Mars dan menm Semen ki Zezi Kri ti marse
Mars dan menm Semen ki Zezi Kri ti marse
“Sa ki dir i ini avek [Bondye] i devre mars dan menm semen ki [Zezi] i’n marse.”—1 ZAN 2:6.
1, 2. Ki i enplike dan gard nou regar fikse lo Zezi?
ZAPOT Pol ti ekrir, “avek determinasyon annou fer sa lakours ki i’n propoz nou. Annou gard nou regar fikse lo Zezi, sa enn ki linisyater nou lafwa.” (Ebre 12:1, 2) Si nou anvi reste fidel nou bezwen gard nou regar fikse lo Zezi Kri.
2 Sa mo Grek ki’n ganny tradwir “regar fikse,” i vedir “anpes nou perdi latansyon,” “aret get en keksoz pour kapab get en lot keksoz,” oubyen “fikse nou lizye lo en keksoz.” En travay referans ti fer sa remark: “Omoman ki en atlet Grek dan en lakours i perdi son konsantrasyon lo lakours ek bi akoz i pe taye, e i get bann spektater, i pou tay pli dousman. I menm parey avek en Kretyen.” Distraksyon i kapab fer li difisil pour nou progrese spirityelman. Nou bezwen fikse nou regar lo Zezi. Ki nou pe rode avek sa Linisyater? Sa mo Grek ki’n ganny tradwir “linisyater” dan Nouvo Testaman ti osi kapab ganny tradwir azan oubyen lider prensipal ki vedir enn ki pran latet dan nenport ki keksoz e ki donn legzanp. Pour kapab gard nou regar fikse lo Zezi nou bezwen swiv son legzanp.
3, 4. (a) Ki nou bezwen fer pour kapab mars dan menm semen ki Kris ti marse? (b) Ki kestyon ki merit nou latansyon?
3 Labib i dir: “Sa ki dir i ini avek [Bondye] i devre mars dan menm semen ki [Zezi] i’n marse.” (1 Zan 2:6) Nou bezwen reste ini avek Bondye par obzerv bann komannman Zezi, zis parey i ti obzerv komannman son Papa.—Zan 15:10.
4 Anfet, pour kapab mars dan menm semen ki Zezi ti marse, nou bezwen byen obzerv li, vi ki i Lider, e nou bezwen byen swiv son lepa. Kestyon enportan ki nou bezwen reponn an konneksyon avek sa size i: Ki mannyer Kris pe diriz nou ozordi? Ki lefe i devret fer lo nou ler nou imit lafason ki i marse? Ki byenfe nou gannyen ler nou swiv model ki Kris in kite?
Ki mannyer Kris pe diriz son bann Disip
5. Avan ki Zezi ti mont dan lesyel, ki i ti promet son bann disip?
5 Avan ki i ti mont dan lesyel, Zezi Kri ki ti’n resisite ti aparet avek son bann disip, e i ti donn zot en travay enportan pour fer. I ti dir zot: “Ale e fer tou pep vin mon bann disip.” Sa zour sa Lider ti osi promet ki i ti pou avek zot anmezir ki zot akonpli sa misyon. I ti dir: “Konnen ki mwan mon avek zot toulezour, ziska lafen.” (Matye 28:19, 20) Konman Zezi i avek son bann disip dan sa letan lafen?
6, 7. Ki mannyer Zezi i diriz nou par mwayen lespri sen?
6 Zezi ti dir: “Konseyer [oubyen led], Lespri-sen ki mon Papa pou anvoye an mon non, pou ansenny zot tou keksoz, e fer zot rapel tou sa ki mon’n dir zot.” (Zan 14:26) Lespri sen ki’n ganny anvoye o non Zezi, i gid e fortifye nou ozordi. I eklersi nou spirityelman e i ed nou konpran ‘menm bann plan Bondye pli profon.’ (1 Korentyen 2:10) Anplis ki sa, bann kalite ki Bondye i annan tel parey “lanmour, lazwa, lape, pasyans, labonte, [lafwa], ladouser, kontrol lo son prop lekor,” tousala i form parti sa “fri Lespri.” (Galat 5:22, 23) Avek led lespri sen nou kapab devlop sa bann kalite.
7 Ofiramezir ki nou etidye Labib e fer zefor pour aplik sa ki nou aprann, lespri Zeova i ed nou pour annan plis lasazes, disernman, konprenezon, konnesans, zizman ek abilite pour reflesir. (Proverb 2:1-11) Lespri sen i osi ed nou pour andir bann tantasyon ek leprev. (1 Korentyen 10:13; 2 Korentyen 4:7; Filipyen 4:13) Bann Kretyen i ganny ankouraze pour ‘pirifye zot lekor avek tou sa ki sali lekor ek lespri, e fer tou pour nou vin konpletman sen.’ (2 Korentyen 7:1) Eski nou kapab fer sa ki Bondye i demann nou an rapor avek sentete oubyen lapropte san led lespri sen? En mwayen ki Zezi i diriz nou ozordi i atraver lespri sen, ki Zeova in donn li lotorizasyon pour servi.—Matye 28:18.
8, 9. Ki mannyer Kris i servi ‘lesklav fidel e pridan’ pour diriz nou?
8 Annou egzamin ankor en lot mwayen ki Zezi i servi pour diriz kongregasyon ozordi. Kan i ti pe koz lo son prezans ek lafen sa sistenm, Zezi ti dir: ‘Lekel sa lesklav fidel e pridan ki son met in plas ansarz tou lezot serviter pour donn zot zot manze kan i ler? Ere sa lesklav ki son met i war li pe fer son devwar ler i arive! An verite mon dir zot, son met pou met li ansarz tou son byen.’—Matye 24:3, 45-47.
9 Zezi Kri i “met.” Sa ‘lesklav’ i en group Kretyen swazir ki ankor lo later. Sa group lesklav in ganny sa responsabilite pour pran swen avek tou sa ki pour Zezi isi lo later, e pour donn nouritir spirityel kan i ler. En pti group bann sirveyan kalifye ki sorti parmi sa group ‘lesklav fidel e pridan,’ i bann manm Konsey Direkter, ki pe servi konman reprezantan sa group lesklav. Zot diriz travay predikasyon dan lemonn antye e fourni nouritir spirityel kan i ler. Alors, Kris pe diriz kongregasyon par mwayen sa ‘lesklav fidel e pridan’ ek son Konsey Direkter.
10. Konman nou devret azir anver bann ansyen, e akoz?
10 En lot laprev ki Kris pe dirize, se atraver bann ansyen oubyen sirveyan ki bann “kado.” Sa bann kado in ganny donnen avek bi ‘pour prepar bann sen, pour akonpli en travay ministeryel, pour konstri lekor Kris.’ (Efezyen 4:8, 11, 12) Ebre 13:7 pe refer avek bann ansyen ler i dir: “Mazin zot bann dirizan ki’n anons zot parol Bondye; get zot mannyer viv, e imit zot lafwa.” Bann ansyen i pran latet dan kongregasyon. Vi ki zot pe imit Zezi Kri, alors i vo lapenn imit zot lafwa. (1 Korentyen 11:1) Nou kapab montre nou lapresyasyon pour sa laranzman par toultan obeir e soumet avek sa bann ansyen, ki bann “kado.”—Ebre 13:17.
11. Par ki mwayen Kris pe diriz son bann disip ozordi, e ki i enplike pour mars dan menm semen ki i ti marse?
11 Wi, ozordi Zezi Kri pe diriz son bann disip par mwayen lespri sen, ‘lesklav fidel e pridan,’ ek bann ansyen dan kongregasyon. Pour kapab mars dan menm semen ki Kris ti marse, nou bezwen konpran ki mannyer Zezi i dirize e soumet avek son direksyon. Nou bezwen osi imit lafason ki i marse. Zapot Pyer ti ekrir: “Se pour sanmenm, annefe, ki Bondye in apel zot, parski Kris limenm in soufer pour zot, an lesan pour zot en legzanp pour zot swiv.” (1 Pyer 2:21) Ki lefe i devret annan lo nou ler nou swiv legzanp parfe Zezi?
Montre ou rezonnab dan Lafason ki ou servi ou Lotorite
12. Ki laspe dan legzanp Zezi ki pli enteres bann ansyen dan kongregasyon?
12 Menm si Zezi ti’n ganny plis lotorite avek son Papa ki tou dimoun, i ti rezonnab dan lafason ki i ti servi li. Tou dimoun dan kongregasyon, espesyalman bann sirveyan, i devret ‘montre zot rezonnab anver tou dimoun.’ (Filipyen 4:5; 1 Timote 3:2, 3) Lefe ki bann ansyen i annan serten lotorite dan kongregasyon, i tre enportan ki zot imit Zezi dan lafason ki zot servi zot lotorite.
13, 14. Dan ki fason bann ansyen i kapab imit Kris ler zot ankouraz lezot pour servi Bondye?
13 Zezi ti pran an konsiderasyon limit son bann disip. Zezi pa ti demann zot pour fer sa ki zot pa ti kapab fer. (Zan 16:12) San met okenn presyon, Zezi ti ankouraz son bann disip pour fer bokou zefor pour fer lavolonte Bondye. (Lik 13:24) I ti fer sa par pran latet parmi son bann disip e esey tous zot leker. Pareyman, bann ansyen ozordi pa fors lezot pour servi Bondye, par fer zot kanmi oubyen santi zot koupab. Okontrer, zot ankouraz lezot pour servi Zeova akoz zot annan lanmour pour li ek Zezi, e osi pour zot prosen.—Matye 22:37-39.
14 Zezi pa ti abiz son lotorite, par kontrol lavi dimoun. I pa ti etabli bann standar ki enposib pour swiv, oubyen fer son pake lareg. I ti apros lezot avek bi pour esey motiv zot par tous zot leker avek bann prensip ki’n ganny tire dan Lalwa Moiz. (Matye 5:27, 28) Bann ansyen i imit Zezi par evite fer bann lareg dapre zot prop santiman oubyen ensiste ki zot pwennvi personnel i toultan byen. Konsernan labiyman, fason pennyen oubyen detant ek lanmizman, bann ansyen i esey tous leker lezot par servi bann prensip dan Labib, tel parey Mika 6:8; 1 Korentyen 10:31-33; ek 1 Timote 2:9, 10.
Konpran lezot e pardonnen
15. Ki ti reaksyon Zezi anver febles son bann disip?
15 Zezi in kit en legzanp pour nou swiv dan lafason ki i ti tret febles ek fot son bann disip. Annou egzamin de keksoz ki ti arive sa dernyen swar ki i ti lo later konman en imen. Apre ki i ti’n ariv Zetsemane, Zezi ti “anmenn avek li Pyer, Zak ek Zan,” e i ti dir zot kontinyen “veye.” Apre, “i ti al en pe pli lwen, i ti tonm ater e i ti priye.” Ler i ti retournen i ti “trouv sa trwa disip pe dormi.” Ki ti reaksyon Zezi? I ti dir: “Lespri i for me laser i feb.” (Mark 14:32-38) Olye severman reprimann zot, i ti esey konpran zot! Sa menm zour swar, Pyer ti renye Zezi trwa fwa. (Mark 14:66-72) Ki mannyer Zezi ti tret Pyer apre sa ki i ti’n fer? ‘Senyer ti resisite, i ti aparet avek Simon [Pyer].’ (Lik 24:34) Labib i dir ki “i ti aparet avek Pyer e apre avek son douz zapot.” (1 Korentyen 15:5) Olye ankoler, Zezi ti pardonn e soulaz sa zapot ki ti’n repantir. Plitar, Zezi ti donn Pyer bann gro responsabilite.—Akt 2:14; 8:14-17; 10:44, 45.
16. Ki mannyer nou kapab mars dan menm semen ki Zezi ti marse ler enn nou frer oubyen ser i dezapwent nou oubyen ofans nou dan en fason ou en lot?
16 Ler enn nou frer oubyen ser Kretyen i dezapwent nou oubyen ofans nou dan en fason ou en lot akoz lenperfeksyon, eski pa nou devret esey konpran li e pardonnen zis parey Zezi ti fer? Pyer ti ankouraz son bann frer ek ser Kretyen: “Zot tou annan menm panse ek menm santiman; kontan kanmarad konman frer, annan konpasyon pour kanmarad e viv avek limilite. Pa rann lemal pour lemal, ni lensilt pour lensilt. Okontrer reponn par benediksyon.” (1 Pyer 3:8, 9) Me si i annan ki pa tret nou parey Zezi ti pou’n fer, i refize pour konpran e pardonn nou? Kantmenm sa, nou devret esey imit Zezi e azir parey i ti pou’n fer.—1 Zan 3:16.
Met Lentere Rwayonm premye
17. Kwa ki montre ki fer lavolonte Bondye ti okip premye plas dan lavi Zezi?
17 I annan ankor en lot fason ki nou bezwen mars dan menm semen ki Kris ti marse. Partaz sa bon nouvel lo Rwayonm Bondye ti sa keksoz pli enportan dan lavi Zezi. Apre ki i ti’n fini pres avek en madanm Samariten obor lavil Sikar, Samari, Zezi ti dir son bann disip: “Mon nouritir se pour obei lavolonte sa enn ki’n anvoy mwan, e fini travay ki i’n donn mwan.” (Zan 4:34) Fer lavolonte son Papa ti sa keksoz ki ti soutenir Zezi, zis parey manze ti nouri, satisfer e rafresi li. Eski ler nou imit Zezi par reste konsantre lo fer lavolonte Bondye, pa i fer nou annan en lavi ki fer sans e ki satisfezan?
18. Ki benediksyon serten i gannyen ler zot ankouraz zot zanfan pour antre dan servis aplentan?
18 Kan paran i ankouraz zot zanfan pour antre dan servis aplentan, zot ansanm avek zot zanfan i ganny en kantite benediksyon. En papa ki annan de zimo, ti ankouraz son de garson depi pti pti pour fer servis pionye vin enn zot lobzektif. Apre ki zot ti fini lekol, sa de garson ti vin pionye. Kan zot Papa ti reflesir lo lazwa ki zot in gannyen, i ti ekrir: “Nou de garson pa’n dezapwent nou. Avek lapresyasyon nou kapab dir, ‘Bann garson i en leritaz sorti kot Zeova.’ ” (Psonm 127:3) Ki byenfe bann zanfan i gannyen ler zot antre dan servis aplentan? En manman ki annan senk zanfan i dir: “Servis pionye in ed mon bann piti pour vin pli pros avek Zeova, i’n amelyor zot labitid pour fer letid personnel, i’n ed zot aprann konman pour byen servi zot letan, e i’n ed zot pour met keksoz spirityel premye dan zot lavi. Menm si zot tou zot ti bezwen fer bokou azisteman, personn pa regrete ki zot in swazir pour swiv sa semen.”
19. Ki plan bann zenn i devret annan pour lavenir?
19 Zenn ki ou plan pour lavenir? Eski ou anvi fer vreman byen dan serten karyer profesyonnel? Oubyen, eski ou pe mazin fer en karyer dan servis aplentan? Pol ti donn sa lavertisman: “Fer byen atansyon ki mannyer zot viv. Pa viv konman bann dimoun inyoran, me konman bann dimoun saz. Servi byen tou bann lokazyon ki prezant devan zot, parski letan ki nou pe viv ladan i move. Pour sa rezon pa bezwen viv konman bann enbesil, me fer tou zot posib pour zot konpran konman Senyer i oule zot azir.”—Efezyen 5:15-17.
Annou fidel
20, 21. Dan ki fason Zezi ti fidel, e ki mannyer nou kapab imit son fidelite?
20 Pour kapab mars dan menm semen ki Zezi ti marse, nou bezwen imit son fidelite. Labib i dir sa lo fidelite Zezi: “Menm ki i ti posed natir Bondye i pa ti [anvi] ran egal avek Bondye. Me, okontrer, par son prop volonte, i ti renons tou sa ki i posede pour . . . pran natir imen, konman en zonm, i ti aksepte viv dan limilite e montre li obeisan ziska lanmor, menm lanmor lo [en poto].” Zezi ti fidelman soutenir drwa Zeova pour dirize par soumet avek sa ki Bondye ti anvi i fer. I ti menm obei ziska en pwen kot i ti mor lo en poto. Nou devret annan sa ‘menm latitid’ e fidelman soumet avek lavolonte Bondye.—Filipyen 2:5-8.
21 Zezi ti osi fidel avek son bann zapot. Kantmenm zot ti enparfe e annan pwen feb, Zezi ti kontan zot “ziska lafen.” (Zan 13:1) Pareyman, nou pa devret les lenperfeksyon nou bann frer ek ser fer nou devlop en latitid pour kritike.
Swiv Legzanp ki Zezi in kite
22, 23. Ki byenfe nou gannyen kan nou fidelman swiv legzanp ki Zezi in kite?
22 Byensir, konman imen enparfe, nou pa pou kapab san poursan mars egzakteman parey Zezi ti marse. Me kantmenm sa, nou kapab fer zefor pour byen swiv son lepa. Pour kapab fer sa, nou bezwen konpran e soumet avek lafason ki Kris pe dirize e fidelman swiv legzanp ki i’n kite.
23 Kan nou imit Zezi nou ganny en kantite benediksyon. Nou lavi i annan plis sans e nou pli satisfe akoz nou pe konsantre lo fer lavolonte Bondye olye lo sa ki nou nou oule. (Zan 5:30; 6:38) Nou annan en bon konsyans. Lafason ki nou marse i vin konman en legzanp. Zezi ti envit tou bann ki ti fatige e pe anmenn fardo pour vin kot li, pour zot kapab ganny repo. (Matye 11:28-30) Kan nou swiv legzanp Zezi, nou osi nou kapab fer lezot ganny repo par nou lasosyasyon. Alors, annou kontinyen mars dan sa semen ki Kris ti marse.
Eski ou rapel?
• Ki mannyer Kris pe diriz son bann disip ozordi?
• Konman bann ansyen i kapab imit Kris dan lafason ki zot servi zot lotorite ki Bondye in donn zot?
• Ki mannyer nou kapab swiv legzanp Zezi dan lafason ki nou azir anver febles lezot?
• Dan ki fason bann zenn i kapab met lentere Rwayonm premye?
[Kestyon]
[Portre lo paz 15]
Bann ansyen i ed nou pour swiv direksyon Kris
[Portre lo paz 16]
Zenn, ki plan ou annan pour kapab ganny bann benediksyon konman en Kretyen?