Nou pou mars onon nou Bondye Zeova
Nou pou mars onon nou Bondye Zeova
“Me nou, nou pou mars onon nou Bondye Zeova pour en letan endefini, wi pour touzour.”—MIKA 4:5.
1. Ki mannyer limoralite ti ete dan letan Noe e ki mannyer Noe ti diferan?
ENOK i sa premye zonm ki Labib i dir ti mars avek Bondye. Swivi par Noe. Labib i dir: “Noe ti en zonm drwat. I ti montre li san defo parmi son bann kontanporen. Noe ti mars avek sa vre Bondye.” (Zenez 6:9) Dan letan Noe, imen an zeneral ti’n elwannyen avek vre ladorasyon. Sa move sitiasyon ti vin pli pir kan bann lanz enfidel ti annan relasyon seksyel avek bann madanm, e an rezilta zot zanfan ki ti ne ti bann Nefilim. Savedir bann “ki for” oubyen “bann zonm renonmen” dan sa letan. I pa drol alor ki later ti ranpli avek vyolans! (Zenez 6:2, 4, 11) Kantmenm sa, Noe ti reste san defo, e i ti pres ladrwatir. (2 Pyer 2:5) Kan Bondye ti demann li pour konstri en lars pour sov bann imen, Noe ti obei, i “ti fer tou dapre sa ki Bondye ti’n donn li lord pour fer. I ti fer egzakteman parey.” (Zenez 6:22) Vreman Noe ti mars avek Bondye.
2, 3. Ki bon legzanp Noe in donn nou ozordi?
2 Kan Pol ti ekrir en lalis bann temwen fidel, i ti enkli Noe ladan: “Par lafwa, Noe ti ekout lavertisman ki Bondye ti donn li konsernan keksoz ki ziska prezan personn pa ti ankor war. Noe ti obei e konstri en lars pour sov son fanmir; ensi i ti kondann lemonn, e i ti ganny konsidere konman en zeritye lazistis ki nou ganny par lafwa.” (Ebre 11:7) Pa sa i en legzanp ekselan! Lefe ki i ti annan konfyans ki parol Zeova pou vin vre, Noe ti donn plis son letan, lenerzi ek resours pour kapab fer sa ki Bondye ti’n demann li. Pareyman, bokou ozordi in rezet bann loportinite dan sa lemonn, e donn plis zot letan, lenerzi, ek resours pour obei komannman Zeova. Zot lafwa i remarkab, e an rezilta zot ansanm avek lezot dimoun pou kapab ganny sove.—Lik 16:9; 1 Timote 4:16.
3 I ti bezwen difisil pour Noe ek son fanmiy demontre lafwa, zis parey i ti difisil pour Enok, granper Noe, ki nou’n diskite dan lartik avan. Dan letan Noe ek Enok, ti napa bokou vre adorater Bondye. Zis wit dimoun ki ti fidel e ki ti reste vivan zour deliz. Noe ti pres ladrwatir dan en lemonn ranpli avek vyolans ek limoralite. Menm si personn pa ti’n zanmen vwar en deliz avan, Noe ansanm avek son fanmiy ti pe konstri en manman lars an bwa pour prepar zot pour sa deliz ki ti pe al arive lo later antye. Bann dimoun ki ti pe obzerv zot, ti’n bezwen vwar sa vreman drol.
4. Ki fot bann kontanporen Noe ti fer ki Zezi ti met lanfaz lo la?
4 I enteresan pour note ki ler Zezi ti mansyonn letan Noe, i pa ti koz lo vyolans, fo larelizyon oubyen limoralite, menm si tousala ti bann keksoz serye. Refize ekout lavertisman, i sa keksoz mal ki Zezi ti met lanfaz lo la. I ti dir ki zot ti pe “manze e bwar, dimoun ti pe marye e zot ti pe fer marye zot fiy, ziska ki Noe ti antre dan lars.” Eski i ti mal pour manze, bwar, marye, fer marye zot fiy? Pa zot ti pe zis viv en lavi “normal!” Me en deliz ti pe vini, e Noe ti pe pres ladrwatir. Son parol ek son aksyon ti’n devret konman en lavertisman pour zot. Kantmenm sa, zot “pa ti pran kont nanryen ziska deliz ti vini e balye zot tou.”—Matye 24:38, 39.
5. Ki kalite Noe ek son fanmiy ti bezwen annan?
5 Kan nou reflesir lo sa letan, nou vwar ki Noe ti viv dan en fason saz. Me dan sa letan avan deliz, i ti demann kouraz pour diferan avek lezot. Noe ek son fanmiy ti bezwen annan en konviksyon ferm pour zot kapab konstri sa manman lars e met bann diferan zannimo ladan. Eski parfwa serten parmi sa fanmiy fidel ti swete ki dimoun pa tro remark zot e anvi zis viv en lavi “normal?” Menm si parler zot ti santi koumsa, zot ti kontinyen mars dan en fason san defo. Apre plizyer lannen, pli long ki okenn kantite letan nou bezwen andire dan sa sistenm, sa lafwa ki Noe ti annan ti fer li reste vivan pandan sa deliz. Annefe, Zeova ti anmenn zizman lo tou sa bann ki ti pe viv en lavi “normal,” e ki pa ti pran okenn kont sinifikasyon sa letan ki zot ti pe viv ladan.
Ankor enn Fwa, Vyolans i ranpli Later
6. Kwa ki ti ankor egziste apre deliz?
6 Apre ki later ti sek, imen ti rekonmans en nouvo lavi. Me imen ti ankor enparfe e “tandans dan leker zonm,” ti ankor “move depi zot zenes.” (Zenez 8:21) Deplis, menm si bann demon ti nepli kapab pran lekor imen, zot ti ankor vreman aktif. Pa bokou letan apre, sa lemonn ki ti elwannyen avek Bondye ti montre ki i ti “dan pouvwar dyab.” Pareyman, bann vre adorater Bondye ozordi i bezwen lager kont “tou bann riz Dyab.”—1 Zan 5:19; Efezyen 6:11, 12.
7. Ki mannyer vyolans ti ogmante apre deliz?
7 Me apre deliz, dan letan Nimrod, later ti ranpli avek vyolans. Lefe ki popilasyon ti ogmante e ti annan plis progre dan teknolozi, sa ti fer ki avek letan i’n annan plis vyolans. Boner dan listwar imen ti annan lepe, lans, lark ek son dart, e osi saret lager. Epi, nou’n vwar bann premye fizi, kannon, e boner dan ventyenm syek nou’n osi vwar lezot fizi ek zarm sofistike. Premye lager mondyal ti anmenn bann zarm pli danzere, tel parey avyon, tenk, soumaren ek gaz anpwazonnen. Diran sa lager, sa bann zarm in pran lavi plizyer milyon dimoun. Eski sa ti en sok? Non.
8. Konman Revelasyon 6:1-4 in ganny akonpli?
8 An 1914, Zezi ti vin lerwa dan Rwayonm Bondye, e depi sa letan nou’n antre dan “Zour Senyer.” (Revelasyon 1:10) Dan en vizyon ki ganny rikorde dan liv Revelasyon, Zezi i ganny vwar konman en Lerwa ki pe al pour ganny laviktwar lo en seval blan. Par deryer li ti annan lezot kavalye, e sakenn pe reprezant bann fleo ki limanite pou bezwen sibir. Enn parmi pe mont en seval rouz konman dife, e i ti’n ganny pouvwar pour “fer disparet lape lo later, pour ki dimoun i a touy kanmarad; e zot ti donn li en gran sab.” (Revelasyon 6:1-4) Sa seval ek son kavalye i reprezant lager, e sa gran sab i reprezant sa kantite destriksyon ki lager denozour ek son bann zarm pwisan in anmennen. Sa bann zarm ozordi i enkli zarm nikleer, zis enn i kapab detrir plizyer milye dimoun. I osi annan bann roket ki kapab viz sa bann zarm nikleer ziska en zistans plizyer milye kilomet. San oubliy bann zarm biolozik e kemikal sofistike ki kapab detrir en kantite dimoun.
Nou pran kont Lavertisman Zeova
9. Ki mannyer sa lemonn ozordi i ete konpare avek letan Noe avan deliz?
9 Zeova ti anmenn en destriksyon dan letan Noe akoz bann Nefilim ti’n fer bann imen vin vreman vyolan. Me ozordi? Eski i annan mwens vyolans ki dan letan Noe? Non! Zis parey dan letan Noe, dimoun ozordi pe kontinyen fer zot bann keksoz dan lavi toulezour, zot pe esey viv en lavi “normal” san pran kont sa lavertisman ki pe ganny donnen. (Lik 17:26, 27) Alor, eski nou annan okenn rezon pour nou doute si Zeova pou detrir sa lemonn ankor enn fwa? Non, nou napa.
10. (a) Ki lavertisman ki toultan pe ganny repete dan bann profesi Labib? (b) Ki sa sel pli bon fason pour viv ozordi?
10 Plizyer santenn lannen avan deliz, Enok ti profetize ki pou annan en destriksyon dan nou letan. (Zid 14, 15) Zezi osi ti koz lo sa “gran ladetres” ki pe vini. (Matye 24:21, NW ) Lezot profet ti osi averti konsernan sa letan. (Ezekyel 38:18-23; Danyel 12:1; Yoel 2:31, 32) Kan nou lir dan liv Revelasyon, nou kapab vwar dan nou lespri sa destriksyon final. (Revelasyon 19:11-21) Nou pe imit Noe e nou pres ladrwatir avek devouman. Nou pran kont lavertisman Zeova, e avek lanmour nou ed nou vwazen pour fer parey. Anfet, parey Noe nou mars avek Bondye. Annefe, i tre enportan pour nenport ki ki ti a kontan ganny lavi kontinyen mars avek Bondye. Ki mannyer nou kapab fer sa avek sa kantite presyon ki nou gannyen toulezour? Nou bezwen devlop lafwa for dan lakonplisman plan Bondye.—Ebre 11:6.
Kontinyen mars avek Bondye dan Letan kritik
11. Dan ki fason nou imit bann Kretyen dan premye syek?
11 Dan premye syek, dimoun ti konn bann Kretyen swazir konman bann ki swiv “Semen Senyer.” (Akt 9:2) Dan lafason zot ti viv, zot ti demontre ki zot annan lafwa dan Zeova ek Zezi Kri. Zot ti swiv sa semen ki zot Met ti pran. Bann Kretyen fidel ozordi i fer menm parey.
12. Ki ti arive apre ki Zezi ti’n fer mirak pour nouri en lafoul?
12 En levennman ki ti arive dan minister Zezi, i montre nou lenportans pour annan lafwa. En zour Zezi ti fer en mirak kot i ti nouri apepre 5,000 zonm. Bann dimoun ti sirprann e kontan. Me remarke ki ti arive answit. Nou lir: “Ler bann dimoun ti’n vwar sa mirak ki Zezi ti’n fer, zot ti dir, ‘Sa i vreman sa Profet ki devre vin dan lemonn!’ Zezi ti realize ki zot ti a pe vin pran li pardfors pour fer li lerwa. Alor i ti al ankor dan montanny li tousel.” (Zan 6:10-15) Sa zour swar i ti al dan en lot landrwa. Lefe ki Zezi ti refize vin lerwa, sa ti dezapwent en kantite dimoun. Apre tou, i ti’n montre ki i ti annan ase lasazes pour vin lerwa e ki i ti annan sa pwisans pour satisfer bezwen fizik tou dimoun. Me i pa ti ankor ler pour Zeova fer li vin Lerwa. Deplis, son Rwayonm ti pou dan lesyel, pa lo later.
13, 14. Ki pwennvi bokou ti annan e konman zot lafwa ti ganny teste?
13 Kantmenm sa, Zan i dir ki sa lafoul ti determinen pour swiv Zezi e zot ti vwar li “lot kote lak.” Akoz zot ti swiv li, menm si i pa ti oule zot fer li vin lerwa? Bokou ti demontre par zot aksyon ki zot ti pe mazin bann keksoz fizik, akoz zot ti pe koz lo manze ki Zeova ti donnen dan dezer dan letan Moiz. Alor, zot ti anvi ki Zezi i kontinyen donn zot manze. Zezi ti vwar zot move motivasyon e i ti konmans ansenny zot laverite ki ti pou kapab ed zot aziste zot fason panse. (Zan 6:17, 24, 25, 30, 31, 35-40) An rezilta en kantite ti konmans konplent avek li, sirtou kan i ti donn en legzanp: “An verite, an verite, mon dir zot, si zot pa manz laser Fis-de-Lonm, e bwar son disan, zot pa pou annan lavi dan zot. Sa ki manz mon laser e bwar mon disan i annan lavi eternel, e mon pou resisit li zour lafen.”—Zan 6:53, 54.
14 Souvannfwa, bann legzanp Zezi ti pous dimoun pour montre si zot vreman anvi mars avek Bondye. Sa enn pa ti en leksepsyon. I ti pous zot pour demontre zot reaksyon. Nou lir: “Apre ki zot ti’n ekout Zezi, bokou parmi son bann disip ti dir, ‘Sa lansennyman i dir. Lekel ki kapab ekout sa?’ ” Epi Zezi ti dir ki zot bezwen rode ki sa parol i vedir dan en sans spirityel. I ti dir: ‘Se lespri ki donn lavi; laser napa valer. Bann parol ki mon’n dir i Lespri e i lavi.’ Kantmenm sa, bokou ti kontinyen pa ekoute, e levanzil i dir: “Depi sa, bokou son bann disip ti dekile e zot ti aret swiv li.”—Zan 6:60, 63, 66.
15. Ki bon pwennvi serten disip Zezi ti annan?
15 Antouka, pa tou disip ki ti kit li. I vre, bann disip fidel pa ti byen konpran ki Zezi ti’n dir. Me kantmenm sa, zot ti ankor pe met tou zot konfyans dan li. Pyer, enn parmi bann disip fidel, ti eksprim sa menm santiman avek lezot disip kan i ti dir: “Senyer, kot lekel nou pou ale? Ou annan parol lavi eternel.” (Zan 6:68) Pa sa i en tre bon latitid ek en bon legzanp!
16. Ki mannyer nou kapab ganny teste, e ki bon pwennvi nou devret annan?
16 Parey bann premye disip, nou osi nou kapab ganny teste ozordi. Dan nou ka, nou kapab dezapwente akoz bann promes Zeova pa’n ganny akonpli deswit parey nou ti anvi. Nou kapab santi ki leksplikasyon lo Labib dan nou bann piblikasyon i difisil pour konpran. Lafason ki enn nou konpanyon Kretyen i konport li i kapab fer nou mekontan. Eski i pou byen pour nou aret mars avek Bondye pour sa bann tel rezon oubyen lezot rezon parey? Non! Bann disip ki ti aret swiv Zezi ti demontre ki zot pa ti mazin parey Bondye. Nou bezwen evite fer menm keksoz.
“Nou pa parmi sa bann Dimoun ki retourn an aryer”
17. Ki led nou kapab gannyen pour kontinyen mars avek Bondye?
17 Zapot Pol ti ekrir: “Tou lekritir i enspire par Bondye.” (2 Timote 3:16) Par mwayen Labib, Zeova i dir nou dan en fason kler: “La sa semen. Mars lo la.” (Izai 30:21) Kan nou obeir Parol Bondye, sa i ed nou pour ‘fer byen atansyon ki mannyer nou viv.’ (Efezyen 5:15) Etidye Labib e reflesir lo sa ki nou aprann pou permet nou kontinyen mars “dan laverite.” (3 Zan 3) Zis parey Zezi ti dir: ‘Se lespri ki donn lavi; laser napa valer.’ Sa sel gidans ki nou kapab depan lo la pour diriz nou semen i gidans spirityel, e sa nou ganny li atraver Parol Zeova, son lespri, ek son lorganizasyon.
18. (a) Ki fot serten i fer? (b) Ki kalite lafwa nou annan?
18 Ozordi, bann ki zot move pwennvi i fer zot dezapwente, oubyen akoz sa ki zot ti pe ekspekte pa’n ganny akonpli, souvan zot konmans profit tou sa ki sa lemonn i ofer. Lefe ki zot nepli konsider sa letan irzan, zot pa vwar sa nesesite pour kontinyen “veye,” e zot swazir pour annan bann lobzektif egois olye met Rwayonm premye dan zot lavi. (Matye 24:42) I vreman pa saz pour viv dan sa fason. Remark sa ki zapot Pol ti dir: “Nou, nou pa parmi sa bann dimoun ki retourn an aryer e ki ganny detri, okontrer nou parmi bann ki annan lafwa e ganny sove.” (Ebre 10:39) Parey Enok ek Noe, nou pe viv dan en letan kritik, me parey zot nou annan sa privilez pour mars avek Bondye. Alor, nou kapab asire ki nou pou vwar bann promes Zeova vin vre, kan bann mesan i ganny detrir e nou pou vwar en nouvo lemonn ganny etablir. Pa sa i en lesperans merveye!
19. Ki mannyer Mika i dekrir lavi en vre adorater Bondye?
19 Anba lenspirasyon, profet Mika ti dir ki bann nasyon “sakenn pou mars onon zot bondye.” Apre i ti koz lo li ek lezot serviter fidel e dir: “Me nou, nou pou mars onon nou Bondye Zeova pour en letan endefini, wi pour touzour.” (Mika 4:5) Si ou determinen parey Mika, reste pros avek Zeova menm si sa lemonn i vin pli kritik. (Zak 4:8) Ofon nou leker, annou annan sa dezir pour mars avek Zeova nou Bondye depi konmela menm e pour en letan endefini, wi pour touzour!
Ki ou pou reponn?
• Ki mannyer nou letan i parey avek letan Noe?
• Ki semen Noe ek son fanmiy ti swiv, e ki mannyer nou kapab imit zot lafwa?
• Ki move pwennvi serten disip Zezi ti annan?
• Ki bann vre Kretyen i determinen pour fer?
[Kestyon]
[Portre lo paz 30]
Zis parey dan letan Noe, dimoun ozordi i vreman okipe avek bann aktivite toulezour
[Portre lo paz 31]
Konman bann proklanmater Rwayonm, “nou pa parmi sa bann dimoun ki retourn an aryer”