasil pour vin zanmi avek lezot akoz i en dimoun fidel. Avek letan, sa kalite lanmitye ki for e dirab pou fer li vin en dimoun fidel dan son maryaz. Sa pou osi ed li pour reste fidel dan sa lanmitye pli enportan.

Zezi ti dir ki pli gran komannman i ki nou devret kontan Zeova avek tou nou leker, tou nou nanm, tou nou lespri ek tou nou lafors. (Mark 12:30) Savedir nou dwa Bondye tou nou fidelite. Kan nou fidel avek Zeova, nou ganny en kantite benediksyon. I pa pou zanmen bliy nou oubyen dezapwent nou, parski li menm i’n dir: “Mon fidel.” (Zeremi 3:12) Anfet, kan nou fidel avek Bondye nou pou ganny bann benediksyon pour touzour.—1 Zan 2:17.

[Ekstre lo paz 6]

En bon zanmi ki fidel avek ou pou fer ou leker kontan

[Portre lo paz 5]

Bann manm fanmiy ki fidel i pran swen avek kanmarad