Mars avek Bondye dan sa Letan kritik

“Enok ti kontinyen mars avek sa vre Bondye. Apre i ti nepli, akoz Bondye ti pran li.”​—ZENEZ 5:24.

1. Kwa ki fer lavi difisil ozordi?

LETAN i kritik! Sa parol i byen dekrir sa plizyer lannen problenm ek vyolans ki limanite in eksperyanse depi ki Rwayonm Mesyanik ti ganny etabli an 1914. Pandan tou sa letan, limanite in antre dan bann “dernyen zour.” Bann katastrof tel parey lafamin, maladi, tranbleman-d-ter, ek lager in ravaz limanite ziska en degre ki zanmen zot in deza eksperyanse oparavan. (2 Timote 3:1; Revelasyon 6:1-8) Bann ki pe ador Zeova pa’n ganny eparnyen avek tousala. Ziska en serten degre, nou tou nou bezwen fer fas avek bann difikilte ek lensertitid ki egziste ozordi. Presyon ekonomik, problenm politik, krim, ek maladi, i zis detrwa parmi sa kantite keksoz ki fer lavi vreman difisil.

2. Ki defi bann serviter Zeova in fer fas avek?

² Alors, sa in fer ki plizyer serviter Zeova in bezwen andir persekisyon sever enn deryer lot, anmezir ki Satan i kontinyen fer lager kont sa bann “ki obei komannman Bondye e ki fidel avek temwanyaz Zezi.” (Revelasyon 12:17) Menm si pa nou tou ki’n soufer avek bann persekisyon direk, tou vre Kretyen i bezwen lalit avek Satan ek sa leta lespri ki i promote parmi bann imen. (Efezyen 2:2; 6:12) Nou bezwen toultan reste vizilan pour nou pa ganny enfliyanse par sa leta lespri, vi ki i egziste dan landrwa travay, kot lekol, e nenport ki landrwa kot nou bezwen zwenn bann dimoun ki napa okenn lentere dan vre ladorasyon.

Mars avek Bondye, me pa avek Lemonn

3, 4. Dan ki fason Kretyen i diferan avek sa lemonn?

³ Pareyman, bann Kretyen dan premye syek ti bezwen lit en kantite kont sa lespri  lemonn, e sa ti fer zot vreman diferan avek bann ki pa ti dan kongregasyon Kretyen. Pol ti dekrir sa diferans ler i ti ekrir: “Mon sipliy zot o non Senyer: arete swiv mannyer viv bann payen ki mars dapre zot lespri ki pa vo nanryen. Zot lespri i dan fernwanr. Zot napa okenn par dan sa nouvo lavi ki Bondye i donnen, akoz zot konpletman inyoran e zot refize ekoute. Zot in perdi tou pider, zot in abandonn zot lekor dan tou sort vis e zot fer tou sort move keksoz san okenn kontrol.”—Efezyen 4:17-19.

⁴ Pa sa bann parol i byen dekrir sa gran fernwanr ki sa lemonn, dan letan Pol ek nou letan, i ladan spirityelman e moralman! Zis parey dan premye syek, bann Kretyen ozordi pa “swiv mannyer viv bann payen.” Okontrer, zot annan sa gran privilez pour mars avek Bondye. I vre, serten dimoun i kapab demande si i fer sans pour dir ki bann senp imen enparfe i kapab mars avek Zeova. Annefe, Labib i montre ki zot kapab. Anplis ki sa, Zeova i ekspekte zot mars avek li. Dan wityenm syek avan nou lepok, profet Mika ti ekrir sa parol enspire: “Ki Zeova pe demann ou an retour apard ki demontre lazistis, kontan labonte, e mars dan en fason modes avek ou Bondye?”—Mika 6:8.

Konman e akoz nou devret mars avek Bondye?

5. Ki mannyer en imen enparfe i kapab mars avek Bondye?

⁵ Ki mannyer nou kapab mars avek en Bondye ki envizib e tou pwisan? Byensir, pa dan menm fason ler nou pe mars avek en dimoun. Dan Labib sa mo ‘marse’ i kapab vedir “swiv en serten fason fer keksoz.” * Avek sa antet, nou konpran ki ler en dimoun i mars avek Bondye i viv son lavi dan lafason ki Bondye i oule e ki fer Li plezir. Kan nou viv dan sa fason, sa i fer nou diferan avek laplipar dimoun dan nou lantouraz. Toudmenm, i sa pli bon swa pour en Kretyen. Akoz? I annan en kantite rezon.

6, 7. Akoz mars avek Bondye i sa pli bon fason pour viv?

⁶ Premyerman, Zeova i nou Kreater, sa enn ki Sours lavi e ki donn nou tou sa ki nou bezwen pour viv. (Revelasyon 4:11) Alors, zis li ki annan drwa dir nou konman nou devret marse. Deplis, mars avek Bondye i sa pli bon fason pour viv. Pour bann ki pe mars avek li, Zeova in fer li posib pour zot pese ganny pardonnen e i’n donn zot sa lespwar pour viv pour touzour. Nou Papa ki kontan nou en kantite, in osi fourni bon konsey ki ed sa bann ki pe mars avek li pour reisi dan lavi depi konmela menm. Sa i leka menm si zot enparfe e pe viv dan en lemonn ki anba pouvwar Satan. (Zan 3:16; 2 Timote 3:15, 16; 1 Zan 1:8; 2:25; 5:19) En lot rezon akoz nou devret mars avek Bondye, se ki i promot lape ek linite dan kongregasyon.—Kolosyen 3:15, 16.

⁷ Finalman, rezon pli enportan akoz nou devret mars avek Bondye, se ki nou montre nou pozisyon an rapor avek sa kestyon ki ti ganny leve dan zarden Edenn, sa kestyon lo si Bondye i annan drwa pour dirize. (Zenez 3:1-6) Par lafason ki nou viv nou klerman demontre ki nou siport Zeova, e san okenn lafreyer  nou fer konnen ki se li tousel ki annan drwa dirize. (Psonm 83:18) Alor, nou azir an akor avek nou lapriyer ki son non sen i ganny glorifye e ki son lavolonte i ganny akonpli. (Matye 6:9, 10) Vreman bann ki’n swazir pour mars avek Bondye i saz! Zot kapab asire ki zot pe al dan sa bon direksyon, akoz Labib i dir ki Zeova ‘tousel ki posed lasazes.’ I pa zanmen fer fot.—Romen 16:27.

8. Ki mannyer letan ki Enok ek Noe ti pe viv ladan i parey avek nou letan?

⁸ Me ki mannyer i posib pour viv konman en Kretyen i devret, dan en letan kot i vreman kritik e kot laplipar dimoun pa enterese pour servi Zeova? Nou pou vwar larepons kan nou egzamin legzanp bann serviter fidel dan lepase ki ti reste fidel dan bann letan vreman difisil. De parmi ti Enok ek Noe. Tou le de ti viv dan en letan ki parey avek nou letan ozordi. Mesanste ti’n ranpli later. Dan letan Noe, later ti ranpli avek vyolans ek limoralite. Me kantmenm sa, Enok ek Noe ti reziste sa leta lespri lemonn dan zot letan, e zot ti mars avek Zeova. Konman zot ti kapab fer sa? Pour reponn sa kestyon, dan sa lartik nou pou egzamin legzanp Enok. Dan lot lartik nou pou egzamin legzanp Noe.

Enok ti mars avek Bondye dan en Letan kritik

9. Ki lenformasyon nou annan lo Enok?

⁹ Enok ti premye dimoun ki Labib i dir ti mars avek Bondye. I dir: “Apre ki i ti fer Metousela, Enok ti kontinyen mars avek sa vre Bondye.” (Zenez 5:22) Apre ki Labib ti fer resorti lakantite letan ki Enok ti viv, ki vreman long ler ou konpar li avek lakantite letan ki nou viv konmela, me ki ti kourt pour sa letan, Labib i dir: “Enok ti kontinyen mars avek sa vre Bondye. Apre i ti nepli, akoz Bondye ti pran li.” (Zenez 5:24) Evidaman, Zeova ti pran Enok pour ki i mor, avan ki son bann lennmi ti poz lanmen lo li. (Ebre 11:5, 13) Apard sa detrwa verse, Labib pa koz bokou lo Enok. Antouka, avek lenformasyon ki nou annan ek lezot ankor, nou annan bon rezon pour dir ki Enok ti viv dan en letan kritik.

10, 11. (a) Ki mannyer koripsyon ti ranpli later apre ki Adan ek Ev ti rebele? (b) Ki mesaz profetik Enok ti prese, e ki ti reaksyon bann dimoun?

¹⁰ Par egzanp, annou egzaminen ki mannyer koripsyon ti’n ranpli later apre ki Adan ti’n fer pese. Labib i dir nou ki premye garson Adan, Kaen, ti vin premye kriminel kan i ti touy son frer Abel. (Zenez 4:8-10) Apre ki Abel ti’n ganny touye dan en fason kriyel, Adan ek Ev ti  ganny ankor en garson e zot ti apel li Set. Labib i dir sa lo li: “Set osi ti ganny en garson e i ti apel li, Enos. Sa letan zot ti konmans kriy non Zeova.” (Zenez 4:25, 26) I malere pour dir ki sa letan zot pa ti pe kriy non Zeova dan en bon fason. * Plizyer lannen apre ki Enos ti ne, Lamek, en desandans Kaen ti konpoz en kantik pour son de madanm e i ti fer resorti ki i ti’n touy en zennonm ki ti’n bles li. I ti osi donn sa lavertisman: “Si set fwa i bezwen annan vanzans pour lanmor Kaen, alor i bezwen annan vanzans swasanndiset fwa pour lanmor Lamek.”—Zenez 4:10, 19, 23, 24.

¹¹ Sa detrwa laprev ki nou’n egzaminen i montre nou ki sa koripsyon ki Satan ti fer dan zarden Edenn, toudswit ti anmenn mesanste parmi desandans Adan. Dan en tel lanvironnman, Enok ti pe servi konman en profet pour Zeova e son bann parol enspire ki pwisan, i ankor fer lefe ozordi. Zid i fer resorti sa ki Enok ti profetize: “La [Zeova] pe vini avek plizyer dizenn milye lanz sen, pour ziz tou dimoun, e pour kondann tou peser, pour zot move laksyon ki zot in fer dan zot revolt kont Bondye, e pour tou zot parol lensilt ki zot in dir kont li.” (Zid 14, 15) Sa bann parol pou ganny son lakonplisman final zour Armagedon. (Revelasyon 16:14, 16) Nou kapab asire ki dan letan Enok, en kantite “peser” ti santi zot agase kan zot ti tann Enok pe profetize. Pa Zeova i vreman bon, lefe ki i ti pran sa profet pour zot pa touy li!

Kwa ki ti donn Enok sa Lafors pour mars avek Bondye?

12. Kwa ki ti fer Enok diferan avek dimoun dan son lepok?

¹² Dan zarden Edenn, Adan ek Ev ti ekout Satan e Adan ti rebel kont Zeova. (Zenez 3:1-6) Zot garson Abel ti swiv en lot semen e i ti ganny laprouvasyon Zeova. (Zenez 4:3, 4) Malerezman, lamazorite desandans Adan pa ti parey Abel. Me Enok ki ti ne plizyer santenn lannen plitar, li i ti swiv legzanp Abel. Ki diferans ti annan ant Enok ek sa plizyer desandans Adan? Zapot Pol i reponn sa kestyon: “Par lafwa, Enok ti ganny anleve . . . pour ki i pa pas par lanmor. Personn pa ti war li, akoz Bondye ti’n pran li; avan sa, i’n ganny ateste konman enn ki ti fer plezir Bondye.” (Ebre 11:5) Enok ti form parti sa “gro nyaz temwen [avan lepok Kretyen,]” ki ti demontre lafwa dan en fason ekstraordiner. (Ebre 12:1) Lafwa ki ti fer li posib pour Enok gard en bon kondwit pandan sa 300 zan ki i ti viv, ki trwa fwa lakantite letan ki laplipar nou i viv ozordi.

13. Ki kalite lafwa Enok ti annan?

¹³ Pol ti dekrir lafwa Enok ek lezot temwen kan i ti ekrir: “Lafwa i lasirans dan keksoz ki ou pe espere, e sertitid keksoz ki ou pa’n war.” (Ebre 11:1) Wi, lafwa i vedir annan konfyans dan sa ki nou pe ekspekte e nou asire ki i pou vin vre. Sa ekspektasyon i sitan for ki i annan en lefe lo sa ki nou konsider pli enportan dan lavi. Sa kalite lafwa ti ed Enok pour mars avek Bondye menm si bann dimoun dan son lantouraz pa ti fer parey li.

14. Lo ki kalite konnesans egzakt lafwa Enok ti baze?

¹⁴ Vre lafwa i baze lo konnesans egzakt. Ki  konnesans Enok ti annan? (Romen 10:14, 17; 1 Timote 2:4) San okenn dout i ti konnen ki ti’n arive dan zarden Edenn. I probab ki i ti osi konnen konman lavi ti ete dan sa landrwa, ki petet ti ankor egziste menm si personn pa ti kapab antre. (Zenez 3:23, 24) Abel ti konnen ki plan Bondye i ki desandans Adan i ranpli later e fer later antye vin en paradi, parey ti ete okonmansman. (Zenez 1:28) Anplis ki sa, Enok ti vreman apresye sa promes ki Zeova ti’n fer pour anvoy en Semans ki pou kraz Satan e retir tou bann move lefe ki i’n anmennen. (Zenez 3:15) Anfet, bann profesi ki Enok ti’n ganny enspire pour ekrir, ki’n ganny prezerve dan liv Zid, i annan pour fer avek destriksyon desandans Satan. Lefe ki Enok ti annan lafwa, nou konnen ki i ti ador Zeova konman sa enn ki “rekonpans tou bann ki rod li.” (Ebre 11:6) Menm si Enok ti napa tou sa konnesans ki nou nou annan ozordi, i ti annan ase konnesans pour ed li devlop en lafwa ferm. Avek sa kalite lafwa i ti kapab reste fidel dan bann letan kritik.

Imit Legzanp Enok

15, 16. Ki mannyer nou kapab swiv sa semen ki Enok ti pran?

¹⁵ Vi ki parey Enok, nou anvi fer plezir Zeova dan sa letan kritik ozordi, nou devret swiv legzanp Enok. Nou devret ganny e gard sa konnesans egzakt lo Zeova ek son plan. Me nou bezwen plis ki sa. Nou bezwen les sa konnesans egzakt gid nou semen. (Psonm 119:101; 2 Pyer 1:19) Nou bezwen les nou ganny gide par fason panse Bondye, e toultan fer zefor pour fer li plezir dan tou nou panse ek aksyon.

¹⁶ Nou napa okenn lenformasyon ki montre ki ti annan lezot dimoun dan letan Enok ki ti pe servi Zeova, me i kler ki li tousel oubyen en pti poursantaz dimoun ki ti pe servi Zeova sa letan. Ozordi osi i napa en kantite Temwen Zeova, me sa pa dekouraz nou. Nenport ki ki kapab kont nou, Zeova pou siport nou. (Romen 8:31) Avek kouraz, Enok ti averti ki Bondye ti pe al detrir bann move dimoun. Nou osi nou annan kouraz anmezir ki nou pres “sa Bonn Nouvel Rwayonm,” kantmenm dimoun i sikann nou, opoz nou e persekit nou. (Matye 24:14) Enok pa ti viv menm kantite letan avek bann dimoun dan son letan. Me kantmenm sa i pa ti met son lespwar dan sa lemonn. Son lizye ti fikse lo en keksoz pli meyer. (Ebre 11:10, 35) Nou osi nou lizye i fikse lo lakonplisman plan Zeova. Anfet, nou pa profit omaksimonm tou sa ki i annan dan sa lemonn. (1 Korentyen 7:31) Plito, premyerman nou servi nou lafors ek resours dan servis Zeova.

17. Ki konnesans nou annan ki Enok ti napa, e ki nou devret fer?

¹⁷ Enok ti annan lafwa ki sa Semans ki Bondye ti’n promet ti pou aparet dan letan ki Zeova ti’n fikse. Ozordi i fer apepre 2,000 an depi ki sa Semans, Zezi Kri, in aparet, sakrifye son lavi, ouver semen pour nou e osi byen pour bann temwen fidel dan lepase tel parey Enok, pour ganny lavi eternel. Sa Semans i aprezan lerwa dan Rwayonm Bondye, i’n tir Satan dan lesyel e zet li lo later, e se pour sa rezon ki nou vwar sa kantite keksoz mal toultour nou. (Revelasyon 12:12) Wi, ozordi nou annan plis konnesans ki Enok ti annan. Alor annou annan en lafwa for parey li. Nou swete ki nou konfyans dan lakonplisman promes Bondye i enfliyans nou dan tou sa ki nou fer. Parey Enok annou mars avek Bondye menm si nou pe viv dan en letan kritik.

[Not anba lo paz]

Ki ou pou reponn?

• Ki savedir mars avek Bondye?

• Akoz mars avek Bondye i sa pli bon fason viv?

• Kwa ki ti ed Enok pour mars avek Bondye dan letan kritik?

• Ki mannyer nou kapab imit Enok?

[Kestyon]

[Portre lo paz 23]

En madanm, lo kote drwat: FAO photo/B. Imevbore; batiman ki pe tonbe: San Hong R-C Picture Company

[Portre lo paz 25]

Par lafwa, “Enok ti kontinyen mars avek sa vre Bondye”

[Portre lo paz 26]

Nou san poursan krwar ki bann promes Zeova pou vin vre