Eski ou pou reflekte Laglwar Bondye?
Eski ou pou reflekte Laglwar Bondye?
‘Nou reflekte laglwar Zeova parey en laglas.’—2 KORENTYEN 3:18.
1. Ki Moiz ti vwar, e ki ti arive apre?
I TI en vizyon pli enpresyonan ki okenn zonm ti’n deza vwar. Anler li tousel lo montanny Sinai, Moiz ti vwar son demann realize. Zeova ti permet li vwar en keksoz ki personn pa ti’n deza vwar—Son laglwar. Me Moiz pa ti vwar Zeova direkteman. Bondye i annan en laparans sitan enpresyonan ki okenn zonm pa kapab vwar li e reste vivan. Atraver en lanz, Zeova ti bezwen kasyet Moiz avek Son “plak lanmen” pour protez li ziska ki I’n fini pase. Apre, Zeova ti les Moiz vwar en pe son laglwar. I ti osi koz avek Moiz atraver en lanz. Labib i dekrir ki ti arive apre: “Ler Moiz ti desann sorti lo montanny Sinai, . . . bann reyon lalimyer ti pe sorti lo son figir akoz i ti’n koz avek [Zeova].”—Egzod 33:18–34:7, 29.
2. Ki zapot Pol ti ekrir konsernan laglwar ki bann Kretyen i reflekte?
2 Fer konmsi ou ti lo sa montanny ansanm avek Moiz. Pa i ti pou pas frison avek ou ler ou vwar labote enkrwayab Bondye Tou Pwisan e tann li pe koze! Pa i ti pou en privilez pour desann sorti lo montanny Sinai, ansanm avek Moiz, medyater Lalwa! Me eski ou ti konnen ki dan en sans bann vre Kretyen i reflekte laglwar Bondye dan en fason pli siperyer ki Moiz ti reflekte? Sa fe enteresan i trouve dan en let ki zapot Pol ti ekrir. I ti ekrir ki bann Kretyen swazir i ‘reflekte laglwar Zeova parey en laglas.’ (2 Korentyen 3:7, 8, 18) Dan en sans, bann Kretyen ki annan lespwar pour viv lo later i osi reflekte laglwar Bondye.
Ki mannyer bann Kretyen i reflekte Laglwar Bondye
3. Ki mannyer nou’n arive konn Zeova dan bann fason ki Moiz pa ti kapab?
3 Ki mannyer nou kapab reflekte laglwar Bondye? Nou pa’n vwar oubyen tann Zeova parey Moiz. Me nou’n arive konn Zeova dan bann fason ki Moiz pa’n zanmen konn li. Zezi ti vini konman Mesi preski 1,500 zan apre ki Moiz ti’n mor. Alor Moiz pa’n arive konnen ki mannyer Lalwa ti akonpli lo Zezi, ki ti mor pour liber nou dan sa kondannasyon dir ki pese ek lanmor in anmennen lo nou. (Romen 5:20, 21; Galat 3:19) Deplis, Moiz ti kapab vwar zis en pti gin grander plan Zeova, ki annan pour fer avek son Rwayonm ek sa Paradi ki i pou anmennen lo later. Alor nou, nou vwar laglwar Zeova, pa avek nou lizye fizik, me avek nou lizye lafwa baze lo bann lansennyman Labib. Deplis, nou’n tann lavwa Zeova, pa atraver en Lanz, me atraver Labib, sirtou Levanzil ki byen dekrir lansennyman ek minister Zezi.
4. (a) Ki mannyer bann Kretyen swazir i reflekte laglwar Bondye? (b) Dan ki fason bann ki annan lespwar pour viv lo later i kapab reflekte laglwar Bondye?
4 Kantmenm bann Kretyen pa reflekte laglwar Bondye par bann reyon lalimyer ki sorti lo zot figir, zot figir i reyonnen avek lazwa ler zot koz avek lezot lo zoli personnalite ek plan Zeova. Konsernan nou letan, profet Izai ti predir ki pep Bondye ti pou “sirman koz lo laglwar [Zeova] parmi bann nasyon.” (Izai 66:19) Deplis, nou lir dan 2 Korentyen 4:1, 2: “Se pour sa rezon, alor ki nou posed sa minister . . . . Nou’n fini rezet tou sa bann keksoz, ki fer onte e ki fer dan kasyet. Nou pa anbet dimoun, e nou pa fer Parol Bondye vin fo. Okontrer, an pibliyan Laverite, nou fer fason ganny konfyans tou dimoun devan Bondye.” Pol ti pe refer sirtou avek bann Kretyen swazir, ki bann “serviter en nouvo lalyans.” (2 Korentyen 3:6) Me zot minister in annan lefe lo en kantite dimoun ki’n ganny sa lespwar pour viv pour touzour lo later. Minister tou le de group i enplik reflekte laglwar Zeova pa zis dan sa ki zot ansennyen me osi dan fason ki zot viv. I en responsabilite e osi en privilez pour nou reflekte laglwar Bondye Tre O!
5. Ki levidans nou prosperite spirityel i donnen?
5 Ozordi, sa bon nouvel glorye lo Rwayonm Bondye pe ganny prese lo later antye zis parey Zezi ti dir. (Matye 24:14) Bann dimoun sorti dan diferan nasyon, tribi, pep, ek lalang in akeyir sa bon nouvel avek bokou lentere e zot in sanz zot lavi pour fer lavolonte Bondye. (Romen 12:2; Revelasyon 7:9) Zis parey bann premye Kretyen, zot pa kapab aret koz lo keksoz ki zot in vwar e tande. (Akt 4:20) Plis ki sis milyon dimoun pe reflekte laglwar Bondye ozordi. Zanmen dan listwar imen i’n annan sa kantite koumsa. Eski ou enn parmi zot? Prosperite spirityel pep Bondye i donn nou levidans konvenkan ki Zeova pe beni e protez zot. I pli evidan ankor ki lespri Zeova i lo nou ler nou pran an konsiderasyon ki i annan en kantite lafors pwisan ki kont nou. Annou vwar akoz lespri Zeova i vreman lo nou.
Pep Bondye pa pou reste trankil
6. Akoz nou bezwen lafwa ek kouraz pour pran pozisyon pour Zeova?
6 Meton ou’n ganny apele ankour pour temwanny kont en kriminel ki annan leker dir. Ou konnen ki sa kriminel i annan en lorganizasyon tre for e i pou servi tou mwayen posib pour anpes ou devwal sa ki i’n fer. Pour ou kapab temwanny kont sa kriminel, ou pou bezwen annan bokou kouraz e osi lasirans ki bann lotorite neseser pou protez ou kont li. Nou dan en sitiasyon parey. Ler nou temwanny lo Zeova ek son plan, nou pe temwanny kont Satan e denons li konman en kriminel e en manter ki pe tronp lemonn antye. (Zan 8:44; Revelasyon 12:9) Pour ou pran pozisyon pour Zeova e kont Dyab i demann lafwa ek kouraz.
7. Ki kantite lenfliyans Satan i annan, e ki i pe sey fer?
7 Byensir, Zeova i pli gran ki tou. Son pouvwar pa kapab ganny konpare avek Satan. Nou kapab annan lasirans ki Zeova pa zis kapab, me i vreman anvi protez nou anmezir ki nou servi li fidelman. (2 Kronik 16:9) Me Satan i sef bann demon e osi sa lemonn ki elwannyen avek Bondye. (Matye 12:24, 26; Zan 14:30) Vi ki i pe sirkil zis lo later aprezan e i annan en “gran lakoler,” Satan pe opoz severman bann serviter Zeova e i pe servi sa lemonn anba son pouvwar pour sey ferm labous tou bann ki pres sa bon nouvel. (Revelasyon 12:7-9, 12, 17) Ki mannyer i fer sa? Dan omwen trwa fason.
8, 9. Ki kalite lanmour Satan i oule nou devlope, e akoz nou devret swazir lekel nou pou frekante?
8 En fason ki Satan i sey anpes nou konsantre lo sa travay, i atraver bann keksoz dan lavi toulezour. Dimoun dan bann dernyen zour i kontan larzan, kontan zot lekor, e kontan plezir. Zot pa kontan Bondye. (2 Timote 3:1-4) Vi ki zot preokipe avek bann keksoz dan lavi toulezour, laplipar dimoun ‘pa pran kont’ sa bon nouvel ki nou anmenn kot zot. Zot zis pa enterese pour konn laverite dan Labib. (Matye 24:37-39) Sa kalite latitid i kapab afekte nou osi e fer nou nepli annan lentere dan bann keksoz spirityel. Si pli ale nou devlop lanmour pour bann keksoz materyel ek lanmizman, nou lanmour pour Bondye pou diminyen.—Matye 24:12.
9 Se pour sa rezon ki bann Kretyen i byen swazir lekel ki zot pou frekante. Lerwa Salomon ti ekrir: “Sa ki mars avek bann dimoun saz pou vin saz, me sa ki frekant bann enbesil pou mal pase.” (Proverb 13:20) Annou mars avek bann ki reflekte laglwar Bondye. Pa i gou koumsa! Ler nou zwenn nou bann frer ek ser spirityel dan bann renyon e dan lezot moman, nou ganny ankouraze par zot lanmour, zot lafwa, zot lazwa, e zot lasazes. En bon lasosyasyon koumsa i fer nou pli determinen pour persevere dan nou minister.
10. Ki mannyer Satan in servi sikannri pour dekouraz bann ki reflekte laglwar Bondye?
10 En dezyenm fason ki Satan i sey anpes bann Kretyen reflekte laglwar Bondye i par bann sikannri. Sa pa devret sirprann nou. Pandan son minister lo later, Zezi Kri ti ganny sikannen. Zot ti riy li, mepriz li, boufonn li, maltret li, e menm kras lo li. (Mark 5:40; Lik 16:14; 18:32) Bann premye Kretyen osi ti ganny sikannen. (Akt 2:13; 17:32) Ozordi bann serviter Zeova i ganny trete menm parey. Zapot Pyer ti dir ki dan en sans zot pou ganny vwar konman bann “fo profet.” I ti predir: “Dan dernyen zour pour annan bann moker ki pou vin sikann zot an swivan zot prop dezir. Zot pou dir, ‘Oli sa promes, ki i pe vini? . . . tou i reste parey depi kreasyon lemonn.’ ” (2 Pyer 3:3, 4) Zot dir ki pep Bondye i byen lwen avek realite. Zot vwar bann standar moral dan Labib tro an retar pour swiv. Pour bokou dimoun, sa mesaz ki nou prese pa fer sans. (1 Korentyen 1:18, 19) Konman Kretyen, nou kapab ganny sikannen kot lekol, dan travay, e menm avek nou prop fanmiy. Kantmenm sa, par nou predikasyon nou kontinyen reflekte laglwar Bondye, parski parey Zezi, nou konnen ki Parol Bondye i laverite.—Zan 17:17.
11. Ki mannyer Satan in servi persekisyon pour esey fer bann Kretyen reste trankil?
11 En trwazyenm taktik ki Dyab i servi pour esey fer nou reste trankil i lopozisyon oubyen persekisyon. Zezi ti dir son bann disip: “Zot pou ganny persekite e met a-mor. Tou dimoun pou ay zot akoz mwan.” (Matye 24:9) I vre ki nou Temwen Zeova, nou ganny persekite severman dan bokou pei lo later. Nou konnen ki depi byen byen lontan, Zeova ti predir ki en laenn ti pou devlope ant bann ki servi Bondye ek bann ki servi Satan. (Zenez 3:15) Nou osi konnen ki ler nou reste fidel dan difikilte, nou siport drwa Zeova pour diriz liniver. Si nou gard sa antet, i kapab fer nou reste for menm dan bann sitiasyon pli difisil. Napa okenn persekisyon ki pou fer nou nepli koz lo Bondye si nou determinen pour reflekte son laglwar.
12. Akoz nou devret santi nou ere ler nou reste fidel kan Satan i opoz nou?
12 Eski ou reziste bann keksoz atiran dan sa lemonn e reste fidel kantmenm ou ganny sikannen e opoze? Si wi, ou annan rezon pour santi ou ere. Zezi ti asir bann ki swiv li: “Zot byennere, kan en dimoun i ensilte zot, persekit zot, e koz manti pour dir tou sort keksoz mal kont zot akoz zot mon disip. ‘Rezoui e santi zot ere akoz zot annan en gran rekonpans dan lesyel. Parski koumsa menm zot bann zanset ti persekit bann profet avan zot.’ ” (Matye 5:11, 12) Ou perseverans i montre ki lespri sen pwisan Zeova i lo ou, pe donn ou lafors pour ou kapab reflekte son laglwar.—2 Korentyen 12:9.
Persevere avek Led Zeova
13. Ki sa rezon prensipal ki nou persevere dan nou predikasyon?
13 Rezon prensipal akoz nou persevere dan nou predikasyon i akoz nou kontan Zeova e nou kontan pour reflekte son laglwar. Zonm i tant pour imit dimoun ki zot kontan e respe. Me napa personn ki pli vo lapenn imite ki Zeova. Akoz son gran lanmour, i ti anvoy son Garson lo later pour temwanny laverite, e liber bann dimoun ki obeisan. (Zan 3:16; 18:37) Zis parey Bondye, nou anvi tou kalite dimoun repantir e ganny sove; se pour sa ki nou pres avek zot. (2 Pyer 3:9) Sa dezir, ansanm avek nou determinasyon pour imit Bondye, i pous nou pour kontinyen reflekte son laglwar atraver nou predikasyon.
14. Ki mannyer Zeova i donn nou lafors pour nou persevere dan nou minister?
14 Apre tou, Zeova i donn nou lafors pour persevere dan nou minister Kretyen. I soutenir e fortifye nou par son lespri, son lorganizasyon, ek son Parol, Labib. Zeova i “donn pasyans” oubyen perseverans bann ki pare pour reflekte son laglwar. I reponn nou lapriyer e donn nou lasazes pour fer fas avek nou problenm. (Romen 15:5; Zak 1:5) Deplis, Zeova pa pou les nou pas dan bann problenm ki nou pa kapab siporte. Si nou met konfyans dan li, i pou fer en fason pour nou sorti pour ki nou kontinyen reflekte son laglwar.—1 Korentyen 10:13.
15. Kwa ki ed nou persevere?
15 Perseverans dan nou predikasyon i donn levidans ki lespri Bondye i lo nou. Annou pran en legzanp: Meton en dimoun i demann ou pour distribye en kalite dipen kot sak lakaz pour nanryen. Ou ganny demande pour fer sa dan ou prop letan e ou bezwen kouver depans ki ou fer. Deplis, pa pran bokou letan pour ou realize ki zis en pti gin dimoun ki anvi sa dipen. Serten i menm oule anpes ou distribye sa dipen. Eski ou krwar ou ti pou kontinyen sa latas lannen ale lannen vini? Petet non. Pourtan, ou’n depanse dan tou fason pour anons sa bon nouvel dan ou prop letan, lannen ale lannen vini. Akoz sa? Pa akoz ou kontan Zeova? Pa osi akoz i’n beni ou zefor par son lespri pour ed ou persevere? Be wi!
En Travay ki nou pa pou zanmen oubliye
16. Ki perseverans dan predikasyon i vedir pour nou e pour bann ki ekout nou?
16 Predikasyon lo sa nouvo lalyans i en kado ki pa kapab ganny konpare avek okenn keksoz. (2 Korentyen 4:7) Pareyman, predikasyon ki bann lezot mouton pe fer partou lo later i en trezor. Ler ou persevere dan predikasyon, parey Pol ti dir Timote, ou kapab “sov ou lekor ek tou bann ki ekout ou.” (1 Timote 4:16) Mazinen ki sa i vedir. Sa bon nouvel ki ou prese i donn loportinite lezot pour viv pour touzour. Ou kapab devlop en bon lanmitye avek bann ki ou’n ede spirityelman. Mazin sa lazwa pour viv pour touzour dan Paradi avek bann ki ou’n ede aprann konn Bondye! Zot pa pou zanmen oubliy zefor ki ou’n fer pour ed zot. Sa pou donn ou en vre satisfaksyon!
17. Akoz nou letan i en letan tre spesyal dan listwar imen?
17 Ou pe viv dan en letan tre spesyal dan listwar imen. Zanmen ankor sa bon nouvel pou ganny prese dan en lemonn ki elwannyen avek Bondye. Noe ti viv dan en lemonn koumsa, e i ti vwar li disparet. I ti’n bezwen vreman kontan pour konnen ki i ti fer lavolonte Bondye fidelman par konstri sa lars, ki ti prezerv son lavi ek son fanmiy! (Ebre 11:7) Ou osi ou kapab eksperyans sa lazwa. Mazinen ki mannyer ou pou santi dan nouvo lemonn ler ou mazin sa ki ou’n fer dan bann dernyen zour, e ou konnen ki ou ti fer tou sa ki ou kapab pour promot lentere Rwayonm.
18. Ki lasirans ek lankourazman Zeova i donn son bann serviter?
18 Alor annou kontinyen reflekte laglwar Bondye. Sa pou en keksoz ki nou pa pou zanmen oubliye. Zeova osi pa pou oubliy nou travay. Labib i donn nou sa lankourazman: “Bondye pa enzis pour li oubliy travay ki zot in fer, ni lanmour ki zot in montre pour li par servis ki zot in rann e pe kontinyen rann bann sen. Me nou oule ki sakenn antre zot i montre menm lantouzyas ziska lafen pour fer sir ki zot lesperans i realize. Nou pa oule ki zot vin pares, me imit sa bann ki par lafwa ek pasyans i erit bann promes Bondye.”—Ebre 6:10-12.
Eski ou kapab eksplike?
• Ki mannyer bann Kretyen i reflekte laglwar Bondye?
• Ki serten taktik Satan i servi pour sey fer pep Bondye reste trankil?
• Ki levidans ki montre lespri Bondye i lo nou?
[Kestyon]
[Portre lo paz 9]
Figir Moiz ti reflekte laglwar
[Portre lo paz 10]
Nou reflekte laglwar Bondye dan nou predikasyon