Paran—Ki Lavenir ou anvi pour ou Zanfan?

“Zot zennonm e osi bann vyerz . . . Ki zot loue non Zeova.” —Psonm 148:12, 13.

1. Ki bann traka paran i annan pour zot zanfan?

ESKI i annan en paran ki pa trakas lavenir son zanfan? Omoman ki en zanfan i ne, oubyen menm avan, paran i konmans trakas konsernan byennet son zanfan. Eski i pou an bonn sante? Eski i pou devlop byen? Anmezir ki zanfan i grandi, i annan plis traka. An zeneral, paran i anvi sa ki pli meyer pour zot zanfan.—1 Samyel 1:11, 27, 28; Psonm 127:3-5.

2. Akoz bokou paran ozordi i vreman anvi zot zanfan annan en lavi konfortab ler zot vin adilt?

² Me dan sa lemonn ozordi i en defi pour paran donn zot zanfan sa ki pli meyer. Bokou paran in eksperyans letan difisil—lager, dezord politik, difikilte ekonomik, problenm fizik oubyen emosyonnel ek lezot ankor. I normal ki zot pa anvi vwar zot zanfan pas atraver menm keksoz. Dan bann pei ris, bann paran i kapab vwar garson ek fiy zot zanmi ek fanmiy pe progrese dan zot karyer e paret pe reisi dan lavi. Alor, zot santi zot anvi fer tou sa ki zot kapab pour fer sir ki zot zanfan osi pou kapab ganny en lavi ase konfortab e stab, en bon lavi, ler zot gran.—Eklezyast 3:13.

 Swazir en bon Lavi

3. Ki swa bann Kretyen in fer?

³ Konman bann disip Zezi Kri, bann Kretyen in swazir pour dedye zot lavi avek Zeova. Zot in pran aker parol Zezi: “Si en dimoun i oule swiv mwan, fodre ki i aret mazin zis li menm e pran son [poto] sak zour e swiv mwan.” (Lik 9:23; 14:27) Wi, fer sakrifis i form parti lavi en Kretyen. Me i pa vedir ki en Kretyen pou viv en lavi mizer e fer lapenn. Okontrer, i en lavi satisfezan e gou. Lavi en Kretyen i en bon lavi akoz i enplik donnen, e parey Zezi ti dir, “I annan plis lazwa pour donnen ki pour resevwar.”—Akt 20:35.

4. Ki Zezi ti ankouraz son bann disip pour rode?

⁴ Dan letan Zezi bann dimoun ti pe viv dan bann sitiasyon tre difisil. Apard ki travay dir pour ganny zot lavi, zot ti bezwen siport dominasyon kriyel bann Romen ek fardo ki larelizyon sa letan ti mete lo zot par enpoz bann lareg strik. (Matye 23:2-4) Kantmenm sa, bokou dimoun ki ti tann koz lo Zezi ti pare pour abandonn zot aktivite personnel, menm zot metye e zot ti vin son bann disip. (Matye 4:18-22; 9:9; Kolosyen 4:14) Eski sa bann disip ti pe pran en risk e pe met zot lavenir an danze? Get sa ki Zezi i dir: “Tou bann ki’n kit zot lakaz, zot frer, zot ser, zot papa, zot manman, zot zanfan, zot propriyete akoz mwan pou ganny san fwa plis e pou erit lavi eternel.” (Matye 19:29) Zezi ti asir son bann disip ki zot Papa dan lesyel ti konnen ki zot bezwen. Pour sa rezon i ti ankouraz zot: “Rod plito Rwayonm Bondye ek son lazistis, e limenm i a donn zot anplis tou lezot keksoz osi.”—Matye 6:31-33.

5. Ki mannyer serten paran i santi konsernan lasirans Zezi ki Bondye pou pran swen avek son bann serviter?

⁵ Sitiasyon i parey ozordi. Zeova i konnen ki nou bezwen, e bann ki met lentere Rwayonm premye dan zot lavi, sirtou sa bann ki dan servis aplentan, i annan sa menm lasirans ki i pou pran swen avek zot. (Malaki 3:6, 16; 1 Pyer 5:7) Me serten paran pa tro sir dan sa domenn. Zot ti ava kontan vwar zot zanfan progrese dan servis Zeova, petet en zour antre dan servis aplentan. Me de lot kote, ler zot mazin difikilte pour ganny en bon plas travay ek sitiasyon ekonomik ozordi dan lemonn, zot vwar li enportan pour zot zanfan ganny en bon ledikasyon avan. Zot mazinen ki sa i ava permet zot zanfan ganny bann kalifikasyon neseser pour ganny en bon plas travay oubyen omwen en keksoz pour depan lo la si i neseser. Souvannfwa, sa bann paran koumsa i krwar pour ganny en bon ledikasyon fodre absoliman fer en letid avanse.

 Prepar pour Lavenir

6. Dan ki fason sa mo “letid avanse” i ganny servi dan sa lartik?

⁶ Sistenm ledikasyon i diferan dan sak pei. Par egzanp Letazini, bann lekol piblik i ofer 12 lannen ledikasyon debaz. Apre sa, bann etidyan i kapab swazir pour al liniversite pour kat an oubyen plis. Zot kapab sorti avek en degre bachelor oubyen apre sa degre kontinyen fer letid dan en liniversite pour en profesyon dan lasante, lalwa, enzenyer, ek lezot. Sa nivo ledikasyon liniversite i sanmenm ki sa lartik pe refer avek ler i servi sa mo “letid avanse.” De lot kote, i annan bann lekol vokasyonnel, ki ofer bann pti kour. Sa i permet en dimoun ganny en sertifika oubyen diplonm dan serten travay mannyel oubyen serten metye.

7. Ki presyon etidyan i fer fas avek dan lekol segonder?

⁷ Lobzektif bann lekol segonder ozordi se pour prepar zot etidyan pour fer en letid avanse. Pour akonpli zot lobzektif, laplipar lekol segonder i konsantre lo bann size akademik ki pou permet bann etidyan fer byen dan legzanmen pour antre liniversite, olye konsantre lo bann kour ki pou ekip etidyan pour trouv en travay. Ozordi bann etidyan i anba bokou presyon avek zot ansennyan, konseye, kanmarad lekol, pour etablir lobzektif pour antre dan bann pli bon liniversite, kot zot ekspekte ganny en degre ki pou permet zot ganny en bon karyer ki pey byen.

8. Ki desizyon bann paran Kretyen i fer fas avek?

⁸ Alor, ki bann paran Kretyen pou fer? Byensir, zot anvi zot zanfan fer byen lekol e aprann bann skil neseser pour siport zot lekor alavenir. (Proverb 22:29) Me eski zot devret zis les zot zanfan ganny enfliyanse par sa lespri konpetisyon pour progrese e reisi dan sa lemonn? Ki kalite lobzektif zot ankouraz zot zanfan devlope, ki swa par zot parol oubyen par zot prop legzanp? Serten paran i travay en kantite e anmas larzan pour kapab anvoy zot zanfan dan bann liniversite plitar. Lezot i pare pour an det zot lekor pour kapab fer sa. Me bann paran pa devret mazin zis an term larzan ler zot pe kalkil kout sa desizyon. Konbyen i koute pour pourswiv en letid avanse ozordi?—Lik 14:28-33.

Konbyen i koute pour pourswiv en Letid avanse?

9. Ki nou kapab dir konsernan depans finansyel en letid avanse ozordi?

⁹ Ler nou mazin konbyen i pou koute, laplipar-di-tan, nou mazin an term larzan. Dan serten pei, gouvernman ki peye pour bann etidyan ki kalifye pour fer en letid avanse. Me dan laplipar landrwa, letid avanse i kout ser e i pe vin pli ser. En lartik dan New York Times i fer sa remark: “Oparavan letid avanse ti ganny konsidere konman en mwayen ki kree loportinite. Konmela letid avanse i fer ladiferans ant dimoun ki annan ek bann ki napa.” Andotmo, en bon letid avanse pe vitman vin en keksoz pour bann dimoun ris e enportan dan lasosyete. Zot fer zot zanfan fer letid avanse pour fer sir ki zot osi zot vin ris e enportan dan lasosyete. Eski bann paran Kretyen i devret swazir sa kalite lobzektif pour zot zanfan?—Filipyen 3:7, 8; Zak 4:4.

10. Dan ki fason letid avanse i relye tre pros avek fer avanse en pei?

¹⁰ Menm dan bann landrwa kot letid avanse i pour nanryen, i kapab annan serten responsabilite ki vin avek. Par egzanp, The Wall Street Journal i raporte ki dan en pei Sid Les Lazi, sa gouvernman i organiz en “sistenm lekol . . . ki volonterman pous bann pli bon etidyan anler.” Bann ki “anler” pou ganny mete dan bann pli bon lenstitisyon dan lemonn—Oxford ek Cambridge Langleter, bann lekol Ivy League Letazini, ek lezot. Akoz sa gouvernman i ofer en tel progranm? Sa rapor i dir, “pour fer progrese lekonomi.” Sa ledikasyon i kapab pour nanryen, me an  retour sa bann etidyan i bezwen angaz zot lavi antye pour fer avanse sa pei. Sa i sa pri ki zot peye. Menm si dimoun dan lemonn i rod sa kalite lavi, eski i sanmenm ki bann paran Kretyen i oule pour zot zanfan?—Zan 15:19; 1 Zan 2:15-17.

11. Ki bann rapor i montre konsernan labi lalkol ek limoralite seksyel parmi bann etidyan liniversite?

¹¹ Apre sa i annan lanvironnman sa bann liniversite. Labi drog ek lalkol, limoralite, malonnekte, i serten parmi bann move mers ki popiler dan bann liniversite. Annou vwar labi lalkol. Magazin New Scientist ti fer en rapor konsernan bwar pour sou. Sa rapor i fer resorti: “Apepre 44 poursan etidyan Letazini i bwar pour sou omwen en fwa dan en lespas de semenn.” Sa menm problenm i egziste parmi bann zenn Lostrali, Langleter, Larisi, ek lezot landrwa. Ki nou pou dir konsernan limoralite seksyel? En lartik dan Newsweek, i dekrir kalite aktivite seksyel ki egziste dan bann liniversite konmela: “En kontak seksyel ant de dimoun ki napa ni menm lentansyon pour koz avek kanmarad apre. Sa i kapab enkli anbrase oubyen menm fer sèks.” Bann letid i montre ki 60 a 80 poursan etidyan i fer sa kalite aktivite. En serser i dir, “si ou en etidyan normal dan liniversite, ou bezwen fer li.”—1 Korentyen 5:11; 6:9, 10.

12. Ki presyon bann etidyan liniversite i rankontre?

¹² Apard ki son move lanvironnman, i annan presyon travay lakour ek legzanmen. Normalman bann etidyan i bezwen etidye e fer zot travay lakour pour pas legzanmen. Petet serten i osi bezwen fer en louvraz amitan anmenmtan ki zot pe lekol. Tousala i pran en kantite zot letan ek lenerzi. Alor, ki kantite letan ek lenerzi ki pou reste pour aktivite spirityel? Ler presyon i vin tro bokou lo zot, ki sa keksoz ki zot pou met dekote? Eski lentere Rwayonm pou kontinyen reste dan premye plas, oubyen zot pou ganny met dekote? (Matye 6:33) Labib i ankouraz bann Kretyen: “Fer byen atansyon ki mannyer zot viv. Pa viv konman bann dimoun inyoran, me konman bann dimoun saz. Servi byen tou bann lokazyon ki prezant devan zot, parski sa letan ki nou pe viv ladan i move.” (Efezyen 5:15, 16) I tris ki serten in abandonn lafwa akoz zot in les lezot keksoz pran zot letan ek lenerzi oubyen akoz zot enplike dan bann move kondwit dan liniversite!

13. Ki kestyon bann paran Kretyen i devret reflesir lo la?

¹³ Byensir, limoralite, move konportman, ek presyon pa zis egziste dan bann liniversite. Bokou zenn dan lemonn i vwar sa bann kalite konportman konman en fason viv ki normal e akseptab dan liniversite. Eski bann paran Kretyen i kapab volonterman ekspoz zot zanfan avek sa kalite lanvironnman pour kat an oubyen menm plis? (Proverb 22:3; 2 Timote 2:22) Eski sa bann risk ki enplike i vo lapenn sa bann benefis ki bann zenn i kapab gannyen plitar? Pli enportan ankor, ki liniversite pe ansenny bann etidyan konsernan sa ki devret vin premye dan lavi? * (Filipyen 1:10; 1 Tesalonisyen 5:21) Bann paran i devret reflesir e priy seryezman lo sa bann kestyon, osi lo danze ki i annan pour anvoy zot zanfan al lekol dan en lot lavil oubyen en lot pei.

Eski i annan lezot Swa?

14, 15. (a) Malgre lopinyon lamazorite, ki konsey Labib ki aplik pour nou ozordi? (b) Ki kestyon bann zenn i kapab demann zot lekor?

¹⁴ Ozordi, lamazorite dimoun i krwar ki fodre absoliman bann zenn i ganny en ledikasyon liniversite pour zot reisi. Me olye swiv sa ki laplipar dimoun i krwar, bann Kretyen i obeir sa konsey dan Labib: “Pa swiv bann koutim sa monn konmela me les Bondye transform zot par en sanzman konplet dan  zot lentelizans. Pour ki zot a kapab konpran lavolonte Bondye: Sa ki bon, sa ki fer li plezir, sa ki parfe.” (Romen 12:2) Ki lavolonte Bondye pour son pep, zenn konman vye, dan sa staz final letan lafen? Pol ti ankouraz Timote: ‘Gard ou bon sans dan tou sirkonstans, siport lasoufrans, fer ou travay konman predikater levanzil, e ranpli ou devwar dan servis Bondye.’ Sirman sa parol i aplik pour nou tou ozordi.—2 Timote 4:5.

¹⁵ Olye les sa leta lespri kontan keksoz dan sa lemonn anvair nou, nou tou nou bezwen ‘gard nou bon sans’—reste konsantre spirityelman. Si ou en zenn, demann ou lekor: ‘Eski mon pe fer mon mye dan mon “travay konman predikater levanzil,” pour mwan vin en minis kalifye Parol Bondye? Ki lobzektif mon pe etablir pour mwan byen ‘ranpli mon devwar dan servis Bondye’? Eski mon’n mazin pour pran servis aplentan konman en karyer?’ Sa bann kestyon i kapab vin en defi pour ou konman en zenn, sirtou ler ou vwar lezot zenn pe rod zot lentere personnel, pe “rod bann gran keksoz” ki zot mazinen pou anmenn en lavenir briyan pour zot. (Zeremi 45:5) Alor, bann paran ki saz i kree sa bon kalite lanvironnman spirityel pour zot zanfan e donn zot sa bon formasyon spirityel depi zot lanfans.—Proverb 22:6; Eklezyast 12:1; 2 Timote 3:14, 15.

16. Ki mannyer bann paran Kretyen i kapab avek lasazes kree sa bon kalite lanvironnman spirityel pour zot zanfan?

 ¹⁶ En frer ki pli vye parmi trwa garson e ki zot manman in fer pionye pour plizyer lannen i rapel: “Manman ti vey byen lekel nou ti frekante. Nou pa ti frekant nou bann kanmarad lekol me zis sa bann dan kongregasyon ki ti annan en bon labitid spirityel. Souvannfwa i ti osi envit bann frer ek ser ki dan servis aplentan—misyonner, sirveyan, Betelit, ek pionye—dan lakour. Ekout zot leksperyans e vwar zot lazwa ti ede fer antre dan nou leker sa dezir pour pran servis aplentan.” Pa i en lazwa pour vwar ozordi tou le trwa garson dan servis aplentan—enn pe servi Betel, enn in asiste Lekol Formasyon Ministeryel, e lot i pionye!

17. Ki gidans paran i kapab donn zot zanfan ler zot pe swazir zot size lekol ek travay? (Vwar bwat lo paz 31.)

¹⁷ Apard ki kree en bon lanvironnman spirityel, osito posib bann paran i bezwen osi gid zot zanfan ler zot pe swazir bann size lekol ek formasyon vokasyonnel. En lot zennonm, ki ozordi i dan Betel, i dir: “Tou le de mon paran ti fer pionye avan e apre zot maryaz e zot ti fer zot mye pour pas sa lespri pionye avek lafanmiy antye. Ler nou ti pe swazir bann size lekol oubyen pe fer desizyon ki ti pou annan lefe lo nou lavenir, zot ti toultan ankouraz nou pour fer en swa ki ti pou ofer nou sa pli bon loportinite pour trouv en travay amitan e fer pionye.” Olye swazir bann size akademik ki viz ver en ledikasyon liniversite, paran ek zanfan i bezwen mazin bann kour ki itil pour pourswiv en karyer dan servis Bondye. *

18. Ki loportinite travay bann zenn i kapab pran an konsiderasyon?

¹⁸ Bann letid i montre ki dan bokou pei i annan en gran demann travayer pour bann travay mannyel ek diferan servis olye dimoun avek en degre liniversite. USA Today i raporte ki “70% travayer dan sa bann lannen ki pe vini pa pou bezwen en degre kat an liniversite me plito en formasyon de zan oubyen serten sertifika dan domenn vokasyonnel.” Sa bann lenstitisyon i ofer bann pti kour dan travay lofis, aranz loto, repar konpiter, plonber, kwafer, ek en kantite lezot louvraz. Eski sa i bann bon metye? Byensir! Petet zot pa atiran parey serten i mazinen, me zot kapab soutenir ou e ofer letan lib ki neseser pour bann ki zot vre travay i servi Zeova.—2 Tesalonisyen 3:8.

19. Ki pli bon fason pour trouv lazwa ek lakontantman dan lavi?

¹⁹ Labib i donn sa lankourazman: “Zot zennonm e osi bann vyerz . . . ki zot loue non Zeova, akoz zis son non tousel i gran. Son grander i parlao later ek lesyel.” (Psonm 148:12, 13) Konpare avek pozisyon ek rekonpans ki lemonn i ofer, fer en karyer dan servis aplentan pour Zeova i san dout pli bon fason pour trouv lazwa ek lakontantman dan lavi. Gard antet sa lasirans dan Labib: “Benediksyon Zeova—se sa ki fer ris, e i pa azout okenn douler avek.”—Proverb 10:22.

[Not anba lo paz]

Eski ou kapab eksplike?

• Dan ki bann vre Kretyen i met zot konfyans pour en lavenir ere?

• Ki defi bann paran Kretyen i rankontre konsernan lavenir zot zanfan?

• Ki fodre kalkile ler pe evalye lavantaz ek dezavantaz pour pourswiv letid avanse?

• Ki mannyer paran i kapab ed zot zanfan pourswiv en karyer dan servis Zeova?

[Kestyon]

[Bwat lo paz 31]

Letid avanse—ki son Valer?

Laplipar dimoun ki antre liniversite i swete ganny en degre ki pou fer li posib pour zot ganny en bon karyer ki pey byen. Me bann rapor gouvernman Ameriken i endike ki selman en kar bann ki al liniversite ki ganny en degre dan lespas sis an. Sa i en nivo ki vreman ba. Me eski sa pti gin ki ganny en degre i garanti en bon louvraz? Get sa ki bann dernyen resers i annan pour dir.

“Al lekol dan liniversite Harvard oubyen Duke pa pou otomatikman prodwir en pli bon louvraz ek en pli gro lapey. . . . Bann lakonpanni pa konn gran keksoz lo bann zenn ki’n fini lekol e pe rod en travay. En zoli degre liniversite i kapab enpresyonan. Me apre sa, sa ki dimoun i kapab fer oubyen pa kapab fer ki kont plis.”—Newsweek, le 1 Novanm 1999.

“Menm si ozordi bann louvraz i demann en abilite pli onivo ki dan lepase . . . , bann skil ki sa bann louvraz i demande i en bon ledikasyon nivo segonder, savedir matematik, lir e ekrir . . . , pa en abilite nivo liniversite. . . . Pa fodre ki bann etidyan i al liniversite pour ganny en bon louvraz, me zot bezwen devlop byen bann abilite onivo segonder.”—American Educator, Prentan 2004.

“Laplipar liniversite i byen lwen avek realite lemonn an rapor avek prepar bann etidyan pour antre dan lemonn travay apre ki zot in fini liniversite. Bann lekol vokasyonnel i paret pe vin pli popiler. Depi 1996 ziska 2000, lakantite dimoun ki’n antre dan sa bann lekol in mont par 48%. . . . Antretan, sa bann diplonm liniversite ki kout ser e pran bokou letan in vin initil plis ki zanmen oparavan.”—Time, le 24 Zanvye, 2005.

“Departman Lanplwa Letazini i estimen ki pandan lannen 2005 omwen en kar dan tou etidyan ki konplet kat an liniversite pa pou trouv en travay ki koresponn avek zot degre.”—The Futurist, Zilyet/Out 2000.

Akoz tousala, pli ale plis ansennyan pe vreman dout valer ledikasyon avanse ozordi. Sa rapor dan zournal Futurist i dir ki “nou pe edik dimoun pour bann lobzektif ki pa apropriye.” Aprezan, konpar sa avek sa ki Labib i dir lo Bondye: “Mwan Zeova, mon ou Bondye, sa Enn ki pe ansenny ou pour ou prop byenfe, sa Enn ki pe fer ou mars dan sa semen ki ou devret marse. Si selman ou byen atantif anver mon bann komannman! Alor ou lape pou vin zis parey en larivyer e ou ladrwatir parey bann laroul dan lanmer.”—Izai 48:17, 18.

[Portre lo paz 28]

Zot ti met dekote zot aktivite personnel e swiv Zezi