Eski i vo lapenn reste fidel?
Eski i vo lapenn reste fidel?
KARL * ki en reprezantan lasirans ti dir: “Ou pe pey tro bokou pour asir ou lasante. Si ou vin dan mon lakonpanni, ou pou kapab met dekote 15 ero dan en mwan, e sa i bokou.”
Jens ti reponn: “Petet i vre. Me mon’n asir mon lasante avek sa menm lakonpanni pour plizyer lannen. Zot in ed mwan en kantite dan lepase, e mon anvi reste fidel avek zot.”
Karl ti reponn li: “Fidelite i en bon kalite. Be selman ou fidelite pe kout ou en ta larzan!”
Karl ti annan rezon. Souvannfwa kan nou fidel avek en dimoun, nou kapab depans en kantite larzan. I osi demann letan, lenerzi ek langazman. Eski i vo lapenn reste fidel?
Dimoun i pli apresye Fidelite ki met li an pratik
Dan en serve ki ti ganny fer Lalmanny par en lenstitisyon ki apel Allensbach, ki fer resers lo lopinyon dimoun, 96 poursan dimoun ti dir ki fidelite i en zoli kalite. Dan en lot serve ki Allensbach ti fer parmi bann zenn aze 18 a 24 an, i montre ki 2 lo 3 zenn i annan en bon pwennvi lo fidelite.
Menm si fidelite i ganny bokou apresye, me kan i ariv ler pour montre nou fidel, sa i en lot zafer. Par egzanp dan plizyer pei Lerop, bann koup marye oubyen manm fanmiy pe deplizanpli montre mwens fidelite anver kanmarad. Souvannfwa bann zanmi i vin enfidel anver kanmarad. Sa fidelite ki dan lepase ti atas en anplwayer avek en anplwaye oubyen en biznes avek son kliyan, in preski disparet. Akoz?
Parfwa, presyon lavi i fer dimoun annan en pti gin letan oubyen lafors pour angaz zot dan bann keksoz ki demann fidelite. Dimoun ki’n ganny dezapwente avek lezot, aprezan petet zot ezite pour reste fidel avek lezot. Serten i kapab plifere viv en lavi kot ozordi zot la demen zot laba, koumsa zot pa pou bezwen reste fidel avek personn.
Pour nenport ki rezon, fidelite i en kalite ki dimoun i pli apresye ki met li an pratik. Me kestyon ki sa i fer nou demande i: Eski i vo lapenn reste fidel? Si wi, avek ki nou devret reste fidel e dan ki fason? Ki byenfe nou gannyen ler nou reste fidel?
[Not anba lo paz]
^ par. 2 Nou’n sanz serten non dan sa lartik e dan lot ki pou swiv.
[Ekstre lo paz 3]
Fidelite i en kalite ki dimoun i pli apresye ki met li an pratik