Parol Zeova i vivan

Bann Pwen enteresan dan Liv Premye Kronik

APEPRE 77 lannen ti’n pase depi ki bann Zwif ti’n retourn dan zot pei natal sorti an legzil Babilonn. I ti fer 55 an depi ki Gouverner Zorobabel ti’n rekonstri tanp. Reetablir vre ladorasyon Zerizalenm ti rezon pli enportan pour bann Zwif retourn dan zot pei. Me sa pep ti’n perdi devouman pour ladorasyon Zeova. Zot ti vreman bezwen lankourazman, e sanmenm ki liv Labib Premye Kronik i ofer zot.

Apard ki mansyonn bann laliny desandans, Premye Kronik i kouver apepre 40 an. Sa i konmans depi lanmor Lerwa Sail ziska lanmor Lerwa David. I paret ki pret Ezra ki ti ekrir sa liv dan lannen 460 A.N.L. Premye Kronik i enteres nou akoz i donn en apersi lo ladorasyon ki ti deroule kot tanp e fourni detay lo laliny desandans Mesi. Lefe ki i form parti Parol enspire Bondye, son mesaz i fortifye nou lafwa e ogmant nou konprenezon lo Labib.—Ebre 4:12.

EN LALIS NON ENPORTAN

(1 Kronik 1:1–9:44)

Sa lalis laliny desandans byen detaye ki Ezra ti fer ti neseser pour omwen trwa rezon: pour fer sir ki zis bann zonm ki annan lotorizasyon ki servi konman pret, pour ede determin leritaz sak tribi, e pour prezerv rikord laliny desandans ki anmenn ziska Mesi. Sa laliny desandans dan Premye Kronik i tras listwar bann Zwif toudilon ziska sa premye zonm. I ti annan dis zenerasyon depi Adan ziska Noe, e en lot dis ziska Abraam. Ezra i mansyonn bann garson Yismael, bann garson Ketoura, konkibin Abraam, ek bann garson Ezai. Apre i konsantre lo laliny desandans sa 12 garson Izrael.—1 Kronik 2:1.

Ezra ti ekrir bokou lenformasyon lo bann desandans Zida akoz ti atraver zot ki Lerwa David ti sorti. Depi Abraam ziska David ti annan 14 zenerasyon, e ankor 14 ziska deportasyon Babilonn. (1 Kronik 1:27, 34; 2:1-15; 3:1-17; Matye 1:17) Apre sa, Ezra i mansyonn desandans bann tribi ki ti lo kote les Zourden, swivi par desandans bann garson Levi. (1 Kronik 5:1-24; 6:1) Epi Ezra ti fer en rezimen lo lezot tribi lo kote was Larivyer Zourden e koz an detay lo desandans Benzamen. (1 Kronik 8:1) I osi mansyonn non bann premye zabitan Zerizalenm ki ti sorti legzil Babilonn.—1 Kronik 9:1-16.

Larepons pour bann Kestyon lo Labib:

1:18—Lekel ki ti papa Sela—Kainann oubyen Arpakad? (Lik 3:35, 36) Arpakad ti papa Sela. (Zenez 10:24; 11:12) Sa mo “Kenan” dan Lik 3:36 i kapab en pti sanzman  lo sa mo “Kaldeen.” Si sa i leka, petet sa teks orizinal ti koumsa, “garson Arpakad, en Kaldeen.” Oubyen kekfwa sa non Kainann ek Arpakad i refer avek menm dimoun. Fodre fer resorti osi ki dan serten dokiman ki zot in retrouve sa lekspresyon “garson Kainann” pa aparet.—Lik 3:36, NW, not anba paz.

2:15—Eski David ti setyenm garson Zese? Non. Zese ti annan wit garson, e David ti pli zenn parmi. (1 Samyel 16:10, 11; 17:12) I paret ki en garson Zese ti mor san annan zanfan. Vi ki sa garson pa ti pou annan okenn lenfliyans lo rikord laliny desandans, Ezra pa ti met son non.

3:17—Akoz Sealtyel ki ti piti Yekonya i ganny apele garson Neri dan Lik 3:27? Yekonya ti papa Sealtyel. Me i paret ki Sealtyel ti marye avek fiy Neri. Lik i refer avek zann Neri konman garson Neri parey i ti apel Zozef garson Eli, menm si Eli ti papa Mari.—Lik 3:23.

3:17-19—Ki mannyer Zorobabel, Pedaya ek Sealtyel ti fanmiy avek kanmarad? Zorobabel ti en garson Pedaya, ki ti en frer Sealtyel. Me parler Labib i apel Zorobabel garson Sealtyel. (Matye 1:12; Lik 3:27) Sa i kapab akoz Pedaya ti mor e Sealtyel ti sonny Zorobabel. Oubyen petet Sealtyel ti mor san annan en zanfan, Pedaya ti marye avek son madanm, e Zorobabel ti premye ne dan sa linyon.—Deterononm 25:5-10.

5:1, 2—Ki sa ti vedir pour Zozef lefe i ti ganny drwa premye ne? I vedir ki Zozef ti ganny doub porsyon leritaz. (Deterononm 21:17) I ti alor vin papa de tribi, sa i Efraim ek Manase. Lezot garson Izrael ti vin papa zis en sel tribi.

Leson pour nou:

1:1–9:44. Sa bann laliny desandans i montre ki bann dimoun ki ti vreman egziste ki ti pratik vre ladorasyon. Alor vre ladorasyon i baze lo realite.

4:9, 10. Zeova ti reponn lapriyer Yabets pour ki son teritwar i vin pli gran dan en fason anpe pour ki i kapab akeyir plis dimoun ki ador Bondye. Nou osi nou bezwen fer lapriyer senser pour ki i annan plis adorater Bondye anmezir ki nou partisip avek devouman dan sa travay fer disip.

5:10, 18-22. Dan letan Lerwa Sail, bann tribi dan les Zourden ti defet bann Agrit menm si bann Agrit ti de fwa plis ki sa bann tribi. Sa i akoz bann zonm brav dan sa bann tribi ti met konfyans dan Zeova e zot ti rod son led. Annou met tou nou konfyans dan Zeova pandan ki nou kontiny nou lager spirityel kont nou bann lennmi ki bokou plis ki nou.—Efezyen 6:10-17.

9:26, 27. Bann Levit ki ti vey baro ti ganny en gro responsabilite. Zot ti ganny lakle pour larantre bann landrwa sen dan tanp. Zot ti montre ki lezot ti kapab depan lo zot pour ouver baro toulezour. Nou’n ganny konfye sa responsabilite pour rod dimoun dan nou teritwar e ed zot vin ador Zeova. Eski pa nou devret montre ki lezot i kapab kont lo nou e montre nou diny konfyans parey bann Levit ki ti vey baro?

 DAVID I VIN LERWA

(1 Kronik 10:1–29:30)

Sa resi i konmans avek ler Lerwa Sail ek son trwa garson ti mor dan lager kont bann Filisten lo montanny Gilboa. David, garson Zese, ti vin lerwa tribi Zida. Bann zonm sorti dan tou tribi ti vin Ebronn e fer li vin lerwa lo Izrael antye. (1 Kronik 11:1-3) En pe letan apre sa, David ti kaptir Zerizalenm. Plitar, bann Izraelit ti anmenn lars lalyans Zerizalenm e “zot ti pe kriye avek lazwa, soufle tronpet, fer sonnen senbal e zwe for bann lenstriman lakord ek larp.”—1 Kronik 15:28.

David ti eksprim en dezir pour fer en lakaz pour sa vre Bondye. Zeova ti rezerv sa privilez pour Salomon, me i ti fer en lalyans avek David pour en rwayonm. Anmezir ki David ti lager kont bann lennmi Izrael, Zeova ti fer li ranport bokou laviktwar. En resansman ki Zeova pa ti donn lord pour fer ti kout lavi 70,000 dimoun. Apre ki David ti resevwar lenstriksyon avek lanz pour fer en lotel pour Zeova, i ti aste en bout later avek Ornann, en Yebouzit. David ti konmans fer “en gran preparasyon” pour konstri en lakaz manifik pour Zeova dan sa landrwa. (1 Kronik 22:5) David ti organiz bann servis ki bann Levit ti fer e dan Premye Kronik sa i ganny dekrir pli byen ki dan okenn lezot landrwa dan Labib. Lerwa ek lepep ti fer en gro kontribisyon pour tanp. Apre ki i ti’n diriz pour 40 an, David ti mor byen aze, apre ki i ti’n rezwir larises ek laglwar; e son garson Salomon ti pran son plas.—1 Kronik 29:28.

Larepons pour bann Kestyon lo Labib:

11:11—Akoz sa verse i dir ti annan 300 ki ti ganny touye e pa 800 parey sa menm resi ki trouve dan 2 Samyel 23:8 i dir? Yasobeanm oubyen Yoseb-Basebet ti sef parmi sa trwa zonm pli for David. Sa de lezot ti Eleazar ek Sama. (2 Samyel 23:8-11) Rezon akoz i annan sa diferans dan sa de resi i kapab akoz zot refer avek de diferan aksyon ki’n ganny fer par sa bann menm dimoun.

11:20, 21—Ki ti pozisyon Abisai an rapor avek sa trwa zonm for David? Abisai pa ti parmi sa trwa zonm pli for ki ti servi David. Me parey 2 Samyel 23:18, 19 i dir, i ti sef sa 30 gerye e i ti pli enportan ki okenn antre zot. Abisai ti annan menm repitasyon avek sa trwa zonm for akoz i ti fer en keksoz en pe parey avek sa ki Yasobeanm ti fer.

12:8—Dan ki sans figir bann gerye Gadit ti parey “figir bann lyon”? Sa bann zonm for ti avek David dan dezer. Zot seve ti’n vin long. Sa ti fer zot annan en laparans bann lyon feros.

13:5—Lekel sa “larivyer Lezip”? Serten dimoun i krwar ki sa lekspresyon i refer avek en larivyer ki zwenn avek Larivyer Nil. Me sa lekspresyon i plizoumwen refer avek “vale toransyel Lezip.” Sa ti en vale ki ti servi konman frontyer sid was Later Promiz.—Nonm 34:2, 5; Zenez 15:18.

16:30—Ki sa lekspresyon “gro douler” akoz Zeova i vedir? Sa mo “douler” i ganny servi la dan en fason senbolik pour endik lakrent ek profon respe pour Zeova.

 16:1, 37-40; 21:29, 30; 22:19—Ki laranzman pep Izrael ti annan pour ador Zeova depi letan ki Lars ti ganny anmennen Zerizalenm ziska tanp ti ganny konstri? Ler David ti anmenn Lars Zerizalenm e met li dan en latant ki i ti fer, sa Lars pa ti’n dan tabernak pour bokou lannen. Apre sa deplasman, sa Lars ti reste dan sa latant Zerizalenm. Tabernak ti Gibeonn, kot Gran Pret Tsadok e son bann frer ti fer bann sakrifis parey Lalwa ti’n demande. Sa laranzman ti kontinyen ziska ki tanp Zerizalenm ti fini konplete. Ler tanp ti’n pare, tabernak ti ganny anmennen Zerizalenm sorti Gibeonn, e Lars ti ganny plase dan Tre Sen dan tanp.—1 Lerwa 8:4, 6.

Leson pour nou:

13:11. Olye ankoler e blanm Zeova ler nou pa reisi dan nou zefor, nou devret analiz nou sitiasyon e esey vwar kwa ki’n fer nou pa reisi. Sirman David ti fer sanmenm. I ti aprann atraver son fot e plitar i ti reisi anmenn Lars Zerizalenm par servi sa bon metod. *

14:10, 13-16; 22:17-19. Nou devret toultan koz avek Zeova dan lapriyer e rod son gidans avan nou fer okenn keksoz ki pou afekte nou spirityelman.

16:23-29. Ladorasyon Zeova i devret vin nou premye konsern dan lavi.

18:3. Zeova i sa enn ki akonpli son bann promes. Atraver David, Zeova ti akonpli son promes pour donn desandans Abraam pei Kanaan an antye, sorti “depi larivyer Lezip ziska gran larivyer, larivyer Efrat.”—Zenez 15:18; 1 Kronik 13:5.

21:13-15. Zeova ti donn lord sa lanz pour aret sa fleo akoz I ti vreman santi soufrans Son pep. Vreman, “son bann mizerikord i tre gran.” *

22:5, 9; 29:3-5, 14-16. Menm si Zeova pa ti donn David permisyon pour konstri tanp Zeova, David ti montre en leta lespri zenere. Akoz? Akoz i ti realize ki tou sa ki i ti’n gannyen ti gras a labonte Zeova. Sa menm santiman rekonesans i devret pous nou pour devlop en leta lespri zenere.

24:7-18. Sa laranzman 24 group pret ki David ti organize ti ankor egziste ler lanz Zeova ti aparet avek Zekarya, papa Zan Batis, pour anons nesans Zan. Lefe ki i ti en manm dan “group Abya,” sa letan ti tour Zekarya pour servi kot tanp. (Lik 1:5, 8, 9) Vre ladorasyon i relye avek bann dimoun ki’n vreman egziste dan listwar me pa avek bann dimoun ki’n ganny envante. I annan bokou byenfe ler nou fidelman korpere avek ‘lesklav fidel e pridan’ an rapor avek ladorasyon Zeova ozordi ki byen organize.—Matye 24:45.

Servi Zeova avek Lazwa

Dan premye Kronik napa zis bann laliny desandans. I osi rakont ler David ti anmenn lars lalyans Zerizalenm, i rakont son bann gran laviktwar, preparasyon pour konstri tanp e ler zot ti etablir bann group pret Levit. Tou sa ki Ezra ti rakonte dan Premye Kronik ti’n bezwen sirman benefisye bann Izraelit. Sa ti ed zot renouvle zot devouman pour ladorasyon Zeova kot tanp.

David i kit en bon legzanp par gard ladorasyon Zeova premye dan son lavi! Olye rod serten privilez spesyal pour li menm, David ti toultan fer zefor pour fer lavolonte Bondye. Nou ganny ankouraze pour aplik son konsey pour servi Zeova ‘avek tou nou leker e avek lazwa.’—1 Kronik 28:9.

[Not anba lo paz]

[Latab/Portre lo paz 8-11]

(Vwar prezantasyon dan piblikasyon)

Zenerasyon depi Adan ziska Noe (1,056 lannen)

4026 A.N.L. Adan

130 lannen ⇩

Set

105 ⇩

Enos

90 ⇩

Kenann

70 ⇩

Maalalel

65 ⇩

Yared

162 ⇩

Enok

65 ⇩

Metousela

187 ⇩

Lamek

182 ⇩

2970 A.N.L. NOE ti ne

Zenerasyon depi Noe ziska Abraam (952 lannen)

2970 A.N.L. Noe

502 lannen ⇩

Sem

100 ⇩

DELIZ 2370 A.N.L.

Arpaksad

35 ⇩

Sela

30 ⇩

Eber

34 ⇩

Peleg

30 ⇩

Reou

32 ⇩

Seroug

30 ⇩

Naor

29 ⇩

Tera

130 ⇩

2018 A.N.L. ABRAAM ti ne

Depi Abraam ziska David: 14 zenerasyon (911 lannen)

2018 A.N.L. Abraam

100 an

Izaak

60 ⇩

Zakob

88 ⇩

Zida

⇩

Perets

⇩

Etsronn

⇩

Ram

⇩

Aminadab

⇩

Nasonn

⇩

Salmonn

⇩

Boaz

⇩

Obed

⇩

Zese

⇩

1107 A.N.L. DAVID ti ne