Enterpret bann Siny i en Zafer serye!

“Premye kou mon ti krwar ki nou garson Andreas ti zis ganny en latet fer mal. Me apre i pa ti oule manze e i ti devlop en gro lafyev. Son latet ti fer mal plis, e mon ti konmans trakase. Ler mon mari ti ariv kot lakour, nou ti anmenn Andreas kot dokter. Dokter ti egzamin son bann sentonm e deswit i ti anvoy Andreas lopital. Sa problenm ti pli serye ki en latet fer mal. Andreas ti annan menenzit. I ti ganny trete e en pti pe letan apre i ti byen ankor.”—Gertrud, en manman Lalmanny.

BOKOU paran i konn tre byen sa ki Gertrud in eksperyanse. Zot obzerv bann siny ki endike ki zot zanfan i kapab malad. Menm si pa tou maladi ki serye, bann paran pa kapab senpleman inyor bann sentonm en maladi dan zot zanfan. Obzerv bann siny e pran aksyon apropriye i kapab fer en gran diferans. I en zafer serye.

Sa i osi leka dan lezot keksoz apard ki lasante. En legzanp apropriye i sa tsounami ki ti arive Desanm 2004 dan bann landrwa otour Losean Endyen. Serten lorganizasyon dan bann landrwa parey Lostrali ek Awai ti detekte sa manman tranbleman-d-ter dan nor Soumatra e ti predir danze ki sa ti kapab anmennen. Me ti napa okenn sistenm an plas pour averti sa bann dimoun ki ti an danze pour zot azir. Sa ti anmenn lanmor plis ki 220,000 dimoun.

Bann Siny ki annan bokou plis Lenportans

Ler Zezi Kri ti lo later, i ti donn bann dimoun ki ti ekout li en leson lo obzerv bann siny e azir dapre sa ki zot vwar. I ti pe koz lo en keksoz ki annan bokou plis lenportans. Labib i raporte: “Bann Farizyen ek Sadiseen ti apros Zezi, pour met li dan en pyez zot ti demann li en siny pour montre ki son pouvwar i sorti kot Bondye. Me Zezi ti reponn, ‘Letan soley pe kouse, zot dir, ‘Pou fer bo-tan akoz lesyel i rouz.’ Gran maten, zot dir, ‘Pou annan move-tan akoz lesyel i rouz e sonm.’ Zot  kapab predir letan an regardan lesyel, me zot pa kapab enterpret bann siny ki konsern sa letan ki nou pe viv ladan!”—Matye 16:1-3.

Ler Zezi ti mansyonn “bann siny ki konsern sa letan,” i ti endike ki sa bann Zwif ki ti pe ekout li ti’n devret rekonnet ki zot ti pe viv dan en letan irzan. Zot ti pe al eksperyans en maler ki ti pou afekte zot tou. Detrwa zour avan son lanmor, Zezi ti koz avek son bann disip konsernan en lot siny. Sa i siny son prezans ek lafen sa lemonn. Sa ki i ti dir sa zour i tre enportan pour tou dimoun ozordi.